Milli Məclis

"Dövlət Himni haqqında" yeni qanun layihəsi birinci oxunuşda qəbul olunub

230
(Yenilənib 15:31 18.12.2018)
Qanun layihəsi 9 maddədən ibarətdir və Azərbaycan Dövlət Himninin ifa edilməsi, oxunması və dinlənilməsi qaydalarını müəyyən edir

BAKI, 18 dekabr - Sputnik. Milli Məclisin bu gün keçirilən plenar iclasında yeni hazırlanan "Azərbaycan Respublikasının Dövlət Himni haqqında" qanun layihəsi birinci oxunuşda müzakirəyə çıxarılıb. Sputnik Azərbaycan xəbər verir ki, qanun layihəsi 9 maddədən ibarətdir və Azərbaycan Dövlət Himninin ifa edilməsi, oxunması və dinlənilməsi qaydalarını müəyyən edir.

Qanun layihəsi müzakirələrdən sonra səsverməyə çıxarılaraq birinci oxunuşda qəbul edilib.

Qanun layihəsini təqdim edirik:

Maddə 1. Dövlət Himni

1.1. Azərbaycan Respublikası Konstitusiyasının 23-cü maddəsinin I hissəsinə əsasən, Dövlət Himni Azərbaycan Respublikasının dövlət rəmzlərindən biridir.

1.2. Dövlət Himninin musiqisi və mətni "Azərbaycan Respublikası Dövlət Himninin musiqisinin və mətninin təsdiq edilməsi haqqında" Azərbaycan Respublikasının Konstitusiya Qanunu ilə müəyyən edilir.

Maddə 2. Dövlət Himninə hörmət

Azərbaycan Respublikası Konstitusiyasının 75-ci maddəsinin I hissəsinə əsasən, hər bir vətəndaş (o cümlədən Azərbaycan Respublikasının ərazisində olan hər bir əcnəbi və vətəndaşlığı olmayan hər bir şəxs) Dövlət Himninəhörmət etməlidir.

Maddə 3. Dövlət Himni haqqında Azərbaycan Respublikasının qanunvericiliyi

Dövlət Himni haqqında Azərbaycan Respublikasının qanunvericiliyi Azərbaycan Respublikasının Konstitusiyasından, "Azərbaycan Respublikası Dövlət Himninin musiqisinin və mətninin təsdiq edilməsi haqqında" Azərbaycan Respublikasının Konstitusiya Qanunundan, Azərbaycan Respublikasının tərəfdar çıxdığı beynəlxalq müqavilələrdən, bu Qanundan və bu Qanuna uyğun hazırlanmış digər normativ hüquqi aktlardan ibarətdir.

Maddə 4. Dövlət Himni ilə bağlı dövlətin vəzifələri

4.1. Dövlət Himni ilə bağlı dövlətin vəzifələri aşağıdakılardır:

4.1.1. əhali arasında Dövlət Himninin mahiyyətinin və əhəmiyyətinin geniş təbliğ olunması üçün maarifləndirmə işləri aparmaq;

4.1.2. gənc nəslin Dövlət Himninə hörmət ruhunda tərbiyə edilməsi məqsədi ilə tədbirlər görmək;

Azərbaycan Respublikasının Prezidenti İlham Əliyev
© Official website of President of Azerbaijan Republic

4.1.3. Azərbaycan Respublikasının ərazisindən kənarda Dövlət Himninə qarşı hörmətsizliyin qarşısının alınması üçün beynəlxalq hüquq normalarına uyğun tədbir görmək;

4.1.4. bu Qanuna riayət olunmasına nəzarəti təmin etmək.

4.2. Dövlət Himninin mətni və musiqisi (partiturası) əlifba kitabının birinci səhifəsində dərc edilir və bütün təhsil müəssisələrində yeni dərs ilinin birinci dərsi Dövlət Himninin öyrənilməsinə həsr edilir.

Maddə 5. Dövlət Himninin ifa edildiyi hallar

5.1. Dövlət Himni aşağıdakı hallarda hökmən ifa edilir:

5.1.1. yeni seçilmiş Azərbaycan Respublikası Prezidentinin təntənəli andiçmə mərasimində (Azərbaycan Respublikasının Prezidenti and içdikdən sonra);

5.1.2. Azərbaycan Respublikasının Prezidenti Azərbaycan Respublikası Milli Məclisinin iclaslarına gəldiyi zaman;

5.1.3. Azərbaycan Respublikası Milli Məclisinin sessiyalarının başlanması və qurtarması zamanı;

5.1.4. dövlət bayramlarına həsr olunmuş təntənəli yığıncaqların və iclasların açılışı və bağlanışı zamanı;

5.1.5. hər gün Azərbaycan Respublikası milli televiziya və radio verilişlərinin əvvəlində və axırında;

5.1.6. Azərbaycan dövləti və xalqı üçün mühüm tarixi hadisələr olduqda;

5.1.7. Azərbaycanın görkəmli dövlət, siyasi, ictimai, elm, ədəbiyyat və ya incəsənət xadimlərinin və milli qəhrəmanların abidələrinin və ya lövhələrinin açılışı zamanı;

5.1.8. dövlət orqanları, yerli özünüidarə orqanları, qeyri-hökumət təşkilatları və ya siyasi partiyalar tərəfindən keçirilən mərasimlər və digər təntənəli tədbirlər zamanı (Azərbaycan Respublikasının Dövlət Bayrağı qaldırıldıqda və ya asıldıqda);

5.1.9. Azərbaycan Respublikasına rəsmi görüşə gələn xarici ölkələrin dövlət və hökumət başçılarının qarşılanması və yola salınması zamanı (müvafiq ölkənin Dövlət Himni ifa edildikdən sonra).

5.2. Azərbaycan Respublikasının qanunvericiliyində Dövlət Himninin ifa edildiyi digər hallar da müəyyən edilə bilər.

Maddə 6. Dövlət Himninin ifa edilməsinə, oxunmasına və dinlənilməsinə dair tələblər

6.1. Dövlət Himni orkestr, xor və ya orkestr-xor tərəfindən, yaxud başqa vokal üsulla və ya alətlər vasitəsilə, həmçinin səsyazma vasitəsindən istifadə etməklə bütün hallarda tam ifa edilir.

6.2. Azərbaycan Respublikasının vətəndaşları üçün Dövlət Himninin ifa edilməsinə, oxunmasına və dinlənilməsinə dair tələblər aşağıdakılardır:

6.2.1. Dövlət Himnini "Azərbaycan Respublikası Dövlət Himninin musiqisinin və mətninin təsdiq edilməsi haqqında" Azərbaycan Respublikasının Konstitusiya Qanununa əlavə olunmuş musiqisinə (partiturasına) uyğun olaraq bu maddənin 6.1-ci maddəsində müəyyən edilmiş qaydada ifa etmək;

6.2.2. Dövlət Himnini "Azərbaycan Respublikası Dövlət Himninin musiqisinin və mətninin təsdiq edilməsi haqqında" Azərbaycan Respublikasının Konstitusiya Qanununa əlavə olunmuş mətninə uyğun olaraq ayaq üstə və sona qədər oxumaq (oxumadıqda isə ayaq üstə və sona qədər dinləmək);

6.2.3. Dövlət Himni ifa edilən zaman Azərbaycan Respublikasının Dövlət Bayrağı qaldırılarsa (asılarsa) Dövlət Bayrağına tərəf baxmaq.

6.3. Azərbaycan Respublikasının ərazisində olan əcnəbi və ya vətəndaşlığı olmayan şəxs Dövlət Himni ifa edilən zaman Dövlət Himnini ayaq üstə və sona qədər dinləməli, Dövlət Himnini ifa etdikdə isə bu Qanunun 6.2.1-ci maddəsinin tələbinə əməl etməlidir.

Əhməd Cavad
© Photo : Public Domain

6.4. "Dövlət qulluğu haqqında" Azərbaycan Respublikası Qanununun 2.3-cü maddəsində göstərilən orqanlarda (Azərbaycan Respublikasının Mərkəzi Bankı istisna olmaqla) xidmət (qulluq) edən hərbi və ya xüsusi rütbəli şəxslərin Dövlət Himni ifa edilən zaman əsgəri salamlaşması qaydaları, o cümlədən Dövlət Himninin ifa edilməsi, oxunması və dinlənilməsi ilə bağlı qaydalar həmin orqanların hərbi nizamnamələri və ya müvafiq aktları ilə tənzimlənir.

6.5. Dövlət Himni respublika və ya beynəlxalq idman yarışlarında həmin yarışları keçirən idman təşkilatının mövcud təcrübəsi nəzərə alınmaqla ifa edilir.

Maddə 7. Dövlət Himni ilə əlaqədar məhdudiyyətlər

7.1. Dövlət Himninin musiqisinin musiqi əsərlərində istifadəsi qadağandır.

7.2. Dövlət Himni bu Qanunda nəzərdə tutulmuş qaydada ifa edilməli, dinlənilməli və oxunmalıdır.

Maddə 8. Bu Qanunun pozulmasına görə məsuliyyət

Bu Qanunun tələblərini pozan şəxslər Azərbaycan Respublikasının İnzibati Xətalar Məcəlləsinə uyğun olaraq, Dövlət Himninə qarşı hörmətsizlik edən şəxslər isə Azərbaycan Respublikasının Cinayət Məcəlləsinə uyğun olaraq məsuliyyət daşıyırlar.

Maddə 9. Yekun müddəalar

9.1. Bu Qanun qüvvəyə mindiyi gündən "Azərbaycan Respublikasının Dövlət himni haqqında" Azərbaycan Respublikasının Qanunu (Azərbaycan Respublikası Ali Sovetinin Məlumatı, 1992, № 11, maddə 384) və "Azərbaycan Respublikasının Dövlət himni haqqında Əsasnamənin təsdiq edilməsi barədə" Azərbaycan Respublikasının Qanunu (Azərbaycan Respublikası Ali Sovetinin Məlumatı, 1993, № 11, maddə 328; Azərbaycan Respublikasının Qanunvericilik Toplusu, 2000, № 6, maddə 380; 2004, № 4, maddə 199; 2017, № 5, maddə 687) ləğv edilir.

9.2. Dövlət Himninin xarici dövlətin ərazisində keçirilən təntənəli tədbirlər zamanı ifa edilməsi qaydasını müvafiq icra hakimiyyəti orqanının müəyyən etdiyi orqan (qurum) müəyyən edir.

230
Teqlər:
layihə, qanun, himn, dövlət
Əlaqədar
Himnin də cinsini dəyişdilər
Futbol üzrə dünya çempionatının himni təqdim edilib - VİDEO
Dövlət himnimizin müəllifi
İlham Əliyev himnimiz, bayrağımız və gerbimizlə bağlı Qanun imzaladı
Elektrik yarımstansiyası, arxiv şəkli

Azərbaycanda yeni istilik elektrik stansiyalarının tikilməsinə ehtiyac yaranıb

35
(Yenilənib 00:22 21.10.2020)
"Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

BAKI, 21 oktyabr — Sputnik. "Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

Sputnik Azərbaycan xəbər verir ki, bunu Energetika naziri Pərviz Şahbazov 20 oktyabr - Azərbaycan energetiklərinin peşə bayramı günü münasibətilə rəsmi mətbuatda dərc etdirdiyi məqalədə bildirib.

Onun sözlərinə görə, bu ilin 9 ayı ərzində elektrik enerjisinin istehsalı ötən ilin müvafiq dövrü ilə müqayisədə 0,8% azalaraq, 19,4 milyard kVt·st təşkil edib.

P.Şahbazov bildirib ki, qarşıdakı illərdə isə elektrik enerjisinə tələbat və istehsal həcmləri ilə bağlı dinamikada əhəmiyyətli dərəcədə artım gözlənilir:

"2025-ci ilə qədər ölkəmizdə elektrik enerjisinə tələbatın 25,5 milyard kVt·st-a qədər artacağı, ixrac da nəzərə alınmaqla elektrik enerjisi istehsalının isə ötən ilə nisbətən 15% artımla 30 milyard kVt·st-a çatacağı proqnozlaşdırılır. Bu istehsal həcmlərinin bir qismi ötən il istismara verilmiş, qoyuluş gücü 409 МVt olan "Şimal-2" elektrik stansiyası, bu il təməli qoyulmuş və 2022-ci ildə istifadəyə verilməsi planlaşdırılan 385 МVt gücündə "Qobu" elektrik stansiyası hesabına əldə ediləcək".

Nazirin fikrincə, həmçinin bu prosesdə "Azərenerji" ASC-nin istehsal güclərinin optimallaşdırılması və bərpası nəticəsində yenidən istismara cəlb edilən 1300 MVt imkan gücündən istifadə ediləcək: "Eyni zamanda, təhlillər göstərir ki, tələbatın tam qarşılanması üçün yeni istilik elektrik stansiyalarının tikilməsinə də ehtiyac var".

35
Su təhcizatı işləri, arxiv şəkli

Həm Azərbaycanın, həm İranın arzusu reallaşır - "Xudafərin" hidroqovşağından şad xəbər

70
(Yenilənib 23:50 20.10.2020)
Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir.

BAKI, 20 oktyabr — Sputnik. "Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir.

Sputnik Azərbaycan xəbər verir ki, bunu Energetika naziri Pərviz Şahbazov deyib.

O vurğulayıb ki, Azərbaycan, İran və Rusiyanın enerji sistemlərinin əlaqələndirilməsi üzrə proses davam edir: "Hər üç ölkənin müvafiq enerji şirkətlərinin razılığı ilə müəyyən edilmiş məsləhətçi şirkət tərəfindən layihənin texniki-iqtisadi əsaslandırılmasının hazırlanmasına başlanılıb. Eyni zamanda, "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş"dən irəli gələn vəzifələr də yerinə yetirilməkdədir.

"Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir. "Xudafərin" hidroqovşağı üzrə tikinti xərclərinin və dəymiş ziyanın hesablanması, habelə su elektrik stansiyalarının qurğu və avadanlıqlarının alınması və quraşdırılması məsələlərinə baxılır. 1,6 milyard kubmetrdən çox sututumuna malik bu hidroqovşaqlar və ümumi qoyuluş gücü 280 meqavat gücündə olan bu stansiyalar Araz çayının su və enerji ehtiyatlarından hər iki tərəfin birgə istifadəsinə imkanlar yaradır".

O bildirib ki, bu layihələr iqtisadi və strateji aspektdən ölkəmiz üçün çox əhəmiyyətlidir:

"Bu layihələrin reallaşması Azərbaycana illik 368 milyon kilovat/saat elektrik enerjisi istehsalı, mövcud 252 min hektar torpaq sahəsi üzrə suvarmanın yaxşılaşdırılması və 8 min hektar yeni əkin sahələrinin suvarılması imkanı yaradacaq. Azərbaycanın suverenliyi, ərazi bütövlüyü əsas götürülməklə 2016-cı ildə bu layihələr üzrə sazişin imzalanması işğal olunmuş ərazilərimizin geri qaytarılacağına böyük inamın ifadəsi idi".

"Bu günlərdə müzəffər Ordumuzun Cəbrayıl şəhəri və rayonunun bıra sıra kəndlərini azad etməsi də Azərbaycan Prezidentinin uzaqgörən siyasətini, həmin ərazilərin bərpası zamanı bu hidroqovşaqlar və stansiyaların istifadəsinə əvvəlcədən hazırlıqla bağlı strateji baxışlarını bir daha nümayiş etdirdi. Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir", - deyə nazir bildirib.

70
Əlaqədar
İranla Azərbaycan arasında tarixi "Xudafərin Sazişi" imzalandı
İlham Əliyev: Xudafərin körpüsünün üzərində Azərbaycan bayrağı qaldırıldı
Nazirlikdən sərhədlərimizi qoruyanlara Xudafərin naminə zirehli hədiyyə - FOTO
Xudafərin körpüsünün üzərində Azərbaycan bayrağı - VİDEO
Ermənistan Xudafərin istiqamətində əməliyyat keçirməyə qadir deyil - MN