Noutbuk arxasında qız, arxiv şəkli

Zövqlərimizi, duyğularımızı, hisslərimizi idarə edən biri var: bir barmaq uzaqda

1534
(Yenilənib 23:16 24.03.2020)
Sosial şəbəkələr heç bir ictimai çəkisi olmayan nataraz adamları qəhrəmanlara çevirdi və gərəksiz dərəcədə sərbəst, "demokratik", "azad" mühit yaratdı

BAKI, 24 mart — Sputnik. Texnologiya, internet, sosial şəbəkələr həyatımıza sürətlə daxil olub və biz necə bir bəlaya düçar olduğumuzdan xəbərsizik. Xüsusilə internet həyatımızı asanlaşdırdığı qədər də problemlər yaradır. Bilgi, informasiya əldə etmək asanlaşdığı qədər, insan həyatı çətinləşir. Fərqində deyilik. Çünki sosial şəbəkələr vasitəsi ilə sosiallaşdığımızı düşünürük.

Əslində isə daha çox yadlaşırıq, tənhalaşırıq, asosiallaşırıq.

Sosial şəbəkələr insanlarla virtual ünsiyyətimizi asanlaşdırdığı qədər, real həyatda ünsiyyətimizə mane olur. Real insani münasibətlər ciddi zədələr alır, insanlar arasında soyuqluq, ögeylik, laqeydlik yaranır. İnsanlar getdikləri məkanları, yedikləri yeməkləri, ünsiyyətdə olduqları yaxınlarını, gördükləri işləri insanlarla paylaşmaq, bölüşmək, bəlkə də qıcıq yaratmaq instinkti ilə hərəkət edirlər. Təbii olaraq bütün bu paylaşımların arxasında "bəyən"ilmək ehtirası, təqdir edilmək arzusu, tərif həvəsi gizlənir. Çağımızı nəzər salsaq, bütün bunların hamısı olduqca təbii, gözlənilən və bəlkə də hesablanmış, dəqiq ölçülüb-biçilmiş prosesdir. Sosial şəbəkələr bütün sahələrə kifayət qədər ciddi təsir etdi və etməkdədir. Sosial şəbəkələr öz "qəhrəman"larını: psixoloqlarını, sosioloqlarını, həkimlərini, filosoflarını, şair və yazıçılarını, elm adamlarını, aktyorlarını, rejissorlarını yaratdı.

İndi hamı ellikcə maraqlı, ağıllı, gözəl, "cool" görünməyə çalışır. Sosial şəbəkələr fərdlərə lazımsız eqoizm bəxş etdi. Sosial şəbəkələr heç bir ictimai çəkisi olmayan nataraz adamları qəhrəmanlara çevirdi və gərəksiz dərəcədə sərbəst, "demokratik", "azad" mühit yaratdı.

Müasir insan sosial şəbəkənin əsirinə çevrilmiş asosiallaşan varlıqdır.

Sosial şəbəkələrin yaratdığı insan tipləri, normal həyatda qarşılaşdığımız "kimlik"lərindən fərqlidir. Çünki zaman-zaman ciddi hesab etdiyimiz adamların sosial şəbəkədəki siması bəzən həddindən artıq gülünc, bəzən isə çox faciəvidir.

Monitor arxasındakı həyatımız hərəkətsiz, soyuq və cansıxıcıdır. Real ünsiyyətdən qaçdıqca, hər şey yazıya, videoya, fotoya, səs yazısına çevrildikcə tənbəlləşir, vecsizləşirik. Hətta ən yaxınlarımızla, doğmalarımızla ünsiyyətimiz azalır, danışmaq, ünsiyyət problemə çevrilir. Müasir insan laqeyd bir varlığa çevrilir, kədəri də, sevinci də bəsitləşir. 

Sosial şəbəkələr ünsiyyət problemini daha da dərinləşdirir.

Məni ən çox narahat edən ədəbiyyatın sosial şəbəkələrdə "əriməsi"dir. Birbaşa prosesin içərisində olduğum üçün, hər şey daha aydın və dərkediləndir. Zaman o zaman idi ki, şeir, hekayə və digər ədəbi məhsullar dərnəklərdə, ən pis halda çayxanalarda, məclislərdə müzakirə edilirdi. Biz kiçik, amma kifayət qədər peşəkar çevrələrdə yazdıqlarımızı müzakirəyə çıxarır, bu müzakirələr nəticəsində qüsurlarımızı görür, istedadımızın sərhədlərini müəyyənləşdirirdik. Hansısa şairin, yazıçının, jurnalistin yazısını dörd gözlə gözləyir, jurnalları, qəzetləri, kitabları "gözümüzə təpirdik". Oxucu az, amma daha keyfiyyətli idi. İndi yazmağı bacaran hər kəs sosial şəbəkələrdə "bəyən"ilmək arxasınca qaçır. Nəticədə oxucu zövqünün idarə etdiyi vecsiz qələm adamları meydan sulayırlar. Çünki şair yazacağı şeiri yox, ona yazılacaq şərhləri düşünür. Şəbəkədaşlar şairi, yazarı öz zövqləri ilə idarə edirlər. Çox təəssüf ki, istedadlı qələm adamları sosial şəbəkələrdə fenomen olmağı ciddi ədəbiyyat yaratmaqdan üstün tuturlar.

Sosial şəbəkə insan zövqlərini, duyğularını, hisslərini idarə edir.

Artıq qələm adamlarının yazdıqları sosial şəbəkələrin yaratdığı yeni insan modelinə hesablanır. Artıq oxucu yoxdur, "layker" var.

Mən neçə-neçə qələm dostlarımın sosial şəbəkə istifadəçiləri tərəfindən ələ salındığının, linç edildiyinin şahidi olmuşam. Çox təəssüf ki, artıq biz bəzən real kimliyi bilinməyən, intellekti, dünya görüşü bizə məlum olmayan insanların sosial şəbəkələrdə yazdıqlarına ciddi-ciddi yazılar həsr edir, əslində isə Don Kixot kimi yel dəyirmanları ilə döyüşürük. 

Yazıçı, arxiv şəkil
© Jason Andrew/Pool via REUTERS

Sosial şəbəkələrin aktiv istifadəçisi olduğum halda bu yazını niyə yazdım? Bu yazının sadaladığım problemlərdən qurtulmağımıza faydası olacaqmı?

Yazdım ki, ən azından sadaladığım bu problemləri bir daha özümə və sizə xatırladım. Sosial şəbəkələrdən uzaq qalmaq, sadaladığım problemlərdən xilas olmaq mənim üçün çətin görünmür. Tanıdığım ciddi insanlar var ki, sosial şəbəkələrdən kənarda çox rahat ömür-gün sürür, işinin, həyatının dadını çıxarır, dostlarla, ailəsi ilə normal vaxt keçirirlər. Bəlkə də, asılılıq dərəcəsinə çatdırmadan, sosial şəbəkələrdə olmaq ziyan gətirməz. Amma gördüyün bütün ciddi işlərin üstündən xətt çəkib sosial şəbəkələrin fenomeninə çevrilmək arzusu təhlükəlidir. Xüsusilə qələm adamlarının bu bəlaya yoluxması, kiçik bir dəstənin, kiçik bir qrupun əlində girinc qalması yaxşı heç nə vəd etmir. Bu gün sizi tənqid edən şəbəkə fenomenləri sabah sizi öz zövqü ilə hesablaşmağa, sizi istədiyi insana çevirməyə nail olacaqlar və bəlkə də buna nail olublar, biz fərqində deyilik. Ədəbiyyat isə kütlədən, bəsit və lağlağı zövqlərdən üstündür.

Bu məqamda dinlərin niyə yazıya ehtiyatla yanaşdığını anlayıram. Hamının əlinə qələm verib yazmağı öyrətmək, sonra isə istədiyini yazmağa şərait yaratmaq ilahi, səmavi söz üçün təhlükə idi.

Proses isə qarşısıalınmazdır. İnsanların sosial şəbəkələrə axınının qarşısını almaq olmaz, yəni onlar artıq "yaza bilirlər". Bu məqamda, yeganə yol şəxsiyyətin, həqiqi qələm adamının, ciddi söz sahibinin özünü xilas etməsidir. Kütləvi olan hər şeylə məsafəli davranmaq ərdəmdir, bəzən kütlədən qaçmaq da...

1534
Əlaqədar
Bu aclıq digərlərinə bənzəməz: o növbələrdə fəhlə də var, bank işçisi də...
Uğursuzların, istedadsızların qisası...
Vəhşi qərb haqqında antologiya: “Baster Skraqs haqqında ballada”
Pis kitablar və qorxulu oxucular – Dilemma buradan başlayır
"Əhlət ağacı" – Yabanı armudun simvolikası
Redaktorun iş masası, arxiv şəkli

İslahatlar dalğası mediamıza çatdı: bizi gözləyir?

20
(Yenilənib 09:44 16.01.2021)
"Cidanı çuvalda gizlətmək" mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyd, jurnalistikadan xəbərsiz bir məmurun rəhbərlik etdiyi AR Prezidenti yanında KİVDF-nin qanunsuz əməlləri də gizli qalmadı.

Nəhayət ki, media sahəsindəki boşluqlar dövlətin diqqətini çəkdi.

Şəxsən mən dəfələrlə bu mövzuda yazsam da, səsimi lazımı şəxslərə eşitdirə bilmirdim.

Çünki, səsimizi eşitməli və eşitdirməli olan kəslər, səsimizi batırmaq üçün çabalayırdılar.

Bəli, mediamızın “başbilənləri” problemdən, haqsızlıqdan, qanun pozuntularından danışan şəxsləri ciddiyə almırdı, imkan olduqca səsimizi batırırdılar.

Onlar ancaq öz ətraflarındakı şəxsləri dinləyir, onlara “ləbbeyk” deyənlərin yolunu açırdılar.

Mediamızın vəziyyəti barədə uzun-uzadı yazmağa ehtiyac görmürəm, aidiyyatı olan hər kəs, hər şeyi bilir.

İllərdir baş alıb gedən ədalətsizliklər, mənimsəmələr, korrupsiya və israf nəhayət ki, dövlətin diqqətini çəkdi.

“Cidanı çuvalda gizlətmək” mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyid, jurnalistikadan xəbərsiz bir məmurun rəhbərlik etdiyi Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun qanunsuz əməlləri də gizli qalmadı. İslahatlar dalğası mediamıza da gəlib çatdı.

***

Ölkə prezidenti “Azərbaycan Respublikasında media sahəsində islahatların dərinləşdirilməsi haqqında” fərman imzalayıb. Fərmana əsasən, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu ləğv edilib və onun bazası əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılıb.

Mediamıza, jurnalistlərimizə, zəhmətkeşlərimizə xeyirli, uğurlu olsun.

Baş verəcək hadisələri qabaqlamaq istəməzdim, ancaq dünən efirlərin birində illərdir media sahəsində hər cür qanun pozuntusu, korrupsiya ilə məşğul olmuş “başbilənlərdən” birinin ölkə prezideninin yeni fərmanını şərh etdiyini görəndə dalağım sancdı.

Nədənsə mənə elə gəlir ki, rüşvətə, korrupsiyaya, KİVDF-nin maxinasiyalarına bulaşmış insanlar bu sahədən uzaqlaşmadıqca, mediamız rahat nəfəs ala bilməyəcək.

İllərdir mətbuatın nəfəsini kəsən bu adamların indi islahatları dəstəkləməsi, yeni yaranan quruma təsir imkanları, ağız dolusu ədalətdən danışması məni çox narahat edir.

***

Düşünürəm ki, “Kütləvi İnformasiya Vasitələri haqqında” qanuna ediləcək dəyişikliklər ictimaiyyətin geniş müzakirəsinə çıxarılmalıdır.

Bu günə qədər edilən dəyişikliklər qənaətbəxş olmadığı üçün, bundan sonrakı proseslərdə ictimai fikir nəzərə alınmalıdır.

İndi diqqət daha çox KİV-nin qeydiyyatı məsələsinə çəkilir, jurnalistikaya aidiyyatı olmayan şəxslərin bu sahədə olmasından narahatlıq bildirir. Halbuki, mətbuatımızın yüzlərlə həll olunması vacib, aktual problemləri var.

Sosial şəbəkələrin, vətəndaş jurnalistikasının, blogerliyin geniş yayıldığı cəmiyyətdə, medianın inkişaf perispektivləri müasir texnologiyalardan kənarda müzakirə olunmamalıdır.

Qanunvericilikdə ediləcək dəyişikliklər medianın reklam bazarının formalaşmasına geniş dəstəyi də nəzərdə tutulmalı, mətbuata mümkün azadlıqlar verilməlidir.

Heç bir funksionallığı olmayan qəzetlərə dövlətin maddi dəstəyi dayandırılmalıdır.

Azad fikrə, azad sözə şərait yaradılmalı, ölkədə ciddi, dövlətçilik maraqlarını düşünən müxalif mətbuatın formalaşmasına imkan verilməlidir.

Şəxsən mən media sahəsindəki islahatların müsbət nəticələrini tezliklə görmək istəyirəm.

20
Xəzər, arxiv şəkli

Dəniz şəhəri olsaq da, bir azdan havanı Kanadadan almalı olacağıq

45
Bakının girişində xəzriyə bir heykəl quraşdırmaq da yerinə düşərdi, çünki bizim eləmədiyimizi bu xeyirli külək edir

Uzunömürlü insanların çoxu adətən dağ rayonu, ya da təmiz havası olan dəniz kənarında yaşayır. Oksigeni bol olan istənilən məkanda xəstələnmək şansı da azdır. Təmiz, yodlu-bromlu dəniz havası insanın uzun müddət sağlam yaşamasına zəmin ola bilər.

Şəhər havasının korlanmasına yüzlərlə amil təsir edir

Böyük şəhərlərdə sinə dolusu nəfəs almaq artıq çoxdan müşkülə çevrilib. Əgər burada artıq 1 milyondan artıq insan yaşayırsa, deməli, istəsən də, istəməsən də, təmiz hava qıtlaşır. Özü də müasir meqapolislərin bir çoxunda insan sayı on milyonlarla ölçülür. Şəhər havasının korlanmasına isə yüzlərlə amil təsir edir.

Milyonlarla bir yerə toplanan insanın nəfəs alması, şəhərlərdə saxlanılan ev heyvanları, insan fəaliyyəti nəticəsində yaranan zibil, sənaye müəssisələri, ziyanlı istehsalat, aviasiya, ictimai və gəmi nəqliyyatı, nəhayət şəxsi avtomobillər sakinlərin həyatını dözülməz edir. Şəhər insanı isə daim özünə rahat şərait yaratmağa çalışır. Tez-tez evini təmir edir, hələ dünən bəh-bəhlə dükandan aldığı əşyanı bu gün zibilə atır, çox yeyir, gəzir, idmanla məşğul olur, avtomobili, kompüteri və smartfonu daha dəblisi ilə əvəzləyir. Hər bir əməliyyat bu və ya digər formada şəhərin havasını çirkləndirir.

London, Nyu-York, İstanbul, Moskva, Pekin, Tokio, Seul kimi meqapolislərdə təmiz hava problemi çoxdan mövcuddur. Oksigen balonlarını Yaponiyada 2006-cı ildən satırlar. Nisbətən təmiz havası olan ölkələr artıq bu “məhsul”u satmaqla gəlir əldə edirlər. Əhalisi az, havası isə zəngin olan Kanada neçə müddətdir Çinə dağ havası yollayır. Eynilə dağ havasını dünya bazarında satan İsveçrə şirkəti də var. Pekin həm də dünyanın ən çirkli şəhərlərindən sayılır. Bəzi tədqiqatçılar Pekində nəfəs almağı gündə 40 siqaret çəkməklə bir tuturlar. Kanada havası Çində olduqca yaxşı satılır. 

Hava yoxdursa, deməli, həyat yoxdur

Hər bir şəhər, hər bir dövlət havanın çirklənməsi ilə bacardığı qədər mübarizə aparır. Deyək, 100-150 il öncə Londonda evlər daş kömürlə qızdırılırdı. Bu prosesdə yaranan tullantılar Böyük Britaniyanın paytaxtını dünyanın ən çirkli şəhərinə çevirmişdi. Nə nəfəs almaq olurdu, nə də normal yaşamaq. Təbii qaz peyda olduqdan sonra London meriyası daş kömürlə evləri qızdırmağı qadağan edir və şəhərin havası xeyli təmizlənir. Hazırda London daha bir problemlə üz-üzədir: əhalisi 10 milyona yaxınlaşan şəhərdə rahat nəfəs almağa ərazi qalmayıb. İnsanlar və avtomobillər paytaxtın havasını dəhşətli dərəcədə çirkləndirir. İndi də daha sərt qaydalar tətbiq edilməyə başlanılıb. Londonun mərkəzinə keçid pulludur, maşın saxlamaq da əlavə pul tələb edir. Yaxın illərdə şəhərdə duru yanacaqla işləyən avtomobillərin tam olaraq hidrogen yanacağına keçəcəyi, elektromobillərin geniş yayılacağı gözlənilir.

Sərt qaydalar tək Londonda deyil, həm də Avropanın bir çox ölkəsində tətbiq edilib. Yaxın gələcəkdə benzinlə işləyən avtomobillərin tam olaraq ekoloji təmiz yanacaqla çalışan nəqliyyat vasitələri ilə əvəzlənməsi bütün böyük şəhərlərin rəhbərliyi üçün prioritet məsələdir. Hava yoxdursa, deməli həyat yoxdur.

Oslonun daxilində bircə dənə sənaye müəssisəsi qalmayıb

Məsələn, Norveçin paytaxtı Oslo 2019-cu ildə Avropanın ən yaşıl və təmiz şəhəri elən edilib. Bu şəhərdə zibil ən azı 4 növə bölünərək şəhərin kənarında yerləşdirilən zibil zavoduna göndərilir. Zibil çox dəqiqliklə emal edilir, yəni cəmi 3 faiz qalıq qalır. Hətta qonşu Danimarka və İsveç öz zibilini də Norveçə təhvil verir. Norveçdə hətta kanalizasiyada yaranan istilikdən evləri qızdırmaq üçün istifadə edirlər. Oslonun daxilində bircə belə sənaye müəssisəsi qalmayıb. Hamısı şəhər kənarına çıxarılıb.

Şəhərin hər yerində piyadalar və velosipedçilər üçün yollar çəkilib. Avtomobil yolları isə şəhəraltı tunellərə köçürülüb.  Oslo əhalisinin yarısı elektromobillərdə hərəkət edir, günəş paneli ilə yüklənən elektrik velosipedi də çox populyardır. Tramvay, gəmi və digər nəqliyyat növlərində də elektrik enerjisindən istifadə edilir. Su elektrik stansiyaları da kifayət qədər enerji verə bilir. 1 litr benzin 3 manatadır deyə oslolular kütləvi olaraq benzinlə işləyən avtomobillərdən imtina edirlər. Elektromobillər üçün hər yerdə doldurma məntəqələri quraşdırılıb. Burada akkumulyatoru doldurmaq havayıdır. Havanı çirkləndirən avtomobillərin şəhər mərkəzinə daxil olması pulludur. Bu qayda həm də parklama yerlərinə də aid edilir.

Müasir şəhərin rəhbərliyi mümkün vasitələrlə havanın çirklənməsinin qarşısını almağa yönəlmiş tədbirlərə əl atmalıdır, yoxsa yaşayış mümkün olmayacaq.  Şəhərin yaşıllaşdırılması, yeni ağacların əkilməsi, demək olar, bütün meqapolislərdə reallaşdırılır. Yaponlar hətta göydələnlərin dam örtüyünü yaşıllıqla tamamlayırlar. Hər eyvanda mütləq ev bitkilərinin olduğunu müşahidə etmək olar. Yaşıllıq varsa, deməli oksigen çatışmazlığının az da olsa, qarşısını almaq olacaq.

Avtomobilin salonundan benzin iyi gəlir? Gəlsin də...

Bakı əhalisi də təmiz hava qıtlığından əziyyət çəkir. Dəniz şəhəri olsaq da, yodlu-bromlu havanı duya bilmirik, çünki Azərbaycanda mövcud olan avtomobillərin yarısı paytaxta cəmlənib. 4 milyonluq əhaliyə bəlkə də 1 milyon maşın düşür. 40 il öncənin Bakısında tək-tük maşın səsi eşidilirdi. Hava təmiz, insan sayı isə 4 dəfə az idi. Hazırda maşının nə səsi kəsilir, nə də havaya atılan zəhərli qazın sonu bilinir. Bizim avtomobil parkımız yalnız benzin və dizellə işləyən nəqliyyat vasitələrindən ibarətdir. Avtobusların bir çoxu elə işə düşərkən atmosferə qara tüstü buraxır, hamılıqla boğuluruq.

Ölkədə köhnə avtomobillərin utilizə edilmə proseduru yoxdur, yəni avtomobil ölənəcən işləyir. Sərt ekoloji qaydalar tətbiq edilmədiyindən avtomobilin texniki vəziyyəti sürücünü narahat etmir bir növ. Maşının arxa borusundan qara tüstü çıxır? Nə olsun? Çıxır, çıxsın da. Avtomobilin salonundan benzin iyi gəlir? Gəlsin də, nə olacaq ki?! Belə vəziyyətdə olan maşınla sərnişin daşıyan da az deyil. Soruşanda da, deyir, düzəldərəm, kasıblığın üzü qara olsun və sair. Avtobusun və ya avtomobilin köhnə olması əsas deyil, gərək yiyəsi bu nəqliyyat vasitəsinə qulluq eləsin, vaxtı-vaxtında yararsız detalları dəyişsin. Onu da etmək istəmirik.

Bakı yaşamaq üçün yararsız olan bir şəhərə çevrilməkdədir

Qanuna görə, hər bir nəqliyyat vasitəsi ildə bir dəfə texniki baxışdan keçməlidir. Məntiqlə paytaxtdakı avtomobillərin bir hissəsi elə bu mərhələdə kənarlaşdırılmalıdır. Amma proses formal olaraq reallaşır, apar pulunu ödə, texniki baxış barədə sənədi al. Nəticədə Bakı yaşamaq üçün yararsız olan bir şəhərə çevrilməkdədir, hava yox, xəstəlik də baş alıb gedir. Nəqliyyata texniki baxış məsələsində daha sərt qaydaların tətbiq edilməsinə su-hava kimi ehtiyac var. Köhnə avtomobil və avtobuslardan çoxdan yaxa qurtarmaq lazımdır, ən azı nəqliyyat vasitəsi sahiblərini  buna məcbur etməklə. Köhnədir, apar təhvil ver, puluna al ya da yeni avtomobil üçün sertifikat əldə et. Köhnəlmiş maşınları utilizə etmək, yığmaq zamanı çatıb. Ya da ən azı maşın sahibi öz avtomobilinə qulluq etməlidir. Niyə yol hərəkət qaydasını pozan sürücüyə cərimə yazılır, amma borusundan tüstü çıxan avtomobili görən yoxdur? Bəyəm, bu insan həyatı üçün təhlükəli deyil? Təmiz hava heç kimi maraqlandırmır?

Təmiz havaya görə xəzri küləyinə borcluyuq

Bakını ekoloji təmiz şəhərə çevirmək üçün bir çox layihə var. Məsələn, tramvay nəqliyyatının yenidən bərpası, metronun genişləndirilməsi, velosiped yollarının inşası, yeni növ elektrik qatarı şəbəkəsinin uzadılması məsələləri ara-sıra gündəmə gəlir, amma bu planlar daha çox kağızda reallaşır. Praktik işlər çox gecikir. Bircə çoxlu ağac əkilir paytaxtda, tez-tez aksiyalar keçirilir, yeni-yeni sahələrdə kiçik meşələr yaradılır. Özü də bu işdə demək olar hər bir dövlət qurumu iştirak edir, hətta könüllü olaraq ağac əkmək olduqca şərəfli iş sayılır. Yenə də şəhərin havası təmizlənir bir növ.

Ümumilikdə təmiz havaya görə Xəzər dənizindən əsən xəzri küləyinə borcluyuq desək, yanılmarıq. Dənizdən əsən sərin şimal küləyi şəhərin tozunu-tüstüsünü sistematik olaraq aparır, havanı təmizləyir. Xilas edir bizi havasızlıqdan. Bakının girişində xəzriyə bir heykəl quraşdırmaq da yerinə düşərdi, çünki bizim eləmədiyimizi bu xeyirli külək edir.

Amma şəhər də dayanmadan artır, yeni binalar ucaldılır, prospektlər salınır, yollar tikilir, xaricdən də yeni avtomobillər gətirilir, özü də benzinlə işləyən. Belə getsə, nə xəzri, nə gilavar kömək etməyəcək bizə, havanı Kanada, ya da İsveçrədən pulla alacağıq.

45
Teqlər:
hava, Bakı, ekologiya
Manat, arxiv şəkli

Yardım dayandırılmayıb - Şahmar Mövsümov

0
(Yenilənib 20:07 16.01.2021)
"Bunun üçün vəsaitlər ayrılıb, proses gedir. Məsələ ilə İqtisadiyyat Nazirliyi məşğul olur" - Prezidentin köməkçisi

BAKI, 16 yanvar — Sputnik. Sahibkarlara dəymiş ziyanın ödənilməsi ilə bağlı tədbirlər planı üzrə proseslər davamlı olaraq həyata keçirilir. Sputnik Azərbaycan-ın məlumatına görə, bunu jurnalistlərə açıqlamasında Prezidentin köməkçisi, Prezident Administrasiyasının İqtisadi Məsələlər və innovativ inkişaf siyasəti şöbəsinin müdiri Şahmar Mövsümov bildirib.

Ş.Mövsümov deyib ki, müxtəlif sahələr və istiqamətlərdə sahibkarlara yardım nəzərdə tutulub:

"Bunun üçün vəsaitlər ayrılıb, proses gedir. Məsələ ilə İqtisadiyyat Nazirliyi məşğul olur. Ümumilikdə zərərçəkmiş sahələrdə çalışanlara yardım heç vaxt dayandırılmayıb".

0