Bakıda yeni il tərtibatı

2017-ci ildə Azərbaycanı gözləyir?!

12035
2016-cı il Azərbaycan üçün çətin sınaqlar ili idi və təəssüf ki, bu sınaqlar 2017-ci ildə də davam edəcək.

BAKI, 30 dek-Sputnik. 2016-cı il öz uğurları və uğursuzluqları ilə insanların həyatında dərin iz buraxdı. Bu il həm də Azərbaycan üçün çətin sınaqlar ili idi və təəssüf ki, bu sınaqlar 2017-ci ildə də davam edəcək.

Yola saldığımız il Ermənistan tərəfindən işğal olunmuş Azərbaycan torpaqlarına qayıdış istiqamətində mühüm bir cəhdlə yadda qaldı. Bu, Azərbaycan ordusunun Lələtəpəni işğaldan azad etdiyi aprel döyüşləri idi. Azərbaycan prezidenti İlham Əliyev və hakimiyyət nümayəndələri Lələtəpə zəfərini çox yüksək qiymətləndirirlər. Çünki həmin hadisə artıq torpaqlarımızın işğaldan azad edilməyəcəyinə inanmağa başlayan azərbaycanlılar üçün gözəl motivasiya oldu.

İlin digər bir hadisəsi də 24-26 iyun tarixlərində Bakıda keçirilən Formula 1 Avropa-Qran Prisi idi. Bu, 2015-ci ildə keçirilmiş I Avropa Oyunlarından sonra Azərbaycanda keçirilən beynəlxalq əhəmiyyətli ən böyük idman tədbirlərindən biri idi. Formula 1-in keçirildiyi Bakı şəhər Halqası dünyanın nəzərlərini paytaxtımıza cəlb etmişdi. Və bu, həm də xarici turistlərin Azərbaycana axını üçün vəsilə oldu.

Bakı üçün geri sayım
© Sputnik / Kamilla Əliyeva

İlin digər idman hadisəsi də sentyabrda baş tutan 42-ci Şahmat Olimpiadası idi. Bu Azərbaycan tarixində rekord sayda — 176 ölkənin qeydiyyatdan keçdiyi idman hadisəsi idi. Bu hadisələr Azərbaycana xarici, xüsusilə rus və ərəb turistlərin axını ilə müşayiət olundu.

2016-cı ilin sentyabrında baş verən digər önəmli hadisə isə Konstitusiya dəyişiklikləri ilə bağlı Ümumxalq Səsverməsinin keçirilməsi idi. Konstitusiyada edilən başlıca dəyişikliklər vitse-prezidentlik institutunun yaradılması, prezidentlik müddətinin 7 ilə qaldırılması, deputatlıq yaşının 18-ə, prezidentlik yaşının isə 25-ə endirilməsi, prezidentə fövqəladə vəziyyət rejimini elan etmək səlahiyyətinin verilməsi ilə əlaqədar idi.

2015-ci ildə baş verən 2 kəskin devalvasiyanı 2016-cı ildə yumşaq devalvasiya (10%) izlədi. Nəticədə Azərbaycan manatının məzənnəsi dollara nisbətdə rekord səviyyədə aşağı düşdü. Azərbaycan manatın üzən məzənnə rejimindən tam üzən məzənnə rejiminə keçidi barədə qərar qəbul etdi. Azərbaycan manatının devalvasiyaya məruz qalmasına başlıca səbəb onun iqtisadiyyatının neft üzərində qurulması idi. Dünya bazarında neftin qiymətinin sürətlə aşağı düşməsi, milli valyutanı ağır vəziyyətə saldı. Yeri gəlmişkən, 2016-cı ildə dünya bazarında neftin qiymətlərinin ciddi surətdə aşağı düşməsi prosesi davam etdi ki, nəticədə Azərbaycan və bir sıra digər neft ölkələri neft hasilatını aşağı salmaq qərarına gəldilər.

Neft və maliyyə bazarındakı vəziyyət Azərbaycanın bank sektoruna da ciddi təlatümlər gətirdi. Bu il həm də çox sayda bankların bağlanması, iflası və başda Beynəlxalq Bankın sabiq prezidenti Cahangir Hacıyev olmaqla bankirlərin qalmaqallı məhkəmə işləri ilə yadda qaldı.

Bu il ölkənin maliyyə sektorunda yaranmış böhranla bağlı Maliyyə Bazarlarına Nəzarət Palatası yaradıldı. Bir sıra dövlət qurumlarına, hüquqi şəxslərə "Publik hüquqi şəxs" statusu verildi.
2015-ci ildə sabiq milli təhlükəsizlik naziri Eldar Mahmudovun vəzifədən çıxarılması ilə başlayan "MTN işi" adlı məhkəmə qalmaqalları da 2016-cı il Azərbaycanda baş verən top hadisələrdəndir.

Yeni il süfrəsi
© Sputnik / Elnur Salayev

2016-cı ilin şoku azərbaycanlılar üçün Tarif (qiymət) Şurasının 2016-cı il 28 noyabrda təbii qaz, elektrik enerjisi, soba mazutu, reaktiv mühərrik yanacağının satışı tariflərini qaldırması idi.

Dekabr ayı 2015-ci ildə olduğu kimi 2016-cı ildə də Azərbaycan neftçiləri və onların ailələri üçün faciələrlə yadda qalıb. Dekabrın 15-də "Azneft" İB-nin N.Nərimanov adına Neft-Qaz Çıxarma İdarəsinin Xəzər dənizindəki 3 saylı Neft Yığım Məntəqəsinin sağ və sol hissəsində yerləşən estakadanın dənizə uçması nəticəsində 10 neftçi itkin düşdü. Onlardan yalnız birinin cəsədi çıxarıldı, qalanların isə taleyindən xəbər yoxdur.

İlin sonunda president İlham Əliyev tərəfindən milli iqtisadiyyat və iqtisadiyyatın əsas sektorları üzrə Strateji Yol Xəritələri təsdiq edildi ki, bu da ölkənin sosial-qitisadi vəziyyətini yaxşılaşdırmağa doğru atlmış addımlardan biri sayılır.

Nəhayət, 2016-cı il Azərbaycanda Multikulturalizm ili elan olunmuşdu. Azərbaycan multikultural ölkə olduğunu isbat etmək üçün xeyli çaba sərf elədi, ölkədə və xaricdə ölkəmizin çoxmədəniyyətli dəyərlərinin təbliği istiqmətində ciddi addımlar atıldı.

Ən əsası isə 2016-cı ildə də Azərbaycanın bir nömrəli problem — Dağlıq Qarabağ və işğal olunmuş ərazilər problem həll olunmamış qaldı.

2016-cı il macəralarla dolu "meymun ili" idi.

Yeni başlayan 2017-ci il isə ay təqvimi ilə Xoruz, günəş təqvimi ilə Dəvə ili hesab olunur. Bu il Azərbaycan üçün son dərəcə çətin və məsuliyyətli bir il olacaq. Ölkənin həm sosial-iqtisadi, həm maliyyə, həm ictimai-siyasi həyatının qaynar proseslərlə izlənəcəyi proqnozlaşdırılır. Bu il Azərbaycanda İslam Həmrəyliyi Oyunları və Formula 1 yarışları olacaq. Ölkəyə turist axınının davam edəcəyi gözlənilir. Əgər neftin qiymətlərində azacıq artım müşahidə olunsa, ölkə vəziyyətdən çıxmağı bacaracaq.

Astroloqların iddiasına görə, Xoruz bu dəfə alovludur, ona görə də ulduzlar öz tərəfdaşlarının maraqlarını nəzərə alan aktiv və fəal adamların tərəfində duracaq. Böyük karvanın özündə gedən Dəvə isə böyük ideyalar uğrunda kiçik şeyləri qurban verə bilir. Xoruz da, Dəvə də kollektivcanlıdırlar, elə buna görə də o adamlar ki, tərfdaşları ilə yola gedə bilirlər və ya hansısa kollektivdə işləyirlər onların az da olsa, uğur qazanmaq şansları başqalarından çoxdur. Gələn il münasib təcrübəli, bilikli, bacarıqlı və maddi ehtiyatı olan adamlar üçün uğur gətirəcək. İl az məhsuldar olduğundan, kənd təsərrufatı sahəsində çalışan adamlar iqlim şəraitini nəzərə almalıdılar.

2017-ci il müasirləşmək və yeni istehsal sahələri yaratmaq üçün əlverişlidir. Bununla yanaşı reklam, şou-biznes və ticarət sahəsində müəyyən çətinliklər olacaq. İnsanlar qərar verərkən gərək ciddi götür-qoy eləsinlər.
Gələn il həm də dünyanın qlobal mahiyyətini dəyişdirən hadisələrin ildönümü kimi yadda qalacaq.

2017-ci il çətin il olacaq, amma ruhdan düşməyə dəyməz. Biz çətinliklərə sinə gərməyi, problemləri imkana çevirməyi bacarmalıyıq.

Odur ki, Sputnik Beynəlxalq İnformasiya Agentliyinin kollektivi Azərbaycan xalqını Yeni İl münasibətilə ürəkdən təbrik edir, 2017-ci ildə ona böyük uğurlar, xüsusilə sülh və əmin-amanlıq, torpaqlarının işğaldan azad edilməsini, ərazilərinin bütövləşməsini, qaçqın və məcburi köçkünlərinin öz yurd-yuvalarına qayıtmasını arzulayır!

Yeni İliniz Mübarək!

12035
Teqlər:
neft, Qarabağ, dollar, Avropa Oyunları, Azərbaycan, manatın məzənnəsi, İlham Əliyev, Azərbaycan IV İslam Həmrəyliyi Oyunları, Xəzər, devalvasiya, Lələtəpə, Formula1, yeni il, Xoruz ili
Əlaqədar
Dollar yeni il ərəfəsində sabit qaldı
Yeni il süfrəsi neçəyə başa gəlir
Yeni ildən etibarən cib telefonu qiymətlərində ciddi yüksəliş olacaq
Yeni il yarmarkaları bu ünvanlarda olacaq

Səfir İranın təlimləri, Ermənistana daşınan yüklər Seyid Həsən Amilinin təhdidi barədə

534
(Yenilənib 21:37 24.09.2021)
İranın Azərbaycandakı səfiri Seyid Abbas Musəvi sosial şəbəkədə həqiqətə uyğun olmayan məlumatların çox yayılmasına təəssüf edir.

BAKI, 24 sentyabr - Sputnik. İranın keçirdiyi təlimlərlə bağlı məsələ yanlış formada təqdim olunub.

Sputnik Azərbaycan xəbər verir ki, bunu İranın Azərbaycandakı səfiri Seyid Abbas Musəvi İran İslam İnqilabı Keşikçiləri Korpusunun (SEPAH) bu günlərdə Culfa-Aslanduz arasında, Azərbaycanla sərhəd boyunca hərbi təlimlərinin keçirilmə səbəbini izah edərkən deyib. 

Səfir qeyd edib ki, təlimlərlə bağlı məlumatı aylar öncə Azərbaycan tərəfinə bildirib və bu, planlı təlim olub:

"Bu təlimlər davamlı həyata keçirilir, bundan əvvəl Qərbi Azərbaycanda keçirilib. Hərbi gücümüz dostlarınızın xidmətindədir, dostlarımıza qarşı təhdid sayıla bilməz".

Musəvi Ərdəbil məscidinin imamı Seyid Həsən Amilinin Azərbaycanı təhdid edən moizəsi barədə deyib ki, "dövlətlərin mövqeyini rəsmi qurumların təmsilçiləri ifadə edir, digər şəxslər yox".

İran səfiri ölkənin "altılıq" (Azərbaycan-Türkiyə-İran-Rusiya-Gürcüstan-Ermənistan) formatına dəstək verdiyini də bildirib. Qeyd edib ki, "bu, bütün region ölkələrinin xeyrinədir". 

"Azərbaycanla İran arasında mehriban qonşuluq münasibətləri var. Üçüncü tərəflər, düşmənlər var ki, bu münasibətləri istəmirlər. Son dövrlər Hikmət Hacıyevlə iki görüş keçirmişəm, ikitərəfli münasibətləri ətraflı müzakirə etmişəm", - səfir deyib.

Onun sözlərinə görə, son görüşdə Hikmət Hacıyev Azərbaycan Prezidentinin İran Prezidentinə ismarıclarını çatdırıb:

"Bunlar dostyana, qardaşyana ismarıclar idi. Təəssüf ki, sosial şəbəkədə həqiqətə uyğun olmayan məlumatlar çox yayılır. Yuk maşınları məsələsini araşdırdıq. Məlum oldu ki, özəl şirkətlər bu addımı atıblar. Biz özəl şirkətlərə xəbərdarlıq etdik ki, Azərbaycanın ərazi bütövlüyünə hörmətlə yanaşsınlar.

Ermənistan qonşularımızdan biridir. Biz hər zaman separatçılığa qarşı olmuşuq. Bizim dövlət səviyyəsində həm daxili, həm xarici siyasətimizi Ali lider təyin edir. Ali lider həm də Ali Baş Komandan, həm də siyasi liderdir. Ali liderin bəyanatında Qarabağın Azərbaycanın ayrılmaz bir hissəsi olduğu vurğulanıb. Ancaq mən arxayınlıqla deyirəm ki, üçüncü tərəflər ikitərəfli münasibətlərə xələl gətirə bilməyəcək".

Həmçinin oxuyun:

* Allahşükür Paşazadə: "Ərdəbil kimi qədim, zəngin tarixə malik Azərbaycan şəhəri..."

* Gorus-Qafan yolu yenidən gündəmdə: İran səfiri Bakıda daha bir rəsmi ilə görüşdü

* Hikmət Hacıyev son üç gündə iki dəfə İran səfiri ilə görüşüb: Mövzu Gorus-Qafan yoludur?

534

Dünyada ilk: azərbaycanlı rəssam neştərlə şah əsərlər yaradır

274
(Yenilənib 18:37 24.09.2021)
Azərbaycanlı rəssam ağla gəlməyən alətlə - cərrah bıçağı ilə heyrətamiz rəsm əsərləri yaradır. Ətraflı - videomuzda.

Rəssamın iş texnikası bir növ qravürlərin hazırlanmasında istifadə olunan ağac üzərində naxış açma sənətini xatırladır. Ancaq əgər həmin sənət növündə ağac üzərində qabarıq siluet alınırdısa, Hüseyn Mirtəqavi birbaşa qara lövhə üzərində işləyir. Bu sənət onu yaradan müəllifdən rəsmi əvvəlcədən təsəvvür edə bilmək və ucu iti qələmlə işləmək bacarığı tələb edir. Çünki yalnız bircə ehtiyatsız hərəkət belə rəsmin korlanmasına gətirib çıxara bilər.
Hər şey 40 il bundan əvvəl başladı. Həmin vaxt Hüseyn öz şeirlərinə eskizlər və illüstrasiyalar çəkirdi. Onun faner üzərində ilk işi lirik məhəbbət mövzusuna həsr olunmuşdu. Əsərdə ürəklərini başlarının üzərində tutmuş gənc oğlanla qız və onların gələcək övladını təcəssüm etdirən çiçək təsvir olunmuşdu.
Daha sonra rəssam Sankt-Peterburqa işləməyə yollanır və öz yaradıcılığını orada davam etdirir. Bu şəhərdə Hüseyn peşəkar rəssamlarla tez-tez ünsiyyətdə olur və öz əl işləri ilə onları heyrətləndirirdi.

274
 Şuşa, arxiv şəkli

"Xudayar təsnifi" Şuşanı bürüdü: Şəhid anaları övladları müqəddəs torpaqlarda

0
(Yenilənib 21:56 24.09.2021)
Vətən müharibəsində adı əfsanəyə çevrilmiş gizirlərimizdən olan şəhid Xudayar Yusifzadənin anası Radə xanım, şəhid övladları və digər iştirakçılar Cıdır düzündə şəhidlərimizi yad ediblər.

BAKI, 24 sentyabr — Sputnik. Şuşa Şəhəri Dövlət Qoruğu İdarəsinin, Müdafiə Nazirliyinin dəstəyi və "Fire Land Production"ın təşkilatçılığı ilə Şuşada "Mənim atam qəhrəmandır" layihəsi çərçivəsində tədbir keçirilib.

Vətən müharibəsində adı əfsanəyə çevrilmiş gizirlərimizdən olan şəhid Xudayar Yusifzadənin anası Radə xanım, şəhid övladları və digər iştirakçılar Cıdır düzündə şəhidlərimizi yad ediblər.

Sputnik Azərbaycan-in məlumatına görə, şəhid övladları könüllülərlə birlikdə "Xudayar təsnifi"ni oxuyublar.

Azərbaycanın qəhrəman oğulları bu musiqinin sədaları ilə bir daha yad olunub.

Sonra Xudayar Yusifzadənin və digər şəhidlərin anaları övladlarının ruhu şad olsun deyə Şuşa dağlarına gülab səpib, dualar oxuyublar.

Qeyd edək ki, bu gün səhər saatlarında şəhid övladları hərbi polisin müşayiəti ilə onlara ayrılmış avtobuslarda Şuşa şəhərinə istiqamət alıblar. Şuşa şəhərinə "Zəfər marşı"nı ifa edərək daxil olan şəhid övladları tədbirə öz atalarının rəsmi, digər uşaqlar subay şəhidlərimizin rəsmləri həkk olunmuş geyimlərdə, şəhid anaları isə öz övladlarının rəsmi olan və "Mənim qəhrəmanım" yazılmış geyimlərdə qatılıblar.

Onları İsa Bulağında Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov və Şuşa Şəhəri Dövlət Qoruğu İdarəsinin İdarə Heyətinin sədri Məftun Abbasov qarşılayıb. Səhər yeməyi ərəfəsində doğum günü bu günə təsadüf edən Şəhid Ramid Hacıyevin övladı Əlini hər kəs təbrik edib. Aydın Kərimov şəhidin balaca balasını hədiyyə ilə sevindirərək təbrik edib və onun üçün Şuşada hazırlanmış tort kəsilib. Sonra tədbirə qonaq qismində qatılan Xalq artistləri Alim Qasımov və Zülfiyyə Xanbabayeva şəhid övladları, şəhid anaları üçün İsa Bulağında "Qarabağın maralı" mahnısını ifa ediblər.

Daha sonra tədbir iştirakçıları Yuxarı Gövhər Ağa məscidində olub. Orada general-mayor Polad Həşimovun anası Səmayə xanım başda olmaqla şəhid anaları namaz qılıb, Allaha dua ediblər. Sonra tədbirə qatılan Olimpiya çempionları Cıdır düzündə uşaqlar üçün güləş təlimi həyata keçiriblər. Yarışın sonunda həm əylənən, həm də yarışan uşaqların hər birini Olimpiya çempionları birinci yer medalı ilə təltif edib.

Tədbirin gedişində şəhid anaları Şuşa qalasının önündə şəhidlərin ruhuna ehsan bişirərək hazırda Şuşada xidmət edən əsgərlərə paylayıblar.

Daha sonra tədbirin rəsmi hissəsi baş tutub. Rəsmi hissədə aparıcı Nərgiz Cəlilova qəhrəman övladlarını, şəhid analarını, şəhid xanımlarını və tədbirə qatılan digər qonaqları salamladıqdan sonra hamını müzəffər ordumuzun şəhid qəhrəmanlarını bir dəqiqəlik sükutla yad etməyə çağırıb.

Sonra tədbirin ikinci aparıcısı Lalə Azərtaş general-mayor Polad Həşimovun anasını Səmayə xanımı çıxış üçün dəvət edib.

"Bu torpaqları gördükcə bir daha təsəvvür edirəm ki, burada necə ağır döyüşlər gedib, oğullarımız, şəhid balalarımız necə qəhrəmanlıqlar göstərib" - deyən şəhid anası övlad həsrətinə dözmək çətin olsa da, oğlunun zəfərimizin bir parçası olması ilə qürur hissi keçirdiyini deyib.

O, "Mənim atam qəhrəmandır" tədbirinin təşkilatçılarına dərin minnətdarlığını bildirərək Şuşaya ayaq basdıqları üçün xoşbəxt olduğunu vurğulayıb.

Tədbirdə çıxış edən Aydın Kərimov öz növbəsində şəhid analarına belə qəhrəman övladlar yetişdikləri üçün minnətdarlıq edərək qəhrəman oğullar var olduqca bu Vətənin də var olacağını deyib.

Tədbirdə çıxış edən "Fire Land Production"un rəhbəri Cəlal Qurbanov da öz növbəsində tədbirin əsas məqsədinin öz qanı ilə tarix yazan hər bir şəhidimizin uşaqdan böyüyə hər kəsin yaddaşına həkk olunması, daim qürurla xatırlanması olduğunu bildirib. Dövlət başçısı, Ali Baş Komandan İlham Əliyevin şəhid ailələrini hər zaman diqqətdə saxladığını vurğulayan C.Qurbanov bu tədbiri Şuşada keçirməyin onlar üçün şərəf olduğunu deyib.

Rəsmi hissənin sonunda Aydın Kərimov və Məftun Abbasov şəhid övladlarına "Xarıbülbül" döş nişanı hədiyyə ediblər.

Daha sonra qəhrəman şəhidlərimizin övladları əsgərlərimizlə birlikdə Şuşa qalasının önündə olan "Xarıbülbül" nişanını əsən güclü küləklər səbəbindən boşaldığı üçün torpağa bərkidiblər. Şəhid Ramiq Mikayılovun övladı Ağaseyid Mikayılov təşkilatçılardan ona verilən "Xarıbülbül" nişanını hədiyyə olaraq Prezident İlham Əliyevə və Mehriban Əliyevaya göndərmələrini xahiş edib.

"Mənim bir böyük arzum var. Mən istəyirəm ki, Novruz bayramında Cıdır düzündə İlham əmi və Mehriban xalayla birgə, şəhidlərimizin anaları və övladları ilə əl-ələ tutub tonqalın ətrafında yallı gedək" - deyə öz arzusunu dilə gətirən balaca Ağaseyid - "Mən də hər kəsin qarşısında söz verirəm ki, qəhrəman atam kimi mən də hər zaman Vətənimi qoruyacağam və sevəcəyəm", söyləyib.

Qeyd edək ki, tədbirə fəxri qonaq qismində qatılan Azərbaycanın Xalq artistləri Alim Qasımov, Zülfiyyə Xanbabayeva, Rasim Balayev, Nurəddin Mehdixanlı şəhid övladları, şəhid anaları ilə öz hisslərini bölüşüblər. Zülfiyyə Xanbabayeva Cıdır düzündə "Şuşanın dağları" mahnısını ifa edib.

Tədbirin sonunda Cıdır düzündə şəhid övladları sənət adamlarıyla birlikdə "Zəfər marşı"nı ifa edərək səmaya ağ göyərçinlər buraxıb, dünyaya "Müharibə olmasın! Uşaqlar atasız qalmasın!" mesajını veriblər.

0