Maskada alış veriş edən qadın, arxiv şəkli

İki sivilizasiyanın qarşıdurması: Fransa ağır problemlərin ağuşuna sürüklənir

153
(Yenilənib 21:35 30.10.2020)
Bu qarşıdurmanın nə ilə nəticələnəcəyi bilinmir, amma Fransa mallarının boykotu, islam ölkələri ilə ticarət əlaqələrinin pozulması tam realdır

BAKI, 30 oktyabr — Sputnik. Son bir ayda Fransanın adı addımbaşı qalmaqalda hallanır. İkinci Qarabağ savaşı başlayan gündən elə bil özünün ATƏT-in Minsk qrupunun həmsədri olduğunu unudan Fransa birmənalı olaraq Ermənistanı dəstəkləməyə başladı. Bunu adətən Fransada erməni diasporunun gücü ilə izah edirlər, çünki Fransa siyasətinə ermənilərin təsirinin böyük olduğu bildirilir. Halbuki əhalisi 68 milyon olan ölkədə cəmi 350-500 erməni yaşayır. Özü də Fransanın cəmi 3 şəhərində, Paris, Marsel və Lionda məskunlaşıblar. Müəyyən qədər nüfuz sahibi olsalar da, onların Fransa siyasətinə ciddi təsirindən danışmaq da bir qədər doğru olmazdı. Sadəcə, Fransa ənənəvi olaraq erməniləri bir siyasi xətt olaraq dəstəkləyib.

Ərdoğan da Türkiyə xalqını Fransa mallarını boykot etməyə çağırıb

Hər halda Fransanın bəzi dairələrindən Azərbaycana da dəstək oldu. Bu, sevindirici əlamətdir. Di gəl, Fransanın adı təkcə Qarabağ münaqişəsi ilə hallanmadı, son günlərdə daha bir neçə hadisə baş verdi. Türkiyə və Fransanın münasibətləri pozuldu. Məhəmməd peyğəmbərin karikaturasını sinifdə nümayiş edən Samuel Pati adlı müəllimin öldürülməsi Fransada əks-səda doğurdu. Karikaturanın nümayişinə haqq qazandıran Prezident Emmanuel Makron ölkədə separatizmlə mübarizə aparmağı, siyasi islama məktəblərdə, dövlət idarələrində, mədəni ocaqlarda müqavimət göstərilməsinin əhəmiyyətindən danışdı. Fransanın dövlət idarələrində, həmçinin bəzi mətbuat orqanlarında bu karikaturaların yerləşdirilməsi də baş verib.

Əlbəttə, müsəlman dünyasının, xüsusilə də Türkiyənin Fransadakı islamofobiyaya qarşı sərt yanaşmasını da müşahidə edirik. Türkiyə Prezidenti Rəcəb Tayyib Ərdoğan Makronun psixi sağlamlığını şübhə altına alan bəyanat da yayıb. Bir çox müsəlman ölkələrində Fransaya qarşı etiraz aksiyaları geniş vüsət alıb. Məsələn, Banqladeşdə 10 minlərlə insan əllərində “Bütün dünya müsəlmanları birləşin” və “Fransanı boykot edin” yazılmış şüarları tutaraq küçələrə axışıblar. Ərdoğan da Türkiyə xalqını Fransa mallarını boykot etməyə çağırıb.

Fransa hökuməti hələlik türk mallarını boykot etməyəcəyini bildirsə də, müəyyən addımlar atacağı gözlənilir. Fransanın “Charlie Hebdo” satirik jurnalı isə Ərdoğanı aşağılayan karikaturasını da dərc edib. Burunla bağlı Ankara Baş Prokurorluğu həmin jurnala qarşı cinayət işi də açıb. Son bəyanatının birində Ərdoğan Avropada islam dünyasına qarşı növbəti xaç yürüşünün başlandığını qeyd edib. Onun fikrincə, Qərb ölkələri islama hücum etməklə hərbi-müstəmləkəçilik hərəkətlərini bərpa etməyə çalışırlar.

Azərbaycanla idxal 160 milyon, ixrac isə 713 milyon dollar təşkil edir

Bu qarşıdurmanın nə ilə nəticələnəcəyi bilinmir, amma Fransa mallarının boykotu, islam ölkələri ilə ticarət əlaqələrinin pozulması tam realdır. Fransanın islam ölkələri ilə ümumi ticarət dövriyyəsi elə də az deyil, haradasa 2019-cu il üçün 100 milyard dollar təşkil edib. Bunların da 45,8 milyardı ixrac, 58 milyardı isə idxal əməliyyatları olub. İslam ölkələri Fransadan daha çox maşın, qaz turbinləri, aviasiya məhsulları, qazanxanalar, motorlu nəqliyyat vasitələri hissələri, avtomobillər, traktorlar, dəmir və polad məhsulları, elektrik və elektron avadanlıqlar və dərmanlar alıblar.

Fransa da İslam ölkələrindən xam neft, təbii qaz, mineral yağlar, motorlu nəqliyyat vasitələri, avtomobil hissələri, peyk qəbulediciləri, elektrik qızdırıcılar, kabellər, geyim, meyvə, tərəvəz və qoz-fındıq kimi məhsulları idxal edib.

Fransa Türkiyədən 9.8 milyard dollarlıq müxtəlif növ məhsullar və avadanlıqlar alıb, 6.66 milyard dollarlıq mal ixrac edib. Fransa məhz Türkiyə ilə ticarət əlaqələrinin həcminə görə digər islam ölkələrini üstələyir. Azərbaycanla idxal 160 milyon, ixrac isə 713 milyon dollar təşkil edir.

“Artıq Fransa malları almırıq”

Azərbaycanda Fransaya yanaşma elə Qarabağda hərbi əməliyyatların aktivləşməsi dövründən pisləşib. Fransa mallarını boykot etmək çağırışları daim eşidilib. Sosial mediada dəqiqəbaşı boykota dəvət edən postlara rast gəlirik. Parisdə yaşayan bir həmyerlimizin postu daha çox yadda qalıb. “Fransız məhsullarını necə boykot edə bilərəm” düşüncəsinə dalarkən... Əti ərəblərdən/türklərdən alıram. Çörəyi evin altındakı “boulangerie”dən, əlcəzairlidir. Mer-meyvəni, tərəvəzi bazardan, ərəblərdən. Alman maşını sürürəm. Geyimləri Almaniyadan, ya da yolum düşəndə Türkiyədən alıram. Böyük qızım rus məktəbində təhsil alır, ödənişlidir, kiçik fransız məktəbinə gedir, pul ödəmirəm. Fransız dili müəlliməm 40 ildir Parisdə yaşayan özbəkdir. Mən çoxdan başlamışam ki, boykota”, - yazan Elzar Ağayev boykotu necə reallaşdırdığını çox doğru qeyd edib. 

“Mən də fransız maşını almayacam”, “Artıq Fransa malları almırıq”, “Fransa mallarına yox”, “boykot”, “Fransız malını alan erməniyə dəstəkdir” kimi ifadələrə addımbaşı rast gəlirik.

“İstehsal: Fransa. Kredit şərtləri var. 1+1 kampaniyası” reklamı isə azərbaycanlı istifadəçilərin qəzəbinə tuş gəlib. “Bunu paylaşan bəlkə də ermənidir və fransız zad. Müsəlman olan şəxs belə reklam etməz!”, “Məqsəd nədir ki, boykot olan malları belə reklam edirsiniz? Kimsiz siz???”, “Fransa malını vur təpənə, bizə lazım deyil düşmənin malı, başlarına dəysin elə”, “Millət deyir boykot edin bunlar kreditlə verir” postları Fransaya olan münasibətin bariz göstəricisidir.

Azərbaycan insanı ümumən Fransaya tarixən yaxşı yanaşıb, elə Mirzə Fətəli Axundovun “Müsyö Jordan və Məstəli şah” əsərinin qəhrəmanı Şahbaz bəyin Parisə gedib bilik almaq həvəsi də o dövrün Fransasının bir elm və mədəniyyət mərkəzi olduğuna işarədir. “Papaq” filmində isə bəylərdən birinin işlətdiyi “o madmazelləri ki, mən Parisin kafe şantanlarında görmüşəm, sən görsən, Məcnuna dönüb biyabanə düşərsən, qardaş” ifadəsi də dillər əzbəri olub. Hamı Parisə getmək istəyib, kimi bilik, kimi də əyləncə dalınca. Amma indi Fransada nə bilik qalıb, nə də əyləncə.

Fransanın ağır çəkili prezidentlərini zəif və iradəsiz siyasətçilər əvəzləyib

Fransanın dünya siyasətindəki nüfuzu əslində çox sarsıyıb. Bu ölkənin Şarl de Qoll, Valeri Jeskar Desten, Fransua Mitteran, Jak Şirak kimi ağır çəkili prezidentləri Nikola Sarkozi, Fransua Olland və Emmanuel Makron kimi zəif və iradəsiz siyasətçilər əvəzləyib. Son 3 Fransa prezidenti dünya siyasət tarixində heç nə ilə yadda qala bilməyib. Sarkozinin adı daim korrupsiya və seksual qalmaqallarda hallanıb, Ollandın prezidentliyi dövrünü bir növ hiss etməmişik. Makronu da sadəcə problemlərin həllini tapa bilməyin birisi kimi görürük.

Elə Avropa Birliyində də Fransanın mövqeləri zəifləməkdə davam edir. Almaniya isə güclənərək AB-nin ən nüfuzlu dövlətinə çevrilir. Fransa bir tərəfdən daxildən silkələnir, “sarı jiletlər” hərəkatı həm iqtisadiyyata ciddi zərbə vurub, həm də hələ də həllini gözləyən nə qədər problemin olduğunu göstərib. Digər tərəfdən ölkəyə daha çox ərəb ölkələrindən olan miqrasiyanın yaratdığı çətinlikləri də həll etmək tələbi də var. Amma məsələnin həlli də yoxdur, fransızlar deyirlər, ərəblər bizim mədəniyyətə uyğunlaşa bilmirlər, ərəblər isə deyirlər, təhsil də alırıq, fransız dilini də öyrənirik, vergi də veririk. Daha nə etməliyik? Pivə, şərab içək?

Koronavirus Fransa iqtisadiyyatını ciddi silkələyib, digər tərəfdən isə ölkə malların boykot təhlükəsi ilə üzləşib. Fransa siyasətinə zəif liderlər ayaq açdıqca, onların yararsız fəaliyyətinə qarşı müqavimət də güclənir. Fransızlar eynicinsli nikahların əleyhinə aksiya keçirir, burada millətçilik və sağçılıq ideyalarına da münasibət dəyişir. Millətçi Mari Lüpen artıq əhalinin böyük hissəsinin rəğbətini qazana bilib.

Fransanın hazırda qarşılaşdığı problemlərin bir çoxu bir və ya bir neçə adamın həll edə biləcəyi məsələ deyil. İki sivilizasiyanın qarşıdurmasıdır. İnsanların bir-birini anlamaması, digəri üçün əhəmiyyətli olan məsələdə anlaşıqlı olmaması həmin bu mədəni qarşıdurmadan irəli gəlir. Fransız üçün “Paris Notr-Dam” kilsəsində baş vermiş yanğın olduqca əhəmiyyətlidir. Günlərlə deyib ağladılar, amma islam düşüncəsində “hər hansı bir hadisə Allahın izni ilə baş verib” ideyası üstünlük təşkil edir. Müsəlman pulunu, evini itirsə belə, qəm etməz, amma qeyrətini itirmək olduqca ağırdır. Təhqiredici karikaturaya görə kimi olsa belə, öldürməyə hazırdır.

Fransada prezident kürsüsünə sahib olan hər bir kəs bu cür incə detalları bilməlidir. Bilməsə, deməli, yerində oturmayıb, öz ölkəsini daha da ağır problemlərin ağuşuna sürükləyir.

153
Bakıda tibbi maska taxmış şəxs, arxiv şəkli

Məsuliyyət disiplin: Koronavirusa qalib gəlməyin yolları

45
Riayət etdiyimiz qaydaların gələcəyimizə, xüsusilə övladlarımıza və digər doğmalarımıza faydalı olacağına inansaq, bu bəlaya qalib gəlməyimiz çətin olmayacaq.

Həyatımızı və düzənimizi dəyişən "taclı bəla"nın yayılması son günlər kəskin şəkildə artıb. Həm dünyada, həm də ölkəmizdə vəziyyət getdikcə qəlizləşir. Xəstəxanaların vəziyyətindən xəbərdar olanlar, vəziyyətin niyə qəliz olduğunu yəqin ki, anlayrırlar. Təcrübə göstərdi ki, bütün dünya bu bəlanın qarşısında hələki çarəsiz vəziyyətdədir. İlin əvvəlində Avropa ölkələrində yaşanan narahatlıq, indi bizim qapımızı döyür. Görülən tədbirlərin, tətbiq olunan qadağaların, qapanmaların, açılmaların effektivliyi də göz qabağındadır. Bu barədə uzun-uzadı yazmağa, danışmağa ehtiyac yoxdur. Son günlərin statistikası vəziyyətin ciddi olduğunu gözlər önünə sərir. Artıq, "Mən koronaya inanmıram"– lağlağısının yeri deyil. İnansaq da, inanmasaq da pandemiya dünyaya meydan oxuyur.

***

Mütəxəsislər yoluxmanın və ölümlərin nisbətən az olduğu isti aylarda payız-qış mövsümündə yoluxmalarda kəskin artım olacağı ilə bağlı xəbərdarlıq etsələr də, dəyişən heç nə olmadı. Özümüzü və ətrafımızı qorumalı olduğumuz halda, yenə biganə davrandıq. Heç kəsə sirr deyil ki, koronavirusun yayılmasında əsas faktor insandır. Əgər insanlar bu məsələdə məsuliyyətli olmasa, yoluxmanın sürətlə artmasına mane olmaq daha da çətinləşəcək. Üstəlik, xəstəxanalarda müalicə alanların sayının artması, həkimlərin daha ağır xəstələrə nəzarət etmək imkanını azaldır. Dolayısıyla, hər bir məsuliyyətsiz addım, ətrafımzdakı onlarla insana təhlükə yaradır. Qarabağ müharibəsində ardıcıl qazanılan zəfərlər bizdə eyforiyaya səbəb olub. Bunu zəfər yürüşlərində də müşahidə etmək çətin deyildi. O müdhiş sevincin qarşısında insanları "Niyə yürüş edərkən maskadan istifadə etmirdiniz?" – deyə qınamaq da olmur. Zəfər sevinci elə bir hissdir ki, sosial məsafə, maska, dezinfektan heç kəsin yadına düşmür. O xoşbəxt anlarda adam bütün mənfi şeyləri unudur. Çox yaxşı haldır ki, insanlarımızın bu xoş aurası bu gün də davam edir. Ancaq bu rahatlığın təhlükəli tərəfi də var: məsuliyyət hissimiz azalır və "taclı bəla" öz arealını genişləndirir. Bu gün yenidən birliyə və həmrəyliyə ehtiyacımız var.

***

Sözün düzü, koronaya yoluxmamaq üçün nələrə riayət etməli olduğumuzu hamımız bilirik. Əgər ilin əvvəlində naməlum düşmənə qarşı təşviş içərisində mübarizə aparırdıqsa, indi bu virus haqqında kifayət qədər məlumatlıyıq. Qoyulan qadağalar kifayət qədər yumşaldılıb. Həyatımızdan bu bəlanın biryolluq çıxıb getməsi üçün özümüzü və ətrafımızı düşünmək, diqqətli və məsuliyyətli olmaqdan başqa yolumuz yoxdur.

***

Bu gün yoluxma riski hər yerdə yüksək olsa da, insanların daha sıx olduğu yerlərdən uzaq gəzmək, bu sıxlığa səbəb olmamaq vacibdir. Düşünürəm ki, insanlarla daha sıx ünsiyyətdən yayınmaq da bu dönəm üçün vacibdir. Maskadan istifadə etməli, gigiyeniya qaydalarına riayət etməliyik. Açıq havada maskadan istifadə etməklə bağlı qoyulan qadağa hamıya qəribə görünsə də, düşünürəm ki, bu məsuliyyət hissini artırmaq, disiplin yaratmaq üçün müəyyən təsirə malik olacaq. Pandemiya ilə mübarizə apardığımız bu dönəmdə hətta absurd görünən qadağalara da riayət etmək, öz davranışımızla ətrafımıza yaxşı nümunə göstərmək məcburiyyətindəyik.

***

Əzizlərimizin həyatını qorumaq, təhsil sistemimizin və həyatın digər sahələrinin normala dönməsi üçün bu qeyri-müəyyənliklərlə dolu günlərdə daha həssas, daha məsuliyyətli olmalıyıq. Riayət etdiyimiz qaydaların gələcəyimizə, xüsusilə övladlarımıza və digər doğmalarımıza faydalı olacağına inansaq, bu bəlaya qalib gəlməyimiz çətin olmayacaq.

Hər birimizdən tələb olunan sadəcə məsuliyyətli və diqqətli olmaqdır. Bunu bacarsaq, minlərlə insanın xilaskarı olmaq şansımız var. Bu gün özünü və ətafını qoruyan hər bir insan qəhrəmandır və hamımızın qəhrəman olmaq imkanı var. Gələcəyimiz və sağlamlığımız üçün bu qəhrəmanlığı etməliyik. Bizim yenədə birliyə, bütövlüyə, həmrəyliyə ehtiyacımız var. Yaxın tarix sübut etdi ki, biz həqiqətən birlikdə güclüyük. Bu gücümüzü gözgörünməz düşmənə də göstərməyin vaxtıdır.

45
Teqlər:
korona virusu, Koronavirus, epidemiya, COVID-19
Xırdalanda uşaqlar, arxiv şəkli

Uşaq ikili standartın çərçivəsində: internetdə bir fikir var, valideyndə başqası

42
(Yenilənib 22:30 23.11.2020)
Noyabrın 20-si Ümumdünya Uşaqlar Günüdür. BMT Baş Assambleyasının 1954-cu ildə qəbul etdiyi №836 saylı qətnaməsində bütün dövlətlərə uşaqların şərəfinə bu bayramın keçirilməsi tövsiyə olunub. Bu məqalə gec dərc olunsa da, həmin günə həsr olunub.

Post-sovet məkanında adətən iyunun 1-ni Uşaq Hüquqlarının Müdafiəsi Günü kimi qeyd etmək qəbul olunub. Dünyanın bir çox ölkəsində uşaq hüquqları, onların problemləri ilə bağlı bir çox normativ aktlar və mütərəqqi qanunlar mövcuddur. Bununla belə, uşaq problemi hələ də aktuallığını saxlamaqdadır.

Çində uşaq oğurluğu problemi olduqca aktualdır

Uşaq gününü qəbul etmək nəyə lazım idi? Müasir dünya olduqca çətin problemləri ortaya qoyur. Hər gün texnoloji yenilik gündəmə gəlməsi yeni problemləri yaradır. Hər yeni mərhələdə yeni çətinliyi dəf etmək, bu işlərin uşaqlara təsirini aradan qaldırmaq lazım gəlir. Dünya üzrə ümumi qanunvericilik olmadığına görə, bəzən hər ölkə üzrə anlaşılmaz problemləri müşahidə edirik.

Məsələn, dünyanın ən qüdrətli ölkələrindən biri olan Çində uşaq oğurluğu problemi olduqca aktualdır. 1970-2015-ci illərdə ölkədə mövcud olan bir uşaq siyasəti böyük cinayətkar qrupların yaranmasına şərait yaradıb. Uşağı olmayan ailələr oğurluq yolla qaçırılmış uşaqları almaqla arzularına çatarmışlar. Əsil valideynlərin isə bəxtinə illərlə itirilmiş övladı axtarmaq qalırmış. Hətta bu gün də Çində minlərlə uşağın oğurlanması, kənara satılması, uşaq əməyinin istismarı, uşaqların cinsi istismarına rast gəlinir. Uşaqlara şikəst edib dilənçiliyə məcbur edən xüsusi qruplar da var. Maraqlı hallara da rast gəlinir.

İki yaşında itmiş Mao İn yalnız 30 il sonra öz valideynlərinə qovuşa bilib. 1988-ci ildə onu oğurlayıb başqa bir ailəyə satıblar. Uşağın anası Li Szinçji və atası Mao Szinçji övladlarını tapmaq üçün minlərlə elan yerləşdirib, çox miqdarda vəsait xərcləyiblər. Ana hətta öz işini tərk edərək həyatını oğlunun axtarışına sərf edib. İllərlə televiziya ekranından danışan Li heç vaxt ümidini itirmədiyini deyib. 2007-ci ildə övladlarını itirmiş valideynlərin qrupuna da qoşulan Mao və Li 2020-ci ildə övladlarına qoşula biliblər. Başqa regionda tapılan 34 yaşlı Qu Ninin DNT analizi verdikdən sonra hər şey aşkarlanıb.

Bu uşaqların nə təhsili var, nə də gələcəyi

Əslində belə hallar elə də tez-tez baş vermir, itirilmiş övladı tapmaq hər valideynə qismət olmur. Uşaq əməyinin istismarı, uşaqların təhsildən kənarda qalması, kasıblıq ucbatından uşaqların sağlamlığı itirməsi hallarına daha çox rast gəlinir. Afrikanın elə ölkələri var, orada elə uşaq özünü tanıyandan zibildə eşələnməklə məşğuldur. Yəni uşaq elə zibillikdə doğulur, böyüdükdən sonra orada pula satıla biləcək materialları toplayıb təhvil verir, min cür xəstəlik taparaq tez də həyatdan gedir. Bu uşaqların nə təhsili var, nə də gələcəyi.

Ekstremal halları kənara qoysaq, elə adi günümüzdə də xeyli çətinlik var. Ötən əsrin 70-ci illərində orta məktəbin 1-ci sinfinə gedən uşağın 7 yaşı olmalı idi. 6 yaşında uşağı götürməzdilər. Hazırda yaş həddi 6-ya endirilib, hətta ilin sonunda 6 yaşı tamam olanlar artıq sentyabrda məktəbə gedə bilərlər. 5 yaşlı uşaq artıq tədris prosesinə qoşulmalıdır. Özü də bu müddətdən öncə bu günün uşaqları həm bağça sistemindən keçir, həm də məktəbəqədər hazırlıq prosesindən.

Valideynin uşağına təsir etmək imkanı gün gündən azalır

Bu günün uşağı faktiki uşaqlığını keçirə bilmir. Elə doğulduğu gündən ətrafında onlarla texniki vasitə ilə üzləşir. 100-lərlə kanalı və internetə çıxışı olan televizor, müxtəlif növ planşet, smartfon, oyun qurğuları uşaq həyatının ayrılmaz hissəsinə çevrilir. Uşaq dəhşət dərəcədə yüklənir. Özünə qapanan, autizm xəstəliyinə düçar olan uşaqlarla yanaşı xeyli sayda hiperaktiv uşaqlar da peyda olub. Kimi telefonu əlinə alıb özünə qapanır, kimi də mənasız videoya baxıb ev-eşiyi dağıdır.

Valideynin uşağına təsir etmək imkanı gün gündən azalır. Uşağı daha çox internet resursları tərbiyə edir. Başqa insanların, digər millətlərin davranış modelləri valideynin dediyindən daha çox əhəmiyyət kəsb etməyə başlayır. İnformasiya kanalları çoxalıb deyə nəyinsə qarşısını da almaq olmur. Valideynin texniki bacarığı da bəzən uşağın bildiyindən zəif olur. Zet nəslinin nümayəndələri anında istənilən qurğudan baş çıxarır, özlərinə maraqla olan məlumatı hər yerdən tapa bilirlər.

Azərbaycanda nəsillər arasında sözün əsl mənasında bir ciddi anlaşılmazlıq var. Milli-mental dəyərlər aşılanır, bəzən bu yöndə olan fikirlər uşaqda gülüş doğurur. Muğamat dinləmək əvəzinə uşaq məşhur bloqçunun videosunu izləməyə, dolma-plov yerinə isə hamburger yeməyə üstünlük verir.

Bir-birini anlamamağın səbəblərindən biri də patriarxal cəmiyyətə məxsus ata kultunun olmasındən, uşağa bir şəxsiyyət kimi yanaşmamaqdan irəli gəlir. Uşaqla danışmaq, onun problemlərini anlamaq əvəzinə elə “mən dedim, deməli belə olacaq” fikrinə üstünlük verilir. Zaman isə dəyişib, bu günün valideyni çox zaman uşağı üçün layiqli nümunə ola bilmir, bir şeyi deyir, amma əksinə hərəkət edir. Telefonla oynamağı qadağan edir, amma səbəbini demir. Özü qazlı rəngli içkiyə üstünlük verir, amma övladına deyir, olmaz. Uşaq daim ailədaxili ikili standartların çərçivəsində yaşamalı olur. İnternetdə bir fikir var, valideynin beynində başqası.

Valideyn də uşaq üçün ən əhəmiyyətli nümunədir

Valideyn-uşaq münasibətlərini dünyanın bir çox ölkəsində ciddi araşdırırlar. Tez-tez hər hansı bir tədqiqatın nəticəsi də açıqlanır. Yüzlərlə kitab, təlimat yaradılıb. Nəyisə bilmirsənsə, uşaq psixoloqundan tutmuş ən müxtəlif növ mütəxəssisə müraciət edə bilərsən. Ölkə var, uşağa fastvud yeməyi qətiyyətlə qadağan edilib. Hər dərsdə onun ziyanından danışırlar. Baxırsan, belə qida satılan şəbəkəyə turistdən başqa heç kim getmir. Valideyn də uşaq üçün ən əhəmiyyətli nümunədir.

Bir ölkə, toplum olaraq yeni dönəmdə “uşaqlara münasibətdə necə davranmalıyıq” sualına cavab axtarmalıyıq. Uşaq valideyndən çox zəmanəsinə bənzəyir deyə, valideyn zamanın nəbzini tutmağı bacarmalı, uşağa irəlidə gedən bir flaqman kimi yol göstərməlidir.

42
Teqlər:
uşaqlar
PPX avtomobili, arxiv şəkli

Bakı sakini küçədə qətlə yetirilib

0
Hazırda prokurorluq və polis əməkdaşları tərəfindən cinayəti törətmiş şəxs və ya şəxslərin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir.

BAKI, 27 noyabr — Sputnik. Noyabrın 25-də saat 21 radələrində Xətai rayonu ərazisində İntizam İsmayılovun aldığı bədən xəsarətləri nəticəsində xəstəxanada ölməsi barədə Xətai rayon prokurorluğuna məlumat daxil olub.

Sputnik Azərbaycan Baş Prokurorluğun məlumatına istinadla xəbər verir ki, dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Faktla bağlı Xətai rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanmış, müvafiq ekspertizalar təyin edilib.

İstintaqla hadisənin zərərçəkmişin yaşadığı evin yaxınlığında naməlum şəxs və ya şəxslər tərəfindən aralarında yaranmış münaqişə zamanı törədilməsinə əsaslı şübhələr müəyyən edilib.

Hazırda prokurorluq və polis əməkdaşları tərəfindən cinayəti törətmiş şəxs və ya şəxslərin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir.

0
Teqlər:
cinayət, istintaq, Bakı, qətl, Xətai rayonu, Xətai