Pulqabında manatlar, arxiv şəkli

Havayı pul qazanmaq istəyənlərin diqqətinə: Düzlənin!

21944
(Yenilənib 17:06 31.03.2019)
Qətiyyətlə bəyan edirəm ki, amerikalılar öz təklifləri qarşısında bizdən uyğun namizədlər tapa bilməzlər

BAKI, 1 aprel — Sputnik. ABŞ-ın Milli Aeronavtika və Kosmik Tədqiqatlar Agentliyi (NASA) qeyri-adi iş təklifi ilə diqqət mərkəzinə gəlib. Belə ki, təşkilat 2 ay ərzində, yalnız yataq vəziyyətində qalmaq üçün külli miqdarda pul verəcəyini vəd edir.

Yayılan məlumatda qeyd olunur ki, bu müddət ərzində yataq vəziyyətində qalacaq şəxslər, eyni zamanda televiziya da izləməlidirlər. NASA bunun üçün 19 min dollar pul mükafatı vəd edir. Vakansiya 14 nəfər üçün nəzərdə tutulub.

Bu NASA-nın diqqətini yönəltmək lazımdır biz tərəfə. Amerikada çətin ki, o təklifi qəbul edəcək 14 nəfər tənbəl tapıla. Amma yönəlsin bu tərəfə, deyil 14 nəfər, azı 140 min nəfər adam çıxaraq qabağına. Həm də iki ay yox e, ölənə qədər yerlərindən qalxmasınlar, təki pul gəlsin.

Sinov getmirik havayı pul qazanmaq, yeyib-yatmaq, yerimizdən tərpənmədən rahat loxma udmaq üçün? Vəssalam da! NASA-nın istədiyi iki göz, daha doğrusu gününü yataqda və televizor qabağında keçirən adam tapmaqdırsa, bizdən uyğununu tapa bilməz.

Gəlin, bir az da özümüzü tənqid edək, əyrilərimizi, eyiblərimizi dilə gətirək. İşsiz-pulsuz qalmağımızın səbəbkarı həm də özümüz deyilik? Gül kimi rayonlarımızı atıb paytaxta axın edirik, nədi-nədi 5-10 manat günəmuzd qazanıb, axşama özümüzü gecə klublarına çatdıra bilək.

Bəli, rayonlarda iş yeri tapmaq asan deyil. Amma istəsək, iş yerlərini elə özümüz yarada bilərik, öz ağamız, öz nökərimiz ola bilərik. Hektarlarla əkin sahələrinı, meyvə bağlarını, potensial fermer təsərrüfatlarını arxamızda buraxıb, şəhərin cansıxıcı küçələrində dolaşmasaq, 3 gün o tikinti briqadasında, 5 gün bu kafenin bulaşıq masaları arasında qəpik-quruş üçün ömür sürməsək, edə bilərik!

Və etmirik. Bilirsiniz niyə? Çünki təsərrüfat yaratmaq üçün az yatıb, çox çalışmaq lazımdır, canını dişinə tutmaq lazımdır, əyləncələrə, çayxanalara, meyxanalara daha az zaman ayırmaq lazımdır.

Görürük axı, qonşumuz Arif kişinin halını. Noolsun yaxşı pulu var, "zato" gecəsi-gündüzü yoxdur. Səhərdən-axşama el-el, oba-oba gəzir, arıq-sısqa mal-heyvanları ucuz qiymətə alır, gətirib bəsləyir-bordayır, minbir əziyyət çəkir, sonra da aparıb baha qiymətə satır. Belə də güzəran olar?

Ya da kəndin aşağısında Quliyev qardaşlarını götürək. Yazıqlar 30 baş inəyin, 200 baş qoyunun, 20 hektar üzüm bağının arasında itib-batıblar. Ailəlikcə tarlalarda, mal-heyvan tövlələrində tər tökürlər ki, 5-10(000…) manat pul qazansınlar.

Biz isə bu əziyyətə niyə qatlaşaq ki?! Yuxumuza niyə haram qataq, şirin canımıza niyə qəsd edək, tinlərdə, dalanlarda çöməlib siqaret tüstülədən yoldaşlarımızın bizim əvəzimizə asudə vaxt keçirmələrinə niyə şərait yaradaq?!

Gedib Gədəbəydə kartof alası vurmaqdansa, Zaqatalada mal tövləsini kürüyüb, inək sağmaqdansa, Şəmkirdə pomidor istixanalarında barmaqlarımızı qabar etməkdənsə, Lənkəranda limonun saralmasını gözləyə-gözləyə çəltik suvarmaqdansa, elə hazır Yasamalın "13-cü xriptovu"sunda 5 nəfərin kirayə qaldığı 1 otaqlı, ümumi hamam-tualetli daxmada lətifədən danışıb, şaqqanaq çəkib gülürük də.

Gülürük… Bəli, gülürük. Ağlamalı halımıza gülürük. "Kruqa" buraxdığımız bir ədəd siqaretin tüstüsü altında gülürük. Kirayə pulunun vaxtı çatarkən, 5 kişiyə 100 manat düzəldə bilmədiyimizə görə ev sahibinin üzümüzdəki tüpürcəyini silə-silə gülürük.

Eyyy NASA, bizə bir nəzər eylə, uduzmazsan. Hələ bəlkə ştatların sayını artırası oldun…

21944
Teqlər:
kənd, rayon, heyvan, mal, tarla, əziyyət, zəhmətkeş, , pul
Əlaqədar
Qadınların iş vaxtı dəyişdirilə bilər
Ev və iş üçün müraciət edən vətəndaşların problemləri həllini tapıb
Yaşı 35-dən aşağı olan vətəndaşlar üçün iş fürsəti
İstanbulda Aya Sofiya məscidi, arxiv şəkli

XİN-dəki "Pole Çudes", Aya Sofya nazirlə milçəyin fərqi

607
(Yenilənib 20:11 13.07.2020)
Şübhəsiz, həftənin bizim üçün ən mühüm hadisəsi Tovuz istiqamətində ermənilərin təxribatların ordumuzun verdiyi cavab oldu

BAKI, 13 iyul — Sputnik. 7x7 həftənin yaddaqalan hadisələrini şərh edir

"Pole Çudes"

DTX-nin XİN-dəki əməliyyatlarından sonra bu nazirliklə bağlı cinayət işi ötən həftə davam etdirildi. "Pole Çudes"in aparıcısı Leonid Yakuboviçi xatırladan Nazirliyin Tender Komissiyasının sədrinin bu işləri tək həyata keçirmədiyi, burada komanda işi tələb olunduğuna dair sadə proqnozlar özünü doğruldur, cinayətkar şəbəkənin dairəsi genişlənir. Görünür, komissiya sədri komandası ilə birgə tenderlərə özünün "Pole Çudes"i kimi baxıb. Amma indi əsas məsələ bu, deyil. İndi diqqət bu nazirlikdə ola biləcək radikal dəyişikliklərə yönəlib.

Qlobal savaş

Ötən 7 ayda olduğu kimi, bu həftədə də gündəmin baş mövzusu karonavirus və ya ona bağlı mövzulardır. Yoluxanların sayı keçən həftə 12 milyonu, ölənlərin sayı 560 mini ötdü.

Bioloji savaş kimi də interpretasiya olunan pandemiyanın dünya düzənini dəyişməyə hesablandığı da deyilir. Bəzi təhlilçilərin qənaətincə, bir-biriylə savaşan mərkəzlərdən biri SSRİ-dən sonra boşalan yerə məhz Çini yerləşdirməyə çalışırdı. ABŞ-ın müqaviməti isə pandemiya ilə təşkil edildi və sonda Çinin neytrallaşdırılması ilə bitəcək.

Aya Sofya

Həftənin ən yaddaqalan hadisələrindən biri Türkiyənin Aya Sofyanı məscidə çevirmək barədə qərarı idi. Qərara qədər muzeyə giriş biletlə idi. Bu, böyük məbləğdə turist vəsaiti demək idi. 

Görünür, illərdir müxtəlif bəhanələrlə Avropa İttifaqına buraxılmayan Türkiyə "əzələ nümayişi"ni daha vacib hesab edib. Xatırladaq ki, məbəd VI əsrdə İmperator Yustiniyanın əmri ilə tikilib. Osmanlılar o zaman Konstantinopol adlandırılan İstanbulu fəth etdikdən sonra kilsə məscidə çevrilib. Lakin 1934-cü ildə Mustafa Kamal Atatürk Aya Sofyaya muzey statusu verib.

Bu arada UNESCO Türkiyə hökumətinə xəbərdarlıq edib ki, Dünya İrs Komitəsinin razılığı olmadan Aya Sofyanın statusunun dəyişdirilməsi qanundankənar addım hesab olunur.

Bu fakt isə əks arqument kimi qəbul oluna bilər: 1236-cı ildə Səlib yürüşlərinin nəticəsi olaraq müsəlmanlar Kordovadan çıxarılıb. Məscidin iri binası xristian məbədinə uyğunlaşdırılıb.

Yəni tarixdə anoloji nümunələr var, çox da narahat olmağa dəyməz.

Baş epidemioloq

1992-ci ildən Azərbaycanın Baş epidemioloqu vəzifəsində çalışan professor İbadulla Ağayev istefa verdi. Səbəb isə yəqin ki, jurnalistlə telefon danışığı idi. Epidemioloq jurnalistin sualına cavabında bildirmişdi ki, rayondadır və koronavirusla bağlı vəziyyətin nə yerdə olduğunu bilmir, onun da yaxını, xəstəsi var, rayona gedib. Belə... Qəzetçiləri xoşhal edən, məmurların isə bəyənmədiyi belə bir fraza var: Nazirlə milçəyin heç bir fərqi yoxdur, onların hər ikisini qəzetlə öldürmək olar!

190 manatlıq qarpız

Həftənin digər mövzusu 190 manatlıq qarpızla bağlıdır. Hökümətin pandemiyanın təsirlərinin minimallaşdırılması istiqamətində sosial paketlərindən biri - əhalinin işsiz təbəqəsinə verilən 190 manatlıq müavinəti alan gənclər onunla aldığı qarpızları həyətə düzərək bıçaqla, ayaqları ilə parçalayır.

Bəli, nazirlik elektron sistem üzərindən aldığı informasiyalarla, yəni vətəndaşın adında əmək müqaviləsi, VÖEN, əmlak, avtomobil və s. olmamasını əsas götürərək, yardımı ayırıb. Videogörüntülər acı təəssüf hissi yaradır: Gəncin düşüncə tərzi, təfəkkürü təhlükəlidir. Təkcə bu gün üçün yox, gələcək üçün də. Halbuki, gənc belə bir video da çəkə bilərdi: aldığı yardıma ehtiyacı olmadığı üçün həmin vəsaitlə aldığı ərzaqları aztəminatlı bir ailəyə çatdıra və bunu sosial şəbəkələrdə yaya bilərdi.

Məsuliyyət

Sumqayıtda yaşadığı evi qanunsuz tərk edən daha bir aktiv koronavirus xəstəsi saxlanıldı. Sumqayıt şəhər 9-cu mikrorayonda yaşayan 1978-ci il təvəllüdlü R.Bağırov barədə cinayət işi başlayıb.

Bəli, qanunvericilikdə son dəyişiklikdən sonra bilərəkdən yoluxdurma cinayət məsuliyyəti yaradır. Ancaq polisin bütün belə hallarda xəstələri aşkarlamaq imkanları məhduddur. Deməli, həlledici amil fərdi məsuliyyətdir. Özümüz qədər başqalarını düşünmək və qaydalara riayət etmək cəmiyyətin mədəni səviyyəsinin göstəricisidir.

Subsidiyalar

Ötən həftə kənd təsərrüfatına dövlət dəstəyindən sui-istifadə edərək bu sahəyə ayrılmış vəsaitləri saxta sənədlərə əsaslanan maliyyə əməliyyatları ilə nağdlaşdıraraq ələ keçirən mütəşəkkil dəstəyə daxil olan 30-a yaxın şəxs saxlanıldı.

Məlum oldu ki, cari ilin 3 ayı ərzində 2000-dən artıq fermerə məxsus subsidiya kartları toplanılıb. 

Daha sonra kartlardakı pul vəsaitləri saxta sənədlər əsasında formal şəxslərin adlarına yaradılmış şirkətlərin bank hesablarına köçürülüb və 25-40% ödəniş müqabilində nağdlaşdırılıb. Ümumilikdə 5 milyon manata yaxın vəsaitin mənimsənilməsi faktından söhbət gedir.

İndi aydın oldumu ki, bazarda əriyin qiyməti niyə 3 AZN-dən, gilas 2.50-dən, çiyələk 4 AZN-dən aşağı düşmür?!

P.S. Və şübhəsiz, həftənin bizim üçün ən mühüm hadisəsi Tovuz istiqamətində ermənilərin təxribatların ordumuzun verdiyi cavab oldu. 4 hərbçimizin şəhid olduğu, beşinin isə yaralandığı, artilleriya, minaatan və tankların tətbiqi ilə gedən döyüşdə bölmələrimizin atəşi ilə düşmənin dayaq məntəqəsi, artilleriya qurğuları, hərbi hissəsi ərazisində avtomobil texnikası və canlı qüvvəsi məhv edilib. Ermənilərin bu təxribatları niyə məhz Tovuz istiqamətində - dövlət sərhədində törətdiyi aydındır, amma bu, Azərbaycanı cəbhə xəttinin digər zolağında düşmənə daha ağır zərbələr vurmaq hüququndan məhrum etmir.

607
Abşeron tutu

Xəzrinin musiqisi, samovar çayı, tutlu plov: yaşlıya savab, cavana səhhət

779
(Yenilənib 22:56 10.07.2020)
Tut mövsümü sona yetməkdədir. Uzaqbaşı bir-iki həftəyə ağ tutdan əsər-əlamət qalmayacaq. Tutsevərlər isə növbəti mövsümü gözləməli olacaqlar

BAKI, 10 iyul — Sputnik. Abşeronun tutu başqa aləmdir. Hər həyətdə bir-iki tut ağacı salmaq hələ dədə-babadan adət olub. Tutu əkən həmişə savab sahibidir, çünki ağacın kölgəsi sərinlik verir, meyvəsinin isə dadından doymaq olmur. Yayın cırhacırında bəzən hündürlüyü ikimərtəbəli ev boyda olan tut ağacının altında xəzri küləyinin musiqisini dinləmək, samovar çayı içmək qədər gözəl bir nəsə tapmaq çətin məsələdir.

Abşeronun xartutu əvəzolunmaz bir bitkidir

Tut ağacını həyətində əkən şəxs bir növ səxavətli insan kimi tanınır, çünki istəsən də, istəməsən də, mövsüm dövründə bütün məhsulu yığıb qurtara bilməzsən. Qonşuya, qohuma pay yollamalı olursan, ətrafdakıları tut yığmağa dəvət etməlisən. Tutu quruda, ondan mürəbbə və bəkməz hazırlaya bilərsən. Qışın soyuq günlərində insana güc-qüvvə verər tutdan hazırlanan məhsullar.

© Photo : İsmayıl Rafiqoğlu
Abşeron tutu

Abşeronda tutun onlarla növünə rast gəlinir. Şahtut, bidanə, tehrani, muştut, xartut kimi müxtəlif sortları yarımadanın hər yerində əkilib. Şahtut və muştut ilk məhsulunu artıq mayın sonunda verir. Tehrani iyunun sonuna tükənir. Bidanə isə iyulun yarısına kimi məhsulunu ağacda saxlayır. İyun ayı küləkli keçsə, bəzən tutun hamısı yerə tökülür. Küləksiz illərdə isə tut elə ağacda quruyur, toplayıb qışa ehtiyat kimi saxlamaq olar.

Abşeronun xartutu isə əvəzolunmaz bir bitkidir. Qanı aşağı olan, vitamini çatmayan şəxslərə məsləhətdir. Gözəl turşməzə dadı olur, hemoqlobini artırır. Hamilə qadınlara məsləhətdir. Toplayıb kənara qoyduqda, tez bir zamanda özündən xeyli şirə buraxır. Bazarlarda xartutun şirəsini ayrıca stəkanla satırlar. Tutların içində ən bahalısı sayılır. Əvəzsiz məhsuldur.

© Photo : İsmayıl Rafiqoğlu
Abşeron tutu

Tut təkcə insanlara yox, həm də quşlara, həşəratlara bir yem vasitəsidir

Tutun yaxşı sirkəsi də olur. Amma üzümdən fərqli olaraq mütləq tərkibinə bir neçə element əlavə edilir. Qara çörək, kömür və paslı mismar sirkəni tündləşdirir. Tut qaraciyərin dərmanıdır deyə, tut sirkəsi və tut bəkməzi qaraciyər üçün xeyirlidir.

Bidanə tutların içində möhtəşəmliyi ilə seçilir. Fars dilindən alınma söz olan “bidanə” tumsuz, toxumsuz mənasını verir. Toxumu yoxdur deyə, mürəbbəsi dadlı olur. Şirinliyi də normadadır. Bidanədən həm də çox gözəl bir yemək hazırlanır: tutlu plov. Ağdam və Ağcabədi zonasında məşhur olan tutlu plovu ən azı ildə bir dəfə tut mövsümündə bişirmək olar. Düyü qədər də tut tələb olunur. Kərə yağı, tut və düyüdən hazırlanır. Tut çırpılır, təmizlənir, qazana düzülür, yağda bişirilir, üzərinə də düyü əlavə edilir. Dadından doymaq olmur.

© Photo : İsmayıl Rafiqoğlu
Abşeron tutu

Qaratut və muştutun şirinliyi az olur, şəkərdən uzaq durmaq istəyənlər üçün daha məsləhətlidir. Gözəl mürəbbəsi alınır. Tut təkcə insanlara yox, həm də quşlara, həşəratlara bir yem vasitəsidir. Yerə tökülür, bir çox canlını qidalandırır. Qarışqalar elə hey tutdan daşıyırlar, qışa hazırlaşırlar. Həyətində toyuq-cücə, qaz-ördək saxlayanlar tutun qiymətini yaxşı bilirlər. Tutun qurumuş budaqları həm samovara, həm də manqala yarayır, çünki bərk oduncağı var, istisi çox olur. Bacaranlar kömür də hazırlaya bilərlər. Tut ağacından hər hansı bir əşya illərlə sahibinə xidmət edə bilər. Yaxşı ət taxtası, odun doğramaq üçün kötük düzəltmək olar, dekorativ işlər üçün material kimi yararlıdır. Tutdan musiqi alətləri də düzəldilir. Əsasən, tarı tut ağacından hazırlayırlar. 

© Photo : İsmayıl Rafiqoğlu
Abşeron tutu

Gövdəsi insanın boynu yoğunluğunda oldusa, demək, ömrünün sonu yaxınlaşır

Tutla bağlı Azərbaycan miflərində xeyli maraqlı təsəvvürə rast gəlirik. Tutu kəsmək günah sayılır, tutu kəsənin başına çox bəla gələr deyirlər. Xartut Bakı əhli üçün müqəddəs sayılır, amma həm də ağır ağacdır, deyirlər, gərək tutu cavan adam əkməsin. Elə ki, xartutun gövdəsi insanın boynu yoğunluğunda oldu, demək, həmin şəxsin ömrünün sonu yaxınlaşır. Məsləhətdir, xartutu yaşı əllidən yuxarı olan birisi əksin. Tut əkən onu adətən özü üçün yox, özündən sonra gələn nəsillər üçün əkir. Elə xartutun böyüməsinə heç 20-30 il bəs eləmir bəzən.

© Photo : İsmayıl Rafiqoğlu
Abşeron tutu

Tutu sevməyən də az deyil, həyətini təmiz görmək istəyən, zir-zibili yığışdırmaqdan bezənlər ən radikal metoda, yəni ağacı doğramağa belə əl atırlar. Həm də əgər bağı başlı-başına buraxsan, elə ətraf qonşular bütün günü həyətdən tut daşımaqla məşğul olacaqlar. Tut yoxdursa, deməli, həyətinə girən də yoxdur. Son 30 ildə tut ağacları həm də xalq arasında “amerikan qurdu” deyilən bir bəla ilə rastlaşıb. Yaşıl rəngli qurd ağacda əməlli-başlı tor salaraq bütün yarpaqları məhv edə bilər. Nə qədər mübarizə etsən belə, çox zaman faydası olmur. Bağ əhli əlində qayçı tutu budayır, qurdları yandırır, ağacı dərmanlayır. Amma qonşuda varsa, bir müddət sonra yenə əmələ gəlir. Niyə bu qurda “amerikan qurdu” deyirlər, məlum deyil, amma əsasən SSRİ dağılandan və sərhədlər açılandan sonra əmələ gəlib. Ola bilər, haradasa xaricdən gətirilib.

Tut mövsümü sona yetməkdədir. Uzaqbaşı bir-iki həftəyə ağ tutdan əsər-əlamət qalmayacaq. Tutsevərlər isə növbəti mövsümü gözləməli olacaqlar.

779
Əlaqədar
Koronavirus bizə çətin qalib gələ, çünki bizim ona qarşı silahımız var
Bir gün yeməsək, marketdən uzaq dursaq, okeana bərpa olmaq şansı verərdik
Açılan süfrələrdə yeri görünər hər an: İtirdiyi mövqeyə qayıdacaqmı zəfəran?
Sarımsaqdan zəncəfilə kimi: antiseptik ədviyyələr nə qədər effektlidir?
Koronavirusdan sağalmağın yolu xəstələnməkdən keçir

Şəhid general-mayorla doğulduğu Qəbələdə izdihamlı vida

0
Azərbaycan-Ermənistan dövlət sərhədinin Tovuz rayonu istiqamətində gedən döyüşlərdə şəhid olan qəhrəman hərbçimiz, general-mayor Həşimov Poladın nəşi doğulduğu Qəbələnin Vəndam kəndinə gətirilib.

General-mayor Həşimov Polad İsrayıl oğlu qəhrəmanca şəhid olub. Onun nəşi doğulduğu Qəbələnin Vəndam kəndinə gətirilib. Məmləkətinə onunla vidalaşmaq imkanı yaradılıb.

Qeyd edək ki, şəhidimiz sabah paytaxtdakı İkinci Fəxri Xiyabanda son mənzilə yola salınacaq.

İyulun 12-də Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib.

Düşmən hücumunun qarşısını alarkən döyüşdə Azərbaycan Ordusunun  hərbi qulluqçuları çavuş Sadıqov Vüqar Lətif oğlu, baş əsgər Məmmədov Elşad Dönməz oğlu, baş leytenant Mahmudov Rəşad Rəşid oğlu, hərbi qulluqçumuz əsgər Daşdəmirov Xəyyam Məhəmməd oğlu, bu gün isə döyüş zamanı müdafiənin ön xəttində olan general-mayor Həşimov Polad İsrayıl oğlu, polkovnik Mirzəyev İlqar Anzor oğlu, mayor Əhmədov Namiq Hajan oğlu, mayor Novruzov Anar Gülverdi oğlu, gizir Zeynallı İlqar Ayaz oğlu, gizir Babayev Yaşar Vasif oğlu və müddətdən artıq həqiqi xidmət hərbi qulluqçusu, əsgər Mustafazadə Elçin Arif oğlu şəhid olub.

0