Azər Qasımov

"Paşinyan kreslosunda oturmaq istəyirsə, Azərbaycanın daxili işlərinə burnunu soxmasın"

7453
(Yenilənib 14:24 17.09.2018)
Azərbaycan Prezidentinin mətbuat katibi: "İndiki şəraitdə Paşinyan rejiminin çökməsi Azərbaycana sərf eləmir"

BAKI, 17 sentyabr — Sputnik. "Ermənistanın baş naziri birinci dəfə deyil ki, Azərbaycanın daxili məsələləri ilə bağlı yersiz və cəfəng açıqlamalar verir. Əvvəla, bu, onu göstərir ki, Paşinyan siyasətdə təsadüfi bir fiqurdur, beynəlxalq münasibətlərdən xəbərsizdir. O, Azərbaycanın daxili işlərinə müntəzəm olaraq öz burnunu soxur".

Dövlət Təhlükəsizliyi Xidmətinin gənc əsgərlərinin andiçmə mərasimi
© Azərbaycan Prezidentinin Rəsmi internet səhifəsi

Sputnik Azərbaycan xəbər verir ki, Azərbaycan Prezidentinin mətbuat katibi Azər Qasımov Ermənistanın baş naziri Nikol Paşinyanın, prezident İlham Əliyevin oğlu Heydər Əliyevin Silahlı Qüvvələrdə xidmət keçməsi ilə bağlı cəfəng bəyanatını şərh edərkən belə deyib.

"Bildirmək istəyirik ki, əgər Azərbaycan Ermənistanın daxili işlərinə müdaxilə etsə, Paşinyan hakimiyyətinin ömrü uzun olmayacaq. Sarkisyan diktatura rejiminin çökməsi buna sübutdur. Sadəcə olaraq, indiki şəraitdə Paşinyan rejiminin çökməsi Azərbaycana sərf eləmir. Nə qədər çox Ermənistanda Paşinyanın diktaturası davam edərsə, bir o qədər də bu ölkənin problemləri çox olacaq" — deyə A.Qasımov bildirib.

Onun sözlərinə görə, Paşinyan xarici səfərlərində yaltaqlanmaqla, özünü alçaltmaqla, özünü qul kimi aparmaqla istədiyinə nail ola bilməz: "Paşinyanın yeni diktatura rejimi Ermənistanı uçuruma aparır. Məhz buna görə də Azərbaycan tərəfi Paşinyan hakimiyyətinin çökməsi üçün hələlik hər hansı bir addım atmır".

Mətbuat katibi qeyd edib ki, Paşinyanın növbəti sarsaq açıqlaması prezident İlham Əliyevin oğlu Heydər Əliyevin Silahlı Qüvvələrdə xidməti ilə bağlıdır: "Bildirmək istəyirik ki, Heydər Əliyev öz fiziki keyfiyyətlərinə və hazırlığına görə Azərbaycanın ən döyüş qabiliyyətli hərbi hissələrinin birinə hərbi xidmətə çağırılıb və sentyabrın 16-da keçirilən andiçmə mərasimi bu hərbi hissənin Azərbaycanın Silahlı Qüvvələrinin aparıcı hissələrinin biri olduğunu nümayiş etdirdi".

"Paşinyanın oğluna gəldikdə isə, bizdə olan məlumata görə, o, təmas xəttindən təxminən 50 km məsafədə Azərbaycanın işğal edilmiş Cəbrayıl rayonunda Ermənistanın hərbi hissələrinin birinə yazılıb və burada, əsasən, məişət məsələləri ilə məşğuldur. Bu hissəyə yazılmasına baxmayaraq, vaxtının çoxunu Xankəndidə keçirir. Ümumiyyətlə, Paşinyanın oğlunun hərbi xidməti ilə bağlı aparılan ucuz təbliğat növbəti populist və aşağı keyfiyyətli şoudan başqa bir şey deyil" — Qasımov vurğulayıb.

"Paşinyanın necə şoumen olması bizə yaxşı bəllidir. Azərbaycan Respublikası Prezidentinin Mətbuat xidmətinin əməkdaşları Brüsseldə iyulda keçirilmiş NATO Zirvə toplantısının kuluarlarında Paşinyanın cılız və yaltaq hərəkətlərini öz gözləri ilə görüblər. NATO-ya üzv dövlətlərin rəhbərlərinə yaxınlaşıb onlarla şəkil çəkdirməyi Paşinyan Ermənistanda bu liderlərlə keçirilmiş görüşlər kimi təqdim edib. Belə gülməli hərəkətlər Paşinyanın çox pis şoumen olduğunu göstərir. Sonda bir daha bildirmək istəyirik ki, əgər Paşinyan bundan sonra da öz kreslosunda oturmaq istəyirsə, ona Azərbaycanın daxili işlərinə burnunu soxmamasını məsləhət görürük" — deyə o, əlavə edib.

7453
Teqlər:
Heydər Əliyev, İlham Əliyev, Azərbaycan Prezidentinin mətbuat katibi Azər Qasımov, Nikol Paşinyan, Azərbaycan, baş nazir, Ermənistan
Əlaqədar
Paşinyanın Azərbaycan barədə daha bir yalanı ifşa olundu - RƏSMİ
Paşinyan hökuməti və ermənilərin AŞPA-dakı dəyişən hədəfləri
Paşinyan üçün "edam kötüyü" hazırlanır
ABŞ Tramp-Paşinyan görüşündən imtina etdi
Azərbaycan prezidenti: “Bütün məsuliyyət şəxsən Paşinyanın üzərinə düşəcək”