Məktəbli, arxiv şəkli

Kamal Abdulla: Azərbaycanda təkcə rusdilli yox, İndoneziyadilli məktəblər olmalıdır

3406
(Yenilənib 22:04 15.09.2020)
Asim Mollazadə: "Bu gün Azərbaycanda rus icması yaşayır. Onlara öz dillərində təhsil almaq imkanı yaradılmalıdır"

Zülfiyyə Quluyeva, Sputnik Azərbaycan

BAKI, 15 sentyabr — Sputnik. Yeni tədris ili ərəfəsi Azərbaycanda rusdilli məktəblərin fəaliyyəti ilə bağlı məsələ yenidən gündəmə gəlib. Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev bildirib ki, Azərbaycanda olan rusdilli məktəblərin şagirdləri təhsillərini başa vurduqdan sonra rəsmi Azərbaycan dilini mükəmməl səviyyədə bilmir, həmçinin onların rus dilində biliklərinin səviyyəsi bir çox hallarda qənaətbəxş olmur. O, deyib ki, rusdilli məktəblər nə təhsil, nə də siyasi məqsədlərə cavab vermir. F. Şəfiyev onu da əlavə edib ki, rusdilli məktəb məsələsi siyasi gündəmdən çıxmalı və sırf Azərbaycanın elmi-tədris müstəvisində inkişaf etdirilməlidir.

Qeyd edək ki, hazırda cəmiyyətdə rusdilli məktəblərə münasibət birmənalı deyil. Bu gün ölkəmizdəki rusdilli məktəblərdə boş yerlərin qalmaması sübut edir ki, Azərbaycanda övladının rus dilində təhsil almasını istəyən valideynlərin sayı kifayət qədərdir. Cəmiyyətimizdə belə bir fikir var ki, rus dilində təhsil uşağın gələcək həyatında, karyerasında, dünya görüşündə əhəmiyyətli rol oynayır. Odur ki, bu gün təkcə ölkəmizdə yaşayan rus icması deyil, azərbaycanlılar da övladlarının rus dilində təhsil alması üçün "dəridən qabıqdan çıxırlar".

Bununla belə, sosial şəbəkələrdə rusdilli məktəblərin bağlanmasını, hətta dövlət hesabına maliyyələşdirilməsinə qadağa qoyulmasını tələb edənlər var. Sputnik Azərbaycan ölkəmizdə rusdilli məktəblərin fəaliyyətinin əhəmiyyətini araşdırıb.

Azərbaycan Dillər Universitetinin rektoru, Xalq yazıçısı Kamal Abdulla Sputnik Azərbaycan-a açıqlamasında bildirib ki, Azərbaycanda təkcə rus dilli yox, İndoneziya dilli məktəblər də fəaliyyət göstərməlidir:

"Biz müstəqil dövlətik və inkişafımız üçün bütün dünya ilə müəyyən əlaqələr qururuq. Yaxın və uzaq qonşularımızla, eləcə də bizdən çox uzaqda yaşayan portuqal indoneziya dili daşıyıcılarının da Azərbaycanda məktəbləri olmalıdır. Azərbaycan cəmiyyətinin üzvü seçimi özü etməlidir. Bu ən demokratik üsuldur. Hər kəs öz seçimini edib öz övladının istədiyi dilə yönəldərək və istədiyi mədəniyyətin içərisinə daxil edir. Fikrimcə bu heç müzakirə olunası mövzu deyil".

Kamal Abdulla hesab edir ki, insanın vətənpərvərliyi onun dil bilgisi ilə ölçülmür: "Mən Moskvada təhsil almışam. Görmüşəm ki, məktəbi rus dilində bitirən Azərbaycan övladları, Azərbaycanın mənafeyini heç də Azərbaycan məktəbini bitirənlərdən az müdafiə etmir. Bu məsələni unutmaq olmaz! İnsanın öz evində aldığı tərbiyə hər şeydən üstün və birincidir. Hər şeyi o müəyyənləşdirir. Hansı dildə təhsil alırıq alaq, azərbaycanlı kimi qalırıqsa, heç bir problem yoxdur. Biz bununla öz zəifliyimizi göstəririk ki, birdən rus dilində təhsil alsaq, azərbaycanlılıqdan çıxarıq. Əslində isə bu, belə deyil".

Xalq yazıçısı Kamal Abdulla
© Sputnik / Irade JELIL
Xalq yazıçısı Kamal Abdulla

Milli Məclisin Beynəlxalq münasibətlər və parlamentlərarası əlaqələr komitəsinin üzvü Asim Mollazadə isə Sputnik Azərbaycan-a açıqlamasında bildirib ki, hər bir azərbaycanlı bir neçə xarici dili bilməyə çalışmalıdır:

"Bu gün Azərbaycanda təkcə rusdilli yox, ingilis, fransız, alman və digər dilli məktəblərin olması çox yaxşı haldır. Biz çalışmalıyıq ki, xarici dilli məktəblərin ölkəmizdə sayı çox olsun. Bu gün Azərbaycanda rus icması yaşayır. Onlara öz dillərində təhsil almaq imkanı yaradılmalıdır. Qoy həm digər xarici dillərdə məktəblərin sayı çoxalsın, həm də Azərbaycanda yaşayan rus icması öz dilində təhsil ala bilsin. Mənim bu məsələyə yanaşmam belədir. Xarici dildə o qədər məlumat var ki, Azərbaycan gəncləri nə qədər mükəmməl səviyyədə xarici dilləri bilsələr, bizim üçün bir o qədər yaxşıdır".

Deputat deyir ki, Azərbaycan əsrlərdən bəri öz multikultural dəyərləri ilə seçilib: "Azərbaycanda hər bir xalqın mədəniyyətinə hörmət var. Multikultural dəyərlər bu gün də qorunur. Bunu rus dili ilə məhdudlaşdıraraq bizi məhdud dairəyə salırlar. Bu məsələni siyasiləşdirmək yanlışdır. Azərbaycan dünyaya əməkdaşlıq üçün açıqdır. Əməkdaşlıq üçün isə bir sıra xarici dilləri mükəmməl bilənlərə ehtiyac var. Biz hər bir qonşumuzla normal münasibət qurmaq, əməkdaşlıq etmək istəyirik. Çünki bölgəmizdə sülh və əmin-amanlığa ehtiyac var. Azərbaycanın hələ görəcəyi işlər çoxdur. Bu planda müharibə bizim planlarımız üçün təhlükədir".

Asim Mollazadə
Milli Məclisin Beynəlxalq münasibətlər və parlamentlərarası əlaqələr komitəsinin üzvü Asim Mollazadə

Milli Məclisin Elm və Təhsil Komitəsinin üzvü, deputat Kamilə Əliyeva Sputnik Azərbaycan-a açıqlamasında bildirib ki, mətbuatda, sosial şəbəkələrdə rus dilinin tədrisi ilə bağlı əsassız fikirlər söylənilməkdədir. Bəzi dairələr bu məsələni siyasiləşdirməyə çalışır və öz maraqlarını güdürlər. Hər bir Azərbaycan vətəndaşı öz dilini tarixini dərindən öyrənməli, ana dilini də mükəmməl bilməlidir.

"Rus dili Azərbaycanda əlavə xarici dil kimi tədris olunur. Burada mənə elə gəlir ki, təhlükəli bir məsələ yoxdur. Bu gün Azərbaycanda rus dili ilə yanaşı dövlət və özəl məktəblərdə, eləcə də universitetlərdə ingilis, fransız dili də tədris olunur. Bakıda Fransız məktəbi fəaliyyət göstərir. Elə orta məktəblər var ki, tədris ancaq ingilis dilində aparılır. Bakıda və bölgələrimizdə xarici dil kursları fəaliyyət göstərir. Deməli, xarici dillərə tələbat var. Mən bunu çox yaxşı hal hesab edirəm. Azərbaycan gənci daha savadlı, bilikli olmalıdır. Azərbaycan həqiqətlərini xarici ölkələrdə onların öz dilində çatdırmağı bacarmalıdır", - deyən Kəmalə Əliyeva hesab edir ki, ana dilini, vətənini sevmək insana genlə gəlir. Bu elə bir məsələdir ki, burada hansı dildə təhsil almaq əhəmiyyətli deyil.

Milli Məclisin Elm və Təhsil Komitəsinin üzvü, deputat Kamilə Əliyeva
"Azərbaycan xalqı elə bir xalqdır ki, öz dilinə, öz vətəninə bağlıdır. Bu əsrlər boyu belə olub. Azərbaycan xalqı bəşəriyyətə töhfə verəcək mədəniyyətə malikdir. Bu məsələ heç də siyasiləşdirilməməlidir. Ölkəmizdə digər xarici dillər kimi rus dili də tədris olunmaqdadır", - deyə deputat əlavə edib.

Təhsil məsələləri üzrə ekspert Kamran Əsədov mediaya açıqlamasında deyib ki, hazırda ölkədə Bakı da daxil olmaqla, 340 orta məktəbdə tədris rus dilində aparılır. "Bu, orta məktəblərin 7,6 faizində tədrisin rus dilində aparılması deməkdir. Ölkədə orta məktəblərin ümumi sayı 4472-dir. Tədrisin rus dilində aparıldığı 340 məktəbdə 90 min şagird rus dilində təhsil alır. Bu, ölkədə ümumən şagirdlərin 6,3 faizinin rus dilində təhsil alması deməkdir. Azərbaycanda şagirdlərin ümumi sayı 1 milyon 416 min nəfərdir. Həmin şagirdlərin 450 mindən çoxu rus dilini xarici dil kimi öyrənir ki, bu da şagirdlərin 32 faizi deməkdir. Ölkədə fəaliyyət göstərən ali təhsil müəssisələrində isə bütün ixtisasların 70 faizdən çoxu rus dilində də tədris olunur. Ali təhsil müəssisələrinin demək olar ki, bütün fakültələrində rus bölməsində təhsil alan tələbələr var".

© Sputnik / Irade JELIL
Təhsil məsələləri üzrə ekspert Kamran Əsədov

Ekspert bildirib ki, rus bölməsi üzrə şagirdlərin sayı Bakı şəhəri üzrə Təhsil İdarəsinin tabeliyində olan ümumi təhsil məktəblərində təhsil alan ümumi şagird sayının 17 faizini təşkil edir.

3406
Əlaqədar
Moskvadan Bakıya ilginc rus dili təklifi: Bizim cavabımızı gözləyirlər
Fərid Şəfiyev: Azərbaycanda rus məktəbləri məsələsi siyasiləşdirilir
Rus dili ilə bağlı problem şərəf məsələsidirmi - Cəmiyyətimiz iki cinaha bölünüb
Azər Həsrət: “Rusdilli media bizim üçün hər şeydən öndə gəlir”
Rusdilli əhalini təmsil edən təşkilatlar prezidentə müraciət ünvanlayıb
Məhkəmə zalı, arxiv şəkıli

Xalq artisti qonşusunu məhkəməyə verib

3
(Yenilənib 17:18 18.09.2020)
Yaşadığı binanın əsas divarlarının və kommunikasiya xətlərinin zədələnə biləcəyini görən aktrisa Səbail rayon məhkəməsinə müraciət edib

BAKI, 18 sentyabr — Sputnik. Akademik Milli Dram Teatrının aktrisası, Xalq artisti Zemfira Nərimanova qonşusunu məhkəməyə verib. Sputnik Azərbaycan-ın məlumatına görə, aktrisanın yaşadığı tarixi binanın konstruksiyasına zərər vura biləcək tikinti işləri aparılır. Binanın əsas divarlarının və kommunikasiya xətlərinin zədələnə biləcəyini görən aktrisa Səbail rayon məhkəməsinə müraciət edib. Məhkəmədə onu vəkil Aynur Abdullayeva təmsil edir. Xəbəri təsdiq edən Xalq artisti hazırda iş məhkəmədə olduğu üçün ətraflı məlumat vermək istəmədiyini bildirib.

Eyni zamanda, Zemfira xanım bu məhkəmə ilə bağlı yaxın günlərdə mətbuata geniş açıqlama verəcəyini qeyd edib.

3
Teqlər:
Zemfira Nərimanova, xalq artisti, məhkəmə, bina, aktrisa
Əlaqədar
Xalq artisti evini satışa çıxarıb
Azərbaycanda çəkilən yeni film tamaşaçıları ötən əsrə aparacaq
Afaq Bəşirqızının oğlu yeni direktor olan xanımından boşanır
Heydər Əliyev Fondu Xalq artistinin müalicəsini üzərinə götürüb
Xalq artisti toy təklifindən imtina edib
 Tofiq Hacıyev

Avropanın ən xarizmatik kişisi: "Pulu düşündüyün an sənət yox olur"

26
(Yenilənib 17:22 18.09.2020)
"İstəyim gündəmdə qalmaq deyil. İstəyim tarixdə qalmaqdır" deyən müğənninin ən böyük qorxusu unudulmaqdır

BAKI, 18 sentyabr — Sputnik. Tofiq Hacıyev - bir zamanlar hər kəsin sevə-sevə izlədiyi "İnterpapa" kinokomediyasından "Söhbət" kimi tanınan, hal-hazırda bəstəkar və müğənni kimi fəaliyyət göstərən gənc istedad...

Uşaqlıqdan incəsənətin əksər sahələrində özünü sınayan, çoxlarının "Mister Totu" kimi tanıdığı Tofiq Hacıyevlə həmsöhbət olduq. Özü barədə Sputnik Azərbaycan-a danışan sənətçinin dediyinə görə, onun "ulduz"u 2006-cı ildən parlamağa başlayıb. Amma həmin illərdə yaşı az olduğundan populyarlığının fərqində belə olmayıb: "Məktəblərarası "KVN" çempionatında 1-ci olmuşduq. Həmin çempionatın ən kiçik və ən sevilən aktyoru oldum. Çempionatdan sonra atamla əlaqə saxlayıblar. O dövrdə gündəm tez-tez dəyişmirdi. Filmlər az idi. Çox az sayda film çəkilirdi. Bir film çəkilirdi, uzun müddət danışılırdı. O dövrdə belə bir adət vardı: televizoru məhlədə qoyurdular, həmin televizora hamı baxırdı. Həmin filmin kirayə kasetləri satılırdı. O dövrün ulduzu idim. Hamı məni "Söhbət" kimi tanıyırdı. Maraqlı idi, amma mən bunun fərqində deyildim. Başa düşmürdüm bunları. O filmdə çox məşhur aktyorlar rol almışdılar. "İnterpapa" mənə təcrübə qazandırdı".

© Photo : Courtesy of Tofik Hadjiyev
Tofiq Hacıyev

"Məşhurluq, tanınmaq və s. - bunlar ötəri, gəldi-gedərdir. Yəni bu gün çox məşhur ola bilərsən, amma onu sabah itirə bilərsən. Amma təcrübə uzun illər sənə lazım olacaq, bu, sənin qazancındır. Peşəkar aktyorlarla çəkilirdim, bəzən 24 saatlıq çəkilişlər var idi. Bu, mənim üçün yenilik idi. Məktəbdə də icazə vermişdilər, amma uzun müddət məktəbdən uzaq düşmüşdüm", - deyə T.Hacıyev bildirdi.

Filmdən sonra aktyor olmağı düşünən qəhrəmanımız Mədəniyyət və İncəsənət Universitetinin rejissorluq fakültəsinə daxil olub. Rejissor olsa, aktyoru daha yaxşı anlayacağını düşünüb: "Niyə rejissorluq? Düşünürdüm ki, yaxşı rejissor olsam, aktyoru daha yaxşı anlayaram. Bundan başqa, rejissorluğun sirlərini də öyrənərəm. Biz oxuduğumuz illərdə rejissorluqla yanaşı, aktyorluğu da öyrədirdilər. Öncə Azərpaşa Nemətovun, sonra da Bəhram Osmanovun tələbəsi oldum".

Tələbəlik illərində ətrafındakılar onun qeyri-adi səsi olduğunu söyləyirlər. Amma o özü buna əmin olmur: "Mənə qəribə gəlirdi. "Yox nə danışırsınız, mən müğənni ola bilmərəm" deyirdim. Amma sonra Mübariz Tağıyevin yanına getdim. O da məni dəstəklədi, dedi, çox fərqli səsin var. Bundan sonra fikirləşirdim ki, vəssalam, səhnəyə çıxan kimi olursan ulduz".

© Photo : Courtesy of Tofik Hadjiyev
Tofiq Hacıyev

Tofiq səhnə həyatına ilk addımlarını hamıdan gizlin atmağı qərara alır. Amma... ""Avroviziya" mahnı müsabiqəsinin seçim turları var idi. Əvvəllər gizli idi. Mən seçim turuna qatıldığım ilə qədər qapalı idi. Dedim, evdən gizlin gedim, müsabiqənin seçim turunda iştirak edim. Nə olar, olar. Onsuz da heç kim bilməyəcək. Dedim, bəlkə, doğrudan da mən istedadlıyam? Necə deyərlər, sən saydığını say, gör fələk nə sayır... Mən getdiyim il seçim turu açıq imiş. Bu sənətdə naşı idim. Qeyri-peşəkar çıxış idi, amma insanlar maraqla qarşıladılar. Sevilsəm də bu, peşəkarlığa görə deyildi. Bəlkə də səhnədə komplekslərdən uzaq oluram, bəlkə də bu onların diqqətini cəlb etdi. Həmin çıxışla mən anladım ki, mən özümü inkişaf etdirməliyəm".

Hacıyev 2015-ci ildə ilk dəfə dünya arenasına çıxır. Bu, onun həyatında mühüm bir hadisəyə çevrilir: "2015-ci ildə "Addım" Gənclər təşkilatı tərəfindən Bolqarıstanda Azərbaycanı təmsil etməklə bağlı təklif aldım. "Ən yaxşı kişi səsi" və "Avropanın ən xarizmatik kişisi" seçildim. Müsabiqədə ən çox nominasiya alan şəxs qalib sayılırdı. Mən də qaliblər sırasında idim. Düzdür, bu status 1 il ərzində gedir, amma mənim üçün ömürlük oldu. Hər müsabiqədə, hər çıxışda anlayıram ki, yox, hələ də yaxşı deyiləm. Heç vaxt qane olmuram".

"Xarizmatik artisti həm münsiflər heyəti, həm də tamaşaçılar seçirdilər. Bolqarıstanın Varna şəhərində idi. Həmin yarış şəhərin ən gündəmdə olan yarışı idi. Yarış bitər-bitməz olursan şəhərin ulduzu. Hər kəs səni tanıyır. Həmin müddət mən də Varnanın ulduzu oldum. Ermənilər orada da öz əbədi-əzəli xislətlərindən əl çəkmədilər. Orada da mənə mane olmağa çalışırdılar. Mənim üçün ilk idi, təcrübəsiz idim. Baxırdın, sənin üçün təyin olunan 1 saatlıq məşq vaxtı sıxışdırılıb, yarım saatını əlindən alıblar. Amma mən buna köklənmədim, çıxışımı düşündüm. Ümumiyyətlə, insanları yola verə bilirəm, düşünürdüm ki, ona fokuslanmayım. Əks halda, həvəsdən düşərəm, bu da mənə zərərlidir", - deyə o əlavə edib.

Courtesy of Tofik Hadjiyev
Tofiq Hacıyev

Sənətə aktyor kimi gələn, sonradan rejissorluq və müğənniliklə məşğul olan Tofiq daha bir sahəyə baş vurur – özünü bəstəkar kimi sınayır: "Gənc müğənni Ruslan Alişana mahnı yazmışdım. Həmin müğənniyə yazdığım "Bağışla" adlı mahnım Tünzalə Ağayevanın diqqətini çəkib. Zəng gəldi ki, Tünzalə xanım bu mahnını duet oxumaq istəyir. Tünzalə xanım öz sənətinə qarşı hədsiz həssaslıqla yanaşır. Hər mahnını qəbul etmir. Bu, məndə özümə inam yaratdı".

Həmsöhbətimiz bəstələdiyi mahnılar sevilsə də, özünü bəstəkar adlandırmır: "Həvəskar mahnı müəllifi desəm, daha doğru olar. Çünki bəstəkar çox böyük səslənir, mən hələ bu sahə üzrə təhsil almamışam. Çox istəyərəm,  bu sahə üzrə təhsil alım. Amma hələ ki buna vaxtım yoxdur. Çünki təhsillə inkişaf etdirmək istədiyim karyeramın yolları düz gəlmir. Ona görə yalnız bir yolu seçməliyəm. İndi karyeram da inkişaf mərhələsindədir, bunu dayandırmaq olmaz. Zamanında Azərbaycanda, eləcə də dünyada xeyli sayda bu sahədə kənar insanlar olub ki, onlar qeyri-peşə sahibləri olublar, amma xeyli mahnıları var. Bunu tamaşaçı həll edir. Zamanında onların yazdıqları qəbul olunmasaydı, dinləyicilər qəbul etməsəydilər, onlar bu sahə üzrə davam etməzdilər. İnsan mübarizə aparmalıdır, inandığı şeylərin arxasınca getməlidir.

© Photo : Courtesy of Tofik Hadjiyev
Tofiq Hacıyev

Müsahibimiz əlavə edir ki, onun müəllifi olduğu mahnılar ölkə əhəmiyyətli layihələrdə səslənib: ""Səs Azərbaycan" layihəsinə qatıldım. Ondan sonra Formula-1 yarışında könüllülər üçün himn müsabiqəsi elan olundu. Bir neçə şəxs himn göndərdi. Onların içində çox məşhur olanlar da var idi. Mən də göndərdim. Həmin il mənim yazdığım himn Azərbaycan rəsmi Formula-1 könüllülər himni seçildi. Bu da mənim üçün artıq bir təsdiq idi. Məndə bir motivasiya yarandı ki, bəli, məndə alınır. Bir neçə təklif gəldi. Teatrlarda uşaq tamaşalarına musiqi tərtibatı üçün təkliflər gəldi. Bundan sonra sifarişli mahnılar yazdım. Bəstəkar olaraq növbəti mərhələm - Prezident İlham Əliyevin sərəncamı ilə "Cəfər Cabbarlının 120 illiyinə həsr olunmuş "Solğun çiçəklər" serialının sound-trekinin və serialda səslənən bütün musiqilərin müəllifi mən oldum".

"İstəyim gündəmdə qalmaq deyil. İstəyim tarixdə qalmaqdır" deyən qəhrəmanımızın ən böyük qorxusu unudulmaqdır: "Bunun üçün çalışıram, ömür vəfa etsə, Allah qismət eləsə, tarixdə qalmaq ən böyük arzumdur. Yaradıcılığım təkcə hansısa verilişə çıxmaq, şou-proqramda iştirak etmək üçün deyil. Təbii ki, onlar da lazımdır, günün nəbzini tutmaq gərəkdir. Amma arzum və məqsədim Azərbaycanın ən yaxşılarından olmaqdır. İstəyim Azərbaycandan kənarda, xaricdə ölkəmizi təmsil etməkdir. Əlimdə elə şanslar olub ki, bəlkə də başqası düşünmədən gedərdi. Bolqarıstandakı yarışdan sonra 5 ölkədən təklif gəldi. Amma mən istəyirəm, burada qalım, buranı inkişaf etdirim. Təbii ki, dünyaya çıxmaq istəyirəm, amma əvvəl buranı inkişaf etdirmək istəyirəm", - deyə bildirdi.

Hacıyev söyləyir ki, səhnədə onun üçün heç bir sərhəd yoxdur: "Tamaşaçının arxasınca getmək istəmirəm, onları öz arxamca aparmaq istəyirəm. İstəyirəm, mənim tərzimi, stilimi qəbul etsinlər. Həyatda utancaq, qapalı insanam. Amma səhnədə hər şeyi unuduram. İstənilən saç düzümü, istənilən geyimlə səhnəyə çıxa bilərəm. Necə ki, etmişəm. Saçımı bir dəfə saraltdım, bir dəfə də ağartdım. "King of the night" mahnısı üçün saçımı ağartdım. Mahnının klipi Kanadada çəkildi. Biz planlaşdırırdıq ki, bu, ingilis dilli mahnıdır və klip də Kanadada çəkilməlidir. Bununla dünya bazarına bir yoxlanış edək. Sözsüz ki, birdən-birə çıxa bilməzdik. Mahnı dünya musiqi telekanallarında bir çox ölkələrdə gün ərzində 2 dəfə yayımlanmaq hüququ qazandı. Bunun özü də böyük işdir. Həmin klipə görə saçımı ağartdım. O saçı rənglətdiyim vaxt nə çəkdim, bir Allah bilir. Yazıq xanımlar nələr çəkirlər".

© Photo : Courtesy of Tofik Hadjiyev
Tofiq Hacıyev

"Sənət baxımdan məni ən böyük dəstəkləyən ailəmdir" deyir müsahibimiz: "Atama desəm ki, işini at, gəl yanımda 24 saat dayan, bütün işini atıb mənim yanımda olar. Mən desəm ki, saçımı saraltmaq istəyirəm, o deyəcək, "bəlkə, qırmızı edəsən?" Hər addımımda yanımdadır. Bu barədə çox şanslıyam. Bəzən insan bunun fərqində olmur. Elə bilirsən ki, hamının ailəsi, atası belədir. Amma o qədər məşhurlar tanıyırıq ki, həyat hekayələrini danışanda deyirlər, "kaş ailəm mənim fikrimə hörmətlə yanaşardı".

Sənətçinin fikrincə, sənətə maddiyyata görə gələnlər uğur qazana bilməzlər: "Təəssüf ki, mənim üslubumda oxuyan insan yoxdur Azərbaycanda. Mən sağlam rəqabəti çox sevirəm. Gənc müğənniləri də izləyirəm. İçində inkişaf edəni də var, istedadlı olub yerində sayanları da. Əksəriyyəti bu sənətə pul qazanmaq üçün gəlir, pul xərcləmək istəmir. Pulu düşündüyün an sənət yox olur".

26
Teqlər:
müsahibə, mahnı, "Avroviziya" mahnı müsabiqəsi, xarizma, səs, Avropa, rejissor, Tofiq Hacıyev, müğənni
Əlaqədar
"Teatrı o qədər sevirdim, orada süpürgəçi olmağa hazır idim"
Tənqidə görə boğazından nə halva, nə də paxlava keçməyən xanım rejissor
Vəziyyət acınacaqlıdır: Pərdə qalxanda faciələrə güləcəyik?
Xalq yazıçısından sərt sözlər - "Hörmətli yerli cahillər"
Gənc rejissor: "Hətta yerli animasiya filmləri uşaqlarımız üçün təhlükəli ola bilər"