Azərbaycan Pakistan arasında aviareys açılır

13
(Yenilənib 14:23 27.07.2015)
“Türk Hava Yolları” (THY) aviaşirkətinin təyyarələri avqustun 12-dən İslamabad-Bakı-İstanbul marşrutu üzrə uçuş həyata keçirəcək.

BAKI, 27 iyul – Sputnik. Azərbaycan və Pakistan arasında aviareys açılır. “Türk Hava Yolları” (THY) aviaşirkətinin təyyarələri avqustun 12-dən İslamabad-Bakı-İstanbul marşrutu üzrə uçuş həyata keçirəcək. 

Sputnik-in məlumatına görə, bu xəbəri Azərbaycanın Pakistandakı səfiri Daşqın Şikarov verib.

Əldə edilmiş üçtərəfli razılaşmaya əsasən, reys həftədə iki dəfə — bazar ertəsi və cümə günləri — THY-nin təyyarələri tərəfindən həyata keçiriləcək. Reysin biletlərinin qiyməti təqribən 600-650 dollar, uçuşun müddəti isə təxminən 3 saat olacaq.

Aviaresyin bərpa edilməsi barədə razılıq Pakistan Prezidenti Məmnun Hüseynin bu ilin martında Azərbaycana rəsmi səfəri zamanı əldə edilmişdi.

Səfir bildirib ki, Prezident M.Hüseyn Azərbaycan Prezidenti İlham Əliyevlə görüşündə bu təşəbbüslə çıxış edib: “Azərbaycan Prezidenti İlham Əliyev təşəbbüsü dəstəkləyib”.

Mövcud İstanbul-İslamabad aviareysinin Bakıyadək uzadılması məsələsi Türkiyənin Baş naziri Əhməd Davudoğlu ilə də müzakirə olunmuşdu.

Səfir Şikarov qeyd edib ki, aviareysin açılması iki ölkənin turizm sahəsində əməkdaşlığının inkişafına yardım edəcək: “Pakistan xalqı Azərbaycanı sevir. Birinci Avropa Oyunlarında pakistanlıların yerli telekanallarının yayımladığı veriliş və çarxlar vasitəsilə ölkəmizlə daha yaxından tanış olmaq imkanı var idi və çoxları Azərbaycana səfər etmək arzusunu bildirib. İndi onların belə imkanı yaranıb”.

Onun sözlərinə görə, aviareysin açılması iki ölkənin iqtisadi əlaqələrinə də xidmət edəcək.

13
Teqlər:
Azərbaycanın Pakistandakı səfiri Daşqın Şikarov, Azərbaycanın Pakistandakı səfiri, İslamabad-Bakı-İstanbul, Azərbaycan və Pakistan, THY, Türk Hava Yolları, Daşqın Şikarov, Məmnun Hüseyn, İslamabad, İstanbul, Bakı, Pakistan, Türkiyə, Azərbaycan
Erməni pasportu

Doğulduğu yer - Azərbaycan? Qarabağ ermənisinin pasportu Ermənistanda qalmaqal yaradıb

367
(Yenilənib 00:01 03.03.2021)
"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam" - Arsen Karapetyan.

BAKI, 2 mart - Sputnik. Qarabağda doğulan Ermənistan vətəndaşlarının yeni pasportlarında doğum yeri hissəsinə “Azərbaycan” yazılmağa başlanılıb.

Sputnik Ermənistan xəbər verir ki, bu barədə Yerevan Ağsaqqallar Şurasının “Mənim addımım” fraksiyasından olan keçmiş üzvü, memar Arsen Karapetyan öz Facebook hesabında yazıb. 

Karapetyan qeyd edib ki, dostu 80-ci illərin ortalarında Ağdərədə (Mardakertdə) anadan olub. Daha sonra isə Rusiyada yaşayıb və hazırda Ermənistan vətəndaşlığı almaq üçün müraciət edib. Onun pasportunda doğum yeri kimi isə Azərbaycan göstərilib.

"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam. Nədir bu?", - deyə Karapetyan sosial şəbəkədə yazıb.

Məsələ ilə bağlı Ermənistan polisinin pasport və viza şöbəsinin rəis müavini Məryəm Gevorkyan açıqlama verib.

"Bu vətəndaş Sovet İttifaqı dövründə anadan olub, Azərbaycan SSR-də anadan olub. Ermənistan Respublikasının pasportu səyahət sənədidir, beynəlxalq standartlara uyğundur, ona görə keçmiş SSRİ ölkələri üçün kodlar yoxdur. Başqa sözlə, əgər bir insan keçmiş SSRİ-nin bir ölkəsində anadan olubsa, onun doğulduğu yer pasporta ölkənin indiki adı ilə qeyd olunur, yəni Gürcüstan SSRİ deyil, Gürcüstan", - deyə Məryəm Gevorkyan bildirib.

O əlavə edib ki, "bu, köhnə təcrübədir". 

Qeyd edək ki, Arsen Karapetyan şərh bölümündə dostunun doğulduğu yerin "Azərbaycan SSR" kimi göstərildiyi Rusiya pasportunu da yerləşdirib. 

367
Bakıda ağac kəsimi, arxiv şəkli

Binəqədidə ağacları kəsən şirkət rəhbəri məhkəməyə verildi

4
(Yenilənib 22:48 02.03.2021)
Meşə fonduna daxil olmayan 8 ədəd, cəmi 17 min 100 manat dəyərində şam, sərv və şərq çinarı ağaclarının qanunsuz kəsilməsinə göstəriş verməsinə əsaslı şübhələr müəyyənləşib.

BAKI, 2 mart — Sputnik. Binəqədi rayonu, 18-ci Dağlıq küçəsi, ev 1 ünvanında "Mahal" MTK tərəfindən tikilən hündürmərtəbəli yaşayış binasının tikintisi üçün ayrılmış torpaq sahəsinin ətrafında mövcud olmuş ağacların köküstə qanunsuz kəsilməsi ilə bağlı Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsindən daxil olmuş material üzrə Binəqədi rayon prokurorluğunda araşdırma aparılıb.

Binəqədi rayon prokurorluğundan Sputnik Azərbaycan-a verilən məlumata görə, Rəhimov İlqar Vəliyəddin oğlunun "Mahal" MTK-nın sədrinin vəzifələrini icra etdiyi müddətdə qulluq mövqeyindən və vəzifə səlahiyyətlərindən sui-istifadə edərək, "Mahal" MTK üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq qeyd edilən ünvanda yerləşən hündürmərtəbəli yaşayış binasının tikintisi üçün ayrılmış torpaq sahəsinin ətrafında mövcud olmuş, meşə fonduna daxil olmayan 8 ədəd, cəmi 17 min 100 manat dəyərində şam, sərv və şərq çinarı ağaclarının qanunsuz kəsilməsinə göstəriş verməsinə əsaslı şübhələr müəyyələşib.

Faktla bağlı Binəqədi rayon prokurorluğunda Cinayət Məcəlləsinin 259.2.3 (şəxs tərəfindən öz qulluq mövqeyindən istifadə etməklə qanunsuz ağac kəsmə) 259.2.4-cü (qanunsuz ağac kəsmə külli miqdarda ziyan vurmaqla törədildikdə) və 308.1 (vəzifə səlahiyyətlərindən sui-istifadə) maddələri ilə cinayət işi başlanaraq istintaq aparılıb.

İş üzrə toplanmış sübutlar əsasında İlqar Rəhimov Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilmiş, cinayət işi üzrə istintaq yekunlaşdırılaraq baxılması üçün aidiyyəti üzrə Binəqədi rayon Məhkəməsinə göndərilib.

4