Zeynəb Xanlarova, arxiv şəkli

Bərqərar olan İlahi ədalət?! Bir geri qayıtmayacaq küsüb getmiş səs

893
(Yenilənib 20:27 02.05.2020)
Biz həqiqəti görəndə, bu sevgi və sayğı haqqını bərpa edəndə ədalət də bərqərar olacaq və o konsert də baş tutacaq.

BAKI, 2 may — Sputnik. Uzun illərdir ki, Zeynəb Xanlarova Azərbaycanda konsert vermir. Sənətkar bunun səbəbi haqqında heç vaxt danışmayıb. Lakin ona atılan iyrənc böhtanlardan, haqqında dolaşan əsassız dedi-qodulardan dolayı olsa gərək, belə bir qənaətə gəldik ki, Zeynəb xanım Azərbaycan səhnəsindən küsüb.

Yaxın keçmişdə isə sənətkar Azərbaycan səhnəsi ilə barışmaq istəyirdi. “Dünyanın Zeynəbi” adlı solo-konsertin afişaları şəhərin hər yerində bərq vurmağa başladı. 2020-ci ilin mart ayının 18-ə təyin edilən konsert daha sonra koronavirus pandemiyası ilə əlaqədar elan edilmiş xüsusi karantin rejimi səbəbi ilə may ayına təxirə salındı. Xüsusi karantin rejiminin müddətinin uzadılması ilə təyin edilən bu tarix də ləğv edildi və konsertin yaz-yay aylarında baş tuta biləcəyinə dair gözləntilər də qalmadı.

Görünür, məsələ Zeynəb xanımın bizim səhnə ilə barışmaq istəyində deyil, ədalətin bərqərar olmasındadır. Axı səhnə və ümumilikdə sənət bütün mövcudiyyəti ilə ədalət prinsiplərinə tabedir. Ən böyük sənətkarların ən nəhəng əsərləri məhz ədalət naminə yaradılıb. Bəs ədalət nədədir? Niyə bərqərar olmur? Ümumiyyətlə, Zeynəb xanımın və onun uzun illər sonra öz ölkəsində baş tutacaq konsertin qəfil bir əngəllə baş tutmamasının ədalət prinsipləri ilə hansı əlaqəsi var?

Bir məsələni diqqətinizə çatdırmaq istəyirəm ki, 1990-cı ilin yanvar ayının 19-dan 20-ə keçən gecə Bakıda baş verən dəhşətli qırğından sonra Zeynəb Xanlarova 2 ilə yaxın bir müddətdə səhnədən uzaqlaşmışdı. Bir müğənni və xanəndə üçün 2 il müddətinə səhnəyə çıxmamaq, mahnı oxumamaq nə deməkdir, bunu musiqidən az da olsa anlayanlar bilərlər. Məhz həmin vaxtlarda səsinə hüzn, kədər və xəfif xırıltı çökdü. Zeynəb xanımın 1990-cı ilə qədərki ifalarına və ondan sonrakı ifalarına qulaq asanda bu fərqi rahatlıqla sezmək olar. İki illik səhnə ayrılığı zamanında adına qəzet manşetlərində “yaslı bülbül” deyilən Zeynəb Xanlarova haqqında tanınmış müğənni Aybəniz Haşımova belə demişdi: “Zeynəb Xanlarova Azərbaycan xalqı üçün səsini şəhid verdi”.

Məhz həmin illər idi ki, nəhəng bir imperiyanın pəncəsindən ayrılıb müstəqillik qazanmış kiçik bir respublika yağışdan çıxıb yağmura düşmüşdü. Qarabağ müharibəsi çoxdan başlamışdı və belə bir zamanda yas saxlayıb sakitcə oturmaq da olmazdı. Zeynəb Xanlarova da sakitcə oturmadı, qollarını çırmalayıb ölkə-ölkə gəzdi və dünyanın müxtəlif yerlərində “Sən mənimsən, Qarabağ! Vətənimsən, Qarabağ!” mahnısını oxudu.

Əlbəttə, Azərbaycan xalqı da, dünyada yaşayan azərbaycanlılar da, onu tanıyan başqa xalqların nümayəndələri də Zeynəb xanımı sevdilər, əzizlədilər, ünvanına ən gurultulu alqışları, ən alovlu pərəstiş nitqlərini göndərdilər. Xanım sənətkarın millət vəkili olduğu müddətdə işıqlandırdığı problemlər, dilə gətirdiyi həqiqətlə onun qazandığı böyük sevgini mübahisə mövzusuna çevirdi. Ölkənin və xalqın rifahına əngəl törədən bu problemlərin səbəbkarları Zeynəb xanıma qarşı qarayaxma kampaniyası başlatdılar və onu hər vəchlə gözdən salmağa çalışdılar.

Elə həmin vaxtlarda bir sıra mənfur niyyətli, köksüz-mənbəsiz, qeyri-peşəkar və sahibləri heç bir əxlaqi normaya riayət etməyən informasiya vasitələrində Zeynəb xanım haqqında yalanlar, böhtanlar yazıldı. Bu yalanlara inandırılan və ya da şübhəyə düşən sadəlövh xalqın müəyyən fərdləri Zeynəb xanımı sevilən sənətkar obrazından çıxarıb onlar üçün qəsdən qurulub-quraşdırılan saxta bir obraza qəzəb püskürməyə başladılar. Nə təsadüf ki, elə həmin vaxtdan etibarən Azərbaycan səhnəsinin ən parlaq sənətkarlarından biri öz doğma səhnəsində konsert vermədi.

Düzdür, o, yenə dünyanı gəzdi. Müxtəlif zamanlarda və müxtəlif məkanlarda – dünyanın fərqli-fərqli ölkələrində “Yaşa, mənim xalqım” dedi, “Azərbaycanım” dedi. Yəni, o, öz xalqını, öz vətənini sevməkdən heç vaxt imtina etmədi. İncimişdi, kim olsa inciyərdi, amma bu, onun ailə məsələsi idi. Öz ailəsinin – ölkəsinin kənarında Zeynəb Xanlarova elə Azərbaycan demək idi və bu məsuliyyətin öhdəsindən gəlməz lazım idi.

Nəhayət, “hər şeyə rəğmən” deyib, səhnəyə  çıxmaq istədi, konsertə hazırlaşdı. Bu dəfə isə hansısa gözəgörünməz varlıq gəlib bu konsert səhnəsinin astanasında peyda oldu və konsertin keçirilməsinə əngəl yaratdı. Əlbəttə, bütün dünyanı ağuşuna almış pandemiya sırf bu məqsədlə gəlməmişdi, amma məhz bu vaxtda, bu vədədə gəlməsi tam təsadüf idimi?

Axı biz ona böhtan atdıq və ya da atılan böhtanlara inandıq. Axı biz onun əməyini görməzdən gəldik. O, Azərbaycan müstəqilliyinin elan olunduğu gün paltosunun altında kamera gizlədib Milli Məclis binasına saldı ki, həmin anı əbədiləşdirsin, ölkə mediasında isə guya onun Azərbaycanın müstəqilliyinin əleyhinə səsverməsi ilə bağlı əsassız, mənbəsiz, dəlilsiz xəbərlər tirajlandı. O, Milli Məclisdəki çıxışlarında dəfələrlə həkimlərin, müəllimlərin maaşlarının artırılması ilə bağlı təkliflər etdi, əvəzində, yenə guya uşaq pulunu kəsdirməsi ilə bağlı heç bir istinad nöqtəsi olmayan dedi-qodular yayıldı. 

Bu xəbərləri oxuyanlar, eşidənlər sorğu-sualsız, mühakiməsiz inandılar. İndi bu ölkənin bu gün yaşayan ən şöhrətli və qüdrətli sənətkarı “hər şeyə rəğmən” deyib, səhnəyə  çıxmalı idimi? Ona olmazın iftiralar atan mənfur niyyətli şəxslər və bu yalanlara inanan dedi-qodu həvəskarları onu eşitməyə, onu dinləməyə, onu duymağa hazır idilərmi?

Ümumiyyətlə, bu xalqın ən dəyərli sənətkarlarından birini gözdən salmağa çalışdılar və bunu müəyyən qədər də olsa, bacardılar. İndi kim verəcək bunun hesabını? Axı, o, bizim dünyaya açılan nadir səslərimizdəndir. Bu əsnada, onu da vurğulamalıyam ki, bütün varlığı – biliyi, bacarığı, uğuru sosial şəbəkə hesabından ibarət olan bir qrup gənclərimiz bu platformanın onlara qatdığı “cool” ab-hava ilə Zeynəb xanımın şöhrəti haqqında “Madonna deyil, Şakira deyil, dünya şöhrəti başqa şeydir” deyirlər. Qəribədir. Biz hələ Madonna qədər də olmasa dünyanın müxtəlif yerlərində tanınan, sevilən, sayılan, seçilən Zeynəb Xanlarovaya sahib çıxa bilmədik, onu hər üsulla vurmağa çalışdılar və biz də bu oyuna alət olduq. Görən, bir Madonnamız olsaydı, onu hansı günə salardıq?

Belə... İndi fikirləşmək gərək, düşünmək, araşdırmaq, axtarmaq, sorğulamaq gərək, bu ölkəyə həmişə zərər-ziyanı dəyənlərin yalan-böhtanına inanmağa davam edirik, yoxsa mədəniyyətimizin ən parlaq şəxslərindən biri olan Zeynəb Xanlarovaya atılan böhtanların mənəvi haqqını qaytarırıq? Çünki biz həqiqəti görəndə, bu sevgi və sayğı haqqını bərpa edəndə ədalət də bərqərar olacaq və o konsert də baş tutacaq.

893
5G K9 robotu, arxiv şəkli

Qazandığımızı tam itirə bilərik: təşəbbüsü robotlara verməklə...

893
(Yenilənib 11:19 13.08.2020)
Bu gün dünyada işsizlikdən əziyyət çəkən, gündəlik çörək tapa bilməyin milyonlarla insan var. Hər yeni robotlaşdırılmış sistem onların sayını birə-on artırır.

Rusiyada robotlar üçün gəlir vergisinin tətbiq edilməsi ideyası gündəmə gəlib. Rusiyanın Mütərəqqi Təhsil İnstitutu belə bir təkliflə Maliyyə Nazirliyinə müraciət edib. Analitiklərin fikrincə, süni intellektin inkişafı yaxın 15-20 ildə 20 milyon rusiyalını işsiz qoya bilər. Vergidən gələn məbləği satıcı, kassir, analitik, mühafizəçi peşələrində çalışan insanların başqa yöndə təhsil almasına yönəltmək mümkün olacaq.

“Terminator” filminin ilk versiyası nə qədər fantastik görünürdüsə...

Süni intellektin, robotların, “ağıllı əşyaların”, androidlərin tədricən insanı bir sıra sahələrdən sıxışdırıb çıxaracağı barədə yüzlərlə bədii və sənədli film çəkilib. 1984-cü ildə ekranlara çıxan, milyonların sevimlisinə çevrilən “Terminator” filminin ilk versiyası nə qədər fantastik görünürdüsə, müasir dövrün prizmasından bir o qədər də primitiv təsir bağışlayır. Bu gün artıq robotlaşdırılmış və avtomatlaşdırılmış zavodlar, internet və onun yaratdığı informasiya mühiti, evi tam idarə edən avadanlıq və yüzlərlə texnoloji yenilik reallaşıb.

Robotlar insanı, sözün əsl mənasında, sıxışdırıblar. Həyatını daha rahat və komfortlu görməyə can atan insan onu hər yerdə əvəzləyə biləcək texnologiya yaradıb, bu barədə hər gün bəh-bəhlə danışır da. Analitiklər robotların bəşəriyyətin gələcəyinə nə cür təsir edəcəyi ətrafında dayanmadan mübahisə edirlər. Tərəqqinin qarşısını almaq mümkünsüzdür, hər gün yeni texnologiya yaradılır və hər yeni texnologiya dünənin köhnəlmiş avadanlığını əvəzləyir. Hər yeni nəsil robotları daha mükəmməl və funksional fəaliyyət göstərir.

Fantastik filmlərdə gördüyümüz səhnələr reallaşa biləcəkmi?

Robotların insanı tam sıradan çıxarması, Yer üzündə milyardlarla insanı işsiz qoymağı mümkündürmü? Fantastik filmlərdə gördüyümüz səhnələr reallaşa biləcəkmi? Adətən yeni avadanlıq, texnologiya istehsal edən şirkətlər, bu sahədə çalışan insanlar tarixə istinad etməyi sevirlər. Antik dövrdə gəmi qulların vasitəsilə hərəkət edirdi, bir müddət sonra taqətdən düşənlərin yerini digərləri tuturdular. Tədricən yelkənli gəmilər meydana gəldi, onları buxarla işləyən gəmilər əvəzlədi. Hazırda atom enerjisi ilə hərəkət edən gəmilər yaradılıb. Okeanda üzən kiçik bir şəhərcikdir sanki.

Avtomobil, dəmir yolu, aviasiya nəqliyyatı inkişaf etdikcə bir çox peşələr sıradan çıxdı. Orada-burada nadir hallarda faytonlara rast gələ bilərik, o da elə-belə gözəllik üçündür. Robototexnikanın sürətli inkişafı bir tərəfdən bəşəriyyətə nə qədər xeyir versə də, bir o qədər də özü ilə problem gətirməkdədir. Bəzən problemin kökünü hələ də anlamırıq. Vaxtilə hər yeni yaranan texnologiya əsasən insanı ağır fiziki zəhmətdən azad edib. Əgər bir neçə əsr öncə dünya əhalisinin 90 faizi kənd təsərrüfatında çalışırdısa, hazırda bu göstərici 3-5 faizə enib. Yəni əvvəllər bu qədər insanın gördüyü işi hazırda müxtəlif növ texnikanın köməyi ilə reallaşdırırıq. Məhsulu da bazara çatdırmaq problem deyil, hər cür sürətli nəqliyyat növü icad olunub.

Robotlar insanı hansı sahələrdən uzaqlaşdırır? 

Ağır, fiziki əməkdən azad olan insan gücünü elmin, ədəbiyyatın, incəsənətin inkişafına yönəldib. Minlərlə böyük şəhər və meqapolisdə dünya əhalisinin böyük hissəsinin toplanmasına şərait yaradılıb. Amma robotlar bəşəriyyət üçün daha təhlükəlidir, çünki artıq insan həm fiziki əməkdən azad olub, həm də düşünmək funksiyasını süni intellektin idarə etdiyi sistemlərə ötürməklə məşğuldur. Robotlar insanı hansı sahələrdən uzaqlaşdırır? 

Sənaye miqyasında robotlar olduqca geniş istifadə edilir, zavod və fabriklərin bir çoxunda avtomatlaşdırılmış xətlər fəaliyyət göstərir. Hərdən reklamda da tez-tez “insan əli dəymədən istehsal edilib” ifadəsini eşidirik. Qida və alkoqol sənayesində, avtomobil, mobil telefon, smartfon, kompüter istehsalında çoxdan robotlar insanı əvəzləyib. Hətta son dövrlərdə sənaye müəssisələrini ABŞ-a qaytarmaq ideyasını dəstəkləyən Tramp administrasiyası ölkədə tam robotlaşdırılmış zavodların quraşdırılması üçün münbit şərait yaradıb, Çinin “Huawei” şirkətini ABŞ bazarından uzaqlaşdırmaqla İsveçin “Ericsson” şirkətinə ölkə daxilində tam robotlaşdırılmış müəssissə tikməyə imkan verib. Texas ştatında 2020-ci ildə fəaliyyətə başlayan bu “ağıllı fabrik” artıq 5G stansiyaları buraxır. 

Müasir robotlar nəyisə öyrənməkdə insanı qabaqlayır

Geyim istehsalı adətən dünyanın bir çox yerində milyonlarla insanı işlə təmin edirdi. Hazırda robotlar bu sahəni də tədricən ələ alırlar. Almaniyanın “Adidas” şirkəti dünyaca məşhur idman geyimi və ayaqqabılarını artıq Avropada robotların köməyi ilə istehsal etməyə başlayıb. ABŞ-da tam avtomatlaşıdırılmış geyim fabrikləri də fəaliyyət göstərir.

Robotlar insanı supermarket kassasında, avtomobil sükanı arxasında, təyyarənin idarə edilməsində, hərbi döyüş zonalarında əvəzləməkdədir. Özü də insanın yol verə biləcəyi səhvlərin heç birini etməz, etsə də, cəmi bir dəfə. Müasir robotlar nəyisə öyrənməkdə insanı qabaqlayır, gün-gündən mükəmməlləşirlər. Amma problem daha dərindir, çünki robotlar insanın məhz düşünmək imkanını əlindən alırlar. Bu, bəşəriyyət üçün sözün əsl mənasında təhlükədir. Belə olan halda insanın deqradasiyası, onun həm fiziki imkanlarının, həm də intellektual potensialının aşağı enməsi qaçılmazdır. Biliyi bir nəsildən digərinə ötürmək də zamanla əhəmiyyətsiz olacaq, süni intellektin qurduğu dünyada, onun yaratdığı sistemdə yaşamalı olacağıq. Heç bir fəaliyyət üçün səbəb olmayacaq.

Bəşəriyyətə nə qədər yazıçı, rəssam, heykəltəraş, bəstəkar lazımdır?

Həkimlər, hüquqşünaslar, jurnalistlər, tərcüməçilər, ümumiyyətlə, ofis işçilərinin əksəriyyəti işsiz qalacaq. Cərrahlıq edən robotlar, hüququ mükəmməl mənimsəyən, hər gün mətbuat üçün yüzlərlə xəbər yazan proqramlar yaradılıb. İnsana müəyyən dərəcədə özünü yaradıcılıqda ifadə etmək mümkün olacaq. Amma bəşəriyyətə nə qədər yazıçı, rəssam, heykəltəraş, bəstəkar lazımdır? Bəs qalan insanlar nə işlə məşğul olacaqlar?

Elə bu gün dünyada işsizlikdən əziyyət çəkən, gündəlik çörək tapa bilməyin milyonlarla insan var. Hər yeni robotlaşdırılmış sistem onların sayını birə-on artırır. Geyim hazırlamağın, smartfon və ya kompüter istehsal etməyin də mənası qalmayacaq. Bunu ala bilən insan yoxdursa, düzəltməyə dəyərmi? Bəşəriyyət artıq bu gün texnologiyanın yarada biləcəyi fəsadları aradan qaldırmaq yollarını araşdırmalıdır. Təşəbbüsü robotlara verməklə qazandığımızı tam itirə də bilərik.

893
Səhnədə müğənni, arxiv şəkli

Hüznlü manıslar xalqın əndişəsi

1189
(Yenilənib 21:08 12.08.2020)
Toyların, el şənliklərinin qadağan edilməsi böyük bir kültürü iflic vəziyyətinə salıb. Böyük bir industriya çökür və müxtəlif peşə sahibləri bu dağıntıların altında qalırlar.

BAKI, 12 avqust — Sputnik. Bir tərəfdən pandemiya sıxır canımızı, bir yandan işsizlik kəsir nəfəsimizi, bir az da manıs-müğənni əhlinin ah-naləsindən pəjmürdəyik. Niyə onları xatırladım? Çünki bəzənib-düzənib, kreditə avtomobillər, bahalı evlər alıb lüks həyat yaşamağa alışanların çətinliyi daha çoxdur. Bizə nə var? Bir tikə çörəyi ümidlə yavanlıq etməyə öyrənmişik. Çətini zəngin yaşamağa çalışan, zənginliyi imitasiya edən manısların güzəranıdır. Aylardır, yeganə qazanc yeri toylar olan bu şən-şaqraq insanlar intəhasız bir hüznə qərq olublar. Karantin acı bağırsaq kimi uzandıqca, efirlərdə görünən müğənnilərin üzündəki kədər və iztirab dərinləşir. Əvvəl çağırıldığı proqramdan üzrxahlıq edib yayınan, toyda oxumağı daha vacib hesab edənlər indi çağırıldıqları proqramların bitməsini istəmirlər...

Düşünürəm ki, toyların, el şənliklərinin qadağan edilməsi böyük bir kültürü iflic vəziyyətinə salıb. Böyük bir industriya çökür və müxtəlif peşə sahibləri bu dağıntıların altında qalırlar.

...Hər gün oxşar xəbərlərlə oyanıb, eyni ümidlə başımızı atırıq yastığa. Az qala, beş aydır yekrəng, yeknəsək bir ömür xırıd edirik fələyin oyununda. Nə qapımızı döyən var, nə hansısa qapını döyməyə üzümüz, imkanımız. Hər sabah internetdən axışıb bizi ağuşuna alan xəbərləri oxuyub, bir ovuc antidepressant nuş edib, bir siqaret yandırırıq qayğılı-qayğılı. Hər gün həyəcanla statistikanı izləyirik. Sağalan sayı yoluxan sayından artıq çıxanda, əlinə “üç tuz” gəlmiş hiyləgər qumarbaz kimi, bığaltı qımışırıq ki, “hə, bir az ümid var...”  Əslində isə “ümid bağlı qapılar arxasında, ruzimiz qurd ağzındadır”.

Təcridimiz orta əsrlər sufi şeyxinin təcridi kimi uzanır: canımız çiləyə təşnədir. Qadağalar azaldıqca, dükan-bazar, dəniz-çimərlik açıldıqca üzümüzə təbəssüm qonur. Amma heyhat! Nə dükan-bazara getməyə imkanımız, nə dənizə getməyə taqətimiz var. Dənizdə, dükan-bazarda sıxlıq yaradan da biz deyilik, bizim nəfsimizdir. Azadlığa təşnə, sərbəstliyə həsrət nəfsimiz özünü qumsallığa verib dincəlmək istəyir. Aylardır, tamarzı qaldığımız azadlığın, sərbəstliyin dadını çıxarırıq. Şükürlər olsun ki, “birinci dalğa” dedikləri hər nədirsə sahillərimizə çırpılıb, ala bildiyi qədər can alıb, geri çəkilir. Biz binəvalar da “birinci dalğa”dan xilas olmamış “ikinci dalğa”nın müjdəsini alırıq.

TƏBİB bir yandan, Operativ Qərargah digər tərəfdən xəbərdarlıq edirlər ki, “bəs hazır olun, gigiyenik olun, məsafəli olun - “ikinci dalğa” gələcək”. Xub! Gəlsin bu dənizin nə qədər dalğası varsa, bir təhər dözərik, səbr edərik. Amma, ancaq, lakin...

Pandemiyadır, karantindir, təcriddir, sosial məsafədir, yarıtmaz səhiyyədir – bunları birtəhər anlayırıq, ya da zor-bəla anlamağa, dərk etməyə çalışırıq. Bəs bizim sosial vəziyyətimiz, külfətimizin və millətimizin dolanışığı, yaşayışı necə olacaq? Körpə övladlarımıza nə qədər nağıl danışaq? Nə qədər aldadaq özümüzü?

Bütün qayda-qadağaya tabe olub, kədərli bir həyat yaşayırıq. Gün üzünə, doğmaların, yaxınların camalına həsrət qalmışıq aylardır. Şəxsən mən bir yazıçı kimi bu çətin məqamlarda dövlətimin dəstəyini hiss etmək, övladlarımın güvəndə olduğunu düşünmək istəyirəm. Ancaq narahatam, əndişəliyəm. Bir qarın çörək dərdi deyil qorxum. Bu il birinci sinifə getməli olan qızımın, liseyə qəbul olub, həvəslə dərslərin başlamasını gözləyən oğlumun təhsilindən nigaranam. Yaşlı valideynlərimin səhhətindən, aylardır işsiz qalan dost-tanışımın dolanışığından narahatam.

190 manata ümid edən, ehtiyac içində olan həmvətənlərimi düşünürəm. Sonuncu ehtiyatını da xərcləyib bitirmiş onlarla adam tanıyıram. Hər gün yardım üçün müraciət edənlərə, marketlərin qarşısında əl açanlara aylardır işsiz olduğumu deməyə utanıram.

Sosial problemlər, işsizlik və sıxıntılar ortaq dərdimizdir. “Ellə gələn toy-bayramdır” deyirik, amma yaxın qonşumuz Gürcüstana və uzağımız Avropaya baxanda görürük ki, əslində “toy-bayram” onlardadır. Səhiyyədən tutmuş, əhaliyə edilən sosial dəstəyə qədər nümunə götürməli olduğumuz çox şey var.

Biz, sadəcə, səriştəsiz, əhli-kef məmurların ümidinə qalmış qoca Şərqin atılmış və unudulmuş binəvalarıyıq.

Bundan sonra ümidimiz yalnız koronavirusun insafına qalıb. Bu zaval, bu mərəz özü könüllü çəkilib getməsə, bizim sonumuz heç də yaxşı görünmür...

1189
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Əlaqədar
Baba nəvəsinə ad günü təşkil etdi, qonaqlar hədiyyə əvəzinə cərimə ödədilər
"Bilmədiyimiz bir şeydən qorxmağın mənası yoxdur" - Psixiatr
Koronavirusdan daha təhlükəli: Qəzəb, aqressiya və gərginlik...
Hökumətdən kafe və restoranlarla bağlı yeni qərar
Birlik, həmrəylik məqamı və keçməməli olduğumuz "qırmızı xətt"
ABŞ Prezidenti Donald Tramp, arxiv şəkli

Tramp İsrail ərəblər arasında imzalanacaq sazişin tarixini açıqladı

0
(Yenilənib 12:37 14.08.2020)
BƏƏ İsraillə tam diplomatik əlaqələri quran üçüncü ölkə olub. Daha əvvəl yəhudi dövləti ilə sülh sazişini 1979-cu ildə Misir, 1994-cü ildə isə İordaniya imzalamışdı

BAKI, 14 avqust — Sputnik. Birləşmiş Ərəb Əmirlikləri (BƏƏ) və İsrail üç həftə ərzində Birləşmiş Ştatların ərazisində sülh sazişi imzalayacaqlar. Sputnik Azərbaycan "The Times of Israel" nəşrinə istinadən xəbər verir ki, bunu Birləşmiş Ştatlar Prezidenti Donald Tramp bildirib.

"Mən çox yaxın vaxtda Ağ Evdə sazişin formal imzalanmasını qəbul etməyə hazırlaşıram. Böyük ehtimalla biz bunu yaxın üç həftə ərzində edəcəyik", - deyə Tramp qeyd edib.

Qeyd edək ki, avqustun 13-də Birləşmiş Ərəb Əmirlikləri (BƏƏ) ilə İsrail arasında diplomatik əlaqələr bərpa edilib. Belə ki, ABŞ Prezidenti Donald Tramp, İsrailin Baş Naziri Benyamin Netanyahu və BƏƏ-nin vəliəhd şahzadəsi Şeyx Məhəmməd Bin Zayid arasında danışıqlar yekunlaşıb. BƏƏ və İsrail rəsmiləri diplomatik əlaqələrin bərpa olunmasına dair razılığa gəliblər. Bununla bağlı tərəflər arasında sənəd imzalanıb.

Xatırladaq ki, BƏƏ İsraillə tam diplomatik əlaqələri quran üçüncü ölkə olub. Daha əvvəl yəhudi dövləti ilə sülh sazişini 1979-cu ildə Misir, 1994-cü ildə isə İordaniya imzalamışdı.

 

0