Azərbaycan əsgəri Lələtəpə yüksəkliyində

ATƏT Qarabağ danışıqlarında vasitəçi rolunu itirmək üzrədir

231
(Yenilənib 22:59 18.03.2017)
"Ermənistan işğal elədiyi əraziləri qeyd-şərtsiz azad etməsə, Azərbaycanın hərbi yolu seçməsi beynəlxalq qanunlarla ziddiyyət təşkil etmir. Bakı məsələnin yenidən BMT-nin nəzarətinə götürülməsini də təklif edə bilər"

Azərbaycan prezidenti İlham Əliyevin Fransaya rəsmi səfəri bir çox önəmli məqamlara aydınlıq gətirdi. Araşdırmaçıların fikrinə görə, Fransanı təkcə Azərbaycanda deyil, bütün Cənubi Qafqazda Avropa siyasətinin təmsilçisi adlandırmaq olar, bir sıra qlobal layihələrdə və böhranlarda, o cümlədən energetika, kommunikasiya, Qarabağ münaqişəsi, 2008-ci il Gürcüstan böhranında bu, özünü əyani şəkildə göstərib. Fransanın Cənubi Qafqazda bu roluna qiymət verən rəsmi Bakı diplomatik şəkildə Avropa siyasətinin istiqamətini müəyyən edərkən inkişafın hər mərhələsində siyasi dialoqun başlanğıc nöqtəsi kimi məhz Parisi götürüb. Onu da qeyd etmək lazımdır ki, Azərbaycan-Fransa münasibətləri əvvəlcədən Avropa təşəbbüslərinə əsaslanıb.

Yelisey Sarayında şam yeməyində və prezidentlərin görüşün yekunlarına həsr olunmuş birgə mətbuat konfransında açıqlamalarından görünürdü ki, israrla Parisə Avropa təhlükəsizlik prinsiplərinə riayət olunması zərurəti, o cümlədən sərhədlərin pozulmasının yolverilməz olduğu, məsələnin humanitar tərəfi xatırladılır. Prezident Ollandın sözlərindən aydın olurdu ki, Paris hazırkı mərhələdə, ilk növbədə münaqişə tərəflərinin və vasitələrin güzəştə hazır olmaması ilə əlaqədar problemin həllini gücləndirməyə hazır deyil. Azərbaycanda və regionda sabitliyi qoruyub saxlamaq istəyi Parisin maraqlarından irəli gəlir. Ollandın masa arxasındakı nitqində isə son olaraq "regionun təhlükəsiz və sabit gələcəyi naminə birlikdə işləmək" təklifi səslənib. Beynəlxalq terrorçuluğa qarşı mübarizə çağırışı ilə gücləndirilən bu mövzu, çox güman ki, yaxın gələcəkdə ikitərəfli münasibətlərin istiqamətini müəyyən edəcək. 

Lakin Ollandın "Dağlıq Qarabağ münaqişəsinin həlli yollarının tapılmasında irəliləmək vaxtı çoxdan çatıb" bəyanatı diqqəti daha çox çəkir. Farnsa prezidenti bəyan edib ki, "artıq 23 ildir ki, münaqişə davam edir və tərəflər heç bir həlledici nəticəyə gəlməyiblər. Status-kvodan pis bir şey yoxdur. 2016-cı ilin aprelində və bir neçə həftə bundan əvvəl baş verən toqquşmalar aydın göstərir ki, bu münaqişə heç vaxt tam dayanmayıb”. Göründüyü kimi, Paris yeni təkliflər verilə biləcəyini nümayiş etdirir.

Vurğulayaq ki, Minsk qrupu həmsədr dövlətlərinin vasitəşilik təşəbbüsləri hələlik heç bir nəticə verməsə də, təşəbbüslər davam edir. ABŞ və Rusiyadan sonra Fransa da problemin həll edilməsi istiqamətində yeni təşəbbüslə çıxış edib. Lakin Fransanın tərəflərə yeni təkliflə müraciət etmə ehtimalı azdır. Müzakirələr yəqin ki, "Madrid prinsipləri" çərçivəsində aparıla bilər. Peterburq və Vyana görüşündə də bu prinsiplər üzərində müzakirələrin aparıldığı və nəticəsiz qaldığı bəllidir. Ermənistanın aprel hadisələrindən sonra silahlanma yarışınına başladığı bir ərəfədə F.Ollandın vasitəçilik missiyasının uğurlu olma ehtimalı azdır. Belə görünür ki, son iki görüşün Rusiya və ABŞ-ın vasitəçiliyi ilə baş tutduğunu düşünən Fransa bu prosesdən kənarda qalmayaraq prezidentlərin üçüncü görüşünün baş tutmasına çalışır. Ermənistan rəsmilərinin son aylarda militarist bəyanatları onu göstərir ki, Fransanın vasitəçiliyi də ciddi nəticə verməyəcək. 

Fransanın ATƏT-in Minsk qrupunun həmsədri kimi fəal olması anlaşılan olsa da, Ollandın erməni həmkarını Ermənistana dəvət etməsi anlaşılmazdır. Fransua Olland apreldə prezident kürsüsü ilə vidalaşır. Dağlıq Qarabağ münaqişəsinin həlli üçün Sarkisyanın Fransaya səfərinin elə bir əhəmiyyəti olmayacaq. Hətta hər hansı bir təklifi olsa belə bu bir ayda reallaşa bilməz. Olland ikinci dəfə prezidentliyə namizədliyini də verməyəcək və onun erməni lobbisinin səsinə ehtiyacı da yoxdur. Görünən budur ki, Fransa Ermənistanın mövqeyini dəstəkləyir. Azərbaycanın mövqeyi belədir ki, ancaq Azərbaycan torpaqları daxilində öz müqəddəratını təyin etmə ola bilər. Amma Ollandın mücərrəd şəkildə müqəddəratı təyin etməkdən danışması əslində erməni separatçılarına dəstək anlamı daşıyır. Həmsədrlik institutu qərəzsiz olmalıdır, obyektiv mövqedən çıxış etməlidir. Olland münaqişənin həlli ilə bağlı yalnız xalqların öz müqəddəratını təyinetmə ilə bağlı prinsipini qabartmaqla münaqişənin Azərbaycanın ərazi bütövlüyü prinsipi ilə həllini inkar etmiş olur. Azərbaycan beynəlxalq hüququn bu prinsipinə də hörmətlə yanaşır və Azərbaycanın tərkibində Dağlıq Qarabağa ən yüksək status verməyə hazırdır. Belə bir vəziyyətdə Fransa dövlət başçısının bu bəyanatı ermənipərəst mövqedən başqa bir şey deyil. 

Fransa-Rusiya-ABŞ-ın həmsədr olduqları, arada vasitəçilik edən Minsk qrupunun apardığı danışıqlar heç bir nəticə vermir. Danışıqların heç bir nəticə verməsə, Ermənistan işğal elədiyi əraziləri qeyd-şərtsiz azad etməsə, Azərbaycanın hərbi yolu seçməsi beynəlxalq qanunlarla ziddiyyət təşkil etmir. Bakı məsələnin yenidən BMT-nin nəzarətinə götürülməsini də təklif edə bilər. İstənilən halda, atəşkəs uzun müddət davam edə bilməz və Azərbaycan öz ərazi bütövlüyünü təmin etmək zorundadır…

231
Teqlər:
Yelisey Sarayı, Dağlıq Qarabağ münaqişəsinin həlli yollarının müzakirəsi, BMT, ATƏT, Azərbaycan prezidenti İlham Əliyev, Fransua Olland, Cənubi Qafqaz, Paris, Fransa, Gürcüstan, Rusiya, Avropa, ABŞ, Azərbaycan, Bakı
Əlaqədar
Yeni dəyişiklik bütün perspektivləri heçə endirdi
Üzümüzü kimə çevirməli: Qərbə, yoxsa Şərqə?
Ermənistanda ciddi qarşıdurma başlaya bilər
Məktəbli

Sönük təhsil ya niyə bir uşağın videosu digər uşağa dərslikdən daha maraqlıdır?

22
(Yenilənib 23:18 25.01.2021)
Koronavirus pandemiyası artıq bir ilə yaxındır uşaqları məktəbdən uzaq salıb. Bir neçə il öncə hər addımda rastlaşdığımız planşet və telefonun ziyanından bəhs edən videolar da nədənsə yoxa çıxıb.

Koronavirus pandemiyası artıq bir ilə yaxındır uşaqları məktəbdən uzaq salıb. Bir neçə il öncə hər addımda rastlaşdığımız planşet və telefonun ziyanından bəhs edən videolar da nədənsə yoxa çıxıb. Televiziya ekranından hər gün “evdə qal, özünü qoru” çağırışları səbəbindən hətta virtual dünyadan uzaq olan hər bir məktəbli artıq onlayn həyat yaşamağa məhkum olub. 

Dərsin biri bir vaxt başlayır, digəri başqa vaxt

Evdə bir neçə uşağı olan ailələrdə vəziyyət olduqca maraqlıdır. Uşağın biri səhər növbəsində məşğul olur, digəri günorta. Dərsin biri bir vaxt başlayır, digəri başqa vaxt. Hansı otağa girsən, əlində planşet və ya telefon tutmuş övladına rast gəlirsən. Təhsil Nazirliyindən qəribə göstərişlər də gəlir: nə bilim, məktəbliyə ağ köynək, qalstuk geyindirib planşetin qarşısında əyləşdirmək lazımdır. Məktəbli də əlini əlinin üzərinə qoyub ekrana baxmalıdır.

30 ildir müstəqillik əldə etmişik, dünyanın ən aparıcı təhsil sistemləri ilə tanış olmuşuq, amma sovetdən qalma qaydalardan hələ də bərk-bərk yapışırıq. Bir az rahatlığı var uşağın, onu da əlindən almaq istəyirik. Ciddi məsələlər isə qalır kənarda.

Uşağın təhsilə marağının azalması elə mənasız dərsliyə, yararsız testə bağlıdır. Məktəbliyə təsviri-incəsənət testində verilən suallara nəzər yetirsək, mənzərənin nə yerdə olduğunu anlaya bilərik. Sual: “Hansı söz latın dilində tərcümədə rəng deməkdir”. 3 cavab: a. Color b. Kolorit c. Fon. Uşaq Azərbaycan dilində oxuyur “color”, deyirsən “kolor”, deyir, axı “color” yazılıb, nə olan bir şeydir? İbtidai sinif şagirdi nə bilir latın dili nədir? Latın dilini yalnız Tibb Universiteti və filologiya fakültələrində keçirlər. Lotereya oynayır elə bil. Ağlına gələn bir cavabı verməlidir.

Ya da, belə bir sual: Cümləni tamamla – “Toxuculuq sənətində ipliyin hörülən düyünü..., bu ilməni saxlayan əsas iplər isə …, adlanır”. Özü də cavaba görə düz 15 bal verilir. Bəli, təsviri incəsənət kitabında bu barədə məlumat var, düyün ilmədir, əsas iplər isə əriş. Bunları heç bir halda uşaq yadda saxlaya bilməyəcək. Adi söz yığınıdır, gərək biliyi möhkəmləndirən əyani vəsait olsun, uşaq xalçanı gözü ilə görsün, ya da xalça toxumağı əks etdirən animasiya filminə baxsın, beş-on dəfə təkrarlasın. Xalça muzeyində olsun, əlini ilməyə və ərişə toxundursun. Yoxsa bu bilik qazanmaq yox, vaxt ötürməkdən başqa bir şey deyil.

Müəllim ya ciy-ciy ciyildəyir, ya “ç” əvəzinə “ts” deyir

Valideyn evdə karantində oturduqca, hər gün ibtidai sinif müəlliminin qüsurlu nitqinə qulaq asmağa məcbur olur. Bu nitq öz-özünə düzələn iş deyil axı, bunu işə götürəndə bir baxan olmayıb yəqin. Müəllim ya ciy-ciy ciyildəyir, ya “ç” əvəzinə “ts” deyir, ya da nəsə başqa qüsura yol verir. İbtidai sinif dərsliklərində isə o qədər problem var, sözlə deyiləsi deyil. 3-cü sinif şagirdi heç Salur Qazan sözünü əməlli-başlı deyə bilmir, Qaraca çobanın kimliyini də anlamır. Oxuyur, amma anlamır. “Dədə Qorqud” dastanı kiçik uşaq beyni üçün anlaşılmaz bir məfhuma çevrilir. Dastana həm də gərək vizual baxasan, film hələ uşağa çətin gəlir, ayrı-ayrı səhnələrin isə animasiya variantı ya yoxdur, ya da anlaşıqlı deyil. Ümumiyyətlə, fərli vizual görüntünün olmamasından əziyyət çəkirik.

Animasiya yoxdur, müasir filmlər çəkilmir. Əslində, Azərbaycanda Mədəniyyət Nazirliyinin xətti ilə həm “Dədə Qorqud”, həm “Koroğlu” dastanlarının yeni versiyaları çoxdan çəkilməli idi. Animasiyası da, bədii və hətta sənədli filmləri də olmalı idi. Uşaqlar üçün adaptasiya olunmuş animasiya filmləri həm gözəl nitqi olan aktyorların ifasında səsləndirilməli idi. Bu günün uşağı çox böyük imkana malikdir. "Disney" filmlərinə HD formatda baxırsa, artıq ağ-qara Azərbaycan filmlərinə baxmaqda maraqlı deyil, o filmlər bir qədər primitiv görünür müasir uşağa. Dünya kinosu və animasiyasında maraqlı süjetlər dəfələrlə çəkilib. Şekspirin “Hamlet” əsərinin onlarla versiyası var. Amma biz Qaraca Çobanı uşağa izah edə bilmirik.

Eləcə də Süleyman Sani Axundovun “Qaraca qız” əsərinin məğzini də ibtidai sinif şagirdinə izah etmək asan məsələ deyil. Hadisələr ötən əsrin əvvəlində baş verib, bu günün uşağı bunlardan xeyli uzaqdır. 1966-cı ildə çəkilmiş film də bir qədər köhnəlib. Klassik ədəbiyyata yeni baxış bucağından baxmağın vaxtı çatıb.

Azərbaycan interneti məlumat baxımından olduqca kasaddır

Hazırda dünya kinosunda hətta klassik süjetləri müasir interpretasiyada təqdim etmək ənənəsi yer alıb. Məsələn, detektiv janrının banilərindən biri olan ingilis yazıçısı Artur Konan Doylun “Şerlok Holmsun macəraları” əsəri dəfələrlə ekranlaşdırılıb. Kraliça Viktoriyanın dövründə yaşamış Şerlok Holms və doktor Vatsonun macəralarını elə Böyük Britaniyada yenidən çəkiblər. “Şerlok” serialında detektiv ustadı yeni texnologiyalardan məharətlə istifadə edir, elə bil anadan olandan smartfonla yatıb-durub. Çox maraqlı və cəlbedici bir serialdır, tam müasir formatda, amma klassik süjet xətti gözlənilməklə çəkilib. Klassik ədəbiyyata maraq yaratmağın yollarından biri də əsərlərə yanaşmada yenilik tətbiq etməkdən keçir.

Azərbaycan interneti məlumat baxımından olduqca kasaddır. Uşaqların informasiya tələbatını ödəməkdə acizdir bir növ. Dərsliklərdə verilən materiallar çox vaxt isə nə ibtidai sinif şagirdinin dünyagörüşünə uyğundur, nə də söz bazasına. Müasir uşaq dərsi hərtərəfli qavramaq istəyir, bunun üçün isə imkan yoxdur. Klassik filmlər yenilənmir, animasiya filmləri çəkilmir, Qaraca qız, Salur Qazan, Koroğlu, Dədə Qorqud və digər personajların kimliyini bildirən videolar, infoqrafikalar və ya videoinfoqrafikalar da yoxdur. Kimdir Salur Qazan? Şagird adı axtarışda yazmaqla görüntülü məlumata çıxış əldə edə bilərdi. Uşaqlar heç axtarış sistemində heç nəsə yazmaq belə istəmirlər. Süni intellektə səs atmaqla nəticə gözləyirlər.

Məktəbli bu internet “ulduz”larının davranışını təkrarlamaqdan həzz alır

Bu günün məktəblisi Azərbaycan kanallarına baxmır, maraqlı deyil. “Youtube”-un Azərbaycan seqmentində kontent axtarsa da, tapa bilmir, tapsa da, ona maraqlı deyil. İnternetdə Rusiya və Ukraynadan olan Katya, Maksim, Vlad, Kamil və Aminka, Nastya, Diana, Roma, Amelka Karamelka kimi yutuberlərlə yanaşı adını bilmədiyimiz onlarla Çin və Koreya blogerlər var. Nə qədər desən, atlanıb düşsünlər, danışsınlar, saç-başını rəngləsinlər, ev-eşiyi dağıtsınlar. Bir müddət sonra baxırsan, uşaqlar evdə salamat bir nəsə qoymayıblar: əşyaları kəsib doğrayıb, sonra da rəngləyiblər. Kimsə də özünü bu avara qızlara bənzətmək üçün hətta öz saçını belə kəsə bilər. Evin divarını da, üz-gözü də rəngləmək adi məsələdir. Məktəbli həmin bu internet “ulduz”larının davranışını təkrarlamaqdan həzz alır. Qaraca çoban isə orta əsrlərdən gələn bir qəhrəmandır, film özü də bir az köhnəlib, uşağa maraqlı deyil.

"TikTok", "Instagram", "Youtube" kimi platformalarda bizim blogerlərin səsi gəlmir. Gəlsə də, elə “Amelka Karamelka” kimi mənasız bir kanaldan heç də yaxşı deyil. Məktəbliyə nə bir dərslik, nə də bir fərli kontent təklif edə bilmirik. Bir alternativi yoxdur. Bu boyda sivilizasiya qurmuşuq, amma uşaqlara digər uşaqların qurduğu səhnələr daha maraqlıdır. Nə qədər mənasız olsa da, baxacaqlar. “Çelenc”, “otkusi, lizni ili niçeqo”, “sirenoqolovıye” kimi ifadələr onların dilindədir.

Ya özümüz nəsə yaratmalıyıq, ya da əcnəbi blogerlər bizim uşaqlardan özlərinə bənzər “dəli yığıncağı” yaradacaqlar. Özü də burada həm Mədəniyyət Nazirliyi, həm Təhsil Nazirliyi birgə çalışmalıdır. Mədəniyyət Nazirliyi köhnəlmiş kontenti yeniləməli, yeni formatda bədii və animasiya filmləri çəkməli, Təhsil Nazirliyi isə nitqi qüsurlu müəllimlər üçün natiqliq kursları təşkil etməklə təsdiqlədiyi dərsliklərə yenidən nəzər salmalıdır. Yoxsa, uşaqlar əldən gedəcək. Valideynlər də hərdənbir övladları ilə söhbət etsələr, ən azı xarici dildə filmə baxan uşaqları doğma Azərbaycan dilini unutmazlar.

22
Ermənistanlar sərhəddə Azərbaycan hərbçisi, arxiv şəkli

Türkmənlərlə yeni dostluq, taclı bəla, soyuq şimaldan ermənilərin qayıdışınadək

57
(Yenilənib 00:17 25.01.2021)
Baydenin tərzini və Vaşinqtonun siyasətində hansısa dəyişikliklər edib-etməyəcəyini yəqin etmək üçün bir qədər vaxta ehtiyac olacaq.

7x7 həftənin ən yaddaqalan hadisələrini şərh edir

“Dostluq”

Bu həftə Azərbaycan və Türkmənistanı Xəzərdə böyük karbohidrogen ehtiyatlara malik yatağı birgə istismar etməklə bağlı razılıq əldə etdilər. Yatağı Azərbaycan neftçiləri tapsalar da, iki ölkənin sərhədində yerləşdiyindən onu birgə istifadə etmək barədə razılıq əldə olundu.
Məlum olduğu kimi, bütün neft-qaz resurslarına malik ərazilər olduğu kimi, Xəzərin dibinin bölünməsi də ətrafında yerləşən ölkələr üçün həmişə mübahisəli olub. Amma 2008-ci ildə ölkələr “qızıl orta” tapıblar.
Bu gün Bakı və Aşqabadın birgə işləyəcəyi yatağı “Dostluq” adlandırdırması həm də rəmzi məna daşıyır.

Əlvida, Tramp
Xoş gördük, Bayden

ABŞ-ın 46-cı prezidenti C.Bayden oval masanın arxasına keçdi. Amerikanın ən yaşlı prezidentinin andiçmə mərasiminə onun sələfi Tramp gözlənildiyi kimi qatılmadı, -çıxanda qapını elə çırpmamışdı ki, qatılsın da, - B.Obama, C.Buş və C.Baydenin çıxışı zamanı mürgüləyən B.Klinton isə qonaqlar arasında idi.

Baydenin tərzini və Vaşinqtonun siyasətində hansısa dəyişikliklər edib-etməyəcəyini yəqin etmək üçün bir qədər vaxta ehtiyac olacaq. Trampı isə biz yəqin ki, daha çox Dağlıq Qarabağ münaqişəsində neytral mövqeyi ilə xatırlayacağıq – hansı ki, bu, bizim üçün 44 günlük müharibədə də qanedici mövqe idi.

Şimalda soyuqdur

ABŞ-da qalmaqallı seçkinin tozu yatmamış digər supergücdə - Rusiyada aləm bir-birinə dəyib. Müxalifət lideri Navalnının həbsi kütləvi etirazlara səbəb olub.

Belə görünür ki, məxməri inqilablar supergüclərə tərəf yönəlib. Bu, yarızarafat kimi də qəbul oluna bilər, amma uzun onilliklər idi ki, supergüclər öz sabitliyini qoruyurdu, indisə dünyanın sakit bucağı qalmamış kimi görünür.

Rusiyada baş verənlər bizi ciddi şəkildə maraqlandırır. Çünki tutaq ki, uzaq Venesuelada liderlərin toqquşmasını biz “Real”-“Barselona” oyununa baxırmış kimi izləyiriksə, bölgənin güc mərkəzində baş verənlərdən bütün regionun təsirlənəcəyi şübhə doğurmur. 

Davam edir koronavirus...

Bəli, davam edir. Daha kəskin, daha ciddi. Dünyada xəstəliyə yoluxanların sayı ümumilikdə 97 milyon civarındadır, infeksiyadan ölənlərin sayı isə 2 milyonu ötüb.
Pandemiyanın iqtisadi zərərləri ilə yanaşı psixoloji travmaları da fəsadlar törədir. Məsələn, Yaponiyada on ildir azalmaqda olan intiharların sayı 2020-ci ildə COVID-19 səbəbindən yenidən artıb. 2020-ci ilin 8 ayı ərzində - noyabra qədər 300-dən çox məktəbli intihar nəticəsində ölüb ki, bu da 2019-cu ilin eyni dövrü ilə müqayisədə 30 %-dən çoxdur.

“Taclı bəla”dan başı ən çox bəla çəkən ölkələrdən biri İtaliya isə ABŞ-ın “Pfizer” şirkətinə qarşı məhkəmə iddiası qaldırmaq niyyətindədir. Səbəb koronavirus vaksinlərinin çatdırılmasında yaranan gecikmələrdir.

Bu arada bizi çipləşdirəcək (?!) “Microsoft” şirkətinin banisi Bill Qeyts koronavirusa qarşı peyvənd vurdurub.

Bir də xəbəriniz olsun, ÜST Britaniyada aşkarlanmış koronavirusun yeni variantının artıq dünyanın 60 ölkəsinə yayıldığını bəyan edib.

Təhsil qayıdır

Britaniya ştammına rəğmən ənənəvi təhsilə qayıdırıq. Etiraf etməliyik ki, onlayn təhsil klassik təhsil formasını əvəz edə bilmədi. Amma etiraf ediləsi bir fakt da var: onlayn təhsil müəllimlərə də, şagirdlərə də, hətta valideynlərə də yeni biliklər qazandırdı, texnologiyalara daha da yaxınlaşdıq.
Həftənin təhsillə bağlı daha bir mövzusu ali təhsilin pullu və ya pulsuz olması ilə bağlı idi. Birincisi, unutmamalıyıq ki, ali təhsil alan tələbələrin hər 100-nün 56-sı dövlət hesabına oxuyur. İkincisi, təhsilin tamamilə pulsuz olması təhsil sahəsində biznesin rəqabətini azalda bilər. Dünyanın aparıcı ölkələrində əksər sektorların dövlətsizləşdirilməsinə gedildiyi halda, müsbət axının əksinə üzməyimiz bizə nə qazandıra bilər?

Üçüncüsü, universitetlərdə bahalı laboratoriyalar, qurğular, peşəkar müəllimlər əmək bazarı üçün peşəkarların hazırlanmasını təmin edə bilər. Yaxşı infrastruktur, maddi-texniki baza və kadr potensialını isə az pulla təmin etmək mümkün deyil. Peşəkar kadrların təhsildə uzun müddət qalmadığı artıq uzun illərin problemidir. Odur ki, təhsilin pullu və hətta baha olması keyfiyyəti şərtləndirən amillər sırasındadır. Bu, həm də peşə təhsilinə marağı stimullaşdıra bilər, hamı universitet diplomu arxasınca qaçmaz, peşə qazanmaq üçün çalışar.

Sürmə 100, yaşa 100!

2020-ci ildə 2019-cu il il müqayisədə yol-qəza hadisələrinin sayı 109 fakt və ya 19,2 faiz azalıb. Yol qəzaları zamanı qeydə alınan ölümlərin sayı 17 nəfər (9,1 %), xəsarət alanların sayı isə 131 nəfər (25,3 %) azalıb.

Göründüyü kimi, avtomobil qəzalarında ölənlərin sayında azalma baş verib. Bu, bizim daha məsuliyyətli sürücü və piyada olmağımızdan irəli gəlirmi? Yəqin ki, yox. Sadəcə, ardıcıl karantin rejimləri ilə bağlı hərəkətin intensivliyinin azalması yol qəzalarının statistikasında da özünü göstərir.

Ermənilər köçür

Rəsmi məlumatlara əsasən, noyabrın 10-dan bu günə qədər 50 mindən çox erməni Xankəndi və digər Azərbaycan ərazilərinə köçürülüb. İrəvan sakinlərin Ermənistandan Qarabağa qayıtmasına maraq göstərir. Ancaq ermənilərin geri qayıtmaq istəmədiyi bildirilir, hətta yerli ermənilərin də Xankəndidə evlərini satışa çıxarması təsadüfi deyil. Ancaq yaxşı olardı ki, gedərkən məzarlarını da aparsınlar.

Aşağıdakı foto müəllifin doğuldu evin həyətindəndir: Laçının Güləbird kəndində, 2007-ci ildə dəfn edilmiş iki erməninin məzarıdır.

© Photo : Courtesy of Vusal Mammadov
Laçının Güləbird kəndində, 2007-ci ildə dəfn edilmiş iki erməninin məzarı
57
Sputnik V peyvənd, arxiv şəkli

İran vaksin ala bilmək üçün onu qeydiyyatdan keçirdi

0
(Yenilənib 20:03 26.01.2021)
"Biz ümid edirik ki, yaxın gələcəkdə onu ala biləcəyik, həmçinin Rusiya və İranın müvafiq institutları tərəfindən birgə istehsala başlayacağıq"

BAKI, 26 yanvar — Sputnik. Rusiya istehsalı olan "Sputnik V" İranda uğurla qeydiyyatdan keçib. Sputnik Azərbaycan xəbər verir ki, bunu İranın xarici işlər naziri Məhəmməd Cavad Zərif bildirib.

"Sizi məlumatlandırmaq istəyirik ki, "Sputnik V" vaksini dünən İranda qeydiyyatdan keçib. O, bizim sanitar rəhbərliyimiz tərəfindən təsdiqlənib və biz ümid edirik ki, yaxın gələcəkdə biz onu ala biləcəyik, həmçinin Rusiya və İranın müvafiq institutları tərəfindən birgə istehsala başlayacağıq", - deyə Zərif qeyd edib.

Xatırladaq ki, ötən il avqustun 11-də Rusiya Prezidenti Vladimir Putin ölkəsində koronavirusdan ilk peyvəndin qeydiyyatını elan edib. Prezident deyib ki, onun qızlarından biri peyvəndi öz üzərində sınaqdan keçirib.

Rusiyanın koronavirusa qarşı hazırladığı yeni peyvənd "Sputnik V" adını alıb. Bu ad 1957-ci ildə Yerin ilk süni peykinin buraxılması ilə bağlıdır.

""Sputnik-1" bütün dünyada kosmik tədqiqatları fəallaşdırıb. COVID-19-dan yeni Rusiya peyvəndi dünya ictimaiyyəti üçün necə deyərlər, "Sputnik anı" yaradıb", – deyə adın izahında bildirilir.

0
Teqlər:
qeydiyyat, Sputnik-V peyvəndi, vaksin, Rusiya, İran
Mövzu:
Yeni tip koronavirus pandemiyası