Şagirdlər məktəbdə nahar edirlər

Gündəlik cəmi 40 dəqiqə: Gələcəyimizə bu gün qoyulan kapital

2905
(Yenilənib 20:51 28.11.2019)
Təhsil sistemindən narazı olmayan valideyn yoxdur. Kimi məktəbdə istilikdən, kimi yararsız dərsliklərdən, kimi də aybaay toplanan vəsaitdən gileylənir. Uşaqlarımızın qidalanması da düzgün qurulmayıb

BAKI, 27 noyabr — Sputnik. Azərbaycan məktəblisinin həyatı və sağlamlığı təhlükədədir. Əlbəttə, söhbət uşaqların fiziki təhlükəsizliyindən getmir. Hər bir orta məktəbdə həm təhlükəsizlik xidməti var, həm də bu ərazi ciddi qorunur. Polisi də istənilən an çağırmaq olar.

11 il məktəblini naharsız qoymaq humanist addım sayıla bilərmi?

Fikir vermədiyimiz, diqqət yetirmədiyimiz, bəzən kiçik görünən yemək məsələsi hər gün uşaqların sağlamlığından hissə-hissə qopardıb aparır. Nəticədə zəif immuniteti olan bu uşaqlar gələcəkdə ciddi bir iş görməyə yararlı olmurlar.

Ölkənin təhsil sistemindən narazı olmayan bir valideyn tapmaq qəliz məsələdir. Kimi məktəbdə qazanxana sisteminin nasazlığından, kimi yararsız dərsliklərdən, kimi də aybaay toplanan vəsaitin ağırlığından gileylənir. Uşaq oxutdurmaq asan deyil.

“Məktəbdə uşağım nə yeyəcək” sualı hər bir valideyni düşündürür. Özü də bir qədər böyük siniflərdə elə də aktual olmasa, yemək problemi ibtidai sinif şagirdlərinə münasibətdə ciddi məsələdir. Cəmi 6-7 yaşı olan bir uşaq ikinci növbədə oxumağa məcbur olursa, deməli, naharını da məktəbdə yeməlidir. Nahara cəmi 20 dəqiqə ayrılırsa, uşaq bu zamanda uzaqbaşı bir dönər, ya da qoğal yeməyə imkan tapar. Bir az da çantasının cibində gəzdirdiyi sudan-çaydan içər. Hər günü belə yola verər. Hətta immuniteti güclü olan yaşlı insan hər gün buterbrod və ya nəsə bir şirniyyatla çox dolana bilməz. Nahar yeməyi sanballı olmalıdır.

Özü də ibtidai sinif uşağını 2-ci növbəyə təyin etmək özü bir günahdırsa, məktəbin digər şagirdlərini naharla təmin etməmək ikiqat günahdır. Deyək, bu uşaq birtəhər ibtidai sinif səviyyəsini başa vurdu, axı 11 illik təhsil dövründə məktəblini naharsız qoymaq nə dərəcədə humanist addım sayıla bilər?

Məktəb şagirdinə əsaslı nahar yedizdirmək ənənəsi nə o zaman olub, nə də indi var

Kimi dindirsən, ya mədəsində olan problemindən, ya şəkərli diabetdən əziyyət çəkdiyindən, ya bağırsaqda yaranan çətinlikdən, qəbizlikdən və digər xəstəlikdən danışacaq. Bu xəstəliklərin əsası elə uşaqlıq dövründən qoyulub. Problemin dərinləşdiyini özü də hiss etməyib. Uşağın normal qidalanması məsələsinə belə biganə münasibət elə sovet dövründə formalaşmış düşüncə tərzini əks etdirir. Məktəb şagirdinə əsaslı nahar yedizdirmək ənənəsi nə o zaman olub, nə də indi var. Belə görmüşük, belə də gedirik. Bağçada uşağı normal yedizdirərik, amma məktəbdə nə yeyir, xəbərimiz olmaz. Nə məktəbin rəhbərliyi bir tədbir görməz, nə də valideyn komitəsi səs-küy qaldırmaz. Hərə bir yolla uşağına nəsə verib yollayar məktəbə.

Bəs, Azərbaycanın orta məktəbi necə olmalıdır? Uşaqların yemək işi necə həllini tapmalıdır? Ümumiyyətlə, təhsildə nə kimi geriliyimiz var?

Fransa məktəbindəki qidalanma sistemi bir etalondur

Geriliyi bilməyin bir yolu var: hər hansı bir aparıcı ölkədəki ümumi vəziyyətlə tanış olmağına dəyər. Fransadakı təhsil təcrübəsi çox maraqlıdır. Mükəmməl bir sistem qurulub. 

Fransa hökuməti orta təhsilin havayı və əlçatan olmasını təmin etmək üçün bir məktəbliyə ildə 9 min avro pul xərcləyir. 12 illik təhsil 3 hissədən ibarətdir: ibtidai məktəb, kollec və liseydən. Dərs saatı 8.30-da başlayıb 17.00-da bitir. Dərsə gecikmək olmaz, buna görə cəzalana bilərsən. Parisin dəqiq işləyən ictimai nəqliyyatını nəzərə alsaq, burada harasa gecikmək yalnız insanın öz günahı ucbatından baş verir. Günün birinci yarısı dərs oxuyursan, ikinci yarısında isə özünü inkişaf etdirə, idman və ya yaradıcılıqla məşğul ola bilərsən. Ev tapşırığı filan yoxdur, nə varsa, elə məktəbdə öyrənirsən.

Dərsə gecikən, özünü yaxşı aparmayan uşaqlar üçün xüsusi otaq ayrılır. Son dərəcə təmiz, səliqəli və işıqlı. Müəllimin nəzarəti ilə burada iki saat cəza kimi dərs tapşırığını yerinə yetirmək lazımdır. Fransa məktəbində imtahan zamanı hər hansı bir şparqalka və ya telefondan istifadə etmək olmaz. Buna heç ehtiyac da yoxdur, çünki dərs zamanı diqqətli olan şagird asanlıqla imtahanın öhdəsindən gələcək. Amma yekun imtahanda nəyisə köçürdüyünə görə tutulan məktəbli qarşıdakı beş ildə hər hansı bir imtahan vermək hüququndan məhrum edilə bilər.

Hər hansı bir musiqi alətini mənimsəməklə məktəb orkestrində məşq etmək, çalışmaq, dərsdən geriliyi olan şagirdlər üçün əlavə məşğələ tam təmənnasızdır. Bunun üçün ayrıca müəllim ayrılır. İşə yeni başlayan müəllimin maaşı 1700 avrodur. Amma perspektivdə 3000 avroya qədər arta bilər. Paris üçün elə də böyük pul olmasa da, hər halda normal dolanmaq olar.

Nəhayət, məktəb naharından danışmağın vaxtıdır. Fransada valideyn övladının orta məktəb təhsili üçün heç nə ödəmir. Tək nahar pulunu çıxmaq şərtilə. Yəni məktəblinin aylıq yemək xərci 50-60 avroya başa gəlir. Hər nahar 3 növ yeməkdən ibarət olur. Məsələn, ətli və ya pendirli pitsa, balıq və ya ətli xörək, çiyələkli desert verilə bilər. Rəngarəngliyi təmin etmək üçün menyu dəyişilir. Burger, hotdoq kimi qida növlərinə Paris məktəbində rast gəlinmir. 3 avroluq bu naharın, demək olar, havayı olduğunu hamı anlayır. Çünki Parisdə bir fincan qəhvənin orta qiyməti 6 avrodur. Nahara ciddi zaman ayrılır, yəni məktəbli tam rahatlıqla yeməyini yeyə bilir.

Fransa məktəbindəki qidalanma sistemi bir etalondur. Dünyanın ən varlı ölkəsi olan ABŞ-da belə, məktəblinin qidası “fastfud”dan ibarət olur. Sağlamlıq baxımından da fransızlar uzunömürlü ölkələr sırasında lider mövqe tuturlar. Bu da birbaşa qidalanmaya bağlıdır. Məktəb dövründən formalaşan qida mədəniyyəti sonralar sağlamlığa qoyulan kapitala çevrilir.

Uşağın normal nahar etməsini təşkil etməyə nə mane olur?

Qədim mədəniyyəti, zəngin mətbəxi olan Azərbaycanın məktəblisinin nə səbəbdən 15-20 dəqiqəyə buterbrod və ya başqa “fastfud”la qidalanmasının səbəbi düzgün təşkil olunmayan təhsil sisteminə bağlıdır. Hər bir məktəbliyə 9000 avro xərcləməyə vəsaitimiz yoxdur, tam havayı təhsili qura bilmirik, məktəbdə çoxlu sayda problem var, amma uşağın normal nahar etməsini təşkil etməyə nə mane olur? Hər məktəbin bufeti var, hər gün yemək bişirilib gətirilə bilər, fasiləni 20 yox, 40 dəqiqə edə bilərik. Valideynin də gündəlik dönərə verdiyi məbləğini kompleksli nahara yönəltmək olar. 

Problemin həlli 3 tərəfə bağlıdır. Təhsil Nazirliyindən qərar olmalı, hər bir məktəbin rəhbərliyi təşəbbüsü dəstəkləməli və valideyn komitəsi prosesə nəzarət etməlidir. Bu halda uşaqların sağlamlığını qoruya bilərik.

2905
Bankada manat, arxiv şəkli

Uğurlu sahibkarın arsenalı: xırda pul, POS terminal, şirin söz, gülərüz ifadə

40
(Yenilənib 22:32 02.12.2020)
Bəzi ziyanlı adətlər də pul qıtlığına səbəb olur. Məsələn, insanlarda daxıla xırda pul toplamaq ənənəsi var.

Sizdə 50 manata xırda olmaz? Bəlkə iyirmiliyə xırda tapılar? Bu kimi ifadələri tez-tez mağaza və müxtəlif ticarət mərkəzlərində eşidirik. Bəzən elə ofis daxilində də kimsə bir əsginasla gəzib xırda axtarır. Xırda pul tapılmır ki, tapılmır.

Kiçik məhəllə dükanlarında xırda pul daima tapılmır

Pulu xırdalamaq problemi həm taksidə, həm aptekdə, həm də bazarda hiss olunur. Bazarda bəzən elə də böyük olmayan pulu bu ona ötürür, o da buna. Güc-bəla ilə xırdalayırlar. 5, 10, 20 manatı rahat xırdalamağın yolu hələ də kart sisteminə keçməyən marşrutda olur. Burada xırda nə qədər desən var, hətta bəzən xırda puldan bezib bir ovuc qəpiyi benzindoldurma məntəqəsinə təhvil verirlər.

Kiçik məhəllə dükanlarında isə xırda pul daima tapılmır. Gündəlik alver böyük deyil deyə 50 və ya 100 manatı burada xırdalamaq mümkünsüzdür. Hətta dükandan nəsə alanda belə gərək yanında xırda pulun ola, yoxsa alver baş tutmayacaq. Bir sıra iri satış şəbəkəsində pul xırdalamağa icazə yoxdur, nəsə mütləq almalısan. Kiçik də olsa, bir mal alsan, bir söz demədən qalığı verəcəklər, amma almalısan. Bunu, əslində, uğurlu marketinq gedişi saymaq olar. Dükan və ya şəbəkə pul xırdalamaq yeri deyil, bura alış-veriş məntəqəsidir. Alver elə, pulunu xırdalayaq.

Xırda pul məsələsi çox zaman sahibkarın səriştəsizliyinə bağlıdır

Pulu problemsiz yalnız banklarda fəaliyyət göstərən valyuta məntəqəsi və ya kassada xırdalamaq olar. Müraciət etdikdə, xırdalayırlar da. Amma pul xırdalamaq bankın işi deyil əsla. Yəni, göstərilən xidmət siyahısında pul xırdalamaq öhdəliyi də yoxdur. Sadəcə pulla işləyən təşkilat olduğuna görə hər bir bank pulu xırdalamalıdır bir növ. Bəzən xırdası da olmaya bilər. Bank özü pul çap eləmir, gərək kassaya pul gələ ki, müştəriyə bu xidməti göstərmək mümkün olsun. İri supermarket və ya ticarət şəbəkəsi xırda pulu əldə etmək üçün hesabı olduğu bankdan onu əvvəlcədən sifariş verməlidir. Marketlər hətta əlində xeyli xırda pulu, qəpiyi olan vətəndaşdan da qəbul edib onu iri əsginasla əvəzləyirlər. Mümkün olan kanallarla alış-verişin bir an belə dayanmasına yol verməmək üçün xırda pulu toplayırlar.

100 və 200 manat dəyərində olan iri əsginaslar adətən marketdə ayrıca yığılır. Hərdən digər əməkdaşlar isə ara-sıra xırda pulu kassaya təhvil verirlər. Xırda pul olmasa, kassada toplaşan müştərilərin çox uzun növbəsi yaranar. Kiçik dükanda, elə də böyük dövriyyəsi olmayan marketlərdə də xırda pul məsələsi çox zaman sahibkarın səriştəsizliyinə bağlıdır. Bir çox satıcı deyir, mən nə edə bilərəm, dükanın yiyəsi axşam gəlib pulu kassadan götürərək onu sıfırlayab. Səhər alverinə xırda pul yoxdur. Hər gün əlində pulla ora-bura qaçaraq onu xırdalamağa çalışan satıcının üzləşdiyi çətinliyi müşahidə edirik.

"Bura pul xırdalamaq yeri deyil"

Kiçik biznesi olan sahibkar obyektdə xırda pul saxlamaq istəmir, yəqin satıcıya etibar eləmir bəlkə də. Amma biznes daim gərginliklə işləyir. Satıcı da bir gün ora-bura qaçır, iki gün, sonra biganələşir. İri əsginası görən kimi deyir, xırda yoxdur, vəssalam. Satıcının çoxu olduqca kiçik maaşa işləyir, bu heç kim üçün sirr deyil. Belə olan halda sahibkar öz biznesini düşünmürsə, satıcı niyə onun yerinə düşünməlidir? 300 manat maaşa satıcı həm mal satmalı, həm pul xırdalamalı, həm kamera yerinə nəzarətçi olmalıdır, çünki hər oğurlanan mala görə də cavabdehdir. Dükanı qoyub getdisə, həmin məqamda guya alverə gələn müştəri bəzən əlinə keçəni atır çantasına. Həm pulunu xırdalayır, həm də oğurluq edir.

Kiçik obyekt yiyəsinin bir çoxu elə köhnə qayda ilə alver edir. Amma dünya dəyişib, indi insanları bəyənmədiyi nəyisə almağa məcbur etmək çox çətin olub. Bu dükan olmasın, o birisi olsun. Gedib istədiyini başqa yerdən alacaq, daha 20 və ya 50 manatı xırdalamaq kimi problemi düşünməyəcək. Digər dükanda xidmət yaxşı olsa, deməli alveri də gedəcək. Dükan var, kiçik alver edirsən, bəzən "bura pul xırdalamaq yeri deyil" kimi acıqlı ifadələrlə qarşılaşırsan. "2 manatlıq alver edib 100 manat verirsənsə, deməli amalın saf deyil" kimi düşünən sahibkarın sayı bir deyil, iki deyil. Onların dükanı bağlanacaq bir gün.

Nəinki qəpik, hətta 1 və 5 manatı da toplayan az deyil

Xırda pul probleminin yaranmasının başqa səbəbləri də var. Ölkədəki pul dövriyyəsində xırda pul çatışmır, bu həqiqətdir. Hələ uzun illər öncə, metal pul formasında 1 və 5 manatlıq pulların buraxılması təklif edilmişdi. Bu siyahıya hətta yeni 2 manatlıq metal pulların da buraxılmasını əlavə etmək olar. Metal pullar kağıza nisbətən daha çox xidmət edir, orta hesabla 25-30 il işə yarayırlar. Dövriyyəyə daha çox xırda pul buraxmaq lazımdır. Bəzi ziyanlı adətlər də pul qıtlığına səbəb olur. Məsələn, insanlarda daxıla xırda pul toplamaq ənənəsi var. Nəinki qəpik, hətta 1 və 5 manatı da toplayan az deyil. Nəticədə məhz ehtiyac duyulan pullar tapılmır.

Son on ildə onlayn vasitələrin artması, elektron və nağdsız hesablaşma imkanlarının mövcudluğu bir sıra hallarda kağız və metal pula olan tələbatı xeyli azaldıb. Nəqliyyatın çox hissəsi kartla ödənişə keçib, bank kartı ilə kommunal xərclərin bir çoxunu internetdən ödəmək olar. Mobil əlaqə üçün pul yükləmək, bank kreditini və üstünə yazılan cəriməni məsafədən ödəmək olar. Elektron ticarət isə yalnız internetdən ödənilir, nağd yolla ödəmək mümkün deyil.

Onlayn ödəmə imkanları asanlaşdıqca, xırda pul problemi aradan qalxa bilər

Nağdsız ödəmə imkanlarını artırmaq üçün hazırda bir neçə layihə də reallaşır. Məsələn, Şamaxının bəzi avtobus xətlərində artıq ödəməni bank kartı və ya mobil qurğunun köməyi ilə reallaşdırmaq olar. Bu, yaxşı təşəbbüsdür. Nəqliyyat kart sisteminə keçsə də, bunu tam mənada onlayn sistem saymaq olmur. Çünki mövcud olan kartlara da pulu gərək nağd yolla aparatdan yükləyəsən. Bakı Nəqliyyat Agentliyi artıq neçə ildir bu kartlara məbləğin internetdən yüklənə bilməsi üçün xüsusi imkanların yaradılacağı barədə açıqlamalar versə də, sistem hələ də yaradılmayıb. Pul yükləmək üçün nəqliyyat bankomatların önündə yaranan növbələr insanları narahat etməkdədir.

Ölkədə işıq və qaz sayğaclarının yenilənməsi prosesi davam edir. Yeni tip sayğac tam olaraq internetə inteqrasiya edilib deyə daha harasa getməyə ehtiyac yoxdur, hər bir ödəmə elə internetdən olacaq. Azərbaycan Dəmir Yollarında da bəzi yeniliklərin olacağı gözlənilir. Bank kartları ilə birbaşa ödəniş etməklə hazırda Bakı və Abşeronda hərəkət edəcək elektrik qatarlarında hərəkət etmək mümkün olacaq.

Onlayn ödəmə imkanları asanlaşdıqca, ticarət şəbəkəsində hər gün rastlaşdığımız xırda pul problemi də tədricən aradan qalxa bilər. Xırdalama prosesində təkcə pulun özü yox, həm də əsginasın keyfiyyəti də münaqişə probleminə çevrilə bilər. Cırıq, əzik, üzülmüş pulları nə bu tərəf, nə də o tərəf götürmək istəmir.

Müasir texnologiyalar həyatımızda yaranan bir çox kiçik, psixoloji problemləri aradan qaldırmağa ciddi kömək edə bilər. Amma hər bir çətinliyin aradan qalxması birbaşa insan amilinə bağlıdır. Bazarda qalıb işləmək istəyən sahibkarın həm xırda pulu, həm də normal işləyən POS terminalı olmalıdır. Ehtiyatda şirin sözü, üzündə isə gülərüz ifadəsi də işə yarayar. Hər bir müştəri qızıl kimi qiymətlidir.

40
Teqlər:
gündəlik, alver, alıcı, market, 10 manat, xırda pul
Pəncərə yaxınlığında kişi, arxiv şəkli

İcazə verin, evinizin pəncərəsindən keçmişimə boylanım...

140
(Yenilənib 22:16 30.11.2020)
Bəlkə də, evimiz, ünvanımız, daimi yaşayış yerimiz olmadığı üçün xoşbəxtlik axtarıb tapa bilmir bizi... Evimiz olsa, qapımızı döyərdi, mütləq.

Kirayədə qaldığım evlər tez-tez yuxuma girir. Divarları, mebelləri, qapı-pəncərələri, xatirələri ilə birgə...

Ən çox oğlumun ayaq açıb gəzdiyi, dil açıb ilk dəfə "ata" dediyi, Gəncədəki kirayə evi xatırlayıram.

Dörd otaq, bir mətbəx, oğlumun kövrək addımlarını atdığı iki addım eni, üç addım uzunu olan darısqal həyət girir yuxularıma.

Gəncədə xəsarət alan uşaq, arxiv şəkli
© Sputnik / Mihail Voskresenskiy

Universitetdən tələsə-tələsə gəlib, həyətdə qollarını açıb məni gözləyən oğlumla qarşılaşdığım o evi, üstündən on ildən çox keçsə də, unuda bilmirəm.

Hərdən, Bakıya köçəndən sonra kirayə qaldığım evləri də xatırlayıram. Darısqal mənzillər, hər dəfə xırda bir probleminə görə narahatlıq keçirdiyim başqasına məxsus evlər.

Hər kitabımı kirayə qaldığım evlərin birində yazmışam.

Acılı-şirinli xatirələrim səpələnib müxtəlif ünvanlara. Yaşadığım gözəl anları xatırlamaq istəsəm, hökmən kiminsə qapısını döyməliyəm.

"İcazə verin, evinizin pəncərəsindən keçmişimə boylanım..."

Adamı qapıdan qovarlar bu xahişə görə...

***

Evlər var ki, sadəcə evdir – xatirəsiz, keçmişsiz.

Evlər var ki, biz xatirələrə boylanmaq istədiyimiz pəncərələrinə indi qara pərdələr asılıb.

Evlər var ki, qapısını aylarla, illərlə açan olmur. Hətta sahibinin də yadından çıxıb.

Evlər var ki, kimsə məşuqəsi ilə görüşmək üçün, ildə, ayda bir dəfə açır qapısını. Toz basmış mebellərdə, yumşaq qadın barmaqlarının ürkək izi qalır, sonra o izləri də toz basır.

Evlər var ki, sobasının üstündə hisli çaydan, yanında saralmış dəm çayniki, pərdələrini də his basıb – Kiminsə yolunu gözləyir...

Evlər var ki, qapı zəngi səbirsizliklə gözləyir çalınmasını, içərisində bir ana səksəkəylə o zəngin səsinə həsrətdir.

Evlər var ki, balkonunda bir bayraq dalğalanır qürurla.

Evlər var ki, balkondakı zivələrdə uşaq paltarları yellənir sevinclə...

Evlər var ki, illərdir heç kəs pərdəsini aralayıb, günəşi salamlamır.

***

Sahibinin unutduğu, sahibini unudan evlər var.

Hansı binanın, hansı mərtəbəsində yerləşdiyini unutduğunuz evlər, küçədəki evsizlərin haqqıdır bəlkə də.

Ən dəbdəbəli evdə, villada, sarayda belə əbədi həyat yaşamaq mümkün deyil.

Daxmalarda xoşbəxt yaşayanlar, saraylarda qəhr olanlar var.

Daxmalar da evdir, saraylar da...

Xoşbəxtlik hansının qapısını döyəcəyini özü seçir.

Amma sənin ünvanın yoxdursa, xoşbəxtlik hansı qapını döyəcək?

Bəlkə də, evimiz, ünvanımız, daimi yaşayış yerimiz olmadığı üçün xoşbəxtlik axtarıb tapa bilmir bizi...

Evimiz olsa, qapımızı döyərdi, mütləq.

Evimiz olsa, qonaq gələrdi xoşbəxtlik...

***

Ölkəmdəki evsizlərin sayı məlum deyin. On minlərlə, yüzminlərlədir, bəlkə də.

Kirayələrdə yaşayanların da sayı bəlli deyil.

Əminəm ki, mənimlə eyni taleyi yaşayan, minlərlə, on minlərlə insan var – xatirələri pərən-pərən, keçmişi perik düşmüş...

***

Ömrümün ən kədərli ayında səs-küylü prosepektdə, kirayə qaldığım evdə xatirələrə boylanıram.

Bilirəm ki, mənim kimi neçə-neçə insan öz xatirələrini yad qapısında buraxıb, köçüb bu dünyadan.

Salam da deyir ki;

Bir böyük ölüm ver, qoy bəsim olsun…

Çörək - daşdan çıxan nəfəsim olsun…

Hər evin xatirə lövhəsi olsun -

hər kəs mismarlansın öz divarına.

Eh şair... Bizim xatirə lövhəsi kimi mismarlanacaq divarımız da yoxdur...

140
Biznes  ledi

İllərin sənətçisi yeni biznesə başlayıb

0
(Yenilənib 23:45 04.12.2020)
Sayan istehsalına yenicə başladıqları məhsul haqqında məlumat da verib. Müğənninin bildirdiyinə görə, sözügedən odekolon öd ağacından hazırlanıb

BAKI, 4 dekabr — Sputnik. Türkiyəli müğənni Seda Sayan yeni biznesə başlayıb.

Sputnik Azərbaycan xəbər verir ki, sənətçi öz adı ilə istehsal olunan ətirli kolonyanı satışa çıxarmağa hazırlaşır.

View this post on Instagram

A post shared by Seda Sayan (@sedasayan)

Artıq Seda məhsullarla çəkdirdiyi fotosunu özünün "Instagram" səhifəsində paylaşıb. O, istehsalına yenicə başladıqları məhsul haqqında məlumat da verib. Müğənninin bildirdiyinə görə, sözügedən odekolon öd ağacından hazırlanıb. Qeyd edək ki, kolonya qutusunun üzərində Seda Sayanın şəkli yer alıb.

0