Məmur, arxiv şəkli

Dəhlizlər, qadınlar, mesajlar, tələsənlər məmurlar…

855
(Yenilənib 23:09 14.02.2021)
"Jurnalistlərdən xahiş edirəm ki, məni siyasətə qatmasınlar". Maraqlıdır, deputat indiyə kimi siyasətlə məşğul deyilmişmi?!

3 dəhliz

Bu həftə Cənub Qaz Dəhlizinin Məşvərət Şurası dəhlizin tamamlanması ilə əlaqədar toplaşdı. Ötən ilin sonunda Dəhlizin sonuncu seqmentinin – TAP-ın işə düşməsi ilə layihə uğurla tamamlanmışdı. Bu qışdan etibarən italiyanlar, bolqarlar və yunanlar da Azərbaycan qazına qızınırlar.
Ötən ay “Dostluq” yatağının birgə işlənməsi ilə bağlı türkmənlərlə də razılaşmamız rəsmiləşdi və bu, eyni zamanda daha bir perspektivin - Orta Asiya qazının Avropaya nəqli imkanlarının genişlənməsi idi.  Hansı ki, bu yataq uzun müddət mübahisəli olaraq qalırdı.
Hər iki prosesin başa çatması Laçın dəhlizinin (ümumilikdə Qarabağın) azad olunması ilə sinxronluq təşkil edir. Qarabağ müharibəsinin başa çatması Azərbaycanla əməkdaşlığa marağı artıracaq, bütün bölgə üçün yeni imkanlar yaradacaq, hələ belə dəhlizlər çox olacaq. Gör, bir dəhliz nə qədər dəhlizləri bağlayırmış...

Hər 5 qadından biri

11 fevral ICESCO tərəfindən elan olunan “Qadınlar ili” çərçivəsində “Qadınlar və qızlar elmdə” Beynəlxalq Günü idi. ICESCO-nun 2021-ci ili  “Qadınlar ili” elan etməsi başadüşüləndir.

Dünyada hər 3 qadından biri şiddətə məruz qalır, hər 5 qadından biri təcavüzə uğrayır, ya da təcavüzdən son anda qurtulur. Mühacirlərin 80 faizini qadınlar təşkil edir. 280 milyonluq Ərəb dünyasında hər 2 qadından biri oxuma-yazma bilmir. Ümumilikdə dünyada oxuma-yazma bilməyənlərin 67 faizi qadınlardır. Hələ də 5 qadından biri, yəni 5 milyon 732 min qadın oxuma-yazma bacarmır.

Gürcüstanda 11 yaşlı azərbaycanlı qızın nişanlanması faktı həftənin ən müzakirə olunan məsələlərindən idi. Yəni Avropaya vizasız gedib-gəlmək, AB-nin, NATO-nun qapısının bir addımlığında dayanmaq hələ nəsə demək deyil...

Tanrı nə etsin?!

Məlum olduğu kimi, məğlubiyyətdən sonra Ermənistanda ara qarışıb, məzhəb itib. Paşinyanın reytinqi “dibə vurur”, ancaq ona müxalif olanlar da nəinki “eyni bezin qırağıdır”, daha pisdir. Xalq kimə “stavka” edəcəyini bilmir, ölkə sanki qayıdıb SSRİ-nin yeni süqut etdiyi illərə. Müxalifət lideri Manukyan deyib ki, "Ermənistanın 2023-cü ilə qədər var olub-olmayacağını yalnız Tanrı bilir." Ancaq xalqın taleyi Allahın ümidinə qalmayıb - əgər siyasi elita papağını qabağına qoyub rassional qərarlar qəbul etsə, Türkiyə və Azərbaycanla dialoqa gedər, regionda formalaşan yeni əməkdaşlıq platformasına qoşular və xilas olar.

Bu arada İrəvanda 4.7 bal gücündə zəlzələ baş verib. Tanrı daha nə etsin?! O, heç vaxt özü düşüb gəlmir, bəndəsinin, təbiətinin əliylə mesajlar göndərir...

PUA-lar da səmadan yaxınlaşırdı...

Bu siyasət ki var...

Bu həftə ən çox müzakirə olunan məsələlərdən biri də deputat Siyavuş Novruzovun açıqlamaları idi. Birincisi, o dedi ki, məlum toy cəriməsinə görə DİN-i məhkəməyə verəcək. Ki, karantin məhdudiyyəti deputatlara şamil olunmur, ancaq onu cərimələməklə yanaşı, el içrə biabır ediblər. Sonra bildirdi ki, pandemiya dövründə polisin xidmətlərini nəzərə alaraq bundan imtina edir. Sonra S.Novruzov belə açıqlama vermədiyini bildirdi və jurnalistləri təhrifdə günahlandırdı.

İkinci vacib açıqlama isə belə idi: “Jurnalistlərdən xahiş edirəm ki, məni siyasətə qatmasınlar”. Maraqlıdır, deputat indiyə kimi siyasətlə məşğul deyilmişmi?!  

Həftənin ən çox müzakirə olunan personalarından biri də keçmiş Nnəqliyyat naziri Ziya Məmmədov idi. O, "Rayonda arpa, buğda, yonca əkirəm. Mal-qaram var, dolanmaq lazımdır. İndiki dövrdə dolanmaq asan deyil" açıqlaması ilə gündəmə gəldi.

Məmur işi

Daha 4 qurum Azərbaycan İnvestisiya Holdinqinin idarəetməsinə verildi. Beləliklə, 8 qurumun idarəetməsi mərkəzləşdirildi. Xatırladaq ki, ilin yekunları ilə bağlı müşavirədə dövlət başçısı dövlət müəssisələrini, bu yaxınlarda müsahibəsində isə bir sıra dövlət qurumlarını rəhbərlərini sərt tənqid etmişdi.
Yeni yaradılmış holdinq ilk növbədə xərclərə nəzarət edəcək – yəni hər hansı bir layihənin qiymətini kim necə istəsə, müəyyən etməyəcək.

Belə getsə, ölkədə məmur işi cazibədarlığını itirəcək, valideynlər “oğlum prokuror, hakim, sonra da nazir olsun” deyə arzulamayacaq.

Tələsənlər...

Bu dəfə tələsənlər təndirə yox, protokola düşüblər. Paytaxtın Nizami rayonunda yerləşən restoranlardan birində karantin qaydalarını pozaraq təşkil olunan şənliyin görüntülərini araşdırna polisə məlum olub ki, ətriyyat şirkətlərindən birinin əməkdaşları toplaşaraq, “karantin rejiminin bitməsi bayramı” adı altında şənlik keçiriblər. Beləcə, 15 nəfər barəsində protokol tərtib edilib, 200 manat da cərimə öz yerində. İcarədara daha ağır sanksiya tətbiq olunub: 4000 manat.

Ümumiyyətlə, toyların, şənliklərin bərpa olunmasının vaxtı çatıb. Bu sahə ölkə iqtisadiyyatında öz dövriyyəsi ilə xüsusi çəkiyə malikdir, minlərlə, bəlkə də yüzminlərlə insanımızın dolanışığı toy biznesinə bağlıdır: şadlıq evləri, müğənnilər, musiqiçilər, şoumenlər, tamadalar, gəlin bəzəyənlər, xına satanlar, love story çəkənlər, gəlin paltarı, gəlin maşını icarəyə verənlər, qızıl mağazaları  - hamı o böyük günü səbirsizliklə gözləməkdədir...

Uzun, incə bir yol?

Xəbər saytlarının son həftədəki monitorinqini aparsaq, son 1 ildə koronavirusa ən az yer ayrıldığı həftənin məhz geridə qalan 7 gün olduğunu söyləyə bilərik. Bu. Xəstəliyin sona çatmasının müjdəçisidirmi?! Bir çox mütəxəssislər vaksinasiyanın “taclı bəla”nı tarixin arxivinə göndərəcəyinə ümid edir. Ancaq bədbinlər də var. Məsələn, Avropanın Xəstəliklərin Profilaktikası və Nəzarəti Mərkəzi virusun hələ uzun illər bəşəriyyəti narahat edəcəyini düşünür. Sitat: “Yoluxmanın zəifləməsi və vaksinasiyanın başlamasına baxmayaraq virus unsan orqanizminə çox yaxşı adaptasiya ola bilib. Ona gör də zamanla vaksinin tərkibi dəyişdirilməli olacaq”. Corc Meyson Unbiversitetinin professoru Ança Baranova isə hesab edir ki, yoluxmanın yeni dalğası yazda başlayacaq. “Temperatur sıfırıdan yuxarı qalxan kimi yoluxma artacaq. Peyvəndləmə isə virusun yoxluğunu təmin etmir. O sadəcə COVID-19-un yüngül və simptomsuz axınını təmin edir” - deyə Baranova söyləyib.

Bundan başqa, alimlər bütün dünyada koronavirusun psixoloji problemlər, xüsusən, depressiya hallarını artırdığını düşünür.

Hə, bu arada Yaponiyada intiharların artmasına görə Tənhalıq Nazirliyi yaradılıb.
Və dünən Ağcabədi Pedaqoji Kollecinin tələbəsi, kollecin TGT sədri həyatına qəsd edib.

855
Qız, arxiv şəkli

Narahat olmaq üçün ciddi səbəblərimiz var: hər 40 saniyənin hökmü bizi bitirir

73
İnsanlar bu hadisələr barədə məsuliyyətsiz və ikrah doğuran fikirlər bildirməkdən çəkinmədikcə, intihar hadisələri cəmiyyəti təhdid etməkdə davam edəcək

Təəssüf ki, ölkədə intiharların sayı artır. Az qala, hər gün sosial şəbəkələrdə, xəbər saytlarında intihar xəbərləri ilə rastlaşırıq. Narahat olmağımıza, əndişələnməyimizə ciddi səbəblər var. Manşetlərdən düşməyən intihar xəbərləri əsəblərimizi daha da gərginləşdirir, müharibədən yenicə çıxmış, pandemiya ilə savaşan cəmiyyətimizdə ruh düşkünlüyü, ümidsizlik yaradır.

Şəxsən mən qarşılaşdığım hər intihar xəbərindən sonra özümü daha gücsüz, aciz, çarəsiz, günahkar hiss edirəm. İntihar - mənim dostlarımı əlimdən almış, həyatımı alt-üst etmiş dəhşətli bir kabusdur. Bu barədə qorxusuz, həyəcansız düşünə bilmirəm. Çünki intihar qərarının necə dəhşətli bir çarəsizlik olduğunu bilirəm.

İntihara cəhd edib ölənlərin iztirabını ailəsi, doğmaları, yaxınları çəkirlər. İntihara cəhd edib sağ qalırsansa, özün bütün ömrünü əzabla keçirməyə məhkumsan. Hər iki halda itirirsən, birincidə həyatını, ikincidə etibarını, nüfuzunu və gələcəyini...

İntihara cəhddən sonra sağ qalırsansa, heç nə əvvəlki kimi olmur. Ailədə, cəmiyyətdə, dost çevrəsində özünə qarşı etibarsızlığı gördükcə hər gün dəfələrlə ölüb-dirilirsən...

Həyatımın son üç ilini intihar və intihara sövq edən səbəbləri araşdırıram. Bu barədə yüzlərlə mənbəyə müraciət etmişəm. Düşdüyüm vəziyyətdən çıxış yolunu məhz özüm tapmalı olduğumu düşünürəm. Az qala, hər gün bu barədə oxuyuram və araşdırıram. Bilirəm ki, bu problem məni həyatımın sonuna qədər narahat edəcək.

***

İntihar təkcə Azərbaycan cəmiyyətinin  yox, bütün dünyanın həll etməyə çalışdığı çox ciddi problemlərdəndir. Xüsusilə pandemiya dövründə bu problem daha da aktuallaşıb.

Dünya Psixiatriya Assosiasiyası XXI əsri “depressiya və intihar əsri” adlandırıb.

Ümumdünya Səhiyyə Təşkilatının araşdırmalarına görə, hər 40 saniyədə bir nəfər intihar edir. Olduqca qorxulu və təhlükəli statistikadır.

İctimailəşən intihar xəbərlərindən sonra qınaqlar, intihar əleyhinə fikirlər səslənir. Bəzən bir intihar hadisəsi günlərlə müzakirə olunur. Bəzən isə çox dəhşətli bir hadisənin üstündən sükutla keçirik. Ümumiyyətlə cəmiyyətin intihara münasibəti birmənalı deyil. Bu baxımdan sosial şəbəkələrdəki müzakirələrdən, intiharla bağlı polemikalardan yayınmağa çalışıram.

***

Bu günlərdə 20 yaşlı gəncin özünü binanın iyirminci mərtəbəsindən ataraq intihar etməsi, bu hadisə ətrafında başlayan müzakirələr məni yenidən bu barədə düşünməyə məcbur etdi. İntihar edən 20 yaşlı Sevil Atakişiyevanı intihar həddinə çatdırmaqda ailəsi ittiham olunur.

Təsəvvür edin, ailə öz mənasız təzyiqləri və təhdidləri ilə gənc qızın intiharına səbəb olur, onun yaşamaq haqqını əlindən alır, sonra tez-bazar hansısa bir kanala müsahibə verib ailəliklə özlərinə haqq qazandırmağa çalışırlar. Bu barədə sosial şəbəkələrdə yayılan faktlar, intihardan öncə Sevilin dostlarına, aktivistlərə yazdığı mesajlar, sosial şəbəkələrdəki paylaşımları çox mətləblərdən xəbər verir.

Hadisəni və faktları hüquq-mühafizə orqanları araşdırır, nəticələri qabaqlayıb bu hadisəyə görə sadəcə ailəni ittiham etmək fikirindən uzağam. Ancaq yayılan faktlara və müşahidələrimə əsaslanaraq ailənin bu intihar faktında günahsız olmadığını düşünürəm. Təəssüf ki, bəzən ailəmiz, yaxın çevrəmiz, dostlarımız, doğma adamımız bizi intihara sürükləyir.

Bəli, bəzi intiharların əsas səbəbi yaxınımızdakı adamların laqeydliyi və diqqətsizliyidir.

Pandemiyanın tüğyan etdiyi dönəmdə bütün dünyada intihar hadisələrinin əsas səbəbi sosial problemlər, bank kreditləri, borclar, iflas edən bizneslər, qazancsız və çarəsiz qalmaqdır. Düşdüyü vəziyyətin çıxılmazlığı insanları son çıxış yolu kimi gördüyü intihara sövq edir. Təəssüf ki, cəmiyyətimizdə intiharların əsas səbəblərindən biri də mental təzyiqlər və düzgün qurulmayan ailə münasibətləri, doğmaların laqeydliyidir. Sevilin intiharında bu faktor daha qabarıq və aydın görünür.

Düşünürəm ki, baş verən intihar hadisələrinə görə cəmiyyət, media, xüsusilə sosial media ciddi məsuliyyət daşımalıdır. İnsanlar bu hadisələr barədə məsuliyyətsiz və ikrah doğuran fikirlər bildirməkdən çəkinmədikcə, intihar hadisələri cəmiyyəti təhdid etməkdə davam edəcək. İntihar hadisələrinin bu qədər gündəmdə olması, intihar xəbərlərinin həvəslə paylaşılması, insanların laqeyd və biganə münasibəti çarəsiz vəziyyətdə olub intihar haqqında düşünənlərin düşüncələrini daha da qarışdırır. İntihar xəbərlərinin bu qədər həvəslə tirajlanması, insanların bu hadisələrə çox vaxt qeyri-obyektiv münasibəti, sosial şəbəkələrdəki müzakirələr intihar hadisələrini adiləşdirir, depressiv insanların intiharla bağlı düşüncələrini körükləyir.

Bəlkə də peşəkar jurnalistikada bu tip xəbərlərin tirajlanması normaldır, amma dəqiq bilirəm ki, bu xəbərlərin canfəşanlıqla təqdim edilməsi əxlaqi baxımdan anormaldır. Hər intihar xəbəri, intihar haqqında hazırlanan televiziya süjeti, intihar edən şəxsin ailəsindən hazırlanan reportaj növbəti intihar hadisəsi üçün qığılcım rolunu oynayır. Hər müzakirə, hər ədalətsiz yanaşma intihar haqqında düşünən insanları daha da təhrik edir. Həssas və depressiyaya meylli insan olaraq “depressiya və intihar əsri”ndə sağ qalmağın qəhrəmanlıq olduğunu düşünürəm.

Ən azından, mən bu “qəhrəmanlığı” etməyə çalışıram.

***

Cəmiyyət olaraq həssas, məsuliyyətli və diqqətli olmalıyıq.

Məlum məsələdir ki, intihar qərarı aydın şüurla verilən, sağlam qərar deyil. İntihar barədə düşünənləri qıcıqlandırmaqdansa, bu barədə daha həssas, anlayışlı müzakirələr aparılmalıdır. Xüsusilə dövlət məhz pandemiya və postmüharibə dövründə insanların düşdüyü depressiv vəziyyəti analiz edib, sağlam və ciddi qərarlar vermək məcburiyyətindədir.

Bəlkə də psixoloji reabilitasiya, psixoloq və psixiatr xidmətlərini pulsuz etməyin, vətəndaşları bu şəkildə qorumağın vaxtıdır.

İtirdiyimiz hər insan cəmiyyətimizin genofonduna zərbə, gələcəyimizə təhdiddir.

73
Dönər

Laçında türk dönəri, Bakıda “meyit” texnikalar, aristokrat vaksin alıcıları və...

73
(Yenilənib 01:21 22.02.2021)
Qarabağda meşələri doğrayan erməniyə elə gəlir ki, o, yalnız azərbaycanlıya zərər verir - əslində isə təbiət sirkulyativ olaraq işləyir, dünyanın bu küncündə kəsilən ağac o biri köşəsində də oksigeni azaltmış olur. Zəngilan isə Ermənistanın düz sərhəddidir.

Gülə bir də...

Gün gəlib, ağlayan ellər gülür bir də. Ötən həftə Azərbaycan Prezidenti Laçına – Güləbird kəndinə təsadüfən səfər etmədi. Bu, həm də Ermənistanda baş qaldırmış yeni separatizm, revanşizm meyllərinə mesaj idi. Mesaj açıq mətnlə də səsləndi.
Kənddə yeni qurulan SES 7000 nəfər əhalini enerji ilə təmin etməklə yanaşı, bölgədə aparılacaq yenidənqurmada əsas enerji mənbələrindən biri kimi çıxış edəcək. SES qurulduğu kənd – Güləbird bir çox özəllikləri ilə müasir Azərbaycan tarixinin vacib səhifəsinə çevrilib. Laçının ən böyük və “qocaman” kəndlərindən biri olan Güləbird 1992-ci ilin may ayında Laçının işğalından sonra 1993-cü ilin avqustunadək döyüşmüş kənddir. Eyni zamanda İkinci Qarabağ Müharibəsində Azərbaycan əsgərinin döyüşərək azad etdiyi sonuncu kənddir. Və nəhayət, işğaldan azad olunan rayonlarda Prezident İlham Əliyevin iştirakı ilə istifadəyə verilən ilk infrastruktur layihəsinin yerləşdiyi kənddir.

Azərbaycan Prezidenti İlham Əliyev işğaldan azad olunmuş torpaqlarda
© Official website of President of Azerbaijan Republic

100 il sonra

Türkiyə Cənubi Qafqaza bu ağırlıqda təxminən 100 il öncə gəlmişdi, erməni daşnaklarını və bolşevikləri qovub, Bakını azad etməkdə Azərbaycan Ordusuna yardım etmişdi. İndi Qarabağın azadlığına qovuşmasında türk əsgəri iştirak etməsə də, onun mövcudluğu, Ankaranın siyasi dəstəyi növbəti “qovma əməliyyatında” olduqca əhəmiyyətli idi.

Ötən həftə Ankarada iki ölkənin hökumətlərarası komissiyası 9-cu dəfə yığışdı və tərəflər arasında daha 11 sənəd imzalandı. Sənədlər iqtisadi sahələrlə yanaşı, müdafiə sahəsində əməkdaşlıq əlaqələrinin inkişaf etdirilməsini də özündə əks etdirir. Xüsusilə Qarabağın bərpa prosesinin başlanmasından sonra qardaş ölkənin iş adamlarının investisiya qoyuluşlarının artacağı gözləniləndir. Tikinti, infrastruktur layihələri öz yerində, Laçında, Şuşada türk dönəri ilk dəfə dadılacaq.

Sülh və “dəmir yumruq”

Ötən həftə ermənilərin yox etdiyi Zəngilanın məşhur çinar meşələrinin yerində yeni yaşıllığın salınmasına başlanıldı. Qarabağda meşələri doğrayan erməniyə elə gəlir ki, o, yalnız azərbaycanlıya zərər verir - əslində isə təbiət sirkulyativ olaraq işləyir, dünyanın bu küncündə kəsilən ağac o biri köşəsində də oksigeni azaltmış olur. Zəngilan isə Ermənistanın düz sərhəddidir.
Ermənistanda revanşistlər qan-qan deyir, amma kimə, nəyə arxayındırlar, aydın deyil. Biz isə sülh mesajları veririk, bütün bölgənin təhlükəsizliyi və əməkdaşlığı üçün yeni imkanlar yaradırıq.
Bu mesajlar dünyanın hər yerində səslənir. ABŞ-ın Filadelfiya şəhərində Türkiyənin bölgədə ermənilərin uzun müddətdir davam edən aqressiv aksiyalarına cavab olaraq nəhəng löhvədə belə bir çağırış yerləşdirilb: “Azərbaycanlılar və türklər ermənilərlə harmoniya içində yaşamağa hazırdırlar. Bəs ermənilər?” (Azerbaijanis and Turks are ready to live in harmony with Armenians. How about armenians?).

Ötən həftə Bakıda, “Ağ şəhər”in ərazisində vurulmuş və qənimət kimi götürülmüş erməni texnikalarının sərgiləndiyi parkda oldum. Biz sülh istədiyimiz üçün yenə də müharibəyə hazırıq. Bəs Ermənistan?! O parkdakı texnika meyitlərini İrəvandakı revanşistlərə göstərmək vacibatdır.

Amerika qayıtdı!

Geridə qalan həftənin ən mühüm hadisələrindən biri Münxen Təhlükəsizlik Konfransı və ABŞ prezidentinin buradakı çıxışı idi. C.Baydenin buradakı nitqi ABŞ siyasətinin konturlarını açmaq üçün vacib hesab olunurdu.

“Hamıya deyirəm: Amerika qayıtdı! Transatlantik İttifaq geri döndü və geri baxmayacağıq”, – supergücün rəhbərinin dilindən əsas mesaj belə səsləndi.

Ağ Evin Türkiyə ilə də soyumuş münasibətlərə istilik gətirməyə çalışacağı gözlənilir. Rusiya ilə əlaqələr barədə isə hələlik hökm tonunda danışmaq mümkün deyil. Ümid edək ki, Üçüncü Dünya Savaşı barədə proqnozlar, sadəcə, biz jurnalistlərin və bir neçə politoloqun əsassız ehtimallarıdır. Ümid edək ki, nəhənglər həqiqətən də rasional düşünürlər: “Ən yaxşı savaşçı döyüşmədən qalib gələndir”.

1/130 ədalət

Dünyanın 130-dan artıq ölkəsinin bir doza da olsun vaksin əldə edə bilmədiyi, zəngin ölkələrin aristokrat qalstuklarına, kostymlarına rəğmən, istehsal olunmuş ümumi vaksinlərin 90 faizini alması real ədalət(sizliy)in porteritini canlandırır.

Bu portretdə Ümumdünya Səhiyyə Təşkilatı da var, nəyi tənzimlədiyi aydın deyil. Ən prinsipial məsələ vaksinlərin bərabər bölgüsüdür və bu məsələdə ÜST, sadəcə, seyrçidir. Təşkilatın işi ancaq məsləhət verməkdir – məsələn, ötən həftə tövsiyə ediblər ki, koronavirusa yoluxub sağalan şəxslər də vaksinasiya olunmalıdır.

İlham Əliyev vaksin məsələsində görməmişlik edənləri qınadı>>

Görünür, ilahi ədalət pozulanda təbiətin mizanı da pozulur. “Nature Communications”ın araşdırmasına görə, dəniz səviyyəsində gedən artım 600 milyondan çox insanı yerindən uzaqlaşdıracaq, 300 milyon insanın isə yaşadığı ərazi 2050-ci ilə qədər hər il sel basqınına məruz qalacaq.
Bu arada dünyanın 10 ölkəsində koronavirusun “B 1525” adlandırılan yeni növü  aşkar edilib.

Kitab oğruları...
Fəvvarələr meydanında yerləşən kitab mağazası - “Əli və Nino” qarət edilib. Dələduzlar xeyli kitab oğrayıblar. Onlar Kafka, Kamyu, Dostoyevski, Tolstoy, Drayzerin əsərlərinə üstünlük veriblər. İnandınız?! Əlbəttə, inanmadınız.

“Əli və Nino” kitab mağazalarının və nəşriyyatlar şəbəkəsinin baş direktoru, sahibi Nigar Köçərli “Facebook” hesabında yazıb: “Üç nəfər içəri girib, onlardan biri suallar ilə satıcıların fikirlərini yayındırıb, digər ikisi isə personal otağına daxil olub və əməkdaşlarımıza məxsus pulları, telefon və digər əşyaları aparıb”.

Bax belə. Kitab mağazasından kitab oğurlanması, yəqin ki, hər birimizə, elə mağazanın sahibinə də xoş impuls ötürərdi, ancaq... Amma indi kitab kimin nəyinə lazımdır ki?!

Bakı-Sumqayıt işgəncəsi

Bakı-Sumqayıt şosesində üç avtomobil toqquşub. Yox, bu həftənin yaddaqalan hadisəsi-filan deyil. Sadəcə, bu həftə də davam edən problemin nəticəsidir. Bakı-Sumqayıt yolunun bir hissəsi yenidən təmir üçün bağlandığından yolun bir hissəsində hərəkət birtərəflidir. Nəticədə, bu yolda onsuz da insanların vaxtını oğurlayan tıxac indi daha məşəqqətli hal alıb. Bu vəziyyətdə qəzalar da qaçılmazdır. Tıxaclar məsələsinə qayıdaq, təxminən 1 il öncə bu yolda sıxılığın aradan qaldırılması üçün genişləndirilmə işlərinə başlanılmışdı. Pandemiya vaxtı hərəkətin intensivliyinin azalması “gözbağlayıcı” oldu, inandıq ki, sıxlıq azalıb. Ancaq bütün sahələrin bərpa olunmadığı bu günlərdə görürük ki, alternativ yollar və nəhəng körpü kompleksləri qurulmazsa, Xırdalandan Bakıya çatmaq az qala Salyandan Bakıya çatmaq qədər vaxt alacaq.

73
Teqlər:
Bakı-Sumqayıt yolu, kitablar, epidemiya, COVID-19, vaksin, Rusiya, ABŞ, Türkiyə, Qarabağ, dünya, Azərbaycan, həftənin icmalı
Yanğınsöndürənlər, arxiv şəkli

Evləri yanan köçkünlər harada qalacaqlar? "Qaçqınkom"dan açıqlama

0
(Yenilənib 01:00 25.02.2021)
Müvəqqəti məskunlaşma yerlərinə zərər dəymiş ailələr dövlət vəsaiti hesabına kirayə mənzillə təmin olunacaqlar.

BAKI, 25 fevral — Sputnik. Qaçqınların və Məcburi Köçkünlərin İşləri üzrə Dövlət Komitəsi Bakıda baş verən yanğınla bağlı açıqlama yayıb.

Sputnik Azərbaycan-a daxil olan məlumatda bildirilib ki, fevralın 24-də Bakı şəhəri, Yasamal rayonu, Tbilisi prospekti, 31/66 ünvanında yerləşən, keçmiş məcburi köçkünlərin müvəqqəti məskunlaşdığı yeddi mərtəbəli, 3 girişli inzibati binanın damında yanğın olub.

Fövqəladə Hallar Nazirliyinin yanğından mühafizə bölmələri tərəfindən yanğın söndürülüb: "Yanğın barədə məlumat daxil olduqdan dərhal sonra Qaçqınların və Məcburi Köçkünlərin İşləri üzrə Dövlət Komitəsinin nümayəndələri hadisə yerinə yollanıblar. İlkin araşdırma nəticəsində binanın damında yanar konstruksiyalardan primitiv qaydada inşa edilmiş 6 tikilinin əşyaları ilə birlikdə tamamilə yandığı müəyyən edilib. Yanğın nəticəsində ümumilikdə 17 mənzilə ziyan dəyib.

Ağdam rayonundan məcburi köçkün, 1986-cı il təvəllüdlü Vəliyev Tural Qabil oğlu yüngül yanıq xəsarətləri alıb.

Müvəqqəti məskunlaşma yerlərinə zərər dəymiş ailələr dövlət vəsaiti hesabına kirayə mənzillə təmin olunacaqlar. Az ziyan dəymiş 11 mənzil Dövlət Komitəsinin aidiyyəti şöbəsi tərəfindən təmir olunacaq. Həmin tikililərdə təmir-bərpa işlərinin aparılmasının və zərərçəkmiş ailələrin yenidən, müvəqqəti olaraq, burada yerləşdirilməsinin mümkünlüyü onların nəzərinə çatdırılıb.

Yanğın baş vermiş binada 277 ailə, yəni min nəfər müvəqqəti məskunlaşıb.

Digər yaşayış sahələri yanğından mühafizə olunub.

Yanğının başvermə səbəbləri Fövqəladə Hallar Nazirliyi tərəfindən araşdırılır, dəymiş ziyan müəyyənləşdirilir. FHN-nin araşdırmasından sonra yekun rəy veriləcək, onun əsasında müvafiq hüquqi addımlar atılacaq".

0