İnsan silueti, arxiv şəkli

Oğrunu itirən var, axtaran. Brejnevin vaxtı isə çoxdan gedib...

137
(Yenilənib 13:14 31.12.2020)
Gərək boynumuza alaq: xırda oğurluğun səviyyəsi Azərbaycanda kifayət qədər yüksəkdir. “Dövlətindir, deməli, heç kimin deyil” yanaşması bu gün özünü işıq, qaz, su oğurluğunda göstərir. İnsanlar bunun heç oğurluq olduğunu qəbul etmirlər

Ukraynanın Odessa vilayətində iki altı yaşlı qız əldəqayırma tələyə düşərək ciddi xəsarət alıb. İlkin məlumata görə, qızlar həyətdə oynayan zaman nədənsə anbara girməyə qərar veriblər. Qızlardan birinin atasının oğrulara qarşı hazırladığı tələ işə düşüb. Qızlardan biri ayağından, digəri isə qarnından zədələnib. Hər iki uşağın atası bu zaman evin içindəymiş. Məsələ ilə bağlı istintaq aparılır.

Xırda oğurluqla məşğul olan şəxslər sadə evləri, mənzilləri güdərlər

Oğru ilə hamı bacardığı yolla mübarizə aparır. Kimi bu cür tələ qurur, kimi nəzarət kamerası quraşdırır, kimi də hündürlüyü 4 metrə qədər olan hasar tikir. Bahalı evlərin və varlı insanların müdafiə sistemləri daha mükəmməl olur. Hər oğru da qiyməti 100 min dollarlarla ölçülən mənzilə girməz, çünki ələ keçəcəyindən çəkinər.

Saat, arxiv şəkli
© AP Photo / Kin Cheung

Ortabab insanın evində nə çox pulu, nə də qızılı olar, amma oğurluqdan əziyyət çəkən də elə özü olar. Xırda oğurluqla məşğul olan şəxslər sadə evləri, mənzilləri güdərlər. Birindən samovar aparar, digərindən velosiped oğurlayarlar. Xırda oğruları ən çox maraqlandıran sahibsiz qalan metal əşyalar, xüsusilə də tərkibində əlvan metallar olan əşyalardır. Mis, alüminium, sink, tunc və digər metallar həmişə onların diqqətindədir.

Xırda oğurluq və ziyanvericilik adi insanlara çox problem törədir. Deyək, həyətdə bir köhnə soyuducu var, anbarda durub. Hər gün istifadə edilmir, amma yayda, meyvə mövsümündə işə yarayır. Ya da qonaqlıq zamanı bir qədər artıq qalan məhsulları orada yerləşdirmək olur. Ev sahibi olmadığı müddətdə bu metal axtaranlar həyətə girib soyuducunun arxasındakı mis məftilləri kəsib aparırlar. İmkan olsa, hətta soyuducunun mühərrikini də götürərlər. O da pula gedər. Beləliklə, aparılan mallara görə 10-15 manat gəlir əldə edərlər. Amma ev yiyəsi xeyli ziyana düşər.

Mühərrik haradasa 50 manata, mis borular 20-25 manata başa gələcək. Üstəlik, freon boşaldığından onu yenidən doldurmaq lazımdır, usta xərci da haradasa 25 manat edəcək. Yəni 15 manata təhvil verilən metala görə kimsə 150 manat ziyana düşəcək. Bəzən köhnə soyuducuya görə 150 manat ödəmək istəməyənlərin daha bir problemi yaranır. Axı yararsız bir əşyaya çevrilmiş soyuducunu hələ həyətdən rədd eləməlisən. Bu da bir işdir. Heç nəyə yaramır.

Yeni velosipedə imkan yoxdur, polis əminin isə əlindən bir iş gəlmir 

Xırda oğurluqla gününü yola verənlərin bir çoxu həyatın dibinə yuvarlanmış insanlardır. Dolanışığı və yaşayış yeri olmayan, əyyaşlıq və narkomanlıq edənlərin günü xırda oğurluqda keçir. Bunları anlamaq üçün alim olmağa ehtiyac belə yoxdur, hər gün televizorda kiçik oğurluq üstündə həbs edilən onlarla insanı görürük. Bir dəfə tutulmur, iki dəfə tutulmur, üçüncü dəfə mütləq ələ keçir belələri.

Rusiyada xırda oğurluq edən əyyaşlara qarşı bəzən ekstremal yola əl atan da olur. Belə bir hal olmuşdu, bağ evində ortalıqda duran araq şüşəsinə zəhər qatan bir nəfəri hüquq-mühafizə orqanları məsuliyyətə cəlb etmişdi, çünki qanun hətta oğruya münasibətdə humanist yanaşma tələb edir. Evə oğurluğa gələn şəxs araqdan içib zəhərlənmişdi, bunu isə etmək olmaz.

Xırda oğrular həm də cəmiyyətə psixoloji zərbə vururlar. Birtəhər pul toplayıb uşağa bir velosiped alırsan. Hətta ən ucuz ortabab uşaq velosipedi 100 manatdır. Uşaq sürür, sonra binanın aşağısındakı zirzəmidə gizlədirsən. Günlərin bir günü velosipedi oğurlayırlar. Yəni həm kilidi qırıblar, həm də velosipedi aparıblar. Hadisə yerinə gələn polis də çiynini çəkir - kiçik oğurluqdur da... Hətta şikayət ərizəsi yazan şəxsə məlumat xarakterli ərizə yazmağı təklif edir, çünki əks halda, polis idarəsinə gəlib-getməli olacaq. Bir çoxu da razılaşır. Həm polis razı qalır, çünki üstü açılmamış cinayəti olmur üstündə, həm də şikayətçi. Düşünür, polisə gedib-gəlməkdənsə, elə oğurluq velosipedi unutsan, yaxşıdır. Amma velosipedi oğurlanmış uşaq psixoloji travma alır, bilmir nə etsin, yeni velosipedə imkan yoxdur, polis əminin isə əlindən bir iş gəlmir. 

Ənənə itir, yəni “ayıbdır”, “oğurluq etmək günahdır” kimi anlayışlar aşılanır

Gərək boynumuza alaq: xırda oğurluğun səviyyəsi Azərbaycanda kifayət qədər yüksəkdir. Bu özü olduqca qəribə görünür. Arazın o tayında yaşayan həmvətənlərimiz nədənsə özünə məxsus olmayan heç nəyi götürməzlər. Bir çantanı unudub küçədə qoyub getsən, bir neçə saat sonra onu elə həmin yerdə taparsan. Küçədə kimsə nəyisə unutsa, uzaqbaşı bu əşyanı polisə verərlər. Bizdə isə kameranın işlədiyi marketdə unutduğumuz əşyanı kimsə götürüb aparır.

Köhnə kişilər hələ ötən əsrin ortalarında eyni vəziyyətin elə Bakıda da müşahidə olunduğunu deyirlər. Yəni 1960-cı illərdə mərkəzi “Passaj” bazarında alış-veriş edəndən sonra əlindəki paketləri heç kimə tapşırmadan bir küncə qoya bilərdin, heç kəs dəyməzdi. Ayıb sayılardı.

İşığın tarifləri gecə və gündüzə görə dəyişəcək - bəs oğurluq necə olacaq?!>>

Bu gün isə məişət oğurluğu dayanmadan artır. Bunun kökündə bir çox səbəb dayanır. Bir tərəfdən ənənə itir, yəni “ayıbdır”, “oğurluq etmək günahdır”, “böyük-kiçik var, görən olar” kimi anlayışlar aşılanır. Təlim-tərbiyə sistemi fərli işləmir deyə “harada əlinə nə keçdisə, qapazla” prinsipi irəli çəkilir. “Halal nədir, haram nədir” anlayışlarını gərək uşaqlıqdan təbliğ edəsən, yoxsa sonra gec olacaq. Qonşu İranda elə islam mədəniyyəti yerində durub deyə heç kimin başqasının toyuq-cücəsinə, ya da uşağının velosipedinə gözü düşmür. Həm də cəzası ağırdır, bir dəfə keçərlər, iki dəfə keçərlər, üçüncü dəfə əli kəsərlər. Müasir dövrdə bu cəza az-az tətbiq edilir, amma oğurluqdan əl çəkməyənin əlini kəsə bilərlər.

Xırda oğurluğun kökündə hələ Brejnev dövründən formalaşmış pis vərdişlər durur

Dünyanın bir çox ölkəsində əl kəsmək cəzası olmasa da, xırım-xırda oğurluq etmək ənənəsi yoxdur. Məsələn, Hollandiyada velosiped oğurluğu heç mümkün deyil, hər tərəf başdan-ayağa velosipeddir, lazımdırsa, sür, sonra gətirib yerinə qoya bilərsən. Alman da oğurluq etməz, xüsusilə də xırda oğurluq. Bəlkə, vergidən yayınar, amma qonşunun qapısına qoyulmuş qəzeti aparmaz, ya da başqa əşyanı.

Azərbaycandakı xırda oğurluğun kökündə həm də hələ Brejnev dövründən formalaşmış pis vərdişlər durur. Yəni sovet imperiyasının son dövründə insanlarda belə bir fikir formalaşmışdı: kimdənsə oğurlamaq günah işdir, amma dövlətdən oğurlamaq olar, çünki dövlətindirsə, deməli, heç kimindir, daha doğrusu, hamıya məxsusdur. Zavodda işləyən fəhlə evinə gedərkən kiçik bir əşya aparmağı qənimət bilirdi. Bir aləti, dəmir parçasını, fəhlə geyimini daşımaq olardı.

Haşiyə: O dövrlə bağlı eşitdiyim bir əhvalat həmin dövrün ab-havasını əks etdirir. Bakıda tikintidə çalışan bir erməni usta hər gün evə gedərkən özü ilə bir kərpic apararmış. Bu apardığı kərpiclə hətta özünə bir ev də ucaltmağa başlayır. Bunu görən azərbaycanlı rəis deyir, a kişi, bu nə kərpic daşımaqdır, əgər ehtiyacın varsa, gəl, sənə bir maşın kərpic verim, evini tik. Usta deyir, yox, elə yaramaz, mənə hər gün evə apardığım bu kərpic daha şirindir. Belə münasibət o dövr üçün çox normal sayılırdı.

A kişilər, belə olmaz, nə dövlətdən, nə başqa insandan nəyisə oğurlamaq olmaz

“Dövlətindir, deməli, heç kimin deyil” yanaşması bu gün özünü işıq, qaz, su oğurluğunda göstərir. İnsanlar bunun heç oğurluq olduğunu qəbul etmirlər. Xətlərə qoşulub havayı istifadə edirlər. Hətta ölkədə bu işə görə cinayət məsuliyyəti olsa da, hələlik heç kimə iş kəsilməyib. Bəzən süjetləri televiziyada da izləyirik, guya kimsə su xəttinə özbaşına qoşulub və bu xətləri kəsirlər. Əslində, həm su idarəsinin xəbəri var, həm də bu işə qol qoyanın. Su havayıdır, dövlətindir, deməli, oğurlamaq olar.

Vaxtilə zavod, fabrik və digər yerlərdən nəsə daşıyanlardan artıq yeni nəsil törəyib, onlar da imkan daxilində əllərinə keçəni oğurlayırlar. Bir deyən yoxdur, a kişilər, belə olmaz, nə dövlətdən, nə başqa insandan nəyisə oğurlamaq olmaz, bu haramdır, buna görə adama iş də kəsilə bilər, o dünyada da cəhənnəm əzabı gözləyir. Hətta gedib bazarda günəmuzd işləyən birisini gətirirsən, iş verirsən, yedirib-içirirsən, sonra baxırsan, gedəndə çəkicini, belini götürüb aparıb. Bir müddət sonra həyətini də başqa oğrulara tanıtdırıb. Hər şeyi daşıyıb aparıblar.

Əslində bu gün həm təlim-tərbiyə sistemində, həm insanların şüurunda bir ciddi dəyişikliyə ehtiyac var. Həm bu barədə danışmalıyıq, həm yeni nəsli başqa ruhda tərbiyə etməliyik, həm də bu bəlanın qarşısını almaq üçün nəsə tədbirlər görməliyik. Xırda oğurluqdur deyə polis bunu ciddiyə almır. Amma əlvan metal hara təhvil verilir? Əlbəttə, qəbul məntəqəsinə. Deməli, bu istiqamətdə işləmək lazımdır. Kimsə əyyaşlıq səbəbindən qonşusunun məftilini kəsib aparırsa, deməli, bu bəlanın müalicəsi üçün səhiyyə ocaqları yaratmalıyıq. Axı, polis həbs etdiyi narkoman və ya əyyaşı aylarla şöbədə saxlaya bilməz, ya harasa yönləndirməlidir, ya cinayət işi qaldırmalıdır. Bu insanları cəzalandırmaqdansa, ilk növbədə müalicəyə yönləndirmək lazımdır. Oğurluğu yaradan sosial səbəbləri aradan qaldırmaq, xəstəliyi olan insanları isə müalicə etmək lazımdır.

Kompleks tədbirlər olmasa, elə xırda oğurluq, kiçik hüquq pozuntularının bataqlığında itib-batacağıq.

137

Soyuq Moskva, isti Şuşa “Puşkin” restoranı

26
Belə hadisələri eşitdikcə əmin olursan ki, dünya koronvirusdan daha artıq faciəyə də layiq görülə bilər.

Onlar üçün soyuq Moskva

Ermənistanın kapitulyasiyasından sonra ilk dəfə Azərbaycan və Ermənistan prezidentlərinin görüşü baş tutdu. Moskvada keçirilən görüş bölgənin kommunikasiya xətlərinin bərpasını özündə ehtiva edən sənədin imzalanması ilə yadda qaldı. Ancaq yadda qalan daha bir neçə detal var idi – Rusiya prezidentinin qalib liderlə daha səmimi qucaqlaşması, Paşinyanın içindən heç nə çıxarmadığı, ancaq yanında saxladığı və bir dəfə qurdaladığı çantası, bədən dilindəki gərginliyi, “status” məsələsini yenidən qabartması, amma ona heç kimin əhəmiyyət verməməsi...

İsti Şuşa

İlham Əliyev Şuşada
© Official website of President of Azerbaijan Republic

Ötən həftənin ən yaddaqalan hadisələrindən biri Ali Baş Komandan İlham Əliyevin Şuşaya səfəri idi.

Ermənilər Şuşanın işğalına “Dağlarda toy” adı vermişdilər. 28 il sonra Azərbaycan əsgəri qəsbkara elə toy tutdu ki, yəqin ki, əsrlər boyu unudulmayacaq.

Qalib sərkərdə “dəmir yumruğu” Ermənistanda revanş arzusuna düşənlərə bir daha xatırlatdı.

Şuşa səfəri hər kəsə Anna Hakopyanın Mehriban xanımı Şuşaya muğama dəvət etməsini də xatırlatdı. “Əgər muğam adı altında onlar müharibə istəyirlərsə, onda bu arzu elə arzu olaraq da qalacaq. Əgər müharibə başlasa, onda muğama qulaq asmaq istədikləri yerlərin sayı da artacaq…” deyən Anna və qızları “Köhnə Yeni il”i Moskvadakı “Puşkin” restoranında qeyd etdilər. Həmin vaxt Mehriban Əliyeva qalib sərkərdə ilə Şuşada Cıdır düzündə çay süfrəsində əyləşmişdi.

Peyvəndləmə və açılma

Dünya vaksinləmə dövrünü yaşayır. Azərbaycan da iki milyon əhali üçün dörd milyon dozada vaksin sifariş edib.

Karantinimizi də bir qədər yumşaltdıq. İctimai iaşə obyektləri, eləcə də restoran, kafe və çay evləri və bu kimi digər məkanlarda yerində xidmətlər bərpa olunmasını xüsusi emosiya ilə qarşılayırıq.

Dünyanın normal həyata qayıdacağına ümidləndiyimiz bu həftə də bəzi maraqlı, amma həm də narahatlıq yaradan açıqlamalar var. Məsələn, ABŞ-ın dövlət katibi Mayk Pompeo koronavirusun Çinin dövlət laboratoriyalarından çıxmasını iddia edib. Peru məhkəməsi isə “Microsoft” şirkətinin qurucusu Bill Qeytsi, amerikalı iş adamı Corc Sorosu və Rokfeller ailəsini koronavirus istehsalında günahlandırıb.

ABŞ alimləri isə növbəti on il üçün koronovirusla bağlı proqnoz tərtib ediblər. Onların fikrincə, SARS-CoV-2 pandemiyası tezliklə endemik dərəcəyədək azalacaq, ancaq virus insanlar arasında baza səviyyəsində daimi olaraq yaşayacaq.

Beləliklə, ola bilsin ki, bu vaxtadək adi tərzdə dediyimiz, eşitdiyimiz “bir az qripləmişəm” ifadəsi kimi “bir az koronaviruslamışam” da qulağa tezliklə sıradan gələ bilər.

İnformasiya savaşı

Müharibə bitdi, amma həm də davam edir. İnformasiya savaşı heç vaxt bitməyəcək. İrəvandakı revanşist əhval-ruhiyyə də, Qarabağa edilən qanunsuz səfərlər də belə deməyə əsas yaradır. Odur ki, informasiya mənbələrimiz də yeni savaşa hazır olmalıdır. Bu həftə imzalanan “Azərbaycan Respublikasında media sahəsində islahatların dərinləşdirilməsi haqqında” Fərman da, Medianın İnkişafı Agentliyinin yaradılması da, görünür, yeni dövrə hazırlığın tərkib hissəsidir.

Türkiyənin Xarici İşlər naziri Mövlud Çavuşoğlu
© Fatih Aktas / Turkish Foreign Ministry via AP, Pool

Bu həftə KİVDF də tarixin arxivinə qovuşdu, rəhbəri Vüqar Səfərlinin taleyi isə qaranlıq görünür - yol verdiyi yeyintilərə görə onu dəmir barmaqlıqlar arasına aparıblar.

ABŞ deqradasiyası?

Prezident Trampı dəstəkləyən bəzi qruplar demokrat Co Baydenin andiçmə mərasiminin keçiriləcəyi yanvarın 20-də 50 ştatda silahlı nümayiş keçirəcəyini elan ediblər. ABŞ Ordusu isə Vaşinqtona göndərdiyi 8500 nəfərlik Milli Qvardiya personalının sayını əvvəlcə 21000-ə, daha sonra 25000-ə çatdıracağını açıqlayıb.

Nəhəng, xarizmatik Amerika 90-cı illərin bəzi sovet ölkələrini xatırladır. Amma əslində ABŞ-da baş verənlər bütün dünyanı qayğılandırmalıdır: bu ölkədə baş verən istənilən hadisə qlobal təsirə malikdir. Ümid edək ki, bu olanlardan sonra, məsələn, neftin qiymətində kəskin ucuzlaşma baş verməyəcək.

Alman və bizim bərbərlər

O qədər əhəmiyyətli olmasa da, ölkəmizdə bərbərxanaların yanvarın 25-dən açılması da nəzərdə tutulub (müəllifin saç düzümü onun bu qərara münasibətini müəyyən edir).

Bu arada futbolçuların saç düzümünə görə alman bərbərlər ayağa qalxıblar. Mərkəzi Bərbərlik Dərnəyindən Futbol Assosiasiyasının prezidentinə ünvanlanan məktubda pandemiya səbəbiylə təxminən 80 000 salonun bağlı olmasına baxmayaraq, idmançıların meydana yalnız xüsusi avadanlıqların köməyi ilə peşəkar bərbərlər tərəfindən düzəldilməsi mümkün olan saç düzümləri ilə çıxdığı bildirilir.

Deməli, nizam-intizamı ilə nümunə göstərilən almanlar da arxa qapıdan tanış bərbərin yanına gəlib, tellərinə əl gəzdirirlərmiş?!

Dünyanı yandırmaq

Bu həftə dünyada ilk dəfə qorillalarda koronavirusa yoluxma qeydə alındı. ABŞ-ın San-Dieqo şəhərində zooparkda səkkiz heyvanda virus aşkarlandı. Bundan əvvəl isə Danimarkada su samurlarında koronavirus müəyyən edilmişdi və hökumət 17 milyon su samurunun məhv edilməsi barədə qərar vermişdi. Ancaq qətl qeyri-humanist üsulla həyata keçirilmişdi. Belə ki, heyvanların çoxu qaz kamerasında sağ qaldığından diri-diri yandırılmışdı.

Belə hadisələri eşitdikcə əmin olursan ki, dünya koronvirusdan daha artıq faciəyə də layiq görülə bilər.

Hə, bu arada Çində koronavirusa yoluxanların sayı artıb, xəstəxanalar bərpa olunub.

26
Redaktorun iş masası, arxiv şəkli

İslahatlar dalğası mediamıza çatdı: bizi gözləyir?

56
(Yenilənib 09:44 16.01.2021)
"Cidanı çuvalda gizlətmək" mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyd, jurnalistikadan xəbərsiz bir məmurun rəhbərlik etdiyi AR Prezidenti yanında KİVDF-nin qanunsuz əməlləri də gizli qalmadı.

Nəhayət ki, media sahəsindəki boşluqlar dövlətin diqqətini çəkdi.

Şəxsən mən dəfələrlə bu mövzuda yazsam da, səsimi lazımı şəxslərə eşitdirə bilmirdim.

Çünki, səsimizi eşitməli və eşitdirməli olan kəslər, səsimizi batırmaq üçün çabalayırdılar.

Bəli, mediamızın “başbilənləri” problemdən, haqsızlıqdan, qanun pozuntularından danışan şəxsləri ciddiyə almırdı, imkan olduqca səsimizi batırırdılar.

Onlar ancaq öz ətraflarındakı şəxsləri dinləyir, onlara “ləbbeyk” deyənlərin yolunu açırdılar.

Mediamızın vəziyyəti barədə uzun-uzadı yazmağa ehtiyac görmürəm, aidiyyatı olan hər kəs, hər şeyi bilir.

İllərdir baş alıb gedən ədalətsizliklər, mənimsəmələr, korrupsiya və israf nəhayət ki, dövlətin diqqətini çəkdi.

“Cidanı çuvalda gizlətmək” mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyid, jurnalistikadan xəbərsiz bir məmurun rəhbərlik etdiyi Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun qanunsuz əməlləri də gizli qalmadı. İslahatlar dalğası mediamıza da gəlib çatdı.

***

Ölkə prezidenti “Azərbaycan Respublikasında media sahəsində islahatların dərinləşdirilməsi haqqında” fərman imzalayıb. Fərmana əsasən, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu ləğv edilib və onun bazası əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılıb.

Mediamıza, jurnalistlərimizə, zəhmətkeşlərimizə xeyirli, uğurlu olsun.

Baş verəcək hadisələri qabaqlamaq istəməzdim, ancaq dünən efirlərin birində illərdir media sahəsində hər cür qanun pozuntusu, korrupsiya ilə məşğul olmuş “başbilənlərdən” birinin ölkə prezideninin yeni fərmanını şərh etdiyini görəndə dalağım sancdı.

Nədənsə mənə elə gəlir ki, rüşvətə, korrupsiyaya, KİVDF-nin maxinasiyalarına bulaşmış insanlar bu sahədən uzaqlaşmadıqca, mediamız rahat nəfəs ala bilməyəcək.

İllərdir mətbuatın nəfəsini kəsən bu adamların indi islahatları dəstəkləməsi, yeni yaranan quruma təsir imkanları, ağız dolusu ədalətdən danışması məni çox narahat edir.

***

Düşünürəm ki, “Kütləvi İnformasiya Vasitələri haqqında” qanuna ediləcək dəyişikliklər ictimaiyyətin geniş müzakirəsinə çıxarılmalıdır.

Bu günə qədər edilən dəyişikliklər qənaətbəxş olmadığı üçün, bundan sonrakı proseslərdə ictimai fikir nəzərə alınmalıdır.

İndi diqqət daha çox KİV-nin qeydiyyatı məsələsinə çəkilir, jurnalistikaya aidiyyatı olmayan şəxslərin bu sahədə olmasından narahatlıq bildirir. Halbuki, mətbuatımızın yüzlərlə həll olunması vacib, aktual problemləri var.

Sosial şəbəkələrin, vətəndaş jurnalistikasının, blogerliyin geniş yayıldığı cəmiyyətdə, medianın inkişaf perispektivləri müasir texnologiyalardan kənarda müzakirə olunmamalıdır.

Qanunvericilikdə ediləcək dəyişikliklər medianın reklam bazarının formalaşmasına geniş dəstəyi də nəzərdə tutulmalı, mətbuata mümkün azadlıqlar verilməlidir.

Heç bir funksionallığı olmayan qəzetlərə dövlətin maddi dəstəyi dayandırılmalıdır.

Azad fikrə, azad sözə şərait yaradılmalı, ölkədə ciddi, dövlətçilik maraqlarını düşünən müxalif mətbuatın formalaşmasına imkan verilməlidir.

Şəxsən mən media sahəsindəki islahatların müsbət nəticələrini tezliklə görmək istəyirəm.

56
Hövsanda çirkli ərazi

Xəzərə tullantıların atılması azalıb

0
"ETSN sadəcə tullantıların idarəedilməsinə nəzarət edir, amma bələdiyyələr həmin tullantıların yığılmasını və atılmasını təmin etməlidirlər".

BAKI, 19 yanvar — Sputnik. Xəzər dənizinə tullantı sularının axıdılması halları xeyli azalıb.

Sputnik Azərbaycan xəbər verir ki, bu barədə Ekologiya və Təbii Sərvətlər Nazirliyinin Ekoloji Siyasət şöbəsinin müdiri Rasim Səttarzadə "Ekspert saatı" proqramında bildirib.

Onun sözlərinə görə, ötən dövr ərzində həm Xəzərə axıdılan tullantı sularının həcmi, həm də axarların sayı azalıb: "Lakin təkcə Abşeron yarımadasından Xəzərə gün ərzində 1 milyon kub metr su axıdılır. Bunun qarşısının alınması üçün tədbirlər görülür".

O qeyd edib ki, Bakı şəhərində tullantıların idarəedilməsi ilə bağlı əksər problemlər həll edilib. Belə ki, regionlarda bu problem hələ qalmaqda davam edir. O, bu problemin həlli üçün strategiya təsdiqləndiyini də nəzərə çatdırıb: "ETSN sadəcə tullantıların idarəedilməsinə nəzarət edir, amma bələdiyyələr həmin tullantıların yığılmasını və atılmasını təmin etməlidirlər".

0