Abqoranın hazırlanması

Kal üzümdən hazırlanan məhsul: təzyiqi aşağı salır, qanda şəkəri azaldır

1050
(Yenilənib 19:26 20.08.2020)
Abşeronlular avqustun gəlişini həm də abqora hazırlamaq üçün gözləyirlər. Yay qaydasında keçibsə, onda elə avqustun ilk 3 günündə bu müalicəvi məhlulu hazırlayarmışlar

BAKI, 20 avqust — Sputnik. Avqust, bəlkə də Bakı camaatının ən çox sevdiyi aydır. Hava həm isti olur, həm də bol şeh əmələ gəlir. Əncir dəyir, üzüm yetişir. Bu il havalar elə də isti keçməsə də, adətən ayın əvvəli çox isti olur. “Qorabişən ay gəldi” deyirlər xalq arasında. Avqustda həm üzümün qorası bişir, yəni dəyir, həm də hava bir az başlayır çönməyə. Avqust ayının ortasına təsadüf edən vaxta xalq arasında deyirlər, “quyruqdondu” və ya “quyruqdoğdu” dövrü gəlib. Hər iki cür adlandırılması var. Bu dövrdən sonra bəzi təsərrüfat işlərini görmək olar.  Hava sərinləşdiyindən kəsilən qoyunun quyruğu də əridikcə donurmuş.

© Sputnik / İsmayıl Rafiqoğlu
Abqoranın hazırlanması

Diabet və ürəyin işemik xəstəliyi olan insanlar abqoranı daim qəbul edirlər

Abşeronlular avqustun gəlişini həm də abqora hazırlamaq üçün gözləyirlər. Yay qaydasında keçibsə, onda elə avqustun ilk 3 günündə bu müalicəvi məhlulu hazırlayarmışlar. Abqora turş, hələ dəyməmiş, kal üzümdən hazırlanan məhsuldur. Əgər bir az qoranı tez yığsan, canında suyu olmayacaq, geciksən, şirinləşəcək və istədiyin abqoranı ala bilməyəcəksən. Bəzən qoranın bişməsi və ya dəyməsi havadan asılı olaraq iyulun sonu, avqustun ilk həftəsi intervalında dəyişə bilər.

Abqora turş məhsuldur, tərkibində bir çox əvəzolunmaz vitamin və mineral var. Bir çox, məsələn, limon, alma kimi orqanik turşuya abqorada rast gəlinir. Arterial təzyiqi aşağı salır, normada saxlayır, damarların kirəclənməsinin qarşısını alır, qanda şəkəri azaldır, ürək-damar xəstəliklərində xeyri var. Diabet və ürəyin işemik xəstəliyi olan insanlar abqoranı daim qəbul edirlər. Yağlı xörəklərlə yararlıdır, həzmi rahatlaşdırır. Əsl abqoranın əvəzi yoxdur.

Abqora həm fol turşusu, həm də K və P vitaminləri ilə boldur. Fol turşusu qan əmələ gəlməsini gücləndirir, K vitamini qanın laxtalanmasına müsbət təsir göstərir, P vitamini isə damarların möhkəmlənməsinə səbəb olur. Abqora tənəffüs yollarının iltihabında, qan azlığında, babasildə, bronxial astmada, maddələr mübadiləsinin pozulmasında, yuxusuzluqda, böyrək və qaraciyər xəstəliklərində məsləhət görülür. Bakının, demək olar, hər bir kəndində hazırlanır, kiçik dükanlarda satılır.

© Sputnik / İsmayıl Rafiqoğlu
Abqoranın hazırlanması

Qədimdən qoranı adi qənbər daşla əzərmişlər

Bir neçə hazırlanma metodu var. Ən sadə yolu belədir: qoralar yığılır, diqqətlə yuyulur. Xüsusilə üzümə dərman vurulubsa, diqqətli olmaq lazımdır. Daha sonra bir neçə qab lazımdır. Alüminium ləyən, aşsüzən və daha bir emaldan olan qazan işə yarayar. Qədimdən qoranı adi qənbər daşla əzərmişlər. Hazırda da bu metod xalq arasında çox məşhurdur, çünki çaydaşı ilə əzilən qoranın toxumu əzilmir, salamat qalır, acısı şirəyə çıxmır. Toxumu faydalı olsa da, tərkibindəki tanin məhlula acılıq verir, dadı itir. Həm də tanin böyük miqdarda təhlükəli də ola bilər.

Bəzi insanlar xüsusi aparatdan da istifadə edirlər. Toxumu əzməyən belə qurğulara satışda rast gəlmək olur. Amma toxum əzildisə, bu abqoranı apar tulla. Deməli, alüminium qazanda qoraları yüngülcə əzirik, daha sonra tənzifə doldurub aşsüzəndən emal qazana sıxırıq. Məhlulu süzdükcə, onu şüşə balona doldurmaq lazımdır. Alınan maye bir müddət sonra həmin bu abqoraya çevriləcək. Abqora üçün hər üzüm yaramaz. Abşeronda Cavanşir, Xalbəsər sortlarından əla məhsul alınır. Yəni heç kim Dərbəndi, Kişmiş, Ağ şanı, Ala şanı kimi yeyiləsi üzümü abqoraya sərf eləməz. Sirkəyə hər cür üzüm yarayar, amma abqora üçün saf, hələ dəyməmiş üzüm salxımı işlədildiyindən həmişə sirkədən baha olur. Bəzən isə heç tapılmır da. Gərək həyətində bir-iki Xalbəsər üzümün ola ki, ondan abqora hazırlayasan. Bu sort üzüm elə də dadlı olmur, amma sirkə və abqoraya yarayır.

Abqora bir müddətdən sonra durulur, rəngi ağappaq olur

Turş üzüm şirəsini mütləq 3 litrlik balona süzmək lazımdır, ağzı tənziflə bağlanır və kənara qoyulur. İlk sıxıldıqda rəngi sarımtıl-yaşıla çalır, bulanıq olur. Kölgəli yerdə bir ayacan qala bilər. Üzərini xüsusi bir pərdə örtür, bəzən ana adlanan göbələklə də bağlana bilər. Bu, abqoranı buxarlanmadan qoruyan bir qatdır. Olmasa, elə yox olub gedər. Balonda çox saxlamaq məsləhət deyil, elə buxarlanma səbəbindən. Bir çox insan elə bir həftə saxlayıb ağzı dar qablara süzür. Həmin qabın da ağzını tənziflə bağlamaq lazımdır.   

Abqora hazırlanmasına bir neçə yaşanma var. Süzülmüş turş şirəni elə balonqarışıq günəşli bir yerdə iki-üç gün saxlamaqla abqoranın əmələ gəlməsini sürətləndirmək olar. Tərkibində az da olsa, şəkər var deyə mütləq qıcqırma prosesi getməlidir. Kölgədə bu proses daha uzun müddətə reallaşır. Gündə qaldısa, qıcqırma tez bitir, sonra süzüb kənara qoymaq olur.

© Sputnik / İsmayıl Rafiqoğlu
Abqoranın hazırlanması

Abqora bir müddətdən sonra durulur, rəngi ağappaq olur. Bəzən gündə çox qaldıqda rəngi qırmızıya çalır. Bəzən qırmızımtıl rəng üzümün sortuna da bağlı ola bilər. Bir neçə dəfə süzməklə ideal məhsul almaq mümkündür. Əvvəllər dar şüşə qaba süzülmüş abqoranı isti quma da basdırarmışlar. Yəni birbaşa günəş şüası yox, isti qumda bişərmiş. Abqora hazır olandan sonra şüşə qabın ağzını bağlamaq və sərin bir yerdə uzun müddət saxlamaq olar. İstifadə zamanı şüşənin ağzı açıldısa, bitənəcən soyuducuda olmağı məsləhətdir.

Abqora sevərlər adətən iki məsələ ətrafında mübahisə edirlər

Abqora hazırlamağın bir neçə fərqli üsulu da var. Bəzən qoranı yığıb yuyandan sonra bir qədər əzib 3 litrlik balona yığırlar. Ağzını bağlayıb günəşdə iki-üç gün saxlayırlar. Günəş şüaları qoranı yumşaldır, onu əzən zaman daha çox şirə buraxır. Bu metodun mənfi tərəfi də var. İmkan olmasa, yaddan çıxsa, tez bir zamanda kiflənə də bilər. Qoralar zay olub gedər.

Başqa bir yol da var. Sıxılmış şirəni bir qədər kölgədə saxladıqdan sonra yumurtanın ağını məhlula qatırlar. Bu prosesdə yumurtanın ağı abqoranın tərkibindəki taninlə birləşir və çöküntü halında aşağı enir. Süzüldükdən sonra tərkibində acılıq duyulmur.

Abqora sevərlər adətən iki məsələ ətrafında mübahisə edirlər. Kimsə məhlulun günəşdə tez bişməsinin tərəfdarıdır, kimsə də kölgədə uzun müddətə əmələ gəlməsinin. Hər halda gərək müddəti düzgün seçəsən, bir az o yan-bu yan oldu, əmələ gəlməz. Ağzıaçıq çox qalsa, dadı qaçar, az saxlayarsan, sonra ağzını açanda şampan şərabı kimi partlayıb ev-eşiyi batırar.

© Sputnik / İsmayıl Rafiqoğlu
Abqoranın hazırlanması

Daha turş olur, rəngi də qırmızıya çalır

Azərbaycanda abqora zavod şəraitində Ağsunun “Azgranata” zavodunda istehsal edilir. Bu abqora dadına görə əllə hazırlanan məhsuldan fərqlənir. Daha turş olur, rəngi də qırmızıya çalır. Zavod şəraitində sterilliyi gözləmək üçün yüksək dərəcədə bağlanır, bu halda rəngi dəyişir. Məhsulun bazara çıxarılması müsbət haldır, hər halda şəhər əhalisi bu məhsulu əldə etmək imkanı qazanıb.

Qorabişən ay bitəcək, bir müddət sonra abqoradan yararlanmaq mümkün olacaq. Təzə məhsul da Bakıətrafı kəndlərin xırda dükanlarında peyda olacaq, həm hazırlayana, həm satana, həm də alana fayda verəcək.

1050
Teqlər:
bağ, üzüm, Abşeron
Əlaqədar
Adi göbələkdir, amma qanda şəkəri azaldar, mədə florasını bərpa edər
Dünyanın koronavirus büdcəsi tükənir: xəstəliyə necə qalib gələcəyik?
Xəzrinin musiqisi, samovar çayı, tutlu plov: yaşlıya savab, cavana səhhət
Supergüclərin “yaşıl” energetika oyunu: nefti satan uduzur, alansa qazanır
Koronavirus bizə çətin qalib gələ, çünki bizim ona qarşı silahımız var
Bankada manat, arxiv şəkli

Uğurlu sahibkarın arsenalı: xırda pul, POS terminal, şirin söz, gülərüz ifadə

41
(Yenilənib 22:32 02.12.2020)
Bəzi ziyanlı adətlər də pul qıtlığına səbəb olur. Məsələn, insanlarda daxıla xırda pul toplamaq ənənəsi var.

Sizdə 50 manata xırda olmaz? Bəlkə iyirmiliyə xırda tapılar? Bu kimi ifadələri tez-tez mağaza və müxtəlif ticarət mərkəzlərində eşidirik. Bəzən elə ofis daxilində də kimsə bir əsginasla gəzib xırda axtarır. Xırda pul tapılmır ki, tapılmır.

Kiçik məhəllə dükanlarında xırda pul daima tapılmır

Pulu xırdalamaq problemi həm taksidə, həm aptekdə, həm də bazarda hiss olunur. Bazarda bəzən elə də böyük olmayan pulu bu ona ötürür, o da buna. Güc-bəla ilə xırdalayırlar. 5, 10, 20 manatı rahat xırdalamağın yolu hələ də kart sisteminə keçməyən marşrutda olur. Burada xırda nə qədər desən var, hətta bəzən xırda puldan bezib bir ovuc qəpiyi benzindoldurma məntəqəsinə təhvil verirlər.

Kiçik məhəllə dükanlarında isə xırda pul daima tapılmır. Gündəlik alver böyük deyil deyə 50 və ya 100 manatı burada xırdalamaq mümkünsüzdür. Hətta dükandan nəsə alanda belə gərək yanında xırda pulun ola, yoxsa alver baş tutmayacaq. Bir sıra iri satış şəbəkəsində pul xırdalamağa icazə yoxdur, nəsə mütləq almalısan. Kiçik də olsa, bir mal alsan, bir söz demədən qalığı verəcəklər, amma almalısan. Bunu, əslində, uğurlu marketinq gedişi saymaq olar. Dükan və ya şəbəkə pul xırdalamaq yeri deyil, bura alış-veriş məntəqəsidir. Alver elə, pulunu xırdalayaq.

Xırda pul məsələsi çox zaman sahibkarın səriştəsizliyinə bağlıdır

Pulu problemsiz yalnız banklarda fəaliyyət göstərən valyuta məntəqəsi və ya kassada xırdalamaq olar. Müraciət etdikdə, xırdalayırlar da. Amma pul xırdalamaq bankın işi deyil əsla. Yəni, göstərilən xidmət siyahısında pul xırdalamaq öhdəliyi də yoxdur. Sadəcə pulla işləyən təşkilat olduğuna görə hər bir bank pulu xırdalamalıdır bir növ. Bəzən xırdası da olmaya bilər. Bank özü pul çap eləmir, gərək kassaya pul gələ ki, müştəriyə bu xidməti göstərmək mümkün olsun. İri supermarket və ya ticarət şəbəkəsi xırda pulu əldə etmək üçün hesabı olduğu bankdan onu əvvəlcədən sifariş verməlidir. Marketlər hətta əlində xeyli xırda pulu, qəpiyi olan vətəndaşdan da qəbul edib onu iri əsginasla əvəzləyirlər. Mümkün olan kanallarla alış-verişin bir an belə dayanmasına yol verməmək üçün xırda pulu toplayırlar.

100 və 200 manat dəyərində olan iri əsginaslar adətən marketdə ayrıca yığılır. Hərdən digər əməkdaşlar isə ara-sıra xırda pulu kassaya təhvil verirlər. Xırda pul olmasa, kassada toplaşan müştərilərin çox uzun növbəsi yaranar. Kiçik dükanda, elə də böyük dövriyyəsi olmayan marketlərdə də xırda pul məsələsi çox zaman sahibkarın səriştəsizliyinə bağlıdır. Bir çox satıcı deyir, mən nə edə bilərəm, dükanın yiyəsi axşam gəlib pulu kassadan götürərək onu sıfırlayab. Səhər alverinə xırda pul yoxdur. Hər gün əlində pulla ora-bura qaçaraq onu xırdalamağa çalışan satıcının üzləşdiyi çətinliyi müşahidə edirik.

"Bura pul xırdalamaq yeri deyil"

Kiçik biznesi olan sahibkar obyektdə xırda pul saxlamaq istəmir, yəqin satıcıya etibar eləmir bəlkə də. Amma biznes daim gərginliklə işləyir. Satıcı da bir gün ora-bura qaçır, iki gün, sonra biganələşir. İri əsginası görən kimi deyir, xırda yoxdur, vəssalam. Satıcının çoxu olduqca kiçik maaşa işləyir, bu heç kim üçün sirr deyil. Belə olan halda sahibkar öz biznesini düşünmürsə, satıcı niyə onun yerinə düşünməlidir? 300 manat maaşa satıcı həm mal satmalı, həm pul xırdalamalı, həm kamera yerinə nəzarətçi olmalıdır, çünki hər oğurlanan mala görə də cavabdehdir. Dükanı qoyub getdisə, həmin məqamda guya alverə gələn müştəri bəzən əlinə keçəni atır çantasına. Həm pulunu xırdalayır, həm də oğurluq edir.

Kiçik obyekt yiyəsinin bir çoxu elə köhnə qayda ilə alver edir. Amma dünya dəyişib, indi insanları bəyənmədiyi nəyisə almağa məcbur etmək çox çətin olub. Bu dükan olmasın, o birisi olsun. Gedib istədiyini başqa yerdən alacaq, daha 20 və ya 50 manatı xırdalamaq kimi problemi düşünməyəcək. Digər dükanda xidmət yaxşı olsa, deməli alveri də gedəcək. Dükan var, kiçik alver edirsən, bəzən "bura pul xırdalamaq yeri deyil" kimi acıqlı ifadələrlə qarşılaşırsan. "2 manatlıq alver edib 100 manat verirsənsə, deməli amalın saf deyil" kimi düşünən sahibkarın sayı bir deyil, iki deyil. Onların dükanı bağlanacaq bir gün.

Nəinki qəpik, hətta 1 və 5 manatı da toplayan az deyil

Xırda pul probleminin yaranmasının başqa səbəbləri də var. Ölkədəki pul dövriyyəsində xırda pul çatışmır, bu həqiqətdir. Hələ uzun illər öncə, metal pul formasında 1 və 5 manatlıq pulların buraxılması təklif edilmişdi. Bu siyahıya hətta yeni 2 manatlıq metal pulların da buraxılmasını əlavə etmək olar. Metal pullar kağıza nisbətən daha çox xidmət edir, orta hesabla 25-30 il işə yarayırlar. Dövriyyəyə daha çox xırda pul buraxmaq lazımdır. Bəzi ziyanlı adətlər də pul qıtlığına səbəb olur. Məsələn, insanlarda daxıla xırda pul toplamaq ənənəsi var. Nəinki qəpik, hətta 1 və 5 manatı da toplayan az deyil. Nəticədə məhz ehtiyac duyulan pullar tapılmır.

Son on ildə onlayn vasitələrin artması, elektron və nağdsız hesablaşma imkanlarının mövcudluğu bir sıra hallarda kağız və metal pula olan tələbatı xeyli azaldıb. Nəqliyyatın çox hissəsi kartla ödənişə keçib, bank kartı ilə kommunal xərclərin bir çoxunu internetdən ödəmək olar. Mobil əlaqə üçün pul yükləmək, bank kreditini və üstünə yazılan cəriməni məsafədən ödəmək olar. Elektron ticarət isə yalnız internetdən ödənilir, nağd yolla ödəmək mümkün deyil.

Onlayn ödəmə imkanları asanlaşdıqca, xırda pul problemi aradan qalxa bilər

Nağdsız ödəmə imkanlarını artırmaq üçün hazırda bir neçə layihə də reallaşır. Məsələn, Şamaxının bəzi avtobus xətlərində artıq ödəməni bank kartı və ya mobil qurğunun köməyi ilə reallaşdırmaq olar. Bu, yaxşı təşəbbüsdür. Nəqliyyat kart sisteminə keçsə də, bunu tam mənada onlayn sistem saymaq olmur. Çünki mövcud olan kartlara da pulu gərək nağd yolla aparatdan yükləyəsən. Bakı Nəqliyyat Agentliyi artıq neçə ildir bu kartlara məbləğin internetdən yüklənə bilməsi üçün xüsusi imkanların yaradılacağı barədə açıqlamalar versə də, sistem hələ də yaradılmayıb. Pul yükləmək üçün nəqliyyat bankomatların önündə yaranan növbələr insanları narahat etməkdədir.

Ölkədə işıq və qaz sayğaclarının yenilənməsi prosesi davam edir. Yeni tip sayğac tam olaraq internetə inteqrasiya edilib deyə daha harasa getməyə ehtiyac yoxdur, hər bir ödəmə elə internetdən olacaq. Azərbaycan Dəmir Yollarında da bəzi yeniliklərin olacağı gözlənilir. Bank kartları ilə birbaşa ödəniş etməklə hazırda Bakı və Abşeronda hərəkət edəcək elektrik qatarlarında hərəkət etmək mümkün olacaq.

Onlayn ödəmə imkanları asanlaşdıqca, ticarət şəbəkəsində hər gün rastlaşdığımız xırda pul problemi də tədricən aradan qalxa bilər. Xırdalama prosesində təkcə pulun özü yox, həm də əsginasın keyfiyyəti də münaqişə probleminə çevrilə bilər. Cırıq, əzik, üzülmüş pulları nə bu tərəf, nə də o tərəf götürmək istəmir.

Müasir texnologiyalar həyatımızda yaranan bir çox kiçik, psixoloji problemləri aradan qaldırmağa ciddi kömək edə bilər. Amma hər bir çətinliyin aradan qalxması birbaşa insan amilinə bağlıdır. Bazarda qalıb işləmək istəyən sahibkarın həm xırda pulu, həm də normal işləyən POS terminalı olmalıdır. Ehtiyatda şirin sözü, üzündə isə gülərüz ifadəsi də işə yarayar. Hər bir müştəri qızıl kimi qiymətlidir.

41
Teqlər:
gündəlik, alver, alıcı, market, 10 manat, xırda pul
Pəncərə yaxınlığında kişi, arxiv şəkli

İcazə verin, evinizin pəncərəsindən keçmişimə boylanım...

142
(Yenilənib 22:16 30.11.2020)
Bəlkə də, evimiz, ünvanımız, daimi yaşayış yerimiz olmadığı üçün xoşbəxtlik axtarıb tapa bilmir bizi... Evimiz olsa, qapımızı döyərdi, mütləq.

Kirayədə qaldığım evlər tez-tez yuxuma girir. Divarları, mebelləri, qapı-pəncərələri, xatirələri ilə birgə...

Ən çox oğlumun ayaq açıb gəzdiyi, dil açıb ilk dəfə "ata" dediyi, Gəncədəki kirayə evi xatırlayıram.

Dörd otaq, bir mətbəx, oğlumun kövrək addımlarını atdığı iki addım eni, üç addım uzunu olan darısqal həyət girir yuxularıma.

Gəncədə xəsarət alan uşaq, arxiv şəkli
© Sputnik / Mihail Voskresenskiy

Universitetdən tələsə-tələsə gəlib, həyətdə qollarını açıb məni gözləyən oğlumla qarşılaşdığım o evi, üstündən on ildən çox keçsə də, unuda bilmirəm.

Hərdən, Bakıya köçəndən sonra kirayə qaldığım evləri də xatırlayıram. Darısqal mənzillər, hər dəfə xırda bir probleminə görə narahatlıq keçirdiyim başqasına məxsus evlər.

Hər kitabımı kirayə qaldığım evlərin birində yazmışam.

Acılı-şirinli xatirələrim səpələnib müxtəlif ünvanlara. Yaşadığım gözəl anları xatırlamaq istəsəm, hökmən kiminsə qapısını döyməliyəm.

"İcazə verin, evinizin pəncərəsindən keçmişimə boylanım..."

Adamı qapıdan qovarlar bu xahişə görə...

***

Evlər var ki, sadəcə evdir – xatirəsiz, keçmişsiz.

Evlər var ki, biz xatirələrə boylanmaq istədiyimiz pəncərələrinə indi qara pərdələr asılıb.

Evlər var ki, qapısını aylarla, illərlə açan olmur. Hətta sahibinin də yadından çıxıb.

Evlər var ki, kimsə məşuqəsi ilə görüşmək üçün, ildə, ayda bir dəfə açır qapısını. Toz basmış mebellərdə, yumşaq qadın barmaqlarının ürkək izi qalır, sonra o izləri də toz basır.

Evlər var ki, sobasının üstündə hisli çaydan, yanında saralmış dəm çayniki, pərdələrini də his basıb – Kiminsə yolunu gözləyir...

Evlər var ki, qapı zəngi səbirsizliklə gözləyir çalınmasını, içərisində bir ana səksəkəylə o zəngin səsinə həsrətdir.

Evlər var ki, balkonunda bir bayraq dalğalanır qürurla.

Evlər var ki, balkondakı zivələrdə uşaq paltarları yellənir sevinclə...

Evlər var ki, illərdir heç kəs pərdəsini aralayıb, günəşi salamlamır.

***

Sahibinin unutduğu, sahibini unudan evlər var.

Hansı binanın, hansı mərtəbəsində yerləşdiyini unutduğunuz evlər, küçədəki evsizlərin haqqıdır bəlkə də.

Ən dəbdəbəli evdə, villada, sarayda belə əbədi həyat yaşamaq mümkün deyil.

Daxmalarda xoşbəxt yaşayanlar, saraylarda qəhr olanlar var.

Daxmalar da evdir, saraylar da...

Xoşbəxtlik hansının qapısını döyəcəyini özü seçir.

Amma sənin ünvanın yoxdursa, xoşbəxtlik hansı qapını döyəcək?

Bəlkə də, evimiz, ünvanımız, daimi yaşayış yerimiz olmadığı üçün xoşbəxtlik axtarıb tapa bilmir bizi...

Evimiz olsa, qapımızı döyərdi, mütləq.

Evimiz olsa, qonaq gələrdi xoşbəxtlik...

***

Ölkəmdəki evsizlərin sayı məlum deyin. On minlərlə, yüzminlərlədir, bəlkə də.

Kirayələrdə yaşayanların da sayı bəlli deyil.

Əminəm ki, mənimlə eyni taleyi yaşayan, minlərlə, on minlərlə insan var – xatirələri pərən-pərən, keçmişi perik düşmüş...

***

Ömrümün ən kədərli ayında səs-küylü prosepektdə, kirayə qaldığım evdə xatirələrə boylanıram.

Bilirəm ki, mənim kimi neçə-neçə insan öz xatirələrini yad qapısında buraxıb, köçüb bu dünyadan.

Salam da deyir ki;

Bir böyük ölüm ver, qoy bəsim olsun…

Çörək - daşdan çıxan nəfəsim olsun…

Hər evin xatirə lövhəsi olsun -

hər kəs mismarlansın öz divarına.

Eh şair... Bizim xatirə lövhəsi kimi mismarlanacaq divarımız da yoxdur...

142
Məktəblərin birində, arxiv şəkli

Professor məktəblərdə dərslərlə bağlı təklif irəli sürüb: "Özüm hazırlayıb keçərəm"

0
(Yenilənib 13:08 05.12.2020)
"Düşünürəm ki, ali məktəb rəhbərləri və Təhsil Nazirliyinə müraciət etdikdən sonra məsələni kütləviləşdirmək və reallaşdırmaq olar" - Nəsiman Yaqublu

BAKI, 5 dekabr — Sputnik. Məktəblərdə "Zəfər-Vətən" dərslərinin keçirilməsi ilə bağlı təklif irəli sürülüb. Bakı Dövlət Universitetindən Sputnik Azərbaycan-a verilən məlumata görə, bu təkliflə universitetin professoru Nəsiman Yaqublu çıxış edib. O bildirib ki, "Zəfər-Vətən" dərsləri zamanı bütün müəllimlər tarixi qələbəmizdən, o cümlədən bu zəfərin əhəmiyyətindən, azad edilmiş ərazilərimizdən, şəhid və qazilərimizin fədakarlığındann birlik və həmrəyliyimizdən danışsınlar:

"Sərəncama uyğun olaraq hər il noyabrın 8-də ali və orta məktəblərdə xüsusi mövzunun - "Zəfər-Vətən" dərslərinin keçirilməsi müsbət addım olar. Biz bu günləri unuda bilmərik. Düşünürəm ki, müxtəlif görüntülər, slaydlar vasitəsilə zəfər tariximizlə bağlı dərslərin keçirilməsi məqsədəuyğun olar. Şəxsən mən həmin materialları hazırlamağa və dərsi tədris etməyə hazıram".

"Biz gənclərimizi şəhidlərimizin, qazilərimizin ruhunda tərbiyə etməliyik. Düşünürəm ki, ali məktəb rəhbərləri və Təhsil Nazirliyinə müraciət etdikdən sonra məsələni kütləviləşdirmək və reallaşdırmaq olar".

0
Teqlər:
Zəfər Günü, Vətən, BDU, professor, dərs, məktəb