Bakıa turistlər, arxiv şəkli

Xaricdən Azərbaycana gələn əcnəbilər nələri bilməlidirlər?

3224
(Yenilənib 12:03 12.02.2021)
"Nazirlər Kabineti yanında Operativ Qərargahdan bildirdilər ki, quru yolla Azərbaycana gəlmək istəyən xarici ölkə vətəndaşları NK-ya onlayn qaydada məktub yazmalı, Azərbaycana gəlmə səbəbini qeyd etməlidir"

Zülfiyyə Quluyeva, Sputnik Azərbaycan

BAKI, 12 fevral — Sputnik. Hazırda Azərbaycanda koronavirus (COVID-19) pandemiyasına görə sərtləşdirilmiş karantin rejimi tətbiq edilsə də, dünyanın əksər ölkələrində olduğu kimi, Azərbaycanda da sərt karantin rejiminin tələbləri tədricən yumşaldılır. Fevralın 17-dən etibarən Azərbaycanın milli aviadaşıyıcısı AZAL Bakı-Moskva-Bakı marşrutu üzrə xüsusi reyslər həyata keçirməyə başlayacaq. Bir çox dövlətlər kimi, Azərbaycan da tədricən öz sərhədlərini xarici ölkə vətəndaşlarının üzünə açmaqdadır.

Bəs görəsən hava və quru yolu ilə Azərbaycana gəlmək istəyən əcnəbi vətəndaşlar pandemiya dövründə nələri bilməlidir?

Sputnik Azərbaycan xarici ölkə vətəndaşları üçün Azərbaycana gələrkən bilmələri zəruri olan məlumatları təqdim edir:

Öncə qeyd edək ki, Nazirlər Kabinetinin qərarına görə, koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının ərazisində xüsusi karantin rejiminin müddəti 2021-ci il 1 aprel saat 06:00-dək uzadılıb.

Bu tarixədək Azərbaycan-a hava yolu ilə gəlmək istəyən xarici vətəndaşlar öncə ölkəmizə hansı əcnəbi vətəndaşların buraxıldığını bilməlidirlər. AZAL-dan Sputnik Azərbaycan-a verilən məlumata görə, xarici ölkələrdən Bakıya yerinə yetirilən xüsusi reyslərə Azərbaycan vətəndaşları ilə yanaşı, aşağıdakı şəxslər buraxılır:⠀

- Azərbaycan Respublikasında akkreditə olan xarici diplomatik nümayəndəlik və konsulluqların rəhbərləri, əməkdaşları və onların ailə üzvləri;

- Valideynlərdən biri, həyat yoldaşı və ya azyaşlı övladı Azərbaycan Respublikası vətəndaşı olan əcnəbilər;

- Azərbaycan Respublikasında işləmək icazəsi olan əcnəbilər;

- Azərbaycan Respublikasında müvəqqəti və ya daimi yaşamaq icazəsi olan əcnəbilər;

- Azərbaycan Respublikasının ali təhsil müəssisələrində təhsil alan əcnəbi tələbələr.

AZAL-dan bildirdilər ki, digər ölkələrdən Azərbaycana uçuş zamanı koronavirus testinin mənfi nəticəsini təsdiq edən arayış təqdim etmək lazımdır (yalnız "PCR"-testlər qəbul olunur). Koronavirus testinin keçirilməsini təstiq edən arayış reysin uçuşundan ən gec 48 saat əvvəl alınmalıdır. İcbari testdən keçməyən və uçuş hava limanında arayış təqdim etməyən sərnişinlər reysə buraxılmır. COVID-19 əlamətləri olan sərnişinlər də aerovağzal kompleksinin binasına buraxılmayacaq. Həmçinin analizinin cavabı müsbət nəticələnən sərnişinlər reysə qəbul edilməyəcək. Bu arayışın Azərbaycan dilinə tərcümə edilməsinə isə ehtiyac yoxdur: "Əgər digər ölkədən Azərbaycana gələn şəxsin koronavirus testinin nəticəsi neqativdirsə, həmin şəxs iltizamnaməyə qol çəkir və evinə göndərilir. Bundan sonra evində 14 gün müddətində izolyasiya olunur. Əgər vətəndaş bu arayışı təqdim edə bilmirsə, həmin əcnəbi hava limanından geri də göndərilə bilər, yaxud da Atletlər Kəndinə yerləşdirilə bilər. Bu zaman həmin şəxs Atletlər Kəndində 7 gün müddətində karantində qaldıqdan sonra temperaturu yoxdursa, test nəticəsi neqativdirsə, evinə göndərilir. Daha 7 günlük izolyasiya müddətinə öz evində əməl edir".

Quru yolla Azərbaycana digər ölkələrdən gələn vətəndaşlarla bağlı isə qaydalar bir qədər fərqlidir. Nazirlər Kabineti yanında Operativ Qərərgahdan bildirdilər ki, quru yolla Azərbaycana gəlmək istəyən xarici ölkə vətəndaşları Nazirlər Kabinetinə onlayn qaydada məktub yazmalı, Azərbaycana gəlmə səbəbini qeyd etməlidir. Bundan sonra həmin şəxsin müraciətinə baxılaraq cavab verilir: "Quru yolla Azərbaycana gələn əcnəbi vətəndaş öz ölkəsində koronavirus testindən (yalnız "PCR"-testlər qəbul olunur) keçməlidir. Həmin şəxslər mütləq gəldiyi ölkənin Səhiyyə Nazirliyinin təsdiq etdiyi laboratoriyaların birində test verilməlidir. Sərhəd keçid məntəqəsində isə həmin arayış təqdim edilməlidir: "Quru sərhəddə əcnəbi arayış təqdim etdikdə, test nəticəsi neqativ olduqda həmin şəxs evə də göndərilə bilər, karantin zonasına da aparıla bilər. Bu barədə qərar artıq sərhəddə verilir. Orada ölkəyə gələn şəxs 7 gün karantin zonasında saxlanılır. Karantin zonasında 7 gündən sonra təkrar analiz verdikdən cavab neqativ çıxdıqda evə buraxılır".

Operativ Qərərgahdan isə bildirdilər ki, digər ölkələrdən Azərbaycana gələn şəxslərdən peyvəndlə bağlı hər hansı sənəd tələb olunmur: "Qərarda peyvənd sənədinin tələb olunması barədə hər hansı bənd yoxdur!"

Tibbi Ərazi Bölmələrini İdarəetmə Birliyindən Sputnik Azərbaycan-a bildirdilər ki, Azərbaycana gələn əcnəbilər ölkəmizdə qalma müddətində simptomlar olduqda yaşadığı ərazi üzrə poliklinikaya müraciət etməli, koronavirusa görə analizdən keçməli, nəticəsi bəlli olduqdan sonra ehtiyac olarsa, təcili və təxirəsalınmaz tibbi yardım xidmətinin vasitəsilə xəstəxanaya yerləşdirilə bilər.

O ki qaldı sərhəd və gömrük yoxlamasından keçib Azərbaycana gələn digər ölkə vətəndaşlarının hotelə yerləşməsinə, Dövlət Turizm Agentliyindən bildirdilər ki, xarici ölkə vətəndaşlarından hotelə yerləşərkən hər hansı əlavə sənəd tələb olunmur. Bir neçə ay öncə əcnəbi qonaqlardan hoteldə qaldıqları müddətdə test vermələri tələb olunsa da, artıq bu qayda ləğv olunub: "Azərbaycana gəlməyə icazəsi olan şəxslər hotellərdə yerləşərkən şəxsiyyətlərini təsdiq edən sənəd təqdim etməlidirlər. Bundan başqa, onlardan hər hansı sənəd tələb olunmur".

NK yanında Operativ Qərargahdan bildirdilər ki, Azərbaycanda karantin dövrü ilə bağlı qəbul edilmiş qaydalar pandemiya dövründə virusa yoluxma ilə bağlı vəziyyətdən asılı olaraq dəyişdirilə, sərtləşdirilə və yumşaldıla bilər. Sputnik Azərbaycan-ın təqdim etdiyi məlumatlar isə hazırda qüvvədə olan qaydalardır.

3224

İntihar çıxış yolu deyil, amma təəssüflər olsun ki, belə qızlar...

14
(Yenilənib 13:55 24.02.2021)
"Qanunvericiliklə erkən nikah qadağandır və bu adla hansısa akt icra olunursa, tərəflər məsuliyyət daşıyırlar" - Fazil Mustafa.

Nigar İsgəndərova, Sputnik Azərbaycamn

BAKI, 24 fevral — Sputnik. Bu gün əksər Azərbaycan ailələrində qız uşaqlarının hüquqlarının tanınmaması, onlara qarşı məsuliyyətsiz yanaşma bir çox hallarda faciə ilə nəticələnir. Bu faciənin törənməsinin arxasında isə çox vaxt ailə böyükləri – “ağbirçəklər", "ağsaqqallar" və məsuliyyətsiz, savadsız valideynlər dayanır.

"Qız yükü, duz yükü" deyib, qızlarını erkən yaşda, yaxud da ağına-bozuna baxmadan ata ocağından didərgin salıb ərə verməklə onları necə çıxılmaz dərənin dibinə yuvarladıqlarının fərqində olmurlar.

Qanunvericilik erkən nikaha icazə vermir, bu kimi halların aşkarlanması məsuliyyət yaradır. Amma çox zaman valideylər hüquqi məsuliyyətdən yayınmaq üçün belə mərasimləri nişanlama, adqoyma adlandırırlar. 13-15 yaşda bir qız gələcəyi ilə bağlı nə seçim edə, nə kimi düzgün qərar verə bilər ki?! Bu yaşda qız ailənin, ana olmanın məsuliyyətinin nədən ibarət olduğunu necə anlaya bilər ki? Bunları dərk etməyən, seçim imkanı olmayan, beyinləri erkən yaşlardan dərsə getmək əvəzinə ərə getmək təbliğatı ilə doldurulan bu qızcığazların əvəzinə valideynlər tərəfindən verilən qərarlar isə onların həyatını məhv etməkdən başqa bir şey deyil.

Erkən nikahla yanaşı, erkən yaşlarda nişanlama və adqoymaya görə də məsuliyyət olmalıdırmı? Qanunvericilikdə belə bir bəndin yer alması necə, erkən nikah probleminin, valideynlərin məsuliyyətdən qaçmalarının qarşısını ala biləcəkmi?

"Azərbaycan Uşaqlar Birliyi"nin sədri Kəmalə Ağazadə Sputnik Azərbaycan-a açıqlamasında erkən nikahı dünənin və bu günün böyük bəlası adlandırıb. Onun sözlərinə görə, bəzən erkən nikahlara dərhal reaksiya verilsə də, bəzən valideynlər bu mərasimləri nişan, adqoyma adlandıraraq cəzasız qalırlar.

“Biz qızları erkən nikaha sövq etməklə nə qədər qızcığazın çiyninə böyük yük, içinə bir qadın, ana qoyuruq, artıq onun bətnini formalaşdırırıq”, - Ağazadə deyib.

Onun fikrincə, “nişan”, “adqoyma” tipli erkən evliliyi hədəf alaraq həyata keçirilən adətlərlə bağlı qanunvericiliyə müəyyən bəndlər əlavə edilməlidir. Orada belə halların hüquqi məsuliyyət yaratdığı konkret qeyd edilməlidir. Yaxud da elə inzibati cəzalar (məsələn, azı 3-4 min manatlıq cərimə) tətbiq edilməlidir ki, valideyn bunun maddi yükünü çiyinlərində hiss eləsin. 

Milli Məclisin Ailə, Qadın və Uşaq Məsələləri Komitəsinin eksperti Aynur Veysəlova Sputnik Azərbaycan-a açıqlamasında bu istiqamətdə görülən işlərdən və sözügedən problemin yaranma səbəblərindən söz açıb. Onun fikruncə, bu problemə iki müstəvidən baxmaq lazımdır: hüquqi müstəvi və adət-ənənələr adlandırdığımız müstəvi.

“Hüquqi müstəvidə Azərbaycan hər zaman erkən nikahlara qarşı mübarizə aparan bir ölkə olub. 2011-ci ildə Azərbaycanda qadın və kişilər üçün ən aşağı nikah yaşı 18 müəyyənləşib. Erkən nikahla bağlı qanunvericilikdə məsuliyyət nəzərdə tutulub və zamanla bu istiqamətdə təkmilləşmə gedir. Lakin məsələyə "adət-ənənələr" müstəvisindən baxdıqda, valideynlərin təhsil vermədən qızlarını erkən yaşlarda nikaha sövq etməklə onları uçuruma yuvarladıqlarını görə bilərik. Valideynlər qız övladlarına yük kimi baxmamalıdırlar. Əslində qız övladları yük deyil, bir zinətdir", - Veysəlova deyib.

Ekspertin sözlərinə görə, valideynlər çalışır ki, qız övladları daha tez ailə həyatı qursunlar. Lakin bir şeyi düşünmürlər ki, təhsili, peşəsi, sənəti yoxdursa, bu qız uşağı bir şəxsiyyət olaraq inkişaf etməyibsə, həm fizioloji, həm də psixoloji olaraq ailə qurmağa hazır deyilsə, onlar övladlarını uçuruma yuvarlayırlar. Sonradan isə bu valideynlər, günahkar axtarırlar:

“Baxın, savadsız, peşəsi olmayan qadın öz gələcəyi ilə bağlı vacib qərarlar qəbul edə, dünyaya gətirdiyi övladına lazımi təhsili verə bilmir. Bir çox hallarda bu qadınların ailə həyatları da uğurlu olmur. Mütəxəssislər də bildirir ki, əksər hallarda erkən nikahlar uğursuz sonluqlarla nəticələnir və bu kimi ailələrdə çoxsaylı problemlər müşahidə edilir. Erkən ailə həyatı quran və şəxsiyyət kimi formalaşa bilməyən bu şəxslər dönüb geriyə baxdıqda, öz özünə sual verəcək ki, “həyatımda nail olduğum bu idimi, mən bunları istəmişdimmi”. Özünü sorğu-sual edərkən onun da içində digərləri kimi oxumaq, təhsil almaq arzusunun baş qaldırdığını görəcək".

Veysəlova bildirib ki, bu qadınlar əzildiklərindən, hüquqlarını bilmədiklərindən haqlarını tələb edə bilmir və bəzən intihara əl atırlar:

"Belə qadınlar arasında məişət zorakılığına məruz qalma, boşanma halları daha çox qeydə alınır. İntihar çıxış yolu deyil, amma təəssüflər olsun ki, belə qızlar ya ailə quranadək, ya da ki ailə qurduqdan sonra dözməyərək intihar edir. Çünki onların gözlədiyi həyat bu olmamışdı".

Veysəlovanın fikrincə, ailədə təmas, ünsiyyət elə olmalıdır ki, heç kəs heç kəsin əmlakı, şəxsi mülkiyyəti olmasın, kiminləsə bu cür rəftar edilməsin: "Övlada, qız uşaqlarına şəxsiyyət kimi yanaşmaq lazımdır. Valideyn elə şərait yaratmalıdır ki, övladı kənarda yox, ailəsində, valideynin timsalında dostunu tapsın. Səmimiyyət və dostluq münasibətləri bütün problemlərin həlli üçün ən mühüm vasitədir. Çünki məsafələr uzaqlaşdıqca, ailədaxili münasibətlərdə də problemlər yaranacaq".

Ekspert hesab edir ki, bu cür münasibətlərdən doğulan uşaqlar da bir sıra qüsurlarla dünyaya gəlirlər.

Erkən nikahların qarşısının alınması yolunun maariflənmədən başladığını bildirən mütəxəssis, valideynləri övladlarına şəxsiyyət kimi yanaşmağa, onun məsuliyyətini daşımağa, təhsillə təmin etməyə çağırıb:

“Qızlar daha tez ailə həyatı qurmalıdır” kimi stereotiplərdən kənara çıxmaq lazımdır.  Bu stereotiplərlə mübarizə çoxlu vaxt tələb edir. Biz qız övladlarına ailə və cəmiyyətdə dəyərin verilməsi məsələsini gündəmə gətirməli, bunu aktuallaşdırmalıyıq. Ailələrdə qızlara qarşı bu və digər formada müəyyən zorakılıq faktorlarının olması bəzi hallarda daha bədbəxt sonluqlarla yekunlaşır. Maarifləndirmə işləri aparılmalı və ictimai qınaq olmalıdır. Məsələn, 14-16 yaşlı qızın nişan mərasimindən xəbər tutan müəllim belə bu hadisənin qarşısını almalıdır. İnsanları elə istiqamətləndirməliyik ki, onlar özləri də boş fikirlərdən daşınsınlar. Körpə qızcığaz həyatdan nə görüb, nə anlayıb ki, ona adqoyma edir, nişanlayırlar?! Sadə həqiqətləri insanlara başa düşəcəyi dildə çatdırmaq lazımdır. İnanın bundan sonra onlar nəinki övladlarına, heç qohum-əqrəbadakı digər doğmalarına qarşı da belə bir addımın atılmasını qəbul etməyəcəklər".

Millət vəkili Fazil Mustafa isə hesab edir ki, burada söhbət həmin mərasimin adının nə qoyulmasından getmir: "Bunun erkən nikah olduğu sübuta yetirilirsə, valideynlər məsuliyyətə cəlb olunurlar. Niyyət erkən nikaha sövqetmədirsə, valideyn məsuliyyət daşımalıdır. Bunu sübut etmək isə heç də çətin deyil. Adını ad günü qoyub müxtəlif fırıldaqlarla hər şey etmək mümkündür. Amma qanunvericiliklə erkən nikah qadağandır və bu adla hansısa akt icra olunursa, tərəflər məsuliyyət daşıyırlar".

14

Ölkədəki faktiki hava - hər yerə qar yağır

8
(Yenilənib 19:34 24.02.2021)
Şimal-qərb küləyinin sürəti Bakıda 10-14 m/s, Abşeronda 18-23 m/s- dək mülayimləşib. Neft Daşları stansiyasının məlumatına əsasən dalğanın hündürlüyü 5.4 metrdir.

BAKI, 24 fevral - Sputnik. Milli Hidrometeorologiya Xidməti faktiki havanı açıqlayıb.

Xidmətdən bildirilib ki, fevralın 24-ü saat 18:00-a olan məlumatına əsasən, qarın intensivliyi səngiyib, lakin Ağstafa, Balakən, Oğuz, Qəbələ, Şamaxı, Qusar, Altıağac, Gəncə, Tovuz, Ağdam, Tərtər, Ceyrançöl, Neftçala, Astara, Bərdə, Beyləqan, Sarıbaş(Qax) , Kişçay(Şəki), Zərdab, Kürdəmir, İsmayıllı, Naftalan,  Zaqatala,  Quba, Mərəzə, Cəfərxan, Salyan, İmişli, Biləsuvar, Yardımlı, Lerik, Nabran, Ağsu, Mingəçevir, Xaçmaz, Şəmkirə qar yağmağa davam edir.

Şimal-qərb küləyinin sürəti Bakıda 10-14 m/s, Abşeronda 18-23 m/s- dək mülayimləşib. Neft Daşları stansiyasının məlumatına əsasən dalğanın hündürlüyü 5.4 metrdir.

8
Rusiyada təcili yardım maşını, arxiv şəkli

Rusiyada koronavirusa yoluxanların sayı durmadan artır

0
(Yenilənib 20:50 24.02.2021)
Rusiyada bu xəstəliyə yoluxanların sayı 4200902-yə çatıb. Pandemiya yayılandan bu ölkədə 84430 nəfər COVID-19-dan vəfat edib.

BAKI, 24 fevral — Sputnik. Son bir sutka ərzində Rusiyada 11749 koronavirusa yeni yoluxma halı aşkarlanıb. Sputnik Azərbaycan Rusiya Operativ Qərargahına istinadən xəbər verir ki, bir gün ərzində qonşu ölkədə 383 nəfər ölüb.

Ümumilikdə, Rusiyada bu xəstəliyə yoluxanların sayı 4200902-yə çatıb. Rusiyada pandemiya yayılandan 84430 nəfər COVID-19-dan vəfat edib. Ölkədə bu virusdan sağalanların sayı 3751562-yə çatıb.

Xatırladaq ki, koronavirus infeksiyası 2019-cu ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 111,7 milyonu keçib, 2,47 milyondan çox insan isə virus səbəbi ilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

0