Nailə xala, qızı və iki nəvəsi ilə Bakıxanovda kirayədə yaşayır

"Qızım kiminləsə gəzsə, uşaqlarına da baxmağa imkanı olar"...

4534
(Yenilənib 15:05 07.03.2016)
Bir qadının dramı: "Məni unutma. Get, insanlara mənim var olduğumu de. Bəlkə bir iş, bir parça çörək verən ola bizə"

İradə CƏLİL, Sputnik Azərbaycan

BAKI, 7 mart — Sputnik. Hər gün uşaqları məktəbə aparanda zibil qablarında eşələn bir qadın diqqətimi çəkirdi. Bir-bir qabların içinə boylanıb əlindəki, çirkli torbasına nəsə yığırdı. Sonra da yorğun addımlarla ordan uzaqlaşırdı.

Bir gün mənə yaxınlaşdı. Pul istəyəcəyini düşünmüşdüm. O isə: "Qızım, mənə ətirindən vur da" deyə xahiş elədi. Qırmadım. Bir gün yenə qarşıma çıxdı: "Sən o qızsan, mənə ətir vuran" deyib qucaqladı.

Nailə xala, qızı və iki nəvəsi ilə Bakıxanovda kirayədə yaşayır. Qızının ailəsi dağıldığı üçün nəvələri və qızını götürüb Bakıya gələn qadın, küçələri gəzir, zibillikləri axtarır, tapdığı əşyları isə həftənin şənbə günləri Sabunçuda "cındır bazarı"nda satır. 

Evinin kirayəsini güclə ödəyən yaşlı qadın nəvələrinin ac qalmaması üçün hamıya ağız açdığını deyir: "Kim oldu, deyirəm, ay bala, bir qab yemək ver, bir para sabun ver. Təqaüdüm heç nəyə çatmır. 125 manat alıram, onun da üstünü düzəldib, evin kirayə haqqını ödəyirəm. Qızım xəstədir, işləyə bilmir. Onun da, uşaqlarının da ağırlığı mənim çiynimdədir".

  • Nailə xala, qızı və iki nəvəsi ilə Bakıxanovda kirayədə yaşayır
    Nailə xala, qızı və iki nəvəsi ilə Bakıxanovda kirayədə yaşayır
    © Photo : Irade Celil
  • Qadın hər gün küçələri gəzir, zibillikləri axtarır, tapdığı əşyları isə həftənin şənbə günləri bazarda satır
    Qadın hər gün küçələri gəzir, zibillikləri axtarır, tapdığı əşyları isə həftənin şənbə günləri bazarda satır
    © Photo : Irade Celil
  • Köhnə oyuncaqlar, paltarlar, ayaqqabılar, qab-qaşıq, nə desən, bu evdə tapa bilərsən
    Köhnə oyuncaqlar, paltarlar, ayaqqabılar, qab-qaşıq, nə desən, bu evdə tapa bilərsən
    © Photo : Irade Celil
  • Evinin kirayəsini güclə ödəyən yaşlı qadın nəvələrinin ac qalmaması üçün hamıya ağız açdığını deyir
    Evinin kirayəsini güclə ödəyən yaşlı qadın nəvələrinin ac qalmaması üçün hamıya ağız açdığını deyir
    © Photo : Irade Celil
  • Hər gün evdən bir yaxşı insana rəst gəlmək, bir yaxşı iş tapmaq ümidilə çıxır
    Hər gün evdən bir yaxşı insana rəst gəlmək, bir yaxşı iş tapmaq ümidilə çıxır
    © Photo : Irade Celil
1 / 5
© Photo : Irade Celil
Nailə xala, qızı və iki nəvəsi ilə Bakıxanovda kirayədə yaşayır

Hər gün evdən çıxanda Allaha pənah aparır: "Bəlkə bir yaxşı insan, bəlkə bir yaxşı iş çıxar deyə ümidlə çıxıram evdən. Axşamları isə zibillikdən yığdığım yeməklər və əşyalarla qayıdıram evə".

Nailə xalanın 6 övladı var. Amma deyir ki, hərəsi özünün ailəsini güclə dolandırır. Heç birinə ağız açmaq istəmir yaşlı qadın: "Qızım boşanıb gəlib, deyir, yenidən ailə qurmaq istəyir. Gəzmir heç kimlə, çünki qanımızda yoxdur. Biz təmiz ailəyik. Bəlkə gəzsəydi, uşaqlarını da yaxşı saxlaya bilərdi. Amma təmizdir".

Nailə xala deyir ki, qızı bir neçə dəfə işə düzəlsə də, 5-6 gün sonra işdən çıxıb oturur evdə: "Soruşuram, ay bala, niyə çıxıb gəldin? Deyir "ay ana, müdir mənə başqa cür baxır. Mən, kiminsə sevgilisi olmaq istəmirəm".

Nailə xalanın kirayə qaldığı ev də zibillikdən yığıb gətirdiyi əşyalarla doludur. Köhnə oyuncaqlar, paltarlar, ayaqqabılar, qab-qaşıq, nə desən, bu evdə tapa bilərsən. Zibilliklərdən yığdığı bütün əşyaları evə gətirir, yuyub təmizləyir, sonra sataraq pulu ilə iki nəvəsini böyüdür.

Yaşlı qadın qızını erkən evləndirdiyi üçün də peşmançılıq hiss yaşayır: "Qızımı ərə verəndə düşünürdüm ki, xoşbəxt olacaq. Amma kişinin Rusiyada da arvadı var imiş. Ona baxırdı, mənim qızıma baxmırdı. Qızım indi də deyir ki, gəlib uşaqlarına sahib çıxsa, mən onunla barışaram. Amma kişinin vecinə də deyil uşaqları… Keçənə güzəş edərlər" deyib. Bu barədə çox danışmaq istəmir".

"Bayramda səni kimsə təbrik edəcəkmi?"- sualına — "Kimim var ki?" Deyə cavab verir yaşlı qadın. Gözlərindəki kədər, əllərinin qabarı keşməkeşli həyatından xəbər verirdi Nailə xalanın. Yol çəkən gözləri deyir ki: "Ümidim yox bir adama, Tanrı çatacaq dadıma"…

Sağollaşıb ayrılıram, uşaq kimi qaçır dalımca "qızım, başına dönüm, qurban olum məni atma, məni unutma. Get, insanlara mənim var olduğumu de. Bəlkə bir iş, bir parça çörək verən ola bizə".

Mən uzaqlaşıram, o isə kədərli gözlərlə arxamca baxır. Yol boyu zibilliklərdən yığıb evinə gətirdiyi əşyaların qoxusunu hiss edirəm. Səfalətin qoxusunu…

4534
Teqlər:
səfalət, pul, kasıblıq, qadın
Əlaqədar
Hamilə qadınlar buna qarşı mütləq müayinədən keçəcəklər
Əlli yaşlı qadın intihar edib
Bakıda başına dəmir parçası düşən qadın öldü
Gəncə şəhərində qadın yanıq xəsarətləri ilə xəstəxanaya yerləşdirilib
Bakıda tozlu hava

Diqqət: Başınızı qaldırıb Bakı səmasına baxın!

9103
(Yenilənib 15:23 12.05.2019)
Onlar hər yerdə, hər tərəfdədirlər və onlardan qurtuluş yoxdur

BAKI, 13 may — Sputnik. Ən ləzzətlisi bilirsiniz nədir? Gözəl yaz havasını ciyərlərinə çəkib məsti-xumar olmaq üçün avtomobilin pəncərəsini açmısan. Yenicə bir-iki nəfəs çəkib ciyərlərini yaz mehi ilə nəşələndirmisən ki, küləyin qova-qova gətirdiyi bir topa toz çağırılmamış qonaq kimi özünü pəncərədən içəri soxur. Orda da boş durmaz ki... Haralaradək soxulacağını, harada "park edəcəyini" təsəvvür edirsiniz.

Ya da balkon seyrindəsən. Qarşında pürrəngi çay, beynində hər şeyin yaxşı olduğuna, yaxşı olacağına dair romantik fikirlər. Xəyal dünyasındasan. Lakin sən bu təmənnada ikən, zəhərə dönür hər şey – balkondakılar da, beynindəkilər də. Aqlayından ayrılmağın acısını çıxarmağa yer axtaran toz dənəcikləri, Çingiz xanın monqolları kimi bir göz qırpımında çökürlər üzərinə.

Onlar hər yerdə, hər tərəfdədirlər: Parkda körpəsini gəzdirən qadınlar da, küçədə iş-güc arxasınca şütüyən kişilər də, açıq və qapalı məkanlarda alver edən tacirlər də, otağın pəncərəsini azacıq aralı qoyub xəstəsini müayinə edən həkimlər də, müayinə olunan xəstələr də, qaçanlar da, duranlar da... şəhərimizə təşrif buyurmuş turistlər də onların qurbanlarıdır. Onlardan qurtuluş yoxdur!

Bakını bürümüş toz duman
©Karikatura
Bakını bürümüş toz duman

... Ay gözəl insanlar! Bir şəhəri nə qədər rəndələmək olar? Bir şəhərdəki binaları, keçidləri, körpüləri, tunelləri, divarları nə qədər laqundalamaq, qazımaq, sürtmək, ağartmaq və qaraltmaq olar? Eyni prosesləri eyni yerlərdə eyni qaydada dönə-dönə təkrarlamaq hansı arzunun məhsuludur? Axı nə vaxtadək?

Bakı küləklər şəhəridir. Burada yanvarın şaxtasında da külək vıyıldayır, avqustun cırcırında da. Burada gah Xəzri at oynadır, gah Gilavar. Bu, yerləşdiyi coğrafi məkandan dolayı şəhərimizin alnına yazılan taledir. Və kimsə təbii qanunauyğunluğu dəyişdirə bilməz.

Bəs, bunları bilə-bilə yeri-göyü qazıyıb, qalaq-qalaq toz yaratmaq (həm də kimyəvi – zərərli toz), həmin zəhər topalarının şəhərin dörd bir yanına yayıldığını görə-görə, əməlindən bircə addım geri durmamaq hansı xoş niyyətdən xəbər verə bilər, siz Allah?

Bir dönün ətrafınıza baxın. Bu şəhərin ağacları belə, bombozdur, budaqlarından qaramat sallanır. Yerə baxın, dizdən aşağı şalvarınız küçədə qalaqlanmış toz-torpağın içindədir. Başınızı qaldırın, şəhərimizin səmasını seyr edin, görün nələr görəcəksiniz. Görün, mavi səmanın üzü necə bozarıb, qanı necə qaralıb. Görəcəksiniz ki, göyün üzündən üstümüzə zəhrimar tökülür.

Və sonra düşünün. Əgər bizə, özünüzə, şəhərimizə qarşı azacıq rəhminiz yaranarsa, əl saxlayın, üstünüzdəki toz-torpağı çırpın, yuyunun, qəşəng bir pürrəngi çay içə-içə, hər şeyin yaxşı olduğu, yaxşı olacağı barədə xəyallara dalın. Yox əgər rəhm-filan duyğusu gəlib çıxmazsa, o zaman ətrafa, yerə, göyə baxmaqla itirdiyiniz vaxta heyfslənin, o itkini kompensasiya etmək üçün daha əzmlə işinizə davam edin.

"Kolay gəlsin"...?

9103
Teqlər:
səma, yer, balkon, bina, küçə, toz
Əlaqədar
Ölkə ərazisini yenə toz-duman bürüyüb
Paytaxt və yarımadanın havası qatılaşır, toz normanı 4.5 dəfə üstələyir
Bakıda normadan 1.3 dəfə artıq toz var
Toz barədə daha bir xoşagəlməz məlumat gəldi
Paytaxt üçün növbəti toz xəbərdarlığı verildi
Akademik Milli Dram Teatrının ətrafında aparılan abadlıq və yenidənqurma işləri

İyun ayının 2-si çox maraqlı olacaq, çox!

4843
(Yenilənib 17:16 07.05.2019)
Hamı qatılmalı, hamı dəstək olmalı ki, bu cür tədbirlər çox olsun

BAKI, 10 may — Sputnik. 30 ilə yaxındır ki, Azərbaycan teatrı tamaşaçı problemi yaşayır. Əlbəttə, bu məsələdə teatr adamlarının da çoxlu günahları var. Bu barədə əvvəlki yazılarımda xeyli qeyd etmişəm deyə, indi təkrarçılıq etmək istəmirəm.

Amma həmişə bir sual məni narahat edir: Teatr adamları öz səhvlərini düzəltsələr, teatra azadlıq verilsə və müstəqil yaradıcılıq eşqi ilə mükəmməl sənət nümunələri ərsəyə gəlsə, o zaman xalq teatra gedərmi?

Məsələ təkcə teatr deyil. Kinoteatrlarda da eyni problem var. Deyəcəksiz ki, kinoteatrlar son zaman kifayət qədər tamaşaçı kütləsi cəlb edib. Biletləri satılır, yerləri dolu olur, seansların sayı artır və s.

Lakin diqqət edilməsi gərəkən nüans budur ki, bu izdahamlar hansı filmlərin nümayişində olur? Yerli və Türkiyənin bayağı komediyalarının, bir də əhəmiyyətsiz kədərə, göz yaşına hesablanmış ailə-məişət və eşq dramlarının nümayişlərindən başqa nədə görmüsüz bu izdihamı? Hansı psixoloji-fəlsəfi filmin nümayişi zamanı zal dolub-daşıb?

Hansısa ciddi sənətkarımızın konserti ildə bir dəfə və bir gün keçirildiyi halda, musiqi və sənət adı ilə ortalığa atılanların ildə beş-altı dəfə, on gün ard-arda konserti olur. Bu kütləvi bayağılaşmanın ciddi faciəvi nəticələri bizi gözləyir.

Elmi tədbirlərə, seminarlara, konfranslara isə Azərbaycanda çox nadir hallarda rast gəlirik. Hərçənd, bu cür tədbirlər çox olmalı, hamısının auditoriyası dolub-daşmalıdır. Populyar və ya yaradıcı elmlə məşğul olan adamlara bu ölkədə heç bir şərait yaradılmır ki, öz biliklərini başqaları ilə paylaşa bilsinlər. Onların sosial şəbəkələrdən və video portallardan başqa heç bir səhnəsi yoxdur.

İlham Əliyev, Azərbaycan Respublikasının Prezidenti
© Official website of President of Azerbaijan Republic

Ölkədəki teatrların, sarayların, konsert zallarının icarə qiyməti fantastik həddədir. Eybi yox, bu mədəni obyektlərin qiyməti hər yerindən durub sənət adı ilə səhnəyə çıxmaq istəyənlər üçün fantastik həddə olsun. Amma ciddi sənətkarlar üçün və elm adamları üçün hətta ödənişsiz olmalıdır. Dövlətin sənət və elm xadimlərinə dəstəyi belə məqamlarda görünməlidir.

Mədəniyyət Nazirliyinin məsul şəxsləri öz çıxışlarında elmə və sənətə, gənclərə dəstəkdən danışırlar. Bir gənc hansısa seminar üçün onlardan məkan istəsə, şəxsi mülklərini satışa çıxarırmış kimi qiymət oxuyurlar.

İndi bu cür çətinliklərin içində, cəmiyyət biganəliyi ilə məsul şəxslərin fürsətdən istifadəsi arasında, öz gücünə, öz hesabına kimlərsə nəsə etməyə çalışır. Hansı ki, bunu edən gənclər gələcək aydın nəsillərin indiki əcdadıdır. O gənclər ki, bu qədər məşəqqətlərə rəğmən, tədbir hazırlayırlar, seminarlar, konfranslar keçirirlər. Maarifçiliklə məşğul olurlar. Azdırlar, amma varlar! Elm və mədəniyyət adına çalışırlar!

İyun ayının 2-si, saat 11:30-da Azərbaycan Dövlət Akademik Milli Dram Teatrında "Kainat, Kvant və Beyin" adlı elmi-kütləvi konfrans baş tutacaq. "Elm Azərbaycan" və "Kvant Dünyası" elmi platformalarının təşəbbüsü, Akademik Milli Dram Teatrı, "ORKHANWAY Coaching" və "Astronomy Club"un dəstəyi ilə 550 nəfərlik elmi konfransdır bu. Konfrans zamanı hər kəsi maraqlandıracaq üç əhəmiyyətli mövzu: "Kainat", "Kvant Fizikası" və "Beyin" barədə çıxışlar olacaq.

Konfransda astronom, elmi tədqiqatçı Orxan Əhməd, fizik, elektrik mühəndisi Sadiq Şamilov, araşdırmaçı, neyromarketinq mütəxəssisi, TEDX spikeri Orxan Şahbaz çıxış edəcəklər. Müasir dünyada yaşayan, elmin, texnologiyanın, kainatın, kvant fizikasının və ən əsası beynin məhsullarından faydalanan hər bir fərdin qatılmasının mühüm olduğu tədbirdir.

Elmə, elmi tərəqqiyə dəstək üçün, müasir zamanda müasir məkan kimi uğurlu inkişafa zəmin yaratmaq üçün, hər kəsin ziyalanması üçün atılmış bir addımdır bu konfrans. Hamı qatılmalı, hamı dəstək olmalı ki, bu cür tədbirlər çox olsun! Çox olsun ki, hamı aydınlansın! Hamı aydınlansın ki, azad cəmiyyətdə azad fərdlər kimi yaşayaq!

4843
Teqlər:
sənət, tamaşaçı, serial, film, tamaşa, teatr
Əlaqədar
Mütəxəssis: “Teatrın keyfiyyətindən xalqın taleyi asılıdır”
Teatr və konsert müəssisələri işçilərinin maaşları artırıldı
"ƏSA Teatrı" fəaliyyətini dayandırmaq məcburiyyətindədir
Teatrlar gözləyir ki, dramaturq yetişsin - yazıçı repertuar problemindən danışır

Kafe restoranlarda karantin tələblərinin tətbiqi üzrə əlaqələndirici şəxs olacaq

0
(Yenilənib 23:47 23.11.2020)
İctimai iaşə müəssisələrində COVİD-19-la əlaqədar karantin tələblərinin tətbiqi üzrə əlaqələndirici şəxs olacaq.

BAKI, 24 noyabr - Sputnik. “Koronavirus (COVID-19) pandemiyası dövründə ictimai iaşə müəssisələrinə müştəri qəbulu ilə bağlı bəzi məsələlərin tənzimlənməsi barədə” Azərbaycan Respublikası Nazirlər Kabinetinin 2020-ci il 6 iyul tarixli 237 nömrəli Qərarına edilən dəyişikliyə əsasən hər bir ictimai iaşə müəssisəsi tərəfindən karantin tələblərinin tətbiqi üzrə əlaqələndirici şəxs müəyyənləşməlidir.

Sputnik Azərbaycan-ın məlumatına görə, bu barədə Nazirlər Kabinetinin qərarına dəyişiklik edilib. 

Dəyişikliyə əsasən, karantin tələbləri üzrə əlaqələndirici (məsul) şəxs funksiyaları ictimai iaşə müəssisəsinin işçilərindən birinə həvalə edilir. Bu təyinat müəssisədaxili rəsmiləşdirilməlidir.

Həmin məsul şəxs epidemiya əleyhinə mövcüd tələblərin müəssisədə tətbiqinin təşkili, bu tələblərin yerinə yetirilməsinə yerində nəzarəti həyata keçirməklə bərabər nəzarətedici dövlət qurumları ilə qarşılıqlı fəaliyyətdə əlaqələndirici olacaq, müəssisənin işçilərini təlimatlandıracaq, dezinfeksiya tədbirlərini təşkil edəcək, bu tədbirlərin müəssisədaxili qeydiyyat formaları və cədvəllərini tərtib edəcək, icrasına müəssisə daxilində nəzarət edəcək.

Məsul şəxs koronavirusla (COVID-19-la) mübarizə ilə bağlı xəbərdaredici məlumatların qonaqlara, işçi heyətə və digər əlaqəli tərəflərə çatdırılmasını təmin etməlidir. Eyni zamanda məsul şəxs bütün təmizlik və dezinfeksiya tədbirlərinin davamlı olaraq qeydiyyatının aparılması üçün gündəlik müntəzəm nəzarət formalarını, habelə keyfiyyətə nəzarət cədvəllərini tərtib etməli və onların icrasına nəzarəti həyata keçirməlidir.

0