Distant təhsil, arxiv şəkli

Laqeydlər fədakarlar: Təhsilimiz sınaq qarşısında

138
(Yenilənib 22:33 03.11.2020)
Ölkəmizdə mart ayında tədris prosesi dayandırıldıqdan sonra Təhsil Nazirliyi “Tele dərs”, “Virtual məktəb” layihələrinə başladı. Təəssüf ki, bu layihələrin icrasını indiki halda uğurlu hesab etmək olmaz.

İlin əvvəlindən həyatımıza daxil olan, bütün reallıqları dəyişib alt-üst edən COVID-19 pandemiyası bütün dünyada ənənəvi şəraitdən tamamilə fərqlənın, alışmadığımız situasiya yaratdı. Sosial-iqtisadi prioritetlərin yenidən gözdən keçirilməsi qaçılmaz oldu. Dünya, bu bəladan qurtulmaq üçün olduca çevik qərarlar vermək məcburiyyətində qaldı. Ölkələr bu situasiyadan daha az itkilərlə çıxmaq üçün xüsusi strategiyalar müəyyənləşdirdi. Ölkəmiz də bu savaşın bir parçasıdır. Müəyyən səhvlər, yanlış addımlar, düzgün hesablanmamış qərarlar olsa da, bu savaşda ölkə olaraq strategiyamız vətəndaşlarımızı qorudu, yoluxmanın kütləvi hal almasının qarşısı demək olar ki, alındı.

Distant təhsil, arxiv şəkli
© REUTERS / VASILY FEDOSENKO

Pandemiya ilə savaşdığımız müddətdə dövlətin səhiyyə sahəsində, sosial-iqtisadi məsələlərlə bağlı atdığı addımlar əhalinin panikaya düşməsinin, pandemiyanın daha ağır təsirlərinin yaranmasının qarşısını ala bildi.

Çox təəssüf ki, pandemiya dönəmində təhsil sistemimizə ağır zərbə dəydi. Pandemiyanın ilkin mərhələsində ümumiyyətlə təhsil sistemimiz pandemiyaya qarşı savaşda məğlub görünürdü. Aydın məsələdir ki, ilk dəfə qarşılaşdığımız bu bəlaya qarşı necə mübarizə aparmaqla bağlı kifayət qədər təcrübəmiz yox idi. Zaman keçdikcə bu bəlayla savaşmaqda yeni təcrübələr, yeni uğurlar əldə edildi. Dünyada həm təhsil, həm yaşam standartları ilə bağlı yeni vəziyyətə adaptasiya prosesi sürətləndi.

Ölkəmizdə mart ayında tədris prosesi dayandırıldıqdan sonra Təhsil Nazirliyi “Tele dərs”, “Virtual məktəb” layihələrinə başladı. Təəssüf ki, bu layihələrin icrasını indiki halda uğurlu hesab etmək olmaz.

Bu məqamda həm müəllimlərin, həm də valideyinlərin üzərinə böyük məsuliyyət düşürdü. Təəssüf ki, əksər müəllimlər distant təhsilə laqeyd yanaşdığı kimi, valideyinlər də bu prosesi ciddiyə almadı və yaxud adekvat reaksiya verə bilmədi.

İnternetdən və elektron resurslardan istifadədə təcrübəsizlik, internetin sürəti, ucqar kəndlərdə internetin keyfiyyəti ilə bağlı problem, müəllimlərin bir qisminin bu prosesə barmaqarası baxmağı, validyinlərin təcrübəsilikdən və ya məsuliyyətsizlikdən yeni şərtləri mənimsəyə bilməməsi və şagirdlərin nəzarətsiz qalmağı bu gün təhsilimizə çox ciddi zərbə vurur.

Xüsusilə məktəbəqədər təhsildə yaranan boşluq və problemlər daha ciddidir. Nazirlik bu boşluğu aradan qaldırmaq üçün cəhdlər etsə də, mövcud şərait və imkanlar məktəbəqədər təhsilin də keyfiyyətinə çox ciddi şəkildə mənfi təsir göstərir.

Ölkəmiz iki cəbhədə – həm pandemiya, həm də Qarabağ cəbhəsində savaş aparır. Hər iki savaşın övladlarımızın təhsilinə və gələcəyinə mənfi təsiri danılmazdır. Döyüş bölgəsinə yaxın ərazilərdə yaşayan şagirdlərin vəziyyətini təsəvvür etmək çətin deyil. Hər an raket hücumuna, mərmi yağışına məruz qalmaq xofuyla yaşayan övladlarımızdan, müəllimlərimizdən keyfiyyətli təhsil gözləmək demək olar ki, mümkünsüzdür. Düşmən hücumu həlak olan məktəblilər mənzərənin necə qorxunc və təhlükəli olmasının bariz nümunəsidir.

Alışmalı olduğumuz yeni reallıqlar müəllim peşəsinin nə dərəcədə vacib və əhəmiyyətli peşə olmasını bir daha təsdiqlədi. İnternet əsrində müəllim peşəsinə tələbatın azalacağını düşünənlər məhz pandemiya dövründə başa düşdülər ki, müəllimlik alternativi olmayan peşələrdəndir.

Pandemiya və müharibə bəlasını eyni dönəmdə yaşayan cəmiyyətimizdə fədakarlıq gözlədiyimiz peşə sahibləri sadəcə həkimlər, polislər, hərbçilər deyil. Bu gün cəmiyyətimiz müəllimlərimizdən də fədakarlıq gözləyir. Təhsildə yaranan yeni şərtlərə çevik uyğunlaşmaq, şagirdlərin təhsilə marağını artırmaq, valideyinlə düzgün ünsiyyət qurmaq, daha böyük həvəslə tədris prosesini sevdirmək müəllimlərimizdən böyük fədakarlıq tələb edir.

Pandemiya bizə öyrətdi ki, rəqəmsal bacarıqlara yiyələnmək hər birimiz üçün həyati əhəmiyyət kəsb edir. Xüsusilə təhsil sahəsində çalışanlar bu bacarıqlarını daha sürətlə və çevik şəkildə inkişaf etdirməli, yeni reallıqlara adekvat davranmalıdır.

Rəqəmsal inkişafı mənimsəmədən, mövcud şəraitlə ayaqlaşmaq mümkün deyil.

Yuxarıda qeyd etdiyim kimi, biz ölkə olaraq iki cəbhədə savaş aparırıq. Hər iki savaşdan qalib çıxmaq üçün böyük fədakarlıqlar tələb olunur. Qələbə, zəfər naminə hər kəs üzərinə düşəni artıqlaması ilə etməyə borcludur.

Bu gün səngərdəki hərbçilərlə, xəstəxanada günlərlə yuxusuz qalan həkimlərlə yanaşı müəllimlərimizin üzərinə də böyük məsuliyyət düşür.

Təhsilimizin indi vəziyyəti hər birimizi narahat etməlidir. Bu gün təhsilə laqeyd yanaşan hər kəs, illər sonra böyük peşimanlıq yaşaycaq. Bütün imkanlarımızı səfərbər edib, təhsilimizə daha ciddi yanaşmalıyıq. Çünki qələbədən sonra bizim təhsilli insanlara, mütəxəsislərə daha çox ehtiyacımız olacaq.

Bütün cəbhələrdə qələbə qazanmağımız üçün, gələcəyimizin daha parlaq, daha işıqlı və gözəl olması üçün fədakarlığa ehtiyacımız var.

Təhsil işçilərimizdən məhz bu fədakarlığı gözləyirik.

138
Teqlər:
orta təhsil, təhsil ocağı, əyani təhsil, təhsil
Əlaqədar
Sabahdan yenidən teledərslərə start veriləcək
Bu gündən distant təhsilə başlanılır
Teledərslərin davam etdirilməsinin səbəbi açıqlandı
Təhsil Nazirliyi bəzi özəl məktəblərə xəbərdarlıq edib
Xırdalanda uşaqlar, arxiv şəkli

Uşaq ikili standartın çərçivəsində: internetdə bir fikir var, valideyndə başqası

26
(Yenilənib 22:30 23.11.2020)
Noyabrın 20-si Ümumdünya Uşaqlar Günüdür. BMT Baş Assambleyasının 1954-cu ildə qəbul etdiyi №836 saylı qətnaməsində bütün dövlətlərə uşaqların şərəfinə bu bayramın keçirilməsi tövsiyə olunub. Bu məqalə gec dərc olunsa da, həmin günə həsr olunub.

Post-sovet məkanında adətən iyunun 1-ni Uşaq Hüquqlarının Müdafiəsi Günü kimi qeyd etmək qəbul olunub. Dünyanın bir çox ölkəsində uşaq hüquqları, onların problemləri ilə bağlı bir çox normativ aktlar və mütərəqqi qanunlar mövcuddur. Bununla belə, uşaq problemi hələ də aktuallığını saxlamaqdadır.

Çində uşaq oğurluğu problemi olduqca aktualdır

Uşaq gününü qəbul etmək nəyə lazım idi? Müasir dünya olduqca çətin problemləri ortaya qoyur. Hər gün texnoloji yenilik gündəmə gəlməsi yeni problemləri yaradır. Hər yeni mərhələdə yeni çətinliyi dəf etmək, bu işlərin uşaqlara təsirini aradan qaldırmaq lazım gəlir. Dünya üzrə ümumi qanunvericilik olmadığına görə, bəzən hər ölkə üzrə anlaşılmaz problemləri müşahidə edirik.

Məsələn, dünyanın ən qüdrətli ölkələrindən biri olan Çində uşaq oğurluğu problemi olduqca aktualdır. 1970-2015-ci illərdə ölkədə mövcud olan bir uşaq siyasəti böyük cinayətkar qrupların yaranmasına şərait yaradıb. Uşağı olmayan ailələr oğurluq yolla qaçırılmış uşaqları almaqla arzularına çatarmışlar. Əsil valideynlərin isə bəxtinə illərlə itirilmiş övladı axtarmaq qalırmış. Hətta bu gün də Çində minlərlə uşağın oğurlanması, kənara satılması, uşaq əməyinin istismarı, uşaqların cinsi istismarına rast gəlinir. Uşaqlara şikəst edib dilənçiliyə məcbur edən xüsusi qruplar da var. Maraqlı hallara da rast gəlinir.

İki yaşında itmiş Mao İn yalnız 30 il sonra öz valideynlərinə qovuşa bilib. 1988-ci ildə onu oğurlayıb başqa bir ailəyə satıblar. Uşağın anası Li Szinçji və atası Mao Szinçji övladlarını tapmaq üçün minlərlə elan yerləşdirib, çox miqdarda vəsait xərcləyiblər. Ana hətta öz işini tərk edərək həyatını oğlunun axtarışına sərf edib. İllərlə televiziya ekranından danışan Li heç vaxt ümidini itirmədiyini deyib. 2007-ci ildə övladlarını itirmiş valideynlərin qrupuna da qoşulan Mao və Li 2020-ci ildə övladlarına qoşula biliblər. Başqa regionda tapılan 34 yaşlı Qu Ninin DNT analizi verdikdən sonra hər şey aşkarlanıb.

Bu uşaqların nə təhsili var, nə də gələcəyi

Əslində belə hallar elə də tez-tez baş vermir, itirilmiş övladı tapmaq hər valideynə qismət olmur. Uşaq əməyinin istismarı, uşaqların təhsildən kənarda qalması, kasıblıq ucbatından uşaqların sağlamlığı itirməsi hallarına daha çox rast gəlinir. Afrikanın elə ölkələri var, orada elə uşaq özünü tanıyandan zibildə eşələnməklə məşğuldur. Yəni uşaq elə zibillikdə doğulur, böyüdükdən sonra orada pula satıla biləcək materialları toplayıb təhvil verir, min cür xəstəlik taparaq tez də həyatdan gedir. Bu uşaqların nə təhsili var, nə də gələcəyi.

Ekstremal halları kənara qoysaq, elə adi günümüzdə də xeyli çətinlik var. Ötən əsrin 70-ci illərində orta məktəbin 1-ci sinfinə gedən uşağın 7 yaşı olmalı idi. 6 yaşında uşağı götürməzdilər. Hazırda yaş həddi 6-ya endirilib, hətta ilin sonunda 6 yaşı tamam olanlar artıq sentyabrda məktəbə gedə bilərlər. 5 yaşlı uşaq artıq tədris prosesinə qoşulmalıdır. Özü də bu müddətdən öncə bu günün uşaqları həm bağça sistemindən keçir, həm də məktəbəqədər hazırlıq prosesindən.

Valideynin uşağına təsir etmək imkanı gün gündən azalır

Bu günün uşağı faktiki uşaqlığını keçirə bilmir. Elə doğulduğu gündən ətrafında onlarla texniki vasitə ilə üzləşir. 100-lərlə kanalı və internetə çıxışı olan televizor, müxtəlif növ planşet, smartfon, oyun qurğuları uşaq həyatının ayrılmaz hissəsinə çevrilir. Uşaq dəhşət dərəcədə yüklənir. Özünə qapanan, autizm xəstəliyinə düçar olan uşaqlarla yanaşı xeyli sayda hiperaktiv uşaqlar da peyda olub. Kimi telefonu əlinə alıb özünə qapanır, kimi də mənasız videoya baxıb ev-eşiyi dağıdır.

Valideynin uşağına təsir etmək imkanı gün gündən azalır. Uşağı daha çox internet resursları tərbiyə edir. Başqa insanların, digər millətlərin davranış modelləri valideynin dediyindən daha çox əhəmiyyət kəsb etməyə başlayır. İnformasiya kanalları çoxalıb deyə nəyinsə qarşısını da almaq olmur. Valideynin texniki bacarığı da bəzən uşağın bildiyindən zəif olur. Zet nəslinin nümayəndələri anında istənilən qurğudan baş çıxarır, özlərinə maraqla olan məlumatı hər yerdən tapa bilirlər.

Azərbaycanda nəsillər arasında sözün əsl mənasında bir ciddi anlaşılmazlıq var. Milli-mental dəyərlər aşılanır, bəzən bu yöndə olan fikirlər uşaqda gülüş doğurur. Muğamat dinləmək əvəzinə uşaq məşhur bloqçunun videosunu izləməyə, dolma-plov yerinə isə hamburger yeməyə üstünlük verir.

Bir-birini anlamamağın səbəblərindən biri də patriarxal cəmiyyətə məxsus ata kultunun olmasındən, uşağa bir şəxsiyyət kimi yanaşmamaqdan irəli gəlir. Uşaqla danışmaq, onun problemlərini anlamaq əvəzinə elə “mən dedim, deməli belə olacaq” fikrinə üstünlük verilir. Zaman isə dəyişib, bu günün valideyni çox zaman uşağı üçün layiqli nümunə ola bilmir, bir şeyi deyir, amma əksinə hərəkət edir. Telefonla oynamağı qadağan edir, amma səbəbini demir. Özü qazlı rəngli içkiyə üstünlük verir, amma övladına deyir, olmaz. Uşaq daim ailədaxili ikili standartların çərçivəsində yaşamalı olur. İnternetdə bir fikir var, valideynin beynində başqası.

Valideyn də uşaq üçün ən əhəmiyyətli nümunədir

Valideyn-uşaq münasibətlərini dünyanın bir çox ölkəsində ciddi araşdırırlar. Tez-tez hər hansı bir tədqiqatın nəticəsi də açıqlanır. Yüzlərlə kitab, təlimat yaradılıb. Nəyisə bilmirsənsə, uşaq psixoloqundan tutmuş ən müxtəlif növ mütəxəssisə müraciət edə bilərsən. Ölkə var, uşağa fastvud yeməyi qətiyyətlə qadağan edilib. Hər dərsdə onun ziyanından danışırlar. Baxırsan, belə qida satılan şəbəkəyə turistdən başqa heç kim getmir. Valideyn də uşaq üçün ən əhəmiyyətli nümunədir.

Bir ölkə, toplum olaraq yeni dönəmdə “uşaqlara münasibətdə necə davranmalıyıq” sualına cavab axtarmalıyıq. Uşaq valideyndən çox zəmanəsinə bənzəyir deyə, valideyn zamanın nəbzini tutmağı bacarmalı, uşağa irəlidə gedən bir flaqman kimi yol göstərməlidir.

26
Teqlər:
uşaqlar
Ağdamda cümə məscidi, arxiv şəkli

damımız, Putinin şərhi, Hacıqabullu Qüdrət kişi hər kəsin arzusu…

77
(Yenilənib 04:02 23.11.2020)
Tezliklə, Ağdama həyat qayıdacaq, məşhur Ağdam Çay Evindən facebook etiketləmələrinin başlanacağı gün uzaqda deyil. Ən böyük maşın bazarının da bu rayonumuzda olacağı şübhə doğurmur.

7x7 həftənin ən yaddaqalan hadisələrini şərh edir

Ağdam həftəsi

Bu həftə Ağdam həftəsi idi. İşğalçı əhalisinə görə Qarabağın ən böyük rayonu olmuş, indisə bayquş uluyan, xarabalığa çevrilmiş Ağdamı boşaltdı. Kefindən yox təbii ki. Noyabrın 10-da imzalanmış kapitulyasiya aktında biz bunu onun boynuna qoymuşduq. Tezliklə, Ağdama həyat qayıdacaq, məşhur Ağdam Çay Evindən facebook etiketləmələrinin başlanacağı gün uzaqda deyil. Ən böyük maşın bazarının da bu rayonumuzda olacağı şübhə doğurmur.
Hələlik isə Ağdam görüntüləri ürək dağlayır – düşmən daşı daş üstündə qoymayıb, hər tərəfdən xarabalıq boylanır.
Bu arada Ağdama doğru yol hərbi birləşmələrimizi yollarda qarşılayan sakinlər sanki futbol komandasını salamlayar kimi alqışlayır. Bu gün mübaliğəsiz deyə bilərik ki, hər bir əsgər özünü  nəinki ulduz, tarixi qəhrəman kimi hiss edə bilər.

Putinin verdiyi peşmançılıq

Bu həftə Rusiya Prezidenti Vladimir Putin erməniləri türklər demiş, növbəti dəfə “hayal kırıklığına” uğratdı. "Rossiya 1" telekanalına müsahibəsində Ermənistanın belə qondarma “Dağlıq Qarabağ”ın müstəqilliyini və suverenliyini tanımadığını xatırladaraq dedi ki, “Bu o deməkdir ki, beynəlxalq hüquqa əsasən, Dağlıq Qarabağ və ətraf rayonlar Azərbaycan Respublikasının ayrılmaz tərkib hissəsidir”.
Beləcə, statusun cəhənnəmə, gora getməsi barədə həqiqət Rusiya Prezidentinin dilindən də dolayısıyla səsləndi və bu, ermənilərin son ümidlərini də PUA-ların zərbəsi texnikalarını dağıtdığı kimi dağıtdı.

Hacıqabullu Qüdrət kişi

Ermənistanın yeni xarici işlər naziri Ara Ayvazyanla bağlı sosial şəbəkələrdə maraqlı məlumatlar yer alıb. Yeni nazirin Vikipediyası onun təyinatından dərhal sonra tam olaraq silindiyi deyilir. Qeyd edilir ki, A.Ayvazyan Azərbaycanın Hacıqabul rayonunun Nəvahi kəndində anadan olub, atası isə Qüdrət Eyvaz oğlu Xancanovdur.
Bədbəxt ölkə! Təbii arıtımın azalması və ölkədən baş götürüb qaçanların artması səbəbi ilə böhran həddinə çatmış demoqrafik problemlər yerli doğumlu kadrlar tapmağa imkan vermir.
Bu arada Xocalı soyqırımını törədən erməni general da erməniləri tərk edib – yox, ölkədən qaçmayıb, Əzrayıl yoldaş onu özü ilə aparıb. Yeri gəlmişkən, "Artsaxın qəhrəmanı”nın maraqlı ayaması olub – “Tuşonka Manvel”. Əsgərlərin yeməyini satmaqla məşhurlaşan, cinayətkar qəhrəman. Qəhrəmanı belə olanların axırı da bu cür olmalı idi.

Ən bahalılar
“The Economist” jurnalının hazırladığı siyahıya görə, Honkonq metropolu, Paris və Sürix dünyanın ən bahalı şəhərləridir. “2020-ci il üçün dünyanın yaşayış xərcləri hesabatı” adlı siyahıda sonrakı yerlərdə Sinqapur, Osaka, Təl-Əviv şəhərləri tutur. İlk 10-luqda son yerlərdə Nyu-York, Cenevrə, Los-Anceles və Kopenhagen qərarlaşıb.
Bizə görə isə dünyanın ən bahalı şəhəri Şuşadır bu gün!

Prezidentsizlik

ABŞ Səhiyyə Nazirliyi bəyan edib ki, Ümumi Xidmətlər İdarəsi Co Baydenin qələbəsi tanınmayana qədər demokratların namizədinin komandası ilə işləməyəcək. Qurumun rəhbəri Aleks Azar deyib ki, “Biz çox açıq şəkildə bildirdik ki, GSA nə zaman kimin qalib gəldiyini elan edəcəksə, o zaman tam şəkildə peşəkar keçid və hazırlıq işlərinə başlayacağıq. Biz təlimat qaydalarına riayət edirik”. Qeyd edək ki, bir qədər əvvəl “Politico” qəzeti ABŞ Ümumi Xidmətlər İdarəsinin rəhbəri Emili Mörfinin Co Baydenin prezident seçkilərində qələbə qazandığını tanımaqdan imtina etdiyini yazmışdı.
Belə. Bu boyda ölkə prezidentini seçməkdə çətinlik çəkir. Buna görə biz də narahat olmalıyıq, çünki Konqo, Somali, Trinidad Tabaqonun ölkə başçısından söhbət getmir, ABŞ prezidenti dünyanın gündəliyinə, problemlərinə, qayğılarına təsir edə bilən adamdır.

İran dərdi

Bu basabasda amerikanların İran dərdi də bitmək bilmir. ABŞ növbəti dəfə İrana qarşı sanksiyaları genişləndirib. Bildirilib ki, sanksiyalar 9 İran vətəndaşına, habelə 49 təşkilat və müəssisəyə, eyni zamanda İranın bayrağı altında üzən bir gəmiyə tətbiq edilib.
Görəsən, nəyə görə ABŞ, Rusiya, Fransa, Britaniya, Pakistan nüvə silahına malik ola bilər, ancaq İran yox? İranı belə özəl edən nədir? Bu sualın aydın cavabını biz hələ eşitməmişik.

2020 mistikası

2020-ci il dünya tarixinin ən unikal illərindən biri kimi tarixdə qalacaq. Numerologiya mistikasına inanlar indi inanmayanlardan daha haqlı görünür. Koronavirus, iqtisadi böhran, təbii fəlakətlər, münaqişələr  - hamısını bir ilə yığıb gözləyiblər sanki.
Bu arada Azov dənizinin sahilindən bir qrup gənc içərisində məktub olan şüşə butulka tapıblar. Məktubdan aydın olur ki, müəllifi doqquz yaşlı Yaroslavdır. Butulka dənizdə doqquz günlük səyahətdən sonra sahilə çıxıb. Bir cümləlik kağız parçasında isə “Qoy bu il tez bitsin” arzusu yazılıb.

77
Azərbaycan hərbçiləri, arxiv şəkli

Müzəffər Ordumuz artıq Kəlbəcərdə!

68
(Yenilənib 01:14 25.11.2020)
Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.

BAKI, 25 noyabr - Sputnik. Azərbaycan Respublikası, Rusiya Federasiyası Prezidentləri və Ermənistan Respublikası baş nazirinin imzaladığı üçtərəfli Bəyanata əsasən, Azərbaycan Ordusunun bölmələri noyabrın 25-də Kəlbəcər rayonuna daxil olub.

Sputnik Azərbaycan bildirir ki, məlumatı Azərbaycan Müdafiə Nazirliyi yayıb. Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.
Gün ərzində Kəlbəcərdən foto və video materiallar təqdim olunacaq.

68
Teqlər:
Azərbaycan ordusu, Qarabağ, Kəlbəcər rayonu