Zeynəb Xanlarova, arxiv şəkli

“Yaşa mənim xalqım” deyən o lirik Leylidən bir heç vaxt olmayacaq

897
(Yenilənib 10:20 12.01.2020)
Sovet İttifaqı dövründə Türkiyədə konsert verən və bu səhnədə sovet əsgərlərinin mühasirəsində "Çırpınırdı Qara dəniz, baxıb türkün bayrağına" deyə mahnı oxuyan, oxuya bilən ilk və tək azərbaycanlı müğənni idi

BAKI, 11 yanvar — Sputnik. Həyatı 4 yaşımdan bu tərəfə xatırlayıram. Ondan əvvəldə nələr baş verib, dəqiq bilmirəm, amma ondan sonrası xatirəmdədir. Onu da deyim ki, mən nadinc, şıltaq, dilbilməz uşaq olmuşam. Ağıla gələcək, ya da gəlməyəcək olan o qədər yaramazlıqlar etmişəm ki, bütün bunların içində məni ram edən çox az şey vardı. Onlardan biri də Zeynəb Xanlarova idi...

Bilirəm, çoxunuzun onunla bağlı xoş fikirləri yoxdur. Bunun ən böyük səbəbi onun siyasi karyerası və tutduğu mövqedir. Amma bunu oxuyan hər kəsdən xahiş edirəm, gəlin, siyasətçi Zeynəb Xanlarovadan yox, sənətkar Zeynəb Xanlarovadan danışaq. Axı bilənlər bilir, səbəbsiz və ya təmənnalı sevmərəm kimsəni!

Televizorun hər evdə olmadığı vaxtlardan danışıram. Bütün kənddə, qəsəbədə 1-2 evdə televizor olardı və o evin əhli bütün kəndin media qurumu idi. Anonslar, xəbərlər, proqnozlar və digər bütün məlumatlar o ev sayəsində bütün kəndə və ya qəsəbəyə ötürülərdi. Bu məlumatların içində ən gözləniləni, intizar ediləni, maraq doğuranı Zeynəb Xanlarovanın oxuyacağına dair anonslar olardı.

Mən də o nadinc halımla təkcə bu xəbərə qulaq kəsilər, uğunardım sevincimdən. SSRİ Xalq artisti oxuyacaq deyirdilər. Canlı əfsanə, qüdrətli sənətkar, dünya şöhrətli sənət ulduzu, şərqin nəhənglərindən biri... Bu ifadələri onun haqqında az-qala hər yerdə, hər saniyə deyirdilər. Sıravi adamlar da, efir adamları da, dövlət nümayəndələri, müəllimlərimiz də deyirdi. Onu bizim üçün əvvəldən mükəmməlləşdirmişdilər. Amma bu mükəmməlliyi ona hədiyyə etməmişdilər. Zeynəb Xanlarova istedadsız adam deyildi, ola bilməzdi. İstedadsız adam kəskin sovet senzurası dövründə Opera Teatrının səhnəsində Leyli, Əsli oynaya bilməzdi. İstedadsız, bacarıqsız, səriştəsiz, tənbəl, laqeyd adam dünyanın az qala bütün ölkələrində konsert verib saatlarla canlı ifalar sərgiləyə bilməzdi. O, mənfi enerjili, narahat edici, depressiv, aqressiv təəssürat yaradan biri də deyildi. Əgər elə olsaydı, bu qədər sevilməzdi, bu qədər gözlənilməz, arzu edilməz, həsrəti çəkilməzdi. Elə mən özüm, o kiçik yaşımda, o balaca canımla onu görəndə, eşidəndə o qədər xoşbəxt olurdum ki, indi ifadə edə bilmirəm o hisləri!

Nəysə. Bütün uşaqlığım və yeniyetməliyim boyunca onun efirə çıxmasını, onun oxumasını gözləmişəm. Onu görəndə həyəcanlanmışam, xoşbəxt olmuşam, zövq almışam. Sizi deyə bilmərəm, amma mənim ona saysız-hesabsız mənəvi borclarım var. Bunu bilirəm, fərqindəyəm.

Təxminən, 13-14 yaşlarımda başladım Zeynəb Xanlarova haqqında çoxsaylı arzuolunmaz fikirlər eşitməyə. Ən birinci eşitdiyim o oldu ki, Zeynəb Xanlarova Lerikə yol çəkməyə icazə verməyib. Parlamentdə deyib ki, "Lerik heç kəsə lazım deyil, indi ora yol çəkmək bizə maddi israfdır". 

Bir yanda da dildən-dilə, eldən-elə dolaşan və heç bir əsası olmayan Nəzakət Məmmədova iddiaları vardı. Sonra eşitdim ki, ittifaq dağılanda Zeynəb Xanlarova Azərbaycanın müstəqilliyinin əleyhinə səs verib. Bu cür ittihamlar onu zaman-zaman xalqın gözündən salırdı. Mən daha uşaq yaşlarımda kəndimizdə gördüyüm kimi, hamıda ona qarşı heyranlıq, pərəstiş görmürdüm. Amma mən sevgimdən dönməmişdim, indi də dönməmişəm! Sevdiklərimi asanlıqla unudan, tərk edən, sonra da ona nifrət bəsləyən adam deyiləm. Təbiətimdə özümə qarşı belə bir dönüklük yoxdur. Axı mən ona olan mənəvi borcumu unutmamışdım, unutmamışam.

İşləyirdim. Həm də oxuyurdum. Çox yorğun, halsız, əsəbi, gərgin, bəzən də tamamilə həyatdan küsmüş halda olurdum. Məni bu narahatlıqlardan Zeynəb Xanlarova arındırırdı. Bütün il boyu gözümü yeni ilə dikirdim. Hamı fişəngin, yolkanın, Şaxta Babanın, plovun, dolmanın, aşqaranın, ləvənginin dərdi ilə yeni ili gözləyəndə, mənim tək dərdim o olurdu ki, Zeynəb Xanlarova oxuyacaq və mən azacıq da olsa bu narahat mühitdə xoşbəxtlik tapacam.

Bəzən haqqında çox yaxşı şeylər də eşidirdim. İddia olunurdu ki, Rəşid Behbudovun həyatını xilas edib. Hindistan söhbətini eşitməmiş olmazsınız. Konsert üçün getdiyi ölkələrdən saçlarının arasında əhəmiyyətli sənədlər daşıdığına dair söhbətlər də çox həyəcanlı olurdu. O sənədləri gətirməklə ölkənin taleyüklü məsələlərində uğurlu nəticələrə imza atdığı deyilirdi. Azərbaycanla Türkiyə arasında bağların qırılması üçün çalışan Sovet İttifaqı dövründə Türkiyədə konsert verən və bu səhnədə sovet əsgərlərinin mühasirəsində "Çırpınırdı Qara dəniz, baxıb türkün bayrağına" deyə mahnı oxuyan, oxuya bilən ilk və tək azərbaycanlı müğənni idi. Bunu Türkiyədə eşitmişdim. Türkiyədə tanış olduğum yaşlı bir kişi azərbaycanlı olduğumu öyrənəndə məni evinə aparıb Zeynəb Xanlarovanın vallarını, hətta imzalı albomunu göstərmişdi və bunu 70-ci illərdə Zeynəb Xanlarovanın İstanbul konsertində şəxsən özündən aldığını demişdi. Daha sonra Ankarada yaşlı bir kişi azərbaycanlı olduğumu öyrənəndə "Xanlarova yaşayırmı" soruşdu. Yaşadığını dedim, onu hardan tanıdığını sual etdim və "Biz Qara dənizi Xanlarovadan duyduq, o zamanlar Qara dənizi heç görməmişdik" dedi.

Sizin üçün bütün bunlar nə qədər önəmlidir, bilmirəm. Amma mənim üçün çox önəmlidir. İl oldu 2020 və Zeynəb Xanlarova ilə qarşıladıq bu ili də. Siyasi karyerasını da, mövqeyini də sevmirəm, razılaşmıram, tərəfdarı deyiləm. Sənətini, sənətə olan sevgisini, əzmini, mübarizəsini, olduğu yeri fəth edə bilmə bacarığını hər zaman sevmişəm, bu gün də sevirəm və sevgidə sədaqətli olduğum üçün əminəm ki, hər zaman sevəcəyəm.

Baxın, dinləyin, görün özü də necə deyir:

Bitdi bu məhəbbət göz yaşlarında!

Biz niyə ayrıldıq sonunda belə?

Süz məni o soyuq baxışlarınla,

məni unutmağa tələsmə hələ!

Əyilməz qəddim bax, dağ bil məni.

Şirin meyvələrdən bağ bil məni.

Desələr ölmüşəm, sağ bil məni.

Məni unutmağa tələsmə hələ!

https://www.youtube.com/watch?v=DdNEcLipfpE

Məncə də. Onu, onun zəhmətini, onun bizə yaşatdığı kəmiyyətdə kiçik, amma mahiyyətdə böyük xoşbəxtlikləri unutmağa tələsməyək hələ! Hər şey düzələcək, əminəm. Lerikə yol artıq çəkilib, Azərbaycan da daha müstəqildir. Çox deputatlar da gəlib keçəcək məclisimizdən, boş-boş danışıqları ilə. Amma səhnəmizdəki “Dünyanın xoşbəxti mənəm dünyada” deyən, xoşbəxtliyi şüurumuzun altına həkk edən, “Qalmaz belə, qalmaz dünya”, “Gərəksən mənə”, “Yaşa mənim xalqım” deyən o lirik Leylidən  bir də heç vaxt olmayacaq.

897
Əllərində smartfonlar olan gənclər, arxiv şəkli

Alternativ kanallar: daha çox imkanın olması hava-su kimi əhəmiyyətlidir

29
(Yenilənib 18:15 19.10.2020)
Texnologiya nə qədər inkişaf etsə də, həyatda həmişə alternativ olmalıdır. Deyək, əgər dünyada hər bir məsələ internetə bağlanıbsa, bu halda istənilən bir ciddi internet problemi müasir sivilizasiyanın süqutuna apara bilər.

Amerikanın məşhur fantast yazıçısı Rey Bredberinin bir hekayəsində bir-biri ilə çarpışan iki ölkənin texnoloji qarşıdurması əks olunub. Uzun sürən müharibədə hər gün bir yeni silah icad olunsa da, qarşı tərəf tezliklə daha yenisini yaradırmış. Beləliklə, çarpışma heç vaxt bitmirmiş. Hər yeni texnologiya başqa birisinin ərsəyə gəlməsinə səbəb olurmuş. Beləliklə, bütün köhnə biliklər də unudulurmuş.

Həyatda həmişə alternativlər olmalıdır

Günlərin bir günü bir şəxs köhnə dədə-baba qaydasına qayıtmağa qərar verir. Adi kağızda klassik metodla hesablama aparır. Onun bu yanaşması yaşadığı ölkənin rəhbərliyində bir şok yaradır, çünki artıq heç kim hesablamanı kalkulyatorsuz apara bilmirmiş. Yəni bütün inkişaf mərhələsini keçəndən sonra insanlar yenidən sadə bir qaydaya üz tutmalı olurlar, çünki irəli getməyə yer qalmır.

Rey Bredberinin hekayəsi, əslində, daha ciddi problemi ortaya qoyub. Texnologiya nə qədər inkişaf etsə də, həyatda həmişə alternativ olmalıdır. Deyək, əgər dünyada hər bir məsələ internetə bağlanıbsa, bu halda istənilən bir ciddi internet problemi müasir sivilizasiyanın süqutuna apara bilər. İnternetə alternativ hər hansı informasiya kanalı varmı? Bəli, hələ var.

Ənənəvi şəhər telefonları informasiya ötürülməsində yararlı bir vasitədir

Məsələn, radio və televiziya siqnalları hələ də köhnə qayda ilə ötürülür. İnternet olmadan belə ölkənin istənilən yerində radionu dinləmək və ən azı yerli kanallara pulsuz baxmaq olur. Bəzi aparatların köməyi ilə pul ödəyib internetsiz, peyk vasitəsilə gələn televiziya siqnallarının köməyi də kanallara baxmaq, məlumat almaq olur.

Köhnə ənənəvi şəhər telefonları informasiya ötürülməsində yararlı bir vasitədir. İşıq da sönsə, internet də qırılsa, ona heç bir təsiri olmur. İşlədiyi kimi işləyir, əgər qarşı tərəfdə də belə bir telefon varsa, rahatlıqla pul ödəmədən danışmaq olur.

Texnologiya nə qədər inkişaf etsə də, nədənsə hələ də “köhnə”, bəlkə də yararsız kimi görünən bir çox vasitə hələ də praktik xeyir gətirməkdədir. “İnternetdə hər şey var, nəyisə yaddaş kartında saxlamaq nəyə lazım” deyənlərin bir çoxu hərdən ehtiyac duyulan bir məlumatı tapa bilmir. Bu gün bu kitab, film və ya digər informasiya açıq mənbədə var, sabah isə kiminsə tələbi ilə yığışdırıla da bilər.

Ailə şəkillərindən tutmuş şəxsi yazı-pozusuna kimi hər bir məlumatı internetdə saxlayan nə qədər insan var. Əvvəl bu şəkillər üçün albom alardıq, xüsusi səliqə ilə düzərdik. Hətta əsgərlikdən nə qədər gözəl albom gətirənlər var. Hərbi qulluğun son 6 ayını məhz bu işə sərf edərmişlər. İndisə hər nəyimiz varsa, vermişik “quql”un ixtiyarına. Açar cansız bir süni intellektin, axtarış sisteminin əlindədir, hara istəsə, ora da fırladacaq. Qapada da bilər, aça da.

Həmin texnologiya tam itmir, bir çoxu hələ də yaşamaqda davam edir

Deyirlər, “ehtiyatlı oğulun anası ağlamaz”. Yəni hər bir çətin durum üçün bir ehtiyat variantının olmalıdır. Ən çətin iş məlumatı qoruyub saxlamaq olub, çünki haraya yerləşdirsən belə, həmin sərt disk yanıb sıradan çıxa bilər. Adi disklər bəlkə də kompüterin yaddaş kartından daha etibarlı qoruyurlar məlumatı. Hətta özünün DVD diskinə 100 il təminat verən şirkət də var. Kifayət qədər bahalı olsa da, informasiya itmir.

Əslində, ehtiyat variantları, alternativlər bizim həyatımızı olduqca zənginləşdirir. Hər yeni texnologiya köhnəsini sırada çıxara bilər, amma həmin texnologiya tam itmir, bir çoxu hələ də yaşamaqda davam edir. Bunun yüzlərlə nümunəsini görürük. Hazırda dünya yeni enerji mənbələri axtarır, istehsal edilən avtomobillərin artıq tam elektrik enerjisi ilə çalışacağını proqnozlaşdırılır. Neft-qaz erasının bitəcəyini iddia edənlər də az deyil. Amma bütün bunlar bir əlavə ehtiyat variantı kim hələ uzun müddət bəşəriyyətə xeyir verə biləcəklər.

Dünyada ən böyük enerji ehtiyatı isə məhz daş kömür formasında toplanıb. Bəli, bu gün müasir şəhəri onunla qızdırmağa icazə yoxdur, amma bu enerji forması bizim sivilizasiyanı hələ uzun müddət məhv olmaqdan xilas edə bilər. Hələ neçə əsr onu yerin altında çıxarmaq imkanı var. Hələ də daş kömürdən dünya iqtisadiyyatında geniş istifadə edilir.

Braziliyada ən dəbdə olan yanacaq növü texniki spirtdir. Həm ekoloji təmizdir, həm də ondan avtomobillərin bir çoxu yararlanır. Həm istehsalı böyükdür, həm də hara gedəcəyi məlumdur. Deməli, dünyada baş verə biləcək neft-qaz böhranı bu ölkə üçün elə də təhlükəli deyil.

Müharibə dövründə alternativlərin qiyməti birə on artır

Vinil valların dövranı çoxdan bitib, amma hələ də onları sifariş edən, aparatını alıb musiqini dinləyən nə qədər insan var. Səbəbini özləri də bilmirlər bəlkə də. Ya deyək, kimi dindirsən, deyəcək kənd təsərrüfatında artıq yalnız və yalnız texnikadan istifadə edilir. Nə ata, nə eşşəyə yer yoxdur. Amma bu heç də belə deyil. Bir çox kiçik təsərrüfatda hələ də atdan yararlanırlar, çünki iri texnika saxlamaq həm bahadır, həm də problemli. Bunun benzini var, texniki qulluğu. 5 hektardan az olan fermer təsərrüfatında elə atdan istifadə daha məqsədəuyğundur. Dağ ərazilərində, texnika və avtomobillərin keçə bilmədiyi yerlərdə at da, eşşək də işə yarayır. Benzin və ya detalların olmadığı şəraitdə bir qədər otla işi yola vermək olar.

Müharibə dövründə alternativlərin, hər hansı bir əlavə variantların qiyməti birə on artır. Döyüş zonasında həm müvəqqəti, həm də daimi sülhə nail olmaq olar, amma informasiya müharibəsində atəşkəs olmur. Hamı deyir, daha vacibi internet və sosial şəbəkədir, burada gərək döyüşəsən. Əlbəttə, internetin imkanları olduqca yüksəkdir, amma bəzən internetin çatmadığı yerlərdə kiçik bir yerli radiostansiya əhəmiyyət kəsb edir. Elə Azərbaycanın özündə çoxlu peyk antenası var. Nə qədər insan bu alternativ informasiya kanalından yararlanır.

Azərbaycana bu gün hətta “dolma müharibəsində” belə qalib olmaq asan deyil

Axı, İsveçin də, Danimarkanın da xeyli kiçik şəhəri var. Bunların bir çoxunda heç Azərbaycanın varlığından xəbəri olmayan yüzlərlə insana lap elə yerli qəzet vasitəsilə ölkəmiz barədə faydalı bir məlumat vermək özü də bir qəhrəmanlıqdır. Qəzeti, radiosu, televiziyası hələ də məlumat ötürülməsində böyük əhəmiyyət daşıyan yüzlərlə ölkə var. Hər ölkənin kitabxanasına yerli dildə Azərbaycan barədə 10-15 kitab verə bilsək, xaricdə təhsil alan hər azərbaycanlı tələbə öz ölkəsi və Dağlıq Qarabağ münaqişəsindən ara-sıra 5-10 kəlmə danışa bilsə, informasiyanın çatdırılmasında irəli gedə bilərik. Görə biləcəyin kiçik bir işi bacarsan, deməli ümumi prosesdə qalib gələ bilərik.

Erməni tərəfi artıq əsrləridir hər bir alternativ kanaldan informasiya ötürməklə məşğuldur. 300 növ dolması olan Azərbaycana bu gün hətta “dolma müharibəsində” belə qalib olmaq asan deyil. Hələ sovet dönəmində “Aşpaz müsabiqəsinə gəlmişik” adlı erməni filmində dolma ilə bağlı yaddaqalan bir epizod nəzər çəkir. Moskvaya yarışmaya gələn erməni aşpazları məhz dolma bişirir və vaxtında onu jüriyə verə bilmirlər. Yer tutmasalar da, dolmanın çox dadlı olması ilə bağlı xeyli tərif eşidirik. Yəni hələ 1977-ci ildə ekrana çıxan bu film Sovet İttifaqının hər yerini gəzmişdi. Gəl, bundan sonra sübut elə ki, dolma türk mənşəli sözdür və Azərbaycanda daha dadlısı bişirilir.

Hər bir mümkün ehtiyat kanalları ilə məlumat ötürməyi bacarmalıyıq. Məlumatın yalnız Facebook və ya Twitter-lə ötürüldüyünü düşünmək doğru deyil. Hərtərəfli ehtiyat sistemləri, alternativ kanallar olmalıdır. İnformasiyanın ötürülməsində daha çox imkanın olması hava-su kimi əhəmiyyətlidir. Bu baxımdan daha çox çalışmağa ehtiyac duyulur.

29
Bayraktar pilotsuz uçuş aparatı, arxiv şəkli

PUA-lar, İsa Məsih, Laçın koridoru və...

43
(Yenilənib 23:07 19.10.2020)
Müharibələr həm də informasiya cəbhəsindədir. İki həftədir ki, internet məkanı üçün tətbiq olunan məhdudiyyətlər olduqca ağıllı qərara söykənir.

BAKI, 19 oktyabr — Sputnik. 7x7 həftənin ən yaddaqalan hadisələrini şərh edir

Müzəffər əsgər

Azərbaycan Ordusunun zəfər yürüşü davam edir. Cəbrayıldan sonra Hadrut və Füzulinin, onlarla kənd və strateji yüksəkliklərin işğaldan azad edilməsi həftənin əsas hadisələri kimi tarixə düşdü. Pərən-pərən düşmüş erməni ordusu itirilən mövqelərə "xilasedici" bir ad da tapıb: "Taktiki olaraq geri çəkilmə".

"Knopka" müharibəsi deyə biləcəyimiz bu savaşda erməni ordusunun 2 milyard dollardan artıq dəyərdə texnikası məhv edilib. PUA-lar isə düşmən üçün həbi olmayan başağrısıdır. Bu uçan aparatlar düşmənə 1 milyard dollardan artıq zərər verib.

Kilsə, yoxsa günahsız uşaqlar?

Düşmənin Gəncəni hədəf almasından sonra 3 azyaşlı uşaq həyatını itirdi, iki uşaq isə hələ də itkindir. Terroru döyüş taktikasına çevirmiş Ermənistan üçün bu, yeni təcrübə deyil. 63 uşağı qətlə yetirdikləri Xocalı faciəsi o qədər də uzaq keçmişdə qalmayıb.

Bu arada Ermənistan Azərbaycan raketinin erməni kilsəsinə dəydiyini iddia edib. Münaqişəyə dini don geyindirməyə çalışan işğalçı, görünür, unudur ki, Azərbaycanın paytaxtında erməni kilsəsi bu gün də qorunur. Bu blef faşisti xilas etmir. Lap tutaq ki, hansısa raket kilsənin daşına toxunub, dünya dağılıb?! Gəncədə daşlar altında qalan uşaqlara görə kim cavab verəcək?! Yəqin İsa sağ olsaydı, kilsənin dəyən zərərdən daha çox, uşaq ölümünə görə qəzəblənərdi...

İkinci cəbhə

Cəbhədəki gərginlik azmış kimi bir də koronavirusla mübarizəyə köklənməliyik. Xəstəliyə yoluxanların sayındakı artım dinamikası həyəcanlanmağa əsas verir. Tabloda 600 rəqəmi yenidən göründü. Səbəb çox sadədir: sosial məsafəni gözləmirik, maska taxmırıq, yəqin ki, gigiyenik qaydalara da düzgün əməl etmirik. Karantin qaydalarının yenidən sərtləşdirilməsi də bu baxımdan gözlənilən idi... Bu arada metronun bağlanması ilə isə avtobuslarda daha çox mehribançılığın yaranacağı proqnozlaşdırılır.

Hər şey cəbhə üçün

TƏBİB rəsmisi bildirdi ki, həkimlərimiz cəbhəyə can atır, bu bölgələrdə çalışmaq istəyirlər: "Bakıdan həmin xəstəxanalara həkim briqadası ezam olunub. Könüllü olaraq gedən həkimlərimiz də var".

Silahlı Qüvvələrə Yardım Fonduna köçürmələr edən şəxslər, şirkətlər, əsgərlərə kabab çəkənlər, kotlet bişirənlər, yataq, paltar və digər ləvazimatlar göndərənlər və cəbhəyə can atan həkimlər – budur milli birliyin təntənəsi!

İnformasiya təhlükəsizliyi

Müharibələr həm də informasiya cəbhəsindədir. İki həftədir ki, internet məkanı üçün tətbiq olunan məhdudiyyətlər olduqca ağıllı qərara söykənir. Bu, düşmənin dezinformasiya hücumunun bloklanması baxımından olduqca əhəmiyyətlidir. "Kontaktsız müharibə" XXI əsrin müharibəsdir – kimdə daha çox informasiya varsa, informasiya selini düzgün idarə edirsə, o da istənilən rəqabətdə, toqquşmada favoritdir.

"Makarov"

Laçın rayon sakini Ə.Vəliyev tapdığı "Makarov" markalı tapançanı və içərisində 4 ədəd patron olan patron darağını könüllü olaraq Səbail rayon Polis İdarəsinə təhvil verdi. Burada təəccüblü bir şey olmasa da, - jurnalistikanın "itin insanı dişləməsi yox, insanın iti dişləməsi xəbərdir" postulatı yada düşür, - ötən həftə əksər saytlar bu hadisəyə diqqət ayırdı. Görünür, Laçın koridoruna getməyə hazırlaşdığımız bu günlərdə Laçın sakininin tapançanı polisə qaytarmasıdır təəccüblü olan.

Təhsilsiz il

Ötən həftə təhsil ocaqları yenidən tətilə çıxdı. Yorulduqları üçün yox, səbəb koronavirusun yayılma tempinin yüksəlməsidir.

Görünən odur ki, 2020-ci il dünyanın təhsildən ən çox uzaq düşdüyü il kimi tarixə qovuşacaq. Martın əvvəlindən etibarən məktəblilər, tələbələr sərasər dincəlir. Distant təhsil isə özünü doğrultmur – ya şagird üçün internet əlçatan deyil, ya müəllim üçün, ya da istifadə çətinliyi var və s.

Növbəti həftənin bazar ertəsi görüşərik - əgər internet əlçatan olsa...

43
Bakıda avtobus, arxiv şəkli

BNA Bakıda ekspres avtobuslarının gecikmə səbəbini açıqladı

0
Q.Qarayev-Koroğlu-28 May və Q.Qarayev-20 Yanvar dairəsi istiqamətində bütün müntəzəm və ekspres xətt avtobuslarının hərəkət intervalında gecikmələr yaranıb

BAKI, 20 oktyabr — Sputnik. Bakı Nəqliyyat Agentliyi paytaxtın Qara Qarayev prospektində yaranmış tıxac barədə məlumat yayıb.

BNA-dan Sputnik Azərbaycan-a verilən məlumata görə, səhər saat 9 radələrindən Qara Qarayev prospekti-Ziya Bünyadov prospekti istiqamətində nəqliyyat vasitələrinin hərəkətində tıxac müşahidə edilir: "Nəticədə Q.Qarayev-Koroğlu-28 May və Q.Qarayev-20 Yanvar dairəsi istiqamətində bütün müntəzəm və ekspres xətt avtobuslarının hərəkət intervalında gecikmələr yaranıb".

0
Teqlər:
avtobus, BNA, tıxac, Bakı