Mаrketdə аdаm

Bir gün yeməsək, marketdən uzaq dursaq, okeana bərpa olmaq şansı verərdik

868
(Yenilənib 21:18 29.03.2020)
Bizə məlum olmayan viruslar da ürəyin istəyən qədərdir. Bir-ikisi üzə çıxsa, koronavirus bizə ən sadə infeksiya kimi görünəcək

BAKI, 29 mart — Sputnik. Xəstəlik tutub ölmək qorxusu istənilən virtual platformada özünü açıq-aşkar büruzə verir. 

Elə hey maskadan, spirtdən, evdə oturmaqdan danışırıq. Amma virusların haradan gəlməsi, necə yayılması adi insanı daha az narahat edir. Hamı bir məsələni düşürür: bircə indi bizdən ötsün, sonrasına baxarıq.

Bir çox virus dünya okeanında gizlənib

Koronavirusun haradan gəlməsi barədə onlarla nəzəriyyə var. Hərəkətlərimizə diqqət yetiririkmi? Bir çox təhlükəli virus və bakteriyalar məhz gizli halda dünyanın müxtəlif nöqtələrində yatmış vəziyyətdə öz gününü gözləyir. Bir çox halda insanın dağıdıcı fəaliyyəti nəticəsində üzə çıxır. Amazon meşələri Yer kürəsinin “ağ ciyəri” adlandırılır, çünki burada bizə lazım olan oksigenin 20 faizi istehsal olunur. Eyni zamanda bu məkana həm də “Pandora yeşiyi” demək olar, çünki bioloji müxtəlifliyin ən qəribə formalarına rast gəlinir, flora və faunası xüsusi seçilir. Bizə məlum olmayan viruslar da ürəyin istəyən qədərdir. Bir-ikisi üzə çıxsa, koronavirus bizə ən sadə infeksiya kimi görünəcək. Amazon meşələrinin məhv edilməsi hələ də davam edir.

Bir çox virus isə böyük su hövzəsində, daha doğrusu, dünya okeanında gizlənib. İnsan fəaliyyətinin nəticəsində yaranan ziyanlı məhsulların əksəri sonda elə okeana axıdılır. Sənaye istehsalında yaranan sular çaylara, oradan dənizə, sonra isə okeana yol açır. Hətta bəzən adi görünən sadə əməllər belə ciddi fəsada səbəb ola bilər. Məsələn, ABŞ-da okean kənarında yaşayan sakinlərdə toksoplazmozun artması aşkarlanıb. 

Bu xəstəlik adətən evində it, pişik və digər heyvan saxlayan insanlarda olur. Yaxşı emal olunmamış yumurta və ya ət məhsullarında da müşahidə edilir. Amma bu dəfə toksoplazmoz böyük miqdarda məhz okean suyunda tapılıb. Araşdırma nəticəsində bunun səbəbi də bilinib. Evdə pişik saxlayan ABŞ sakinləri sadəcə olaraq onlardan yaranan nəcisi kanalizasiya buraxırmışlar, toksoplazmoz da bu yolla okean sularına yol tapıb. Amma təbiətdə yaşayan pişik özündən sonra yaranan nəcisi çox ciddiliklə torpaqlayır.

Dünya okeanı bu qədər zibilin qarşısında acizdir

Okeana həm kimyəvi maddələr, həm paltar yumaq üçün istifadə edilin zəhərli tullantılar axıdılır. Belə maddələr okeanın mikroflorasını pozsa da, hər halda hər hansı bir virus xəstəliyinə səbəb olmur. Amma deyək, böyük toyuq və ya mal-qara fermalarında yaranan tullantılar olduqca ciddi problemə yol açır. Bunların son nöqtəsi də su hövzəsidir. Dünya okeanı nə qədər möhtəşəm olsa da, bu qədər zibilin qarşısında acizdir. Yəni orqanik tullantılar okeanda elə də sürətlə utilizə ola bilmir. Dəniz və okean kənarında yaradılan balıq emalı zavodları da külli miqdarda orqanik tullantını elə suya tökürlər. Onların da mənimsənilməsinin bir müddəti var, heç də həmişə bizim istəyimizə uyğun sürətlə okeanda utilizə olunmur.

“Okeana düşən insan cəsədinin taleyi necə olur” sualı alimləri çox düşündürür. Axı sunami, tayfun, gəmi və təyyarə qəzası və digər hallara görə hər ilə minlərlə insan qalığı okeanda “dəfn” olunur. Son illərdə Yaxın Şərqdə müharibə zonalarının çoxalması nəticəsində miqrasiyanın artması da insan ölümünün sayını yüksəldib. Suda boğulan insan qalıqlarının okeandakı taleyindən çoxumuzun xəbəri yoxdur.

Bu “qar” orqanik mənşəli qalıqlardan yaranıb

100-200 metr dərinlikdə nə olduğundan xəbərimiz müəyyən qədər varsa, artıq 1000 metrdə baş verənləri elə də bilmirik. Okeanın dərinliklərində hər hansı bir insan cəsədi on illərlə toxunulmaz qala bilər. Eyni zamanda daxilində olan virus və bakteriyalar da sağ-salamat öz gününü gözləyəcək. Dəniz və okean suyunda oksigeninin səviyyəsi, temperatur göstəriciləri, suyun duzluluğunun dərəcəsi də cəsədin parçalanmasına təsir edir.

Flame Towers qülləsi
© Official website of President of Azerbaijan Republic

Kanadanın “Saymon Frezer” universitetinin alimləri “VENUS” eksperimental laboratoriyasında cəsədin duzlu suda necə parçalandığını təyin etmək üçün təcrübə keçiriblər. 3 donuzu Vankuver adasının yaxınlığında yerləşən məkanda 10 0 metr dərinliyə yerləşdiriblər. Xüsusi avadanlığın köməyi ilə oksigenin, temperaturun, suyun təzyiqi və duzluluğunun səviyyəsi təyin edilib.

Tezliklə donuzların leşi ətrafında krevet, krab və omarlar toplaşıb. Daha sonra köpək balıqları da peyda olub. Bir aya ilk iki donuz leşini tam yeyiblər. Amma üçüncü leşin yeyilməsinə bir neçə ay zaman sərf olunub. Səbəbi də sonra məlum olub. İlk 2 donuzu okeana endirərkən oksigenin səviyyəsi yüksək olub deyə köpək balıqları problemsiz donuz dərisini parçalaya biliblər. Oksigenin səviyyəsi 3-cü donuzda azalıb. Daha az oksigenlə yaşaya bilən krab və krevetlər isə donuzun bərk dərisini parçalaya bilməyiblər. Donuz leşi bir neçə ay elə okean suyunda qalıb. Yalnız oksigenin səviyyəsi yüksələndən sonra köpək balığı donuzu parçalayıb.

Alimlər həm də okean dərinliklərində, yəni ən azı min və ya daha aşağı səviyyədə qəribə bir “qar” yağmasını da müşahidə ediblər. Bu “qar” əslində orqanik mənşəli qalıqlardan yaranıb. Bir çox dərinlik canlısı elə bu qida ilə dolanır.

Bir çox xəstəlik elə dünya okeanından gəlir

Beləliklə, okeanda istənilən heyvan və ya insan qalıqları bəzən uzun müddət tam salamat qala bilər. Daxildə olan virusların da suda yayılma təhlükəsi var. Bir çox xəstəlik elə dünya okeanından gəlir. Okeana nə tökürüksə, o da bir müddət sonra geri dönür. Bizim üçün təhlükəli ola biləcək bir sıra xəstəlik, virus və bakteriya çox rahatlıqla dəniz və okean canlılarında yaşayır. İnsan dəniz məhsullarını qida formasında qəbul etdikcə, xəstəliyə tutulma şansı artır. Dünya okeanını orqanik və qeyri-orqanik məhsullarla zibillədikcə, özümüzün də dəhşətli xəstəliklərlə üz-üzə qalmaq şansımız artır.

Koronavirus elə də dəhşətli xəstəlik olmasa da, dünya iqtisadiyyatına ciddi zərbə vurub. Amma bu zərbə təbiət üçün kiçik də olsa, bir istirahət etmək imkanını yaradıb. Daha az istehsal edirik, az yeyirik, az gəzirik, okean da bir qədər nəfəs alır, zir-zibildən azad olur.

Ayda heç olmasa bir gün yeməsək, bir gün şəxsi avtomobildən imtina etsək, bir gün evimizdə toplanan köhnə əşyalardan azad olsaq, bir gün marketdən uzaq dursaq, nə qədər heyvana, dəniz və okean canlısına bərpa olunmaq üçün şans verərdik. Bunu anlamaq elə də çətin deyil.

868
5G K9 robotu, arxiv şəkli

Qazandığımızı tam itirə bilərik: təşəbbüsü robotlara verməklə...

896
(Yenilənib 11:19 13.08.2020)
Bu gün dünyada işsizlikdən əziyyət çəkən, gündəlik çörək tapa bilməyin milyonlarla insan var. Hər yeni robotlaşdırılmış sistem onların sayını birə-on artırır.

Rusiyada robotlar üçün gəlir vergisinin tətbiq edilməsi ideyası gündəmə gəlib. Rusiyanın Mütərəqqi Təhsil İnstitutu belə bir təkliflə Maliyyə Nazirliyinə müraciət edib. Analitiklərin fikrincə, süni intellektin inkişafı yaxın 15-20 ildə 20 milyon rusiyalını işsiz qoya bilər. Vergidən gələn məbləği satıcı, kassir, analitik, mühafizəçi peşələrində çalışan insanların başqa yöndə təhsil almasına yönəltmək mümkün olacaq.

“Terminator” filminin ilk versiyası nə qədər fantastik görünürdüsə...

Süni intellektin, robotların, “ağıllı əşyaların”, androidlərin tədricən insanı bir sıra sahələrdən sıxışdırıb çıxaracağı barədə yüzlərlə bədii və sənədli film çəkilib. 1984-cü ildə ekranlara çıxan, milyonların sevimlisinə çevrilən “Terminator” filminin ilk versiyası nə qədər fantastik görünürdüsə, müasir dövrün prizmasından bir o qədər də primitiv təsir bağışlayır. Bu gün artıq robotlaşdırılmış və avtomatlaşdırılmış zavodlar, internet və onun yaratdığı informasiya mühiti, evi tam idarə edən avadanlıq və yüzlərlə texnoloji yenilik reallaşıb.

Robotlar insanı, sözün əsl mənasında, sıxışdırıblar. Həyatını daha rahat və komfortlu görməyə can atan insan onu hər yerdə əvəzləyə biləcək texnologiya yaradıb, bu barədə hər gün bəh-bəhlə danışır da. Analitiklər robotların bəşəriyyətin gələcəyinə nə cür təsir edəcəyi ətrafında dayanmadan mübahisə edirlər. Tərəqqinin qarşısını almaq mümkünsüzdür, hər gün yeni texnologiya yaradılır və hər yeni texnologiya dünənin köhnəlmiş avadanlığını əvəzləyir. Hər yeni nəsil robotları daha mükəmməl və funksional fəaliyyət göstərir.

Fantastik filmlərdə gördüyümüz səhnələr reallaşa biləcəkmi?

Robotların insanı tam sıradan çıxarması, Yer üzündə milyardlarla insanı işsiz qoymağı mümkündürmü? Fantastik filmlərdə gördüyümüz səhnələr reallaşa biləcəkmi? Adətən yeni avadanlıq, texnologiya istehsal edən şirkətlər, bu sahədə çalışan insanlar tarixə istinad etməyi sevirlər. Antik dövrdə gəmi qulların vasitəsilə hərəkət edirdi, bir müddət sonra taqətdən düşənlərin yerini digərləri tuturdular. Tədricən yelkənli gəmilər meydana gəldi, onları buxarla işləyən gəmilər əvəzlədi. Hazırda atom enerjisi ilə hərəkət edən gəmilər yaradılıb. Okeanda üzən kiçik bir şəhərcikdir sanki.

Avtomobil, dəmir yolu, aviasiya nəqliyyatı inkişaf etdikcə bir çox peşələr sıradan çıxdı. Orada-burada nadir hallarda faytonlara rast gələ bilərik, o da elə-belə gözəllik üçündür. Robototexnikanın sürətli inkişafı bir tərəfdən bəşəriyyətə nə qədər xeyir versə də, bir o qədər də özü ilə problem gətirməkdədir. Bəzən problemin kökünü hələ də anlamırıq. Vaxtilə hər yeni yaranan texnologiya əsasən insanı ağır fiziki zəhmətdən azad edib. Əgər bir neçə əsr öncə dünya əhalisinin 90 faizi kənd təsərrüfatında çalışırdısa, hazırda bu göstərici 3-5 faizə enib. Yəni əvvəllər bu qədər insanın gördüyü işi hazırda müxtəlif növ texnikanın köməyi ilə reallaşdırırıq. Məhsulu da bazara çatdırmaq problem deyil, hər cür sürətli nəqliyyat növü icad olunub.

Robotlar insanı hansı sahələrdən uzaqlaşdırır? 

Ağır, fiziki əməkdən azad olan insan gücünü elmin, ədəbiyyatın, incəsənətin inkişafına yönəldib. Minlərlə böyük şəhər və meqapolisdə dünya əhalisinin böyük hissəsinin toplanmasına şərait yaradılıb. Amma robotlar bəşəriyyət üçün daha təhlükəlidir, çünki artıq insan həm fiziki əməkdən azad olub, həm də düşünmək funksiyasını süni intellektin idarə etdiyi sistemlərə ötürməklə məşğuldur. Robotlar insanı hansı sahələrdən uzaqlaşdırır? 

Sənaye miqyasında robotlar olduqca geniş istifadə edilir, zavod və fabriklərin bir çoxunda avtomatlaşdırılmış xətlər fəaliyyət göstərir. Hərdən reklamda da tez-tez “insan əli dəymədən istehsal edilib” ifadəsini eşidirik. Qida və alkoqol sənayesində, avtomobil, mobil telefon, smartfon, kompüter istehsalında çoxdan robotlar insanı əvəzləyib. Hətta son dövrlərdə sənaye müəssisələrini ABŞ-a qaytarmaq ideyasını dəstəkləyən Tramp administrasiyası ölkədə tam robotlaşdırılmış zavodların quraşdırılması üçün münbit şərait yaradıb, Çinin “Huawei” şirkətini ABŞ bazarından uzaqlaşdırmaqla İsveçin “Ericsson” şirkətinə ölkə daxilində tam robotlaşdırılmış müəssissə tikməyə imkan verib. Texas ştatında 2020-ci ildə fəaliyyətə başlayan bu “ağıllı fabrik” artıq 5G stansiyaları buraxır. 

Müasir robotlar nəyisə öyrənməkdə insanı qabaqlayır

Geyim istehsalı adətən dünyanın bir çox yerində milyonlarla insanı işlə təmin edirdi. Hazırda robotlar bu sahəni də tədricən ələ alırlar. Almaniyanın “Adidas” şirkəti dünyaca məşhur idman geyimi və ayaqqabılarını artıq Avropada robotların köməyi ilə istehsal etməyə başlayıb. ABŞ-da tam avtomatlaşıdırılmış geyim fabrikləri də fəaliyyət göstərir.

Robotlar insanı supermarket kassasında, avtomobil sükanı arxasında, təyyarənin idarə edilməsində, hərbi döyüş zonalarında əvəzləməkdədir. Özü də insanın yol verə biləcəyi səhvlərin heç birini etməz, etsə də, cəmi bir dəfə. Müasir robotlar nəyisə öyrənməkdə insanı qabaqlayır, gün-gündən mükəmməlləşirlər. Amma problem daha dərindir, çünki robotlar insanın məhz düşünmək imkanını əlindən alırlar. Bu, bəşəriyyət üçün sözün əsl mənasında təhlükədir. Belə olan halda insanın deqradasiyası, onun həm fiziki imkanlarının, həm də intellektual potensialının aşağı enməsi qaçılmazdır. Biliyi bir nəsildən digərinə ötürmək də zamanla əhəmiyyətsiz olacaq, süni intellektin qurduğu dünyada, onun yaratdığı sistemdə yaşamalı olacağıq. Heç bir fəaliyyət üçün səbəb olmayacaq.

Bəşəriyyətə nə qədər yazıçı, rəssam, heykəltəraş, bəstəkar lazımdır?

Həkimlər, hüquqşünaslar, jurnalistlər, tərcüməçilər, ümumiyyətlə, ofis işçilərinin əksəriyyəti işsiz qalacaq. Cərrahlıq edən robotlar, hüququ mükəmməl mənimsəyən, hər gün mətbuat üçün yüzlərlə xəbər yazan proqramlar yaradılıb. İnsana müəyyən dərəcədə özünü yaradıcılıqda ifadə etmək mümkün olacaq. Amma bəşəriyyətə nə qədər yazıçı, rəssam, heykəltəraş, bəstəkar lazımdır? Bəs qalan insanlar nə işlə məşğul olacaqlar?

Elə bu gün dünyada işsizlikdən əziyyət çəkən, gündəlik çörək tapa bilməyin milyonlarla insan var. Hər yeni robotlaşdırılmış sistem onların sayını birə-on artırır. Geyim hazırlamağın, smartfon və ya kompüter istehsal etməyin də mənası qalmayacaq. Bunu ala bilən insan yoxdursa, düzəltməyə dəyərmi? Bəşəriyyət artıq bu gün texnologiyanın yarada biləcəyi fəsadları aradan qaldırmaq yollarını araşdırmalıdır. Təşəbbüsü robotlara verməklə qazandığımızı tam itirə də bilərik.

896
Səhnədə müğənni, arxiv şəkli

Hüznlü manıslar xalqın əndişəsi

1199
(Yenilənib 21:08 12.08.2020)
Toyların, el şənliklərinin qadağan edilməsi böyük bir kültürü iflic vəziyyətinə salıb. Böyük bir industriya çökür və müxtəlif peşə sahibləri bu dağıntıların altında qalırlar.

BAKI, 12 avqust — Sputnik. Bir tərəfdən pandemiya sıxır canımızı, bir yandan işsizlik kəsir nəfəsimizi, bir az da manıs-müğənni əhlinin ah-naləsindən pəjmürdəyik. Niyə onları xatırladım? Çünki bəzənib-düzənib, kreditə avtomobillər, bahalı evlər alıb lüks həyat yaşamağa alışanların çətinliyi daha çoxdur. Bizə nə var? Bir tikə çörəyi ümidlə yavanlıq etməyə öyrənmişik. Çətini zəngin yaşamağa çalışan, zənginliyi imitasiya edən manısların güzəranıdır. Aylardır, yeganə qazanc yeri toylar olan bu şən-şaqraq insanlar intəhasız bir hüznə qərq olublar. Karantin acı bağırsaq kimi uzandıqca, efirlərdə görünən müğənnilərin üzündəki kədər və iztirab dərinləşir. Əvvəl çağırıldığı proqramdan üzrxahlıq edib yayınan, toyda oxumağı daha vacib hesab edənlər indi çağırıldıqları proqramların bitməsini istəmirlər...

Düşünürəm ki, toyların, el şənliklərinin qadağan edilməsi böyük bir kültürü iflic vəziyyətinə salıb. Böyük bir industriya çökür və müxtəlif peşə sahibləri bu dağıntıların altında qalırlar.

...Hər gün oxşar xəbərlərlə oyanıb, eyni ümidlə başımızı atırıq yastığa. Az qala, beş aydır yekrəng, yeknəsək bir ömür xırıd edirik fələyin oyununda. Nə qapımızı döyən var, nə hansısa qapını döyməyə üzümüz, imkanımız. Hər sabah internetdən axışıb bizi ağuşuna alan xəbərləri oxuyub, bir ovuc antidepressant nuş edib, bir siqaret yandırırıq qayğılı-qayğılı. Hər gün həyəcanla statistikanı izləyirik. Sağalan sayı yoluxan sayından artıq çıxanda, əlinə “üç tuz” gəlmiş hiyləgər qumarbaz kimi, bığaltı qımışırıq ki, “hə, bir az ümid var...”  Əslində isə “ümid bağlı qapılar arxasında, ruzimiz qurd ağzındadır”.

Təcridimiz orta əsrlər sufi şeyxinin təcridi kimi uzanır: canımız çiləyə təşnədir. Qadağalar azaldıqca, dükan-bazar, dəniz-çimərlik açıldıqca üzümüzə təbəssüm qonur. Amma heyhat! Nə dükan-bazara getməyə imkanımız, nə dənizə getməyə taqətimiz var. Dənizdə, dükan-bazarda sıxlıq yaradan da biz deyilik, bizim nəfsimizdir. Azadlığa təşnə, sərbəstliyə həsrət nəfsimiz özünü qumsallığa verib dincəlmək istəyir. Aylardır, tamarzı qaldığımız azadlığın, sərbəstliyin dadını çıxarırıq. Şükürlər olsun ki, “birinci dalğa” dedikləri hər nədirsə sahillərimizə çırpılıb, ala bildiyi qədər can alıb, geri çəkilir. Biz binəvalar da “birinci dalğa”dan xilas olmamış “ikinci dalğa”nın müjdəsini alırıq.

TƏBİB bir yandan, Operativ Qərargah digər tərəfdən xəbərdarlıq edirlər ki, “bəs hazır olun, gigiyenik olun, məsafəli olun - “ikinci dalğa” gələcək”. Xub! Gəlsin bu dənizin nə qədər dalğası varsa, bir təhər dözərik, səbr edərik. Amma, ancaq, lakin...

Pandemiyadır, karantindir, təcriddir, sosial məsafədir, yarıtmaz səhiyyədir – bunları birtəhər anlayırıq, ya da zor-bəla anlamağa, dərk etməyə çalışırıq. Bəs bizim sosial vəziyyətimiz, külfətimizin və millətimizin dolanışığı, yaşayışı necə olacaq? Körpə övladlarımıza nə qədər nağıl danışaq? Nə qədər aldadaq özümüzü?

Bütün qayda-qadağaya tabe olub, kədərli bir həyat yaşayırıq. Gün üzünə, doğmaların, yaxınların camalına həsrət qalmışıq aylardır. Şəxsən mən bir yazıçı kimi bu çətin məqamlarda dövlətimin dəstəyini hiss etmək, övladlarımın güvəndə olduğunu düşünmək istəyirəm. Ancaq narahatam, əndişəliyəm. Bir qarın çörək dərdi deyil qorxum. Bu il birinci sinifə getməli olan qızımın, liseyə qəbul olub, həvəslə dərslərin başlamasını gözləyən oğlumun təhsilindən nigaranam. Yaşlı valideynlərimin səhhətindən, aylardır işsiz qalan dost-tanışımın dolanışığından narahatam.

190 manata ümid edən, ehtiyac içində olan həmvətənlərimi düşünürəm. Sonuncu ehtiyatını da xərcləyib bitirmiş onlarla adam tanıyıram. Hər gün yardım üçün müraciət edənlərə, marketlərin qarşısında əl açanlara aylardır işsiz olduğumu deməyə utanıram.

Sosial problemlər, işsizlik və sıxıntılar ortaq dərdimizdir. “Ellə gələn toy-bayramdır” deyirik, amma yaxın qonşumuz Gürcüstana və uzağımız Avropaya baxanda görürük ki, əslində “toy-bayram” onlardadır. Səhiyyədən tutmuş, əhaliyə edilən sosial dəstəyə qədər nümunə götürməli olduğumuz çox şey var.

Biz, sadəcə, səriştəsiz, əhli-kef məmurların ümidinə qalmış qoca Şərqin atılmış və unudulmuş binəvalarıyıq.

Bundan sonra ümidimiz yalnız koronavirusun insafına qalıb. Bu zaval, bu mərəz özü könüllü çəkilib getməsə, bizim sonumuz heç də yaxşı görünmür...

1199
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Əlaqədar
Baba nəvəsinə ad günü təşkil etdi, qonaqlar hədiyyə əvəzinə cərimə ödədilər
"Bilmədiyimiz bir şeydən qorxmağın mənası yoxdur" - Psixiatr
Koronavirusdan daha təhlükəli: Qəzəb, aqressiya və gərginlik...
Hökumətdən kafe və restoranlarla bağlı yeni qərar
Birlik, həmrəylik məqamı və keçməməli olduğumuz "qırmızı xətt"
AZAL şirkətinin sərnişin təyyarəsi, arxiv şəkli

Xaricdəki azərbaycanlıların gətirilməsi ilə bağlı problemlər var

0
(Yenilənib 11:55 15.08.2020)
Azərbaycanda olan Rusiya vətəndaşlarının quru yolu ilə ölkəsinə getməsi təmin olunur, eyni zamanda da eyni marşrut üzrə Rusiyada olan vətəndaşlarımızın müəyyən qrafiklə ölkəmizə keçidi təmin olunur

BAKI, 15 avqust — Sputnik. "Xaricdə olan vətəndaşların gətirilməsi ilə bağlı ciddi problemimiz var. Uçuş reyslərinin təşkilində müəyyən çətinliklər var. Mərkəzi Asiya, Qazaxıstan, Türkmənistanda bir neçə vətəndaşımız qalıb ki, gələn həftə onların bərə ilə gətirilməsi təşkil olunacaq".

Sputnik Azərbaycan xəbər verir ki, bu sözləri Azərbaycan Respublikası Prezidentinin Administrasiyasının xarici əlaqələr şöbəsinin rəhbəri Hikmət Hacıyev deyib.

O bildirib ki, Azərbaycanda olan Rusiya vətəndaşlarının quru yolu ilə ölkəsinə getməsi təmin olunur, eyni zamanda da eyni marşrut üzrə Rusiyada olan vətəndaşlarımızın müəyyən qrafiklə ölkəmizə keçidi təmin olunur: "Eyni mexanizmlə Gürcüstanda olan vətəndaşlarımızın və Azərbaycanda olan Gürcüstan vətəndaşlarının da keçidi təmin olunur".

0