Qəzaya düşmüş şəxs, arxiv şəkli

Amerikanı sayda iki dəfə üstələmişik, amma üzünü görən cənnətlikdir

143
(Yenilənib 22:16 07.12.2019)
Çox qəribə vəziyyət yaranır, polisə zəng vurursan, növbədə gözləyirsən, sonra da gəlib çıxmır. Yanından da polis maşınları ötüşür, biri də yaxınlaşmır

BAKI, 7 dekabr — Sputnik. İnsanın həyatı və təhlükəsizliyi bir tükdən asılıdır. Bizdən asılı olmayan hər hansı vəziyyətdə polisdən, tibbi yardım xidmətindən və ya yanğınsöndürən komandadan kömək gözləyirik. Bəzən köməyə elə də ehtiyac yoxdur, amma qanunun tələbinə görə, müvafiq qurumun nümayəndəsinin gəlməsini mütləq gözləməlisən.

Polisin müvafiq aktı olmasa, sığorta şirkəti dəymiş ziyanı ödəməkdən imtina edəcək

Əgər yolda avtomobil qəzası baş veribsə, polis mütləq gəlməli, vəziyyəti yerində araşdırmalı və qərar verməlidir. Polisin müvafiq aktı olmasa, sığorta şirkəti dəymiş ziyanı ödəməkdən imtina edəcək. Üstəlik, hadisə yerində zərər çəkən, yaralanan da ola bilər. Bununla da bağlı təhqiqat aparılmalı, yeri gələrsə, hətta cinayət işi açılmalıdır.

Böyük şəhərdə biz istər-istəməz müəyyən qurumların nümayəndələri ilə təmasa girməyə, işimizi onların qrafikinə uyğun qurmağa məhkumuq. Başqa cür də hərəkət etmək mümkün deyil, əks halda qanunu pozasan gərək.

Bəzi dövlət qurumlarına müraciət etdikdə elə də operativ reaksiya gözləmirik. Evimizə telefon çəkiriksə, bunun üçün telefon stansiyasına ərizə yazırıq, sonra da problemin bir müddət sonra həll olunacağına ümid edirik. Bu, bir həftə də ola bilər, bir il də. Həll olmasa belə, birtəhər keçinərik. Amma evdə infarkt keçirmiş xəstə varsa, bizə yardım bu dəqiqə, bu an lazımdır. Təcili yardım xidmətinə zəng ediriksə, həkim briqadasının yaxın 10-15 dəqiqəyə gələcəyini düşünürük.

Evimizdə yanğın baş veribsə, mənzil tüstülənirsə, yanğınsöndürən maşın o dəqiqə özünü çatdırmalıdır. Yoxsa şəhərin yarısı yanıb kül olar. Bəzən isə dövlət qulluğunda olan kimisə çox gözləməli olursan…

Nə qədər çalışsa da, 102-ni yığa bilmir

Kamran jurnalistikanın əsaslarını öyrənir, bu sahəyə marağı çoxdur. Elə yol qəzasına düşdüyü gün də dərsə tələsirdi. Heydər Əliyev prospektində Nərimanov rayonu ilə Nizami rayonunun kəsişdiyi yerdə bir qədər təhlükəli manevr edir, bir xanımın maşınını ötüb keçir. Bu xanım da heç də kişilərdən geri qalmaq niyyətində olmur, qəzəblənir, düşür Kamranın dalınca, onu ötməyə çalışır, onun maşınını kənara sıxır, nəticədə maşınlar toqquşur. Hər iki maşına zərər dəyir. Özünün haqlı olmadığını düşünən xanım bir qədər çığır-bağır salır, amma sonra hadisə yerini tərk edib yoxa çıxır.

Kamran qalır yolun kənarında. Nə qədər çalışsa da, 102-ni yığa bilmir. Ya növbədə 20-ci olur, ya 10-cu. Nəhayət, növbətçi ilə danışıb vəziyyəti izah edir. Amma xeyri olmur, nə bir gələn, nə də maraqlanan tapılır. Polisə yenə müraciət edir. Özü də yanından bir neçə dəfə polis maşını ötüb keçir, amma biri də ona yaxınlaşmır. Nə qədər əllə işarə etsə də. Haradasa 40-50 dəqiqə sonra bir polis yaxınlaşır, maşına baxıb deyir, get Xırdalana. Kamran yığışıb gedir Xırdalan polisinə, amma yolda zəng gəlir. Deyirlər, ora lazım deyil, yaxınlaş Nərimanov polis bölməsinə. Dönür yoldan, gedir Nərimanova. Bir də zəng gəlir, deyirlər, gəl Nizami polis bölməsinə. Yenə dönür yoldan, gedir Nizamiyə.

Onlar hələ yaşaya bilərdilər - Qəzada ölən bütöv bir sinif, yaxud geriyə dönməyən yol>>

Burada artıq qaydanı pozmuş xanımın olduğunu görür. Polisdə gözlədiyinin əksinə olaraq məhz onun haqsız olduğunu sübut etməyə çalışırlar. Təhlükəli manevr etdiyinə görə 40 manat cərimə edilir. Xanıma dəyən zərəri Kamranın sığortalandığı şirkət ödəməyi öhdəsinə götürür, özünə dəyən ziyanı isə özü ödəməli olur. Yəni maşınını ustaya aparıb təmir elətdirməli olur. Kameranın görüntüsünə də əməlli-başlı baxmaq olmur. Nizami rayon bölməsində nümayiş edilən videoda nəyisə görmək və təyin etmək çətin olur. Digər kamera isə Nərimanov rayon polisi ərazisindədir. Kamrana isə təklif olunur ki, əgər qərarla razı deyilsənsə, get məhkəməyə müraciət et, qoy araşdırsınlar. Xanımın uşağının maşında stres keçirtdiyi barədə deyilir də. Amma maşında uşaq olubsa, qorxubsa, bu qadının hərəkəti anlaşılan deyil. Uşağını sevən ana yolda kiminləsə sürət oyununa necə çıxar axı? Kamran isə hər hansı bir uşağın maşında olduğunu görmədiyini deyir.

Əgər vətəndaş polisə zəng edirsə, oraya anında düşməlidir

Hər gün yollarda baş verən adi hadisələrdən biridir. Nəsə təəccüblü bir məqam yoxdur. Həm sürücülər, həm polislər belə halla hər gün rastlaşırlar. Diqqət çəkən başqa detallar var.

Əgər vətəndaş polisə zəng edirsə, oraya anında düşməlidir. Bu, Kənd Təsərrüfatı Nazirliyi və ya Diaspora Komitəsi deyil axı. Zəng olursa, deməli, cinayət, qəza və ya yol hadisəsi baş verib, yəqin. Bir saat polismi gözləmək olar küçədə? Beynəlxalq hesabatlarda Azərbaycanda hər 100 min nəfərə 456 polis əməkdaşının olduğu bildirilir. Yəni əhalinin sayına düşən polis sayına görə Azərbaycan ABŞ-ı iki dəfə, Finlandiyanı isə 3 dəfə qabaqlayır.

Amma ABŞ-da və ya istənilən Avropa ölkəsində polisə zəng vurub cavab verməsən, telefonu izləyib həmin yerə patrul xidməti göndərilir. Dəfələrlə Hollivud filmlərində polisin hadisə olan yerə öz təşəbbüsü ilə yaxınlaşdığını görmüşük. Çox qəribə vəziyyət yaranır, polisə zəng vurursan, növbədə gözləyirsən, sonra də gəlib çıxmır. Yanından da polis maşınları ötüşür, biri də yaxınlaşmır. Vətəndaşı 3 ünvana yönəldirlər. Sonra da deyirlər, bu bizim rayon deyil, yaxşı görüntü digər rayondadır.

Məgər bir ümumi sistem deyil? Məgər bir polis bölməsi digər bölmədən görüntü istəyə bilməz?

Bu yaxında Daxili işlər naziri Vilayət Eyvazovun əmri ilə Sumqayıt Şəhər Polis İdarəsinin əməkdaşı, polis leytenantı Murad Abdullayev "Polis haqqında" Qanunun və "DİN əməkdaşlarının etik davranış kodeksi"nin müvafiq maddələrinin tələblərini pozduğu üçün xidmətdən xaric edilib. Gənc əməkdaşın sosial mediada yayılmış videoya görə işdən azad edilməsi, çox yəqin, son dövrdə Daxili İşlər Nazirliyinin polisin müsbət imicinin formalaşması yolunda görülən tədbirlər sırasında atılan addımlara uyğun olub.

Amma vətəndaşın 102 xidmətinə zəng edə bilməməsi, ora-bura süründürülməsi, görüntünün guya başqa rayon ərazisində olması kimi "nağıl"ların danışılması müsbət imicə nə qədər xidmət edir?

Vətəndaşın müraciətinə polis operativ yanaşmalı, ədalətli qərar verilməlidir. Başqa yolu da yoxdur. Əks halda istənilən addımın xeyri olmayacaq.

143
Redaktorun iş masası, arxiv şəkli

İslahatlar dalğası mediamıza çatdı: bizi gözləyir?

47
(Yenilənib 09:44 16.01.2021)
"Cidanı çuvalda gizlətmək" mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyd, jurnalistikadan xəbərsiz bir məmurun rəhbərlik etdiyi AR Prezidenti yanında KİVDF-nin qanunsuz əməlləri də gizli qalmadı.

Nəhayət ki, media sahəsindəki boşluqlar dövlətin diqqətini çəkdi.

Şəxsən mən dəfələrlə bu mövzuda yazsam da, səsimi lazımı şəxslərə eşitdirə bilmirdim.

Çünki, səsimizi eşitməli və eşitdirməli olan kəslər, səsimizi batırmaq üçün çabalayırdılar.

Bəli, mediamızın “başbilənləri” problemdən, haqsızlıqdan, qanun pozuntularından danışan şəxsləri ciddiyə almırdı, imkan olduqca səsimizi batırırdılar.

Onlar ancaq öz ətraflarındakı şəxsləri dinləyir, onlara “ləbbeyk” deyənlərin yolunu açırdılar.

Mediamızın vəziyyəti barədə uzun-uzadı yazmağa ehtiyac görmürəm, aidiyyatı olan hər kəs, hər şeyi bilir.

İllərdir baş alıb gedən ədalətsizliklər, mənimsəmələr, korrupsiya və israf nəhayət ki, dövlətin diqqətini çəkdi.

“Cidanı çuvalda gizlətmək” mümkün olmadığı kimi, mediamızın inkişafından məsul olan, bir zamanlar Vüqar Səfərli kimi laqeyid, jurnalistikadan xəbərsiz bir məmurun rəhbərlik etdiyi Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun qanunsuz əməlləri də gizli qalmadı. İslahatlar dalğası mediamıza da gəlib çatdı.

***

Ölkə prezidenti “Azərbaycan Respublikasında media sahəsində islahatların dərinləşdirilməsi haqqında” fərman imzalayıb. Fərmana əsasən, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu ləğv edilib və onun bazası əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılıb.

Mediamıza, jurnalistlərimizə, zəhmətkeşlərimizə xeyirli, uğurlu olsun.

Baş verəcək hadisələri qabaqlamaq istəməzdim, ancaq dünən efirlərin birində illərdir media sahəsində hər cür qanun pozuntusu, korrupsiya ilə məşğul olmuş “başbilənlərdən” birinin ölkə prezideninin yeni fərmanını şərh etdiyini görəndə dalağım sancdı.

Nədənsə mənə elə gəlir ki, rüşvətə, korrupsiyaya, KİVDF-nin maxinasiyalarına bulaşmış insanlar bu sahədən uzaqlaşmadıqca, mediamız rahat nəfəs ala bilməyəcək.

İllərdir mətbuatın nəfəsini kəsən bu adamların indi islahatları dəstəkləməsi, yeni yaranan quruma təsir imkanları, ağız dolusu ədalətdən danışması məni çox narahat edir.

***

Düşünürəm ki, “Kütləvi İnformasiya Vasitələri haqqında” qanuna ediləcək dəyişikliklər ictimaiyyətin geniş müzakirəsinə çıxarılmalıdır.

Bu günə qədər edilən dəyişikliklər qənaətbəxş olmadığı üçün, bundan sonrakı proseslərdə ictimai fikir nəzərə alınmalıdır.

İndi diqqət daha çox KİV-nin qeydiyyatı məsələsinə çəkilir, jurnalistikaya aidiyyatı olmayan şəxslərin bu sahədə olmasından narahatlıq bildirir. Halbuki, mətbuatımızın yüzlərlə həll olunması vacib, aktual problemləri var.

Sosial şəbəkələrin, vətəndaş jurnalistikasının, blogerliyin geniş yayıldığı cəmiyyətdə, medianın inkişaf perispektivləri müasir texnologiyalardan kənarda müzakirə olunmamalıdır.

Qanunvericilikdə ediləcək dəyişikliklər medianın reklam bazarının formalaşmasına geniş dəstəyi də nəzərdə tutulmalı, mətbuata mümkün azadlıqlar verilməlidir.

Heç bir funksionallığı olmayan qəzetlərə dövlətin maddi dəstəyi dayandırılmalıdır.

Azad fikrə, azad sözə şərait yaradılmalı, ölkədə ciddi, dövlətçilik maraqlarını düşünən müxalif mətbuatın formalaşmasına imkan verilməlidir.

Şəxsən mən media sahəsindəki islahatların müsbət nəticələrini tezliklə görmək istəyirəm.

47
Xəzər, arxiv şəkli

Dəniz şəhəri olsaq da, bir azdan havanı Kanadadan almalı olacağıq

60
Bakının girişində xəzriyə bir heykəl quraşdırmaq da yerinə düşərdi, çünki bizim eləmədiyimizi bu xeyirli külək edir

Uzunömürlü insanların çoxu adətən dağ rayonu, ya da təmiz havası olan dəniz kənarında yaşayır. Oksigeni bol olan istənilən məkanda xəstələnmək şansı da azdır. Təmiz, yodlu-bromlu dəniz havası insanın uzun müddət sağlam yaşamasına zəmin ola bilər.

Şəhər havasının korlanmasına yüzlərlə amil təsir edir

Böyük şəhərlərdə sinə dolusu nəfəs almaq artıq çoxdan müşkülə çevrilib. Əgər burada artıq 1 milyondan artıq insan yaşayırsa, deməli, istəsən də, istəməsən də, təmiz hava qıtlaşır. Özü də müasir meqapolislərin bir çoxunda insan sayı on milyonlarla ölçülür. Şəhər havasının korlanmasına isə yüzlərlə amil təsir edir.

Milyonlarla bir yerə toplanan insanın nəfəs alması, şəhərlərdə saxlanılan ev heyvanları, insan fəaliyyəti nəticəsində yaranan zibil, sənaye müəssisələri, ziyanlı istehsalat, aviasiya, ictimai və gəmi nəqliyyatı, nəhayət şəxsi avtomobillər sakinlərin həyatını dözülməz edir. Şəhər insanı isə daim özünə rahat şərait yaratmağa çalışır. Tez-tez evini təmir edir, hələ dünən bəh-bəhlə dükandan aldığı əşyanı bu gün zibilə atır, çox yeyir, gəzir, idmanla məşğul olur, avtomobili, kompüteri və smartfonu daha dəblisi ilə əvəzləyir. Hər bir əməliyyat bu və ya digər formada şəhərin havasını çirkləndirir.

London, Nyu-York, İstanbul, Moskva, Pekin, Tokio, Seul kimi meqapolislərdə təmiz hava problemi çoxdan mövcuddur. Oksigen balonlarını Yaponiyada 2006-cı ildən satırlar. Nisbətən təmiz havası olan ölkələr artıq bu “məhsul”u satmaqla gəlir əldə edirlər. Əhalisi az, havası isə zəngin olan Kanada neçə müddətdir Çinə dağ havası yollayır. Eynilə dağ havasını dünya bazarında satan İsveçrə şirkəti də var. Pekin həm də dünyanın ən çirkli şəhərlərindən sayılır. Bəzi tədqiqatçılar Pekində nəfəs almağı gündə 40 siqaret çəkməklə bir tuturlar. Kanada havası Çində olduqca yaxşı satılır. 

Hava yoxdursa, deməli, həyat yoxdur

Hər bir şəhər, hər bir dövlət havanın çirklənməsi ilə bacardığı qədər mübarizə aparır. Deyək, 100-150 il öncə Londonda evlər daş kömürlə qızdırılırdı. Bu prosesdə yaranan tullantılar Böyük Britaniyanın paytaxtını dünyanın ən çirkli şəhərinə çevirmişdi. Nə nəfəs almaq olurdu, nə də normal yaşamaq. Təbii qaz peyda olduqdan sonra London meriyası daş kömürlə evləri qızdırmağı qadağan edir və şəhərin havası xeyli təmizlənir. Hazırda London daha bir problemlə üz-üzədir: əhalisi 10 milyona yaxınlaşan şəhərdə rahat nəfəs almağa ərazi qalmayıb. İnsanlar və avtomobillər paytaxtın havasını dəhşətli dərəcədə çirkləndirir. İndi də daha sərt qaydalar tətbiq edilməyə başlanılıb. Londonun mərkəzinə keçid pulludur, maşın saxlamaq da əlavə pul tələb edir. Yaxın illərdə şəhərdə duru yanacaqla işləyən avtomobillərin tam olaraq hidrogen yanacağına keçəcəyi, elektromobillərin geniş yayılacağı gözlənilir.

Sərt qaydalar tək Londonda deyil, həm də Avropanın bir çox ölkəsində tətbiq edilib. Yaxın gələcəkdə benzinlə işləyən avtomobillərin tam olaraq ekoloji təmiz yanacaqla çalışan nəqliyyat vasitələri ilə əvəzlənməsi bütün böyük şəhərlərin rəhbərliyi üçün prioritet məsələdir. Hava yoxdursa, deməli həyat yoxdur.

Oslonun daxilində bircə dənə sənaye müəssisəsi qalmayıb

Məsələn, Norveçin paytaxtı Oslo 2019-cu ildə Avropanın ən yaşıl və təmiz şəhəri elən edilib. Bu şəhərdə zibil ən azı 4 növə bölünərək şəhərin kənarında yerləşdirilən zibil zavoduna göndərilir. Zibil çox dəqiqliklə emal edilir, yəni cəmi 3 faiz qalıq qalır. Hətta qonşu Danimarka və İsveç öz zibilini də Norveçə təhvil verir. Norveçdə hətta kanalizasiyada yaranan istilikdən evləri qızdırmaq üçün istifadə edirlər. Oslonun daxilində bircə belə sənaye müəssisəsi qalmayıb. Hamısı şəhər kənarına çıxarılıb.

Şəhərin hər yerində piyadalar və velosipedçilər üçün yollar çəkilib. Avtomobil yolları isə şəhəraltı tunellərə köçürülüb.  Oslo əhalisinin yarısı elektromobillərdə hərəkət edir, günəş paneli ilə yüklənən elektrik velosipedi də çox populyardır. Tramvay, gəmi və digər nəqliyyat növlərində də elektrik enerjisindən istifadə edilir. Su elektrik stansiyaları da kifayət qədər enerji verə bilir. 1 litr benzin 3 manatadır deyə oslolular kütləvi olaraq benzinlə işləyən avtomobillərdən imtina edirlər. Elektromobillər üçün hər yerdə doldurma məntəqələri quraşdırılıb. Burada akkumulyatoru doldurmaq havayıdır. Havanı çirkləndirən avtomobillərin şəhər mərkəzinə daxil olması pulludur. Bu qayda həm də parklama yerlərinə də aid edilir.

Müasir şəhərin rəhbərliyi mümkün vasitələrlə havanın çirklənməsinin qarşısını almağa yönəlmiş tədbirlərə əl atmalıdır, yoxsa yaşayış mümkün olmayacaq.  Şəhərin yaşıllaşdırılması, yeni ağacların əkilməsi, demək olar, bütün meqapolislərdə reallaşdırılır. Yaponlar hətta göydələnlərin dam örtüyünü yaşıllıqla tamamlayırlar. Hər eyvanda mütləq ev bitkilərinin olduğunu müşahidə etmək olar. Yaşıllıq varsa, deməli oksigen çatışmazlığının az da olsa, qarşısını almaq olacaq.

Avtomobilin salonundan benzin iyi gəlir? Gəlsin də...

Bakı əhalisi də təmiz hava qıtlığından əziyyət çəkir. Dəniz şəhəri olsaq da, yodlu-bromlu havanı duya bilmirik, çünki Azərbaycanda mövcud olan avtomobillərin yarısı paytaxta cəmlənib. 4 milyonluq əhaliyə bəlkə də 1 milyon maşın düşür. 40 il öncənin Bakısında tək-tük maşın səsi eşidilirdi. Hava təmiz, insan sayı isə 4 dəfə az idi. Hazırda maşının nə səsi kəsilir, nə də havaya atılan zəhərli qazın sonu bilinir. Bizim avtomobil parkımız yalnız benzin və dizellə işləyən nəqliyyat vasitələrindən ibarətdir. Avtobusların bir çoxu elə işə düşərkən atmosferə qara tüstü buraxır, hamılıqla boğuluruq.

Ölkədə köhnə avtomobillərin utilizə edilmə proseduru yoxdur, yəni avtomobil ölənəcən işləyir. Sərt ekoloji qaydalar tətbiq edilmədiyindən avtomobilin texniki vəziyyəti sürücünü narahat etmir bir növ. Maşının arxa borusundan qara tüstü çıxır? Nə olsun? Çıxır, çıxsın da. Avtomobilin salonundan benzin iyi gəlir? Gəlsin də, nə olacaq ki?! Belə vəziyyətdə olan maşınla sərnişin daşıyan da az deyil. Soruşanda da, deyir, düzəldərəm, kasıblığın üzü qara olsun və sair. Avtobusun və ya avtomobilin köhnə olması əsas deyil, gərək yiyəsi bu nəqliyyat vasitəsinə qulluq eləsin, vaxtı-vaxtında yararsız detalları dəyişsin. Onu da etmək istəmirik.

Bakı yaşamaq üçün yararsız olan bir şəhərə çevrilməkdədir

Qanuna görə, hər bir nəqliyyat vasitəsi ildə bir dəfə texniki baxışdan keçməlidir. Məntiqlə paytaxtdakı avtomobillərin bir hissəsi elə bu mərhələdə kənarlaşdırılmalıdır. Amma proses formal olaraq reallaşır, apar pulunu ödə, texniki baxış barədə sənədi al. Nəticədə Bakı yaşamaq üçün yararsız olan bir şəhərə çevrilməkdədir, hava yox, xəstəlik də baş alıb gedir. Nəqliyyata texniki baxış məsələsində daha sərt qaydaların tətbiq edilməsinə su-hava kimi ehtiyac var. Köhnə avtomobil və avtobuslardan çoxdan yaxa qurtarmaq lazımdır, ən azı nəqliyyat vasitəsi sahiblərini  buna məcbur etməklə. Köhnədir, apar təhvil ver, puluna al ya da yeni avtomobil üçün sertifikat əldə et. Köhnəlmiş maşınları utilizə etmək, yığmaq zamanı çatıb. Ya da ən azı maşın sahibi öz avtomobilinə qulluq etməlidir. Niyə yol hərəkət qaydasını pozan sürücüyə cərimə yazılır, amma borusundan tüstü çıxan avtomobili görən yoxdur? Bəyəm, bu insan həyatı üçün təhlükəli deyil? Təmiz hava heç kimi maraqlandırmır?

Təmiz havaya görə xəzri küləyinə borcluyuq

Bakını ekoloji təmiz şəhərə çevirmək üçün bir çox layihə var. Məsələn, tramvay nəqliyyatının yenidən bərpası, metronun genişləndirilməsi, velosiped yollarının inşası, yeni növ elektrik qatarı şəbəkəsinin uzadılması məsələləri ara-sıra gündəmə gəlir, amma bu planlar daha çox kağızda reallaşır. Praktik işlər çox gecikir. Bircə çoxlu ağac əkilir paytaxtda, tez-tez aksiyalar keçirilir, yeni-yeni sahələrdə kiçik meşələr yaradılır. Özü də bu işdə demək olar hər bir dövlət qurumu iştirak edir, hətta könüllü olaraq ağac əkmək olduqca şərəfli iş sayılır. Yenə də şəhərin havası təmizlənir bir növ.

Ümumilikdə təmiz havaya görə Xəzər dənizindən əsən xəzri küləyinə borcluyuq desək, yanılmarıq. Dənizdən əsən sərin şimal küləyi şəhərin tozunu-tüstüsünü sistematik olaraq aparır, havanı təmizləyir. Xilas edir bizi havasızlıqdan. Bakının girişində xəzriyə bir heykəl quraşdırmaq da yerinə düşərdi, çünki bizim eləmədiyimizi bu xeyirli külək edir.

Amma şəhər də dayanmadan artır, yeni binalar ucaldılır, prospektlər salınır, yollar tikilir, xaricdən də yeni avtomobillər gətirilir, özü də benzinlə işləyən. Belə getsə, nə xəzri, nə gilavar kömək etməyəcək bizə, havanı Kanada, ya da İsveçrədən pulla alacağıq.

60
Teqlər:
hava, Bakı, ekologiya
Laçın şəhərinə mənzərə, arxiv şəkli

Laçının gəzməli-görməli yerləri haqqında videoçarx hazırlanıb

0
Videoçarxda Laçının Ağoğlan qəsri, Dəmirovlu pir məbədi, Məlik Əjdər türbəsi, "Kar günbəz" türbəsi, Həmzə Soltan sarayı haqqında məlumatlar təqdim olunur.

BAKI, 18 yanvar — Sputnik. Dövlət Turizm Agentliyi tərəfindən işğaldan azad edilmiş Laçının gəzməli-görməli yerləri haqqında tanıtım videoçarxı hazırlanıb. Bu haqda Dövlət Turizm Agentliyinin sədri Fuad Nağıyev rəsmi "Twitter" səhifəsində etdiyi paylaşımla məlumat verib. "Qədim tarixi abidələrə və gözəl təbiətə malik olan Laçında turizmin inkişafı üçün imkanlar genişdir. Növbəti videoçarxımız düşməndən azad olunan Laçınımızın gəzməli-görməli yerlərinə həsr olunub", - deyə Fuad Nağıyev qeyd edib.

Videoçarxda Laçının gəzməli-görməli yerləri, o cümlədən Qafqaz Albaniyasının mədəni irs nümunlərindən IX əsrə aid bazilika Ağoğlan qəsri və XI əsrə aid edilən Dəmirovlu pir məbədi, Elxanilər dövründə tikildiyi güman edilən Məlik Əjdər türbəsi, XVII əsrə aid edilən və tikintisində Albaniya xristian memarlığının təsiri duyulan "Kar günbəz" türbəsi, 1761-ci ildə tikilməsi haqqında məlumat mövcud olan Həmzə Soltan sarayı, rayonun bir və ikitağlı körpüləri, müxtəlif at və qoç fiqurlarından ibarət daş abidələri haqqında məlumatlar təqdim olunur.

Qeyd edək ki, Agentlik tərəfindən bundan əvvəl erməni işğalından azad edilmiş Qubadlı, Zəngilan, Şuşa və Kəlbəcərin gəzməli-görməli yerləri haqqında videoçarx təqdim olunub. Layihə çərçivəsində digər azad edilmiş torpaqlarımızın da turizm potensialını əks etdirən bu növ video çarxların hazırlanması nəzərdə tutulub.

0