Bakıda qəzet satışı, arxiv şəkli

Yubileyin astanasında: Rəngli qəzetlər, “alternativ siyahılar” iddialı acgözlər…

771
(Yenilənib 15:05 16.07.2020)
Milli Mətbuat Günü yaxınlaşdıqca həmkarlarımızın həyəcanı da yüksəlir. Təltiflər, fəxri adlar, hədiyyələr yağış kimi yağacaq. Axı 145 il elə belə tarix deyil! Milli Mətbuatın fikir babası Həsən bəy Zərdabi bu günləri görsəydi, yəqin ki, çox sevinərdi…

BAKI, Sputnik – 16 iyul. Azərbaycan milli mətbuatının 145 illik yubileyinə sayılı-sanalı günlər qalıb. Ölkə prezidenti bu möhtəşəm yubileyin qeyd edilməsi ilə bağlı sərəncam imzalayıb. Bəzi qəzetlər bu yubiley ərəfəsində gündəlik nəşrini bərpa etdi, yeni təyin olunan KİVDF rəhbərliyi bu qəzetlərdə çalışan həmkarlarımıza ilk sevincini yaşatdı.

Açığı elektron mətbuatın bir addım irəlidə olduğu, sosial medianın gücünün durmadan artdığı bu dönəmdə qəzetlərin gündəlik nəşrini bərpa etməsinə bir anlam verə bilməsəm də, həmkarlarımızın sevincinə şərikəm. Ümumiyyətlə pandemiyanın tüğyan etdiyi bu dövrdə, jurnalistlərin, jurnalistikanın diqqətdən kənarda qalmaması, yenidən həmkarlarımızın üzünü güldürən addımların atılması sevindiricidir. Ümid edirəm ki, KİVDF-nin qrantı ilə gündəlik nəşrini bərpa edən, hətta rəngli formata keçən qəzetlərimiz fəaliyyətlərini düzgün şəkildə qura, cəmiyyətimiz, insanlarımız üçün faydalı ola biləcəklər.

Ölkə prezidentinin sərəncamına uyğun olaraq Prezident Administrasiyasına koronavirus (COVID-19) pandemiyası ilə əlaqədar Azərbaycan ərazisində tətbiq edilən xüsusi karantin rejiminin tələbləri və Nazirlər Kabineti yanında Operativ Qərargahın tövsiyələri nəzərə alınmaqla yubiley tədbirlərinin keçirilməsini təmin etmək tapşırılıb.

Açığı zaman daralsa da, bu tədbirlərlə bağlı hər hansı ciddi addımın atıldığını deyə bilməyəcəm. Bəlkə də, hansısa addımlar atılıb, mən xəbərsizəm, əfv edin! Təbii ki, böyük və dəbdəbəli zallarda bayram ziyafətləri pandemiya dönəmində qeyri-mümkündür. Ancaq yəqin ki, Administrasiya müəyyən işlər görəcək. addımlar atacaq və bu görülən işlərdən sonra bu barədə danışmaq daha asan olacaq.

Milli Mətbuat Günü yaxınlaşdıqca həmkarlarımızın həyəcanı da yüksəlir. Təltiflər, fəxri adlar, hədiyyələr yağış kimi yağacaq. Axı 145 il elə belə tarix deyil! Milli Mətbuatın fikir babası Həsən bəy Zərdabi bu günləri görsəydi, yəqin ki, çox sevinərdi…

Varislərinin canfəşanlığı, həyəcanla bu bayramı gözləməyi yəqin rəhmətliyin xoşuna gələrdi. Əhalisinin cüzi bir hissəsi oxuyub-yazmağı bacaran toplum üçün “Əkinçi”ni yoxdan var edən böyük mütəfəkkir, bəlkə də qurduğu milli mətbuatın bu günlərə gəlib çıxacağını düşünməzdi.

Mən nədənsə bu yubiley ərəfəsində peşəsini icra edərkən döyülən, həbs edilən, təqib olunan, təhdid edilən, təhqirlərlə üzləşən, xəstəlik tapan və hətta öldürülən həmkarlarımı düşünürəm. Nə yaxşı ki, bu cür insanlar gəlib-keçib mətbuatımızdan.

Bayram, yubiley ərəfəsində pessimist, neqativ notlara köklənmək istəməzdim. Bir göz qırpımında keçib gedən bu 145 ildə mətbuatımızın keçdiyi yola nəzər salanda, bu tarixi azacıq araşdıranda üzümüz gülməsə də, sevinəcəyimiz məsələlər də az deyil. Hər şeydən önəmlisi bizim ana dilimizdə mətbuatımız var. 

Bu bir qələm adamı olaraq şəxsən mənim üçün əvəzolunmaz nemətdir. Ana dilimdə yazdıqlarımı nəşr etdirmək üçün mətbuatımızın olması ciddi anlamda qürurvericidir. Bundan sonra nə qədər neqativ, xoşagəlməz hal, xüsus varsa hamısı zamanla düzələcək, hər şey gec ya tez yoluna düşəcək, arzuladığımız kimi olacaq.

Bundan daha çətin, ağır günləri olub mətbuatımızın.

Yubiley dönəmində təltif, fəxri ad, hədiyyə gözləyən həmkarlarıma, bunu açıq-aydın bəyan edən qələm adamlarına üzülməmək əldə deyil. Düşünürəm ki, jurnalist, ümumiyyətlə yaradıcılıqla, yazıyla, sözlə məşğul olan adam əlabaxım olmamalıdır. İşinin, peşəsinin məsuliyyətini dərk edən qələm adamı bütün bu şeylərdən arınmağı, gördüyü işi sevməyi və zövq almağı bacarmalıdır.

Prezident Administrasiyasının, KİVDF-nin, Mətbuat Şurasının yubileyqabağı  susqunluğu bəzi həmkarlarımızı darıxdırır.

Əksər həmkarlarımız 145 illik tarixi, bu möhtəşəm yubileyi unudub, bütün diqqətini jurnalistlər üçün tikilən məlum və məşum “üçüncü bina”ya cəmləyib. Həmkarlarımı qınamaq fikrindən uzağam. Evsizlik olduqca ciddi sosial problemdir. Ancaq peşə kodeksini, peşə şərəfini unutduracaq qədər böyük faciə deyil. Düşünürəm ki, öncə layiqli jurnalist, qələm adamı olmaq lazımdır. Bunu bacarandan sonra, hədiyyələrə, təltiflərə, fəxri adlara qarşı da münasibət yerinə oturacaq.

Bəzi həmkarlarımız, dostlarımız “üçüncü bina”dakı mənzillər üçün “layiqli” jurnalistlərin siyahısını hazırlayır. Bəzi siyahılarda öz adımı görəndə məni niyəsə gic gülmək tutur. Və bu siyahılarda özümü görməmək üçün illərlə necə əziyyət çəkdiyimi xatırlayanda isə, üzülürəm.

Son günlər müzakirə olunan əksər “ədalətli siyahılar”, zamanında ev hədiyyəsi almışların siyahısından daha gülünc, daha biabırçıdır.

Qəribədir ki, evi, hətta bağ evi olan da ev almaq iddiasındadır. Dünən mətbuata gələn də, fəaliyyətinin jurnalistikaya dəxli olmadığını dərk edən də, “reket jurnalistikada” ad çıxaran da, işi-gücü yalan yazmaq olan da dövlətdən ev hədiyyəsi gözləyir.

Və özünə vicdanlı jurnalist deyən bu adamlar utanmadan iddiasını açıq şəkildə bəyan edir, hətta buna görə arsız-arsız dava edir, başqaları ilə söz güləşdirir.

Ay sizi, iddialı acgözlər!

Hə, bu siyahıları görəndə adam az qalır bundan öncəki illərdə ev alan katibələrə, məşuqələrə şükür etsin…

Bir də sevinirəm ki, heç vaxt bu cür cılız iddiada olmamışam, heç vaxt, heç kəsdən ənam, hədiyyə gözləməmişəm. Və xoşbəxtəm ki, 145 illik mətbuatımızın saralmış səhifələrində mənim də 3-5 cümləm var.

Qarşıdan gələn yubiley ərəfəsində baş verənlər, şəxsən mənim üçün çox maraqlı, eyni zamanda əyləncəlidir…

Həsən bəy Zərdabidən başlanan bu uzun yolun ən sərt döngələrinin birində dayanıb, maraqla baş verənlər barədə düşünürəm…

Nur içində yat, Həsən bəy!

771
Artilleriya atəşi, arxiv şəkli

Həftənin ən mühüm hadisəsi Layiqli cavab

257
(Yenilənib 01:05 29.09.2020)
Həftənin ən mühüm hadisəsi, heç şübhəsiz, Azərbaycanın cəbhədəki uğurlu əks-hücum əməliyyatları idi. Nəhayət, Ermənistan başa düşdü ki, Azərbaycan hərbi gücünü göstərmək istəsə, onlar ən azı İrəvana qədər qaçmalı olacaq.

BAKI, 28 sentyabr — Sputnik. 7x7 həftənin ən yaddaqalan hadisələrini şərh edir

Döyüş davam edir

Həftənin ən mühüm hadisəsi, heç şübhəsiz, Azərbaycanın cəbhədəki uğurlu əks-hücum əməliyyatları idi. Nəhayət, Ermənistan başa düşdü ki, Azərbaycan hərbi gücünü göstərmək istəsə, onlar ən azı İrəvana qədər qaçmalı olacaq.

Ermənilərin təxribatlara hazırlaşdığı, danışıqların formatını dəyişdirmək və yeni təcavüz planları üzərində işlədiyini son dövrlərdə bu ölkənin hərbi-siyasi ritorikası da aydın ifadə edirdi. "Qarabağ Ermənistandır, nöqtə" bəyanatından tutmuş qondarma "Dağlıq Qarabağ respublikası"nda seçkilər, Şuşadakı andiçmə, Paşinyanın bölgəyə səfəri, erməni hərbi rəhbərliyinin "yeni ərazilər uğrunda yeni müharibə" açıqlaması və Gəncəni vurmaqla təhdid etməsi, bölgəyə muzdlu döyüşçülərin gətirilməsi və nəhayət, yeni hərbi doktirinada Azərbaycanafob məqamların əksini tapması bu ölkənin təcavüzkar mahiyyətini və planlarını ifadə edir.

Bu da layiqli cavab!

© AR Ministry of Defence
Artilleriya bölmələrinin döyüş atəşi

Mövqe(sizlik)

Baş verən hadisələr zamanı ən çox diqqətçəkən məqamlardan biri də beynəlxalq təşkilatların daha çox neytral mövqe nümayiş etdirməsi idi. Hətta işğala son qoyulmalı olduğunu tələb edən 4 qətnamə qəbul etmiş BMT-nin baş katibi də katiblik etdiyi təşkilatın qətnamələrini xatırlatmır, birmənalı mövqe ortaya qoymur – soyuqqanlı şəkildə tərəfləri danışıqların davam etdirməyə çağırır. Eynilə də digər bir çox ölkələrin xarici işlər nazilrikləri və beynəlxalq təşkilatlar. Maraqlıdır, onlar bu 30 ildə harda idilər?!

Koronavirus?!

Cəbhədə baş verənlər bütün digər mövzuların aktuallıq dərəcəsini azaldıb. Məsələn, indi bizi heç qlobal bəla – koronavirus da bizi maraqlandırmır. Məsələn, dünənki infeksiyaya yoluxma sayı barədə məlumat yayıldığı kimi də "zibil qutu"suna düşdü.

Azərbaycan oxucusu tezliklə manşetlərdə, məsələn, bu xəbəri arzulayır: "Şuşada modul tipli xəstəxananın açılışı olub".

© Sputnik / Murad Orujov
Modul tipli xəstəxana

Korona məktəblərdə

Ötən həftənin hadisələrindən biri də koronavirusun məktəblilər və müəllimlər arasında yayılmağa başlaması idi. Təhsilin qismən bərpasından sonra bu, nisbətən gözlənilən idi. Hazırda Təhsil Nazirliyi TƏBİB modunda işləyir, statistikalar da bu nazirlik tərəfindən açıqlanır.

Ümid edək ki, məktəblərin yenidən bağlanmasına lüzum olmayacaq. Hərçənd, bunun da faydaları istisna edilə bilməz: distant təhsil dövründə valideynlər, şagirdlər və müəllimlər texnoloji biliklərini artırdılar.

ABŞ çökür?

ABŞ-ın Demokrat partiyasından prezidentliyə namizəd Co Bayden Rusiyanı seçkilərə müdaxilədə ittiham edib və bildirib ki, seçkilərdə qalib gələcəyi təqdirdə bu ölkəni ağır nəticələr gözləyir. Qeyd edək ki, Rusiyanın ABŞ-da keçirilən prezident seçkilərinə müdaxiləsi 2016-ci ildən gündəmdədir.

Co Bayden, arxiv şəkli
© AFP 2020 / ROBERTO SCHMIDT
ABŞ-ın Demokrat partiyasından prezidentliyə namizəd Co Bayden

Bu günlərdə isə Tramp Rusiya Prezidenti Vladimir Putinlə "yaxşı anlaşdığına" görə tənqid olunduğuna təəccübləndiyini söyləmişdi.

Norveçəli professor var - Johan Galtung. Bir çox hadisələrə dəqiq proqnoz verməsi ilə ad çıxarıb. O 2000-ci ildə ABŞ-ın qlobal güc kimi 2025-ci ilədək çökəcəyini bəyan etmişdi. Və bir neçə gün öncəki daha bir məlumat: BMT Baş katibi Antonio Quterres deyib ki, BMT ABŞ-ın İrana qarşı sanksiya tələbini nəzərdən keçirmir. Son dövrlərdə Avropa Birliyi ölkələrinin rəsmi Tehranla, türklər demiş, daha sıcaq ilişkiləri də Ağ Evin təklənməyi kimi şərh olunur.

Su böhranı

Hazırda ölkədə su istehlak edən 1 milyon 523 min əhali abonentinin 227 mini sayğacla təmin olunmayıb. Bunu ötən həftə "Azərsu" açıqlayıb.

Uşaq əllərini yuyur, arxiv şəkli
© AFP 2020 / DANIEL LEAL-OLIVAS
Kişi əllərini yuyur

Cənubi Qafqazın ən az içməli su resurslarına malik, su ehtiyatlarının böyük həcmi düşmən ölkənin daxilində formalaşan ölkə kimi suya qızıl kimi baxmalıykən, onu amansızcasına israf edirik. Dövlət başçısının bu sahə ilə bağlı xüsusi müşavirə keçirməsi də dövlət səviyyəsində narahatlıqdan irəli gəlirdi. Gələcək müharibələrin su hövzələri uğrunda olacağından artıq yalnız dövlət yox, hamımız narahat olmalıyıq.

Hələlik isə müharibə Qarabağdadır – Azərbaycan öz torpaqlarını azad edir!

257
Televizora baxan adam, arxiv şəkli

Rəsmi məlumat gözləyərkən: Uşağın məktəbi də, koronavirus da, maska da əhəmiyyətini itirib

224
(Yenilənib 19:37 28.09.2020)
Çoxdan işlətmədiyi radiosunu işə salan, internet gələndən kənara atdığı antenanı quraşdıran nə qədər insan var. İllərlə arzuladığı bir qırıq sözü eşitmək arzusu ilə hərə bir yolla məlumat almaq istəyir.

Müharibə asan görünən işləri çətinləşdirir. Bir anda görə biləcəyin hər hansı məsələ bəzən çətin problemə çevrilir. Bir anda narahatlıq yaranır, istəyirsən yaxın bir adamına zəng edəsən, görürsən şəbəkə yüklənib. Hamı sənin kimi zəng etmək istəyir deyə heç yerə siqnal çatmır.

İnsanı bir vahimə bürüyür. Hətta adi telefonla da zəng edə bilməyəndə, düşünürsən, bunun axırı necə olacaq, görəsən. Kimsə tez əlinə bir zənbil alıb qaçır dükana, lazım gəldi, gəlmədi əlinə keçəndən alıb atır zənbilinə. Düşünür, sabah bir çətinlik olsa, evində bir ehtiyatı olar.

Çoxdan kənara atdığı qaz balonu da aktuallaşır, bir də baxırsan, vurub qoltuğuna düz yönlənir qazdoldurma məntəqəsinə. Doldurur, qayıdır evinə, atır bir küncə. Evində xəstəsi olan qaçır aptekə, olan dərmandan bir az artıq alıb yığır. Amma interneti yüklənəndə və ya kəsiləndə lap müdafiəsiz olur müasir insan, nə ödəmə, nə taksi sifariş edə bilir. Elə belə qalır vakuumda. Nə edəsən, hara qaçasan, kimlə danışasan? Bu sualların əlində də aciz qalır.

Komfort şəraitə öyrəşmiş insanın çətin durumda atacağı addımları da qabaqcadan proqnozlaşdırmaq olmur. Elə oradan bura, buradan ora xaotik hərəkət etməklə bir yol axtarır. İnternet olmasa da, hamı bir yolla internetdədir. Hamı xəbər gözləyir, xəbər izləyir. Sosial şəbəkəyə giriş olmasa da, hamı şəbəkədədir. Hər kiçik yeniliyə ya sevinir, ya kədərlənir hər birimiz.

Uşağın məktəbi də, koronavirus da, maska da əhəmiyyətini itirib. Çoxdan işlətmədiyi radiosunu işə salan, internet gələndən kənara atdığı antenanı quraşdıran nə qədər insan var. İllərlə arzuladığı bir qırıq sözü eşitmək arzusu ilə hərə bir yolla məlumat almaq istəyir. Sosial mediada müzakirə mövzuları sırasında elə antena axtaranları da görmək olar. Elə hey soruşurlar, bu işə yarayar ya yox?

"Yaralanan yaxud itki var?", "övladlarımız doğma nənə-baba torpağını ziyarət edəcək", "Rəsmi olmayan məlumatları yaymayın", "Allah rəhmət eləsin...", "Füzuli deyirlər, rəsmi məlumat gözləyirik" – şəbəkədə belə postlar hələ çox paylaşılacaq.

Hamı öz aləmində, öz Qarabağındadır bu gün. Kimi döyüş meydanında, kimi də virtual məkanda. İrəli getmək var, geri dönmək yoxdur.

224
Vladimir Putin və Emmanuel Makron

Makron Putinə zəng edib: Qarabağda gedən hərbi əməliyyatlar pislənib

0
(Yenilənib 01:57 01.10.2020)
Rusiya və Fransa prezidentləri Dağlıq Qarabağ münaqişə bölgəsində vəziyyətin kəskin hal almasını pisləyiblər.

BAKI, 1 oktyabr — Sputnik. Rusiya Prezidenti Vladimir Putinlə Fransa Prezidenti Emmanuel Makron arasında telefon danışığı olub.

Sputnik Azərbaycan Kremlin mətbuat xidmətinə istinadla xəbər verir ki, söhbət zamanı dövlət başçıları Dağlıq Qarabağda, həmçinin Belarus Respublikasında yaranan son vəziyyəti müzakirə ediblər.

Telefon danışığı Fransa tərəfinin təşəbbüsü ilə baş tutub. Hər iki prezident Dağlıq Qarabağ münaqişə bölgəsində vəziyyətin kəskin hal almasını pisləyiblər. Onlar davam edən hərbi əməliyyatlardan narahatlıq keçirdiklərini ifadə ediblər.

0
Teqlər:
hərbi əməliyyatlar, Dağlıq Qarabağ bölgəsi, Dağlıq Qarabağ problemi, Dağlıq Qarabağ, Rusiya prezidenti Vladimir Putin, Fransa prezidenti Emmanuel Makron